Kapisi hepero tu gazare asi varongwa 70 kwa zumbire Jesus ndi asi Jesus ga va nyokere morwa yeeyi va dilire kukara poMurarero gwaHompa. Posiruwo esi ga tulisire po Jesus Murarero gwaHompa, age kwa here tupu kukara novapostoli vendi.

Jesus kwa haferere varongwa vendi navenye 12 ntani 70. Movarongwa vendi navenye, Jesus kwa horowere mo vagara 12 yipo a va ture va kare vapositoli vendi. (Ruk. 6:12-16) Age kwa kere moGalireya apa ‘ga zigidire ava murongo navavali’ ntani ‘kwa va tumine va ka zuvhise kuhamena Uhompa waKarunga ntani nokuverura vantu.’ (Ruk. 9:1-6) Ano konyima apa Jesus ga kere moJudeya, ‘ta horowora hena varongwa 70 tava tumu va ze vavali-vavali.’ (Ruk. 9:51; 10:1) Yipo nye, Jesus kwa kere novarongwa komavango gokulisiga-siga ava nga va zuvhisa kuhamena mbudi zendi.

Vajuda ava va ya kere varongwa vaJesus ngava dana sipito soPaska nkenye mvhura nampo kumwe nomapata gawo. (Ex. 12:6-11, 17-20) Komeho Jesus va ka mu dipage, age kwa zire novapositoli vendi moJerusarema. Jesus kapi ga zigidire varongwa vendi navenye womoJudeya ntani moGalireya va ka ponge kumwe posipito soPaska. Yipo nye, Jesus kwa here kukara novapositoli vendi posiruwo oso. Age kwa va tanterere asi: “Ame kwa ndindira ni lye none Paska ezi komeho va ka hepeke nge.”​—Ruk. 22:15.

Apo pwa kere konda zongwa. Jesus kwa kere pepi nokufa ‘ngoNzwigona zaKarunga ezi azi gusa po nonzo douzuni.’ (Joh. 1:29) Age kwa ya fililire moJerusarema omu nga va gavere nonzambo kwaKarunga. Sipito soPaska kwa diworokesere Vaisraeli asi Jehova ga va mangwilire mo moEgipite. Nye nzambo ezi geve Jesus kwa mangurura vantu navenye kononzo nokonomfa. (1 Kol. 5:7, 8) Eyi ga rugene Jesus ya pulisilire vantu murongo nambali va ya hamene kombungakriste zompe ezi va totere po. (Efe. 2:20-22) Jerusarema sitata sokupongoka, kwa kara “nomamanya 12 getateko lyomamanya murongo nagavali,” ntani apo kwa tjanga po “madina 12 govapositoli 12 woNzwigona.” (Ehor. 21:10-14) Yosili, vapositoli wovalimburukwi va ya kere nositumbukira sosinene mokusikisa mo sitambo saKarunga. Yipo nye, kuvhura tu yi kwate egano asi morwasinke Jesus ga harerere kukara kumwe nawo posipito soPaska sokuhulilira ntani poMurarero gwaHompa ogu gwaya kweme ko.

Varongwa 70 ntani varongwa vamwe kapi va kere po poMurarero ogo. Nye nampili ngoso, varongwa navenye wovalimburukwi ngava ka gwanena mo mauwa moMurarero gwaHompa ogu ga tulisire po Jesus. Varongwa navenye ava va ya kere vagwavekwa mwaza siruwo, ngava hamena megwanekero lyoUhompa eli ga tanterere Jesus vapositoli vendi masiku gena.​—Ruk. 22:29, 30.