1, 2. (a) Yisinke nayi tu ninkisa tu lipure asi ‘siruwoke ndi dogoro ezuvake’? (b) Morwasinke sihonena sovakareli vaJehova womosiruwo sanare nasi tu korangedera?

“NANI siruwoke” ntani “dogoro ezuvake?” Ogo kuna kara mapuro va lipulire vaporofete Jesaya naHabakuku. (Jes. 6:11; Hab. 1:2) Apa hompa Ndafita ga tjenge Episarome 13, nage kwa pulire mapuro gokulifana yikando yine asi: “Dogoro siruwoke” ndi “dogoro ezuvake?” (Epis. 13:1, 2) Hompa gwetu Jesus Kristusa nage kwa pulire asi “siruwo sokuhura kupi?” apa ga uyungisire vantu ava va dilire kukara nepuro. (Mat. 17:17) Kapisi yi tu tetukise nsene tu lipura mapuro gokulifana poyiruwo yimwe.

² Yisinke nayi tu ninkisa tu lipure mapuro gangoso? Nampo ose kuna kututekura momudona. Ndi nampo kuna kulididimikira ukurupe ndi uvera ndi kuna kara nosinka morwa kuna kuparuka ‘poyiruwo yoyidigu.’ (2 Tim. 3:1) Ndi nampo nkareso zondona zovantu kuna kutuninkisa tu dompe mutjima. Yi kare asi konda musinke, ayo kutukorangeda pokudiva asi vakareli vaJehova  womosiruwo sanare nawo kwa lipulire mapuro gokulifana ntani age kapi ga va handukilire.

3. Yisinke ngayi tu vatera nsene kuna kuligwanekera nomaukaro goudigu?

³ Yisinke ngayi tu vatera nsene kuna kuligwanekera nomaukaro goudigu? Jakopo mumbyaJesus kwa tjenge asi: “Ano vakwetu, didimikeni nye dogoro noku nga wiza Hompa.” (Jak. 5:7) Natuvenye twa hepa kulididimika. Nye yisinke ya hamena mo mokulididimika?

4, 5. (a) Yisinke ya hamena mo mokulididimika? (b) Ngapi omu Jakopo ga hetakanesere ukaro wetu kelididimiko? (Tara efano pepenuno 3.)

⁴ MoBibeli, elididimiko kuna kara siyimwa sompepo zokupongoka. Ngovantu wokudira kusikilira mo kapi tatu vhuru kulididimikira maukaro goudigu pwa hana evatero lyaKarunga. Elididimiko kuna kara uhwi wokutunda kwaKarunga ntani kulididimika kuna kara nkedi ezi atu likida eharo lyetu kwendi ntani kovakwetetu. Nsene kapi tuna kulididimikira kapi ngatu lihara novakwetetu. (1 Kol. 13:4; Gar. 5:22, NW) Elididimiko kwa hamena mo kulikida nkareso ndi yikara yimwe yoSikriste. Pasihonena, kukara nomutaro gomuwa nampili momaukaro goudigu. (Koros 1:11; Jak 1:3, 4) Elididimiko kwa hamena mo hena kudira kutengwida kuwoko nampili kuna kutuhepeka ntani kukara noulimburukwi mwankenye udigu. Bibeli kutukorangeda asi twa hepa kukara nonkareso zokundindira. Sikara sokulididimika kwa si tumbura mwaJakopo 5:7, 8. (Resa.)

⁵ Morwasinke twa hepera kundindira mwaJehova a rugane ko yuma? Jakopo kwa hetakanesere ukaro wetu komunandima. Nampili ngomu munandima a rugana unene mokukuna mbuto, age kapi ga kara nononkondo dokupangera mukarompepo ndi a kulise yimeno. Kapi ta vhuru kugenderesa siruwo asi yi kure. Age ga hepa kuyitambura nokundindira nedidimiko asi ‘epya li yime nawa.’ Mokulifana pwa kara yininke yoyinzi eyi atu dili kugusa po ngomu tuna kundindira Jehova nga ka sikise mo matumbwidiro gendi. (Mar. 13:32, 33; Yirug. 1:7) Ngwendi munandima, nose twa hepa kundindira nedidimiko.

6. Yisinke natu lirongera ko kosihonena somuporofete Mika?

⁶ Maukaro aga atu ligwanekere nago naina kwa lifana naga gomomazuva gomuporofete Mika. Age kwa parukire posiruwo esi ga pangerere hompa gomudona Ahasi ano mosirongo kwa vhukire mo udona. Vantu kwa ya kere ‘vanandunge mokurugana udona.’ (Resa Mika 7:1-3.) Mika ga yi divire asi kapi ta vhuru kurundurura ukaro wina. Nye yisinke ga rugene? Age kwa tente asi: “Nye ame ngani tara kwaHOMPA, tani ndindire nehuguvaro Karunga ogu nga parura nge. Karunga gwange nga zuvha nge.” (Mika 7:7) Ngwendi Mika, nose twa hepa ‘kundindira nehuguvaro.’

7. Nkareso musinke natu kara nazo ngomu tuna kundindira Jehova nga sikise mo matumbwidiro gendi?

⁷ Nsene tu kara nepuro ngwendi lyaMika, ngatu kara neharo lyokundindira nehuguvaro mwaJehova. Ukaro wetu kapi wa lifana nomunadorongo ogu ana kundindira va ka mu dipage. Age kuna kundindira komusininiko. Nye ukaro wetu kwa lisiga nomunadorongo ogo. Ose kuna kundindira neharo morwa twa kara nehuguvaro asi Jehova nga ka sikisa mo matumbwidiro gendi nokukatupa mwenyo gwanarunye. Yipo nye, ose “kudidimika maudigu nagenye nehafo.” (Koros. 1:11, 12) Nye nsene tu sivana ngomu tuna kundindira asi Jehova kapi ana kurugana ko  yuma usimbu, ayo kapi ngayi mu hafesa.—Koros. 3:12, NW.

8. Nsene kuna kuteda kuhamena vagara novakadi wovalimburukwi womosiruwo sanare, yisinke twa hepa kukoneka?

⁸ Nsene tu teda ko koyihonena yovagara novakadi wovalimburukwi womosiruwo sanare ava va ndindilire nehuguvaro mwaJehova a sikise mo matumbwidiro gendi, nose ngatu vhura kundindira nehuguvaro. (Rom. 15:4) Pokuteda ko, ayo ya wapa hena kukoneka asi siruwo sokuhura kupi va hepere kundindira ntani morwasinke va ndindililire nehuguvaro ntani matungiko musinke va gwene.

9, 10. Siruwo sokuhura kupi Abirahamu naSara va hepere kundindira nehuguvaro mwaJehova?

⁹ Tu tareni sihonena saAbirahamu naSara. Awo kwa kere nedidimiko ntani nepuro yiyo ‘va pingire eyi ga va tumbwidilire Karunga.’ Matjangwa kwa tanta asi ‘Abirahamu ga mwene pokulididimika a ndindire,’ matumbwidiro aga ga mu tanterere Jehova asi nga mu tungika nokuvhukisa ruvharo rwendi. (Heb. 6:12, 15) Morwasinke Abirahamu ga heperere kulididimika? Morwa matumbwidiro gena kwa gusire siruwo mokusika mo. Egwanekero eli ga tulire po Jehova naAbirahamu kwa tamekere kusika mo moNisani 14 nomvhura 1 943 komeho zokuwiza Jesus pevhu. Ayo kwa horokere apa Abirahamu naSara kumwe nepata lyawo va tagurukire mukuro gwaEufurata va hwilire moSirongo sEtumbwidiro. Abirahamu ga hepere kundindira nomvhura 25 komeho va ka hampuruke munwendi Isaka nomvhura 1 918 komeho zokuwiza Jesus pevhu. Ntani ga hepere hena kundindira nomvhura 60 komeho va ya va hampuruke vatekuru vendi Esau naJakopo nomvhura 1 858 komeho zokuwiza Jesus pevhu.—Heb. 11:9.

 ¹⁰ Evango lyokuhura kupi ga pingire Abirahamu? Bibeli kutanta asi: “Nye Karunga kapi ga mu pere ko kavega nampili kokusika pompadi asi ka kare kendi, nye ga mu tumbwidilire asi nga mu pa sirongo age noruvharo rwendi, asi si kare sawo. Posiruwo oso Abirahamu age simpe kutupu muna.” (Yirug. 7:5) Kutunda apa Abirahamu ga tagurukire mukuro gwaEufurata, kwa pitire po nomvhura 430 ntani nye va pongaikire ruvharo rwendi oru rwa ya gusire Sirongo sEtumbwidiro.—Ex. 12:40-42; Gar. 3:17.

11. Morwasinke Abirahamu ga ndindilire nehuguvaro mwaJehova ntani matungiko musinke nga ka gwana morwa elididimikiro lyendi?

¹¹ Abirahamu kwa ndindilire nehuguvaro morwa ga kere nepuro mwaJehova. (Resa Vahebeli 11:8-12.) Abirahamu ga ndindilire noruhafo, nampili ngomu ga dilire kumona matumbwidiro nagenye kuna kusika mo. Gazadara ko tupu omu nga ka hafa apa ngava ka mu vhumbwira pevhu moparadisa. Ayo ngayi ka mu tetukisa mokukazuvha asi sihorokwa sendi nesi soruvharo rwendi kwa si tjanga moBibeli. * Gazara tupu omu ngayi ka mu hafesa mokukadiva omu ga hamenene mo mositambo saJehova kuhamena ruvharo rwetumbwidiro. Yosili age nga ka lizuvha asi elididimiko lyendi kwa kere nomulyo.

12, 13. Morwasinke Josefa ga heperere kulididimika ntani nkareso musinke ga kere nazo?

¹² Josefa mutekurwa Abirahamu gokononkokona, nage kwa ndindilire nelididimiko. Age kwa mu tekwire momudona. Pomuhowo, vakuru vendi kwa mu randesere koupika apa ga kere koyiha yonomvhura 17. Ano konyima tava ya mu rundire asi kwa kwaterere kononkondo mukadaPotifara, eyi ya mu twaredesere va mu ture modorongo. (Gen. 39:11-20; Epis. 105:17, 18) Nampili ngomu ga rugene youhunga, mevango lyokugwana matungiko, age kwa hepere. Nye konyima zonomvhura 13, makura tapa wiza marunduruko. Age kwa mu pwagesere mo modorongo nokumutura a kare mupangeli gwauvali gwaEgipite.—Gen. 41:14, 37-43; Yirug. 7:9, 10.

¹³ Udigu ou ga ligwanekerere nawo Josefa wa mu ninkisire a handuke ndi? Ga zumbanesere ehuguvaro lyendi mwaJehova ndi? Hawe. Yisinke ya vaterere Josefa a ndindire nedidimiko? Age kwa kere nepuro mwaJehova. Ntani ga mwene omu Jehova ga mu vaterere. Ayo kuyimonenena mononkango edi ga tanterere vakuru vendi asi: “Mwa ha tjira. Ame nyame nani gepevega lyaKarunga? Yosili one kwa rugana nge yoyidona, nye Karunga kwa yi gazarera momuwa pokurugana moomu yina kara ntaantani, asi a parure mbunga zonene.” (Gen. 50:19, 20) Yosili, Josefa ga yi divire asi edidimiko lyendi kwa kere nomulyo.

14, 15. (a) Yisinke ayi kutetukisa kuhamena elididimiko lyaNdafita? (b) Yisinke ya vaterere Ndafita a lididimike?

¹⁴ Hompa Ndafita nage kwa mu tekwire momudona. Nampili ngomu Jehova ga mu gwavekere apa ga kere simpe mudinkantu mokuyakara hompa goVaisraeli, Ndafita ga hepere kundindira nomvhura 15 komeho a ya kare hompa goVajuda. (2 Sam. 2:3, 4) Monomvhura dina ga ndindilire, hompa Sauru kwa here kudipaga Ndafita. * Ngoyitundwamo, Ndafita poyiruwo yimwe nga tjwayukire koyirongo nayopeke ndi kukavanda momakombombo. Nampili apa va dipagere Sauru moyita, Ndafita ga hepere kundindira nomvhura  ntambali komeho a ya tameke kupangera muhoko goVaisraeli.—2 Sam. 5:4, 5.

¹⁵ Morwasinke Ndafita ga ndindilire nedidimiko? Elimbururo kuligwana mEpisarome omu ga pulire yikando yine asi: “Dogoro siruwoke” ndi “dogoro ezuvake?” Age kwa tente asi: “Nye ame kuna huguvara ufenkenda woge, mutjima gwange ngagu hafera eparu lyoge. Ame kuna hara ni dimbire HOMPA, morwa ana ruganene nge uwa.” (Epis. 13:5, 6) Ndafita kwa huguvarere moufenkenda waJehova. Age kwa ndindilire Jehova a mu popere ntani ga gazadarere ko yininke yoyiwa eyi Jehova ga mu ruganene. Yosili, Ndafita ga lizuvhire asi elididimiko lyendi kwa kere nomulyo.

16, 17. Sihonena musinke Jehova naJesus va tura po kuhamena kundindira nelididimiko?

¹⁶ Kombinga zokulididimika, Jehova kapi a ndindire asi tu rugane yininke eyi a dili kurugana mwene. Age kwa tura po sihonena sosiwa sokulididimika. (Resa 2 Peturusa 3:9.) Jehova kwa ndindira nelididimiko nomvhura dononzi mokukakohonona po nompata domosikunino saEdeni. Age kuna “kundindira” siruwo esi ngava ka pongora edina lyendi. Eyi ngayi ka reta matungiko kowo va “huguvara” mwendi.—Jes. 30:18.

¹⁷ Jesus nage kuna kundindira. Apa ga kere pevhu age kwa limburukwire dogoro konomfa dendi, ano momvhura 33 yipo ga ka geve nzambo zosizoweseso kwaJehova. Nye simpe ga hepere kundindira dogoro mo-1914 a tameke kupangera. (Yirug. 2:33-35; Heb. 10:12, 13) Age simpe nga twikira kundindira dogoro kouhura woNomvhura Eyovi dEpangero lyendi apa nonkore dendi ngava ka di zonagwilira po. (1 Kol. 15:25) Age nga ndindira siruwo sosire sili, nye edidimiko lyendi ngali kara nomulyo.

18, 19. Yisinke ngayi tu vatera tu kare nonkareso zokundindira?

¹⁸ Yosili, natuvenye twa hepa kundindira nehuguvaro nokukara nonkareso zokulididimika. Yisinke nayi tu vatera? Twa hepa kuhundira kwaKarunga mpepo zokupongoka. Ntani tu diworokeni asi edidimiko kuna kara siyimwa sompepo zokupongoka. (Efe. 3:16; 6:18; 1 Tes. 5:17-19) Likwambera kwaJehova a ku vatere o lididimikire.

¹⁹ Diworoka hena eyi ya vaterere Abirahamu naJosefa ntani Ndafita va ndindire nedidimiko matumbwidiro gaJehova. Awo kwa kere nepuro nehuguvaro mwendi. Awo kapi va gazarere tupu yavene ndi eyi va here. Nsene tu gazadara ko mauwa aga va gwene, nose ngayi tu tumangeda tu kare nonkareso zokundindira.

20. Yisinke ngano natu tokomena kurugana?

²⁰ Nampili tu ligwanekere nomaudigu, ngano tu tokomene kukara nonkareso ‘zokundindira.’ Yimo, poyiruwo yimwe kuvhura tu lipure asi: “Nani siruwoke?” (Jes. 6:11) Nye mevatero lyompepo zokupongoka, ose kuvhura tu honene muporofete Jeremiya nokuuyunga asi: “HOMPA gelike yige na kara nendi, yipo nye na huguvarere mwendi.”—Malira. 3:21, 24.