MEGENDESO lyaKarunga, mupositoli Paurusa kwa tjenge yikara ntane eyi za retesa po mpepo zokupongoka. (Gar. 5:22, 23, NW) Age kwa tumbwire yikara oyo asi “yiyimwa yoMpepo.” * Oyo yiyo yikara twa hepa mokudwara “muntu gomupe.” (Koros. 3:10) Ngwendi moomu sitji asi yimi enyango lyewa nsene va sitekera nawa, muntu nage nga tunga po yikara yoyiwa nsene a hundira mpepo zokupongoka.—Epis. 1:1-3.

Sikara sokuhova esi ga tumbwire Paurusa kuna kara eharo. Ngapi omu sa kara nomulyo? Age kwa lizuvhire asi pwa hana eharo age “nayimwe si.” (1 Kol. 13:2) Yisinke eharo ntani ngapi natu li tunga po nokulilikida nkenye ezuva?

Nampili ngomu ya kara udigu kufaturura eyi ali tanta eharo, Bibeli za faturura omu ava li likida. Pasihonena, azo kwa tanta asi “eharo kwa kwata nedidimiko nounambili.” Ntani hena “alyo kuhafa kumwe nousili,” “kwa kwata nayinye: kupura nayinye, kuhuguvara nayinye, kudidimika nayinye.” Eharo kwa kwatera mo hena kufira nkenda vakwetu nokuvapakera mbili ntani nokutulisa po ukaume nawo. Nye nsene kapi twa kara neharo, ngatu kara vantu womfudu, wokulinenepeka, wonkareso zondona, wokuliharera uwa wokuhanduka usimbu ntani nkoko. Mevango lyokukara noyikara oyo, twa hepa kutunga po eharo eli ‘ali dili kupapara yeeyi lya hara lyene.’—1 Kol. 13:4-8.

“Karunga yige eharo.” Yiso sikara sendi sosinene po. (1 Joh. 4:8) Nayinye eyi a rugana kugava umbangi asi age eharo. Nkedi zimwe omu ga tu likida eharo lyenene kuna kara pokutuma Jesus a ya tu fire. Mupositoli Johannesa kwa tjenge asi: “Karunga omu ga tu horwera eharo lyendi, mokututumina Munwendi thi asi tu parukire mwendi. Eharo lyeli asi, kapisi asi nyose twa here Karunga, hawe, Karunga yige ga tu hara, yiyo ga tuma Munwendi a ya kare nzambo zokugusisa po nonzo detu.” (1 Joh. 4:9, 10) Morwa Karunga ga tu hara, nonzo detu kuvhura kudidongonona po nokukara nehuguvaro lyokukagwana mwenyo gwanarunye.

Jesus kwa likidire asi ga hara vantu apa ga sikisire mo mpango zoGuhwe. Paurusa kwa tjenge asi: “[Jesus] ta tanta asi: ‘Nyame ogu na wiza ni ya sikise mo mpango zoge.’ Morwa Jesus Kristusa kwa rugana eyi ga mu harerere Karunga, yiyo ga tu kuhura natuvenye kononzo pokugava rutu rwendi, ru kare nzambo pwarumwe tupu.” (Heb. 10:9, 10) Kwato muntu gokuvhura kulikida eharo lyangoso. Jesus kwa tente asi: “Nagumwe si ga kara neharo lyokupita lyogu a fire  vakwawo.” (Joh. 15:13) Ngovantu wokudira kusikilira mo, kuvhura tu honene eharo eli Jehova naJesus va tu likida ndi? Kuvhura. Tu tareni omu natu yi rugana.

Paurusa kwa tu korangeda asi: “One mu vana vaKarunga, age kwa mu hara. Omu heteke nye kukara moomu ga kara age! Omu lihara-hare, moomu ga tu here Kristusa.” (Efe. 5:1, 2) Ose ‘kulihara-hara’ apa atu likida sikara oso meparu lyetu. Ose kulikida sikara oso kupitira moyirugana. Johanesa kwa tjenge asi: “Vana vange, walye atu kareni neharo lyoolyo lyomononkango ndi lyomokana, atu kareni neharo lyosili, eli ali lihorora moyirugana youhunga nomousili.” (1 Joh. 3:18) Pasihonena, nsene tu hara Jehova novakwetetu, ngayi tu tumangeda tu zuvhise ‘mbudi zongwa zoUhompa.’ (Mat. 24:14; Ruk. 10:27) Ose hena kulihara-hara apa atu lididimikire nokuligusira po nokukara nombili. Bibeli kutukorangeda asi: “Omu dongwenene po vakweneni moomu ga mu dongwenena po Hompa.”—Koros. 3:13.

Kukara neharo kapi yina kutanta asi kupulisira tupu nkenye eyi. Pasihonena, vakurona vamwe kuvhura kupa munwawo nkenye eyi ana hara yipo a hageke kulira. Nye mukurona ogu ga hara sili munwendi, nga mu haverera. Mokulifana, Karunga eharo, nye age ‘kurungurura ndi kupukurura nkenye ogu ga hara.’ (Heb. 12:6) Nsene tu lihara-hara, ose ngatu lipukurura-pukurura. (Yis. 3:11, 12) Nampili ngoso, twa hepa kudiworoka asi natuvenye kulipuka ntani poyiruwo yimwe kapi atu likida eharo. Yipo nye, nkenye gumwe gwetu ga hepa kutura po marunduruko. Ngapi natu yi rugana? Tu tareni nonkedi ntatu.

Nkedi zokuhova, hundira mpepo zokupongoka ezi azi retesa po eharo. Jesus kwa tente asi Jehova ‘kugava mpepo zokupongoka kwava ava zi mu hundire!’ (Ruk. 11:13) Nsene tu hundira mpepo zokupongoka nokuzipulisira ‘zi tu pitisire,’ ngatu vhura kulikida eharo. (Gar. 5:16) Pasihonena, nsene o mukuronambunga kuvhura o hundire mpepo zokupongoka zi ku vatere o gave mapukururo gomoBibeli monkedi zeharo. Nsene o mukurona, kuvhura o hundire mpepo zokupongoka zi ku vatere o pukurure vana woge monkedi zeharo nye kapisi nehandu.

Nkedi zauvali, gazadara ko kosihonena saJesus omu nga likida eharo apa ngava mu swaura. (1 Pet. 2:21, 23) Ayo ya wapa kugazadara ko sihonena sendi unene po nsene kuna tu handukisa ndi kuna tu tekura momudona. Poyiruwo yangoso kuvhura tu lipura asi: ‘Ngano Jesus, yisinke na rugana?’ Epuro lyangoso lya vaterere munazinyetukadi Leigh a gazadare ko komeho a rugane yuma. Age kwa tanta asi: “Murugani mukwetu kwa tuminine vakwetu mbudi zondona zokuhamena nge ntani noyirugana eyi ngani rugana. Ayo kwa koresere nge unene. Nye na lipulire asi: ‘Ngapi nani honena Jesus moukaro wangesi?’ Konyima zokugazadara ko kweyi Jesus ngano ga rugene, tani tokora kuyisiga tupu. Konyima na ya dimbwilire asi murugani mukwetu kwa kere nouvera wounene ou wa mu reterere sinka sosinene. Ntani na ya dimbwilire hena asi eyi ga tjenge kapisi yimo ga yi harerere. Mokugazadara ko omu Jesus ga likidire eharo nampili ngomu ngava mu swaura, ya vaterere nge ni likide eharo komurugani mukwetu.” Yosili, nsene tu honena Jesus, ose ngatu likida eharo nkenye apa.

Nkedi zautatu, tunga po eharo lyokulizambera eli ali dimbwilisa Vakriste wousili. (Joh. 13:34, 35) Matjangwa kutukorongeda tu kare ‘nomagazaro’ ngwendi aga ga kere nago Jesus. Pokutunda meguru, age kwa  likidire ‘elinunupiko dogoro konomfa.’ (Fil. 2:5-8) Pokuhonena sikara saJesus sokulizambera, magazaro nomalizuvho getu ngaga kara ngwendi gendi ntani ngayi tu tumangeda tu dire kuligazara tupu nyamwetu. Mauwa musinke atu gwanene mo pokutunga po eharo?

Ose kugwana mauwa gomanzi apa atu likida eharo. Tu tareni yihonena yivali:

• UUMWE WOMBUNGA ZETU: Ose twa yidiva asi mwankenye mbungakriste ezi ngatu za mouzuni, vanavazinyetu ngava tu tambura morwa ose twa lihara-hara. Ayo kutuhafesa pokudiva asi ‘vapuli vakwetetu mouzuni naunye’ kwa tu hara. (1 Pet. 5:9) Yosili, eharo lyangoso kulimona tupu mokatji kovantu vaKarunga.

• MBILI: ‘Kulididimika-didimikira meharo’ kutuvatera tu kare ‘nombili novakwetetu.’ (Efe. 4:2, 3) Ose kulimonena mbili ezi apa atu kara komapongo ntani poyigongi. Mbili zangoso kapi to vhuru kuzigwana mouzuni ou woudona. (Epis. 119:165; Jes. 54:13) Apa atu kara nombili novakwetetu, ose kulikida eharo kwawo ano eyi kuhafesa Guhyetu gemeguru.—Epis. 133:1-3; Mat. 5:9.

Paurusa kwa tjenge asi: “Eharo kumuwapeka.” (1 Kol. 8:1) Ngapi omu eharo ali tu wapeke? MoVakolinte wokuhova egaununo 13, Paurusa kwa fatwilire omu eharo ali tu wapeke. Alyo kutuvatera tu kondjere uwa wovakwetetu. (1 Kol. 10:24; 13:5) Ntani morwa eharo kwa kara nombili, kudidimika ntani kapi ali papara eyi lya hara, alyo kuwapeka mapata nokureta uumwe mombungakriste.—Koros. 3:14.

Eharo lyetu lyokuhara Karunga yilyo lyomulyo po ntani kutuvatera tu hare vakwetu. Eharo olyo kureta vantu womomarudi nomonomuhoko va karere Jehova mouumwe noruhafo. (Sef. 3:9) Tu tokomeneni kulikida nkenye ezuva siyimwa esi sompepo zokupongoka.