MWAMANGUNDU 1932 monkurusitata zaMeksiko mbudi ezi va divisire unene vanambudi kwa kere zonorobota edi va tulire moyitaura. Nye konyima tava divisa mbudi zapeke. Awo kwa zire nomafano komahina gorutenda mokukandindira mugenda gokulikarera Joseph F. Rutherford ogu ga kere peresidende goWatch Tower Society. Nombangi daJehova domositata oso nado kwa ndindilire mokutambura Rutherford ogu ga wizire aya kare posigongi sawo somazuva gatatu.

Sifo The Golden Age kwa tente asi: “Sigongi esi kapi ngava si divara vantu, aso ngasi vatera mokutwara mbudi zongwa kovantu moMeksiko.” Yisinke ya ninkisire sigongi esi si kare nomulyo nampili ngomu pwa kere tupu vantu konyara 150?

Komeho zosigongi oso, usili kapi vau divire nawa moMeksiko. Kutundilira mo-1919 kwa ya tamekere kukara noyigongi, nye mwaza nomvhura sivaro sonombungakriste kwa gurumukire unene. Apa za paturukire mberewa zomutayi monkurusitata zaMeksiko mo-1929 kwa monekere asi azo ngazi reta po marunduruko. Nye pwa kere maudigu. Mbunga zaJehova kwa korangedere vazuvhisi wokukarerera va dire kulihameka monongesefa. Nye muzuvhisi gumwe gokukarerera ta hageke kuzuvhisa nokutulisa po mbunga zanyamwendi zovarongwa woBibeli. Mutareli gomberewa zomutayi kwa mu gusire mo mosirugana sendi morwa kulihameka moyirugana yoyidona. Yipo nye, vakareli vaJehova wovalimburukwi moMeksiko va hepere ekorangedo.

Apa munazinyetu Rutherford ga ya va dingwire, kwa ya va korangedere pokugava yiuyungwa yivali posigongi ntani yitano kwa yi pwagesere kupitira moradio. Aso kwa kere sikando sokuhova vanavazinyetu moMeksiko va ruganesere noradio mokuhanesa mbudi zongwa. Konyima zosigongi, mutareli gomupe gomberewa zomutayi kwa tulisire po mawapaiko kuhamena sirugana sokuzuvhisa. Mevatero lyaJehova, vazuvhisi va ya twikilire kuzuvhisa nomupampi.

Mvhura zokukwama ko, mosirongo oso kwa kere mo yigongi yivali, simwe mositata saVeracruz ano simwe monkurusitata zaMeksiko. Eliturumo lyawo moyirugana yokuzuvhisa kwa retere yitudwamo yoyiwa. Mo-1931 pwa kere vazuvhisi 82. Ano konyima zonomvhura murongo sivaro sovazuvhisi kwa ligwederere unene. Vanavazinyetu wokusika 1 000 kwa wizire kosigongi esi sa kere monkurusitata zaMeksiko mo-1941.

Momvhura 1943, Nombangi daJehova kwa ruganesere mapurakate mokuzigida vantu kosigongi sosiparatjangwa “Emanguruko lyonomuhoko” esi sa karere moyitata 12 yomoMeksiko. * Awo kwa dwere mapurakate limwe komeho ano limwe konyima. Ozo yizo nkedi zokuzuvhisa va ruganesa Nombangi daJehova kutundilira mo-1936.

 Sifo La Nación kwa tente kuhamena omu ya tompokere pokuruganesa mapurakate mokuzuvhisa monkurusitata zaMeksiko asi: “Ezuva lyokuhova lyosigongi, Nombangi kwa di korangedere mokuzigida vantu kosigongi oso. Ano ezuva lyokukwama ko vantu kapi va ya gwanekere mo mevango.” Ayo kapi ya hafesere ngereka zaKatolika, makura yipo za rwanesere Nombangi daJehova. Nampili ngomu vanavazinyetu va pitire momaudigu ogo, awo kwa twikilire kuzuvhisa moyitarata nouradi. Sifo La Nación kwa tente hena asi: “Vantu navenye womositata va mwene omu vagara novakadi va zuvhisire nomapurakate.” Mosifo oso kwa tulire mo efano lyovanavazinyetu moyitarata yomonkurusitata zaMeksiko. Ano konhi zefano kwa tjenge ko nonkango edi asi: “Kwa gogomokerere moyitarata.”

Monomvhura dina, sinzi soNombangi daJehova da hepere kutura po malizambero gomanene mokuza koyigongi moMeksiko. Wovanzi ngava tundu konomukunda dokoure oku kwa dilire kukara yitaura ndi mahina gorutenda. Mbungakriste zimwe kwa tjenge asi: “Mahina gorutenda kapi ngaga ya siki ko kwetu.” Eyi yiyo vanavazinyetu ngava ruganesere yindongi ndi kugenda mazuva gongandi va ka sike komahina gorutenda aga ngaga va twara koyigongi.

Sinzi soNombangi daJehova kwa kere woruhepo ntani kapi ngava vhuru kulifutira pokuza koyigongi. Apa ngava ka sika, vapuli vakwawo ngava va tambura momambo gawo. Vamwe ngava rara moYinyanga yoUhompa. Posiruwo simwe, vanavazinyetu wokusika konyara 90 kwa ka rere koBeteli pomapakote omu mwa kere nobuke. Yearbook kwa tente asi vanavazinyetu kwa kere pandwire morwa pomapokote apa va rere kwa kere “nombete donongwa kupitakana kurara posamende.”

Vanavazinyetu owo va yi dimbwilire asi kuponga kumwe novapuli vakwawo kwa kere nomulyo kupitakana malizambero aga va tulire po. Naina pana kara vazuvhisi wokusika konyara emiliyona moMeksiko ntani awo simpe kwa kara nonkareso zorupandu. * Mo-1949, Beteli zomoMeksiko kwa geve erapoto kuhamena vanavazinyetu asi: “Maukaro nagenye aga va pita kapi gava kondera mokukarera Jehova. Ano nkenye sigongi kwa va vatera va hafere kukara kumwe novapuli vakwawo ntani awo ngava lipura nkenye apa asi: Siruwoke ngatu kara hena nosigongi?” Vanavazinyetu naina kulipura epuro lyokulifana.—Kuna tundu moupungwiro wetu moAmerika.