SINZI SOVADINKANTU womoBeteli ngava zigida nge asi “tate,” “tamwa.” Ngomukurupe gonomvhura 89, ame kuyihafera. Ame kuyitara ngetungiko lyokutunda kwaJehova kweyi na mu karera mosirugana sosiruwo nasinye nomvhura 72. Eyi na limonena mosirugana saKarunga, kuvatera nge ni korangede vadinkantu asi, ‘ngo gwana mfeto’ nsene kapi ono kusigilira mawoko goge ga mye.—2 Hist. 15:7.

Vakondi vange kwa dirukilire koKanada va tunde koUkraine. Awo kwa ka tungire modoropa zaRossburn momukunda gwaManitoba. Ose kwa tu reta vamati 8 novakadona 8 ame gwau-14, nye pezimo lyetu pwatomapange. Otate kwa here Bibeli ntani ngava zi tu resere nkenye Sondaha kongurangura, nye ngava tara maukarelikarunga asi kwa hara tupu yimaliwa ntani ngava lipura asi, “Yilye nga futu Jesus kosirugana sendi sokuudisa nokuronga?”

Vakuru vange ntazimwe novamumbya vange vavali kwa tambwire usili. Mukurwange Rose kwa rugene uzuvhisi wokukarerera dogoro konomfa dendi. Komeho a ka fe, age kwa korangedere navenye va twikire kulironga Bibeli pokutanta asi, “Nina hara ngani ka mu mone mouzuni woupe.” Pomuhowo mukurwange Ted nga udisa kuhamena mundiro gwanarunye. Nkenye Sondaha kongurangura nga udisa koradio nokutugumukira vapurakeni vendi asi vananzo ngava ka pya momundiro gwanarunye. Nye konyima, ga ya kere mukareli gwaJehova goupampi.

Ezuva limwe MwaPembagona 1944, apa na ka tundire kosure tani ya gwana mbapira zosiparatjangwa The Coming World Regeneration * positafura mokombisa zetu. Tani resa epenuno lyokuhova, eyi na resere kwa hafesere nge makura tani twikire kuresa. Apa na mene kuziresa nazinye, ya tumangedere nge ni karere Jehova ngwendi Jesus.

Yilye ga tulire mbapira zina positafura setu? Mukurwange Steve kwa tente asi: “Vagara vavali vana kurandesa nombapira yipo vana wiza pembo lyetu. Yiyo nina randa ko ozo, morwa azo kuna kosa tupu nosenda ntano.” Vagara owo kwa ka tengwilire ko moSondaha zokukwama ko. Awo kwa tu tanterere asi awo vamwe woNombangi daJehova ntani asi awo kuruganesa Bibeli mokulimburura  mapuro aga ava pura vantu. Ose kwa yi haferere morwa vakondi vetu kwa tu ronga tu hare Nonkango daKarunga kutunda unona. Nombangi dina kwa tu tanterere hena asi ntaantani ngava kare nosigongi moWinnipeg, mositata omu ga tungire mukurwange Elsie. Ame kwa tokwere kuza kosigongi oso.

Ame kwa singire mbasikora zange ure wonokilometa 320 ni ze koWinnipeg, nye tani kara tanko modoropa zaKelwood omu da kere Nombangi dina da ya tu dingwire. Ame ngani zi komapongo apa na kere modoropa ozo ntani na ya divire asi yisinke mbungakriste. Na ya dimbwilire hena asi nkenye muntu ga hepa kuudisa tunda embo zende embo ngwendi Jesus.

MoWinnipeg tani ka ligwana namukurwange Jack ogu ga tundire korwamuzogo gwaOntario a wize kosigongi. Mezuva lyokuhova lyosigongi, munazinyetu gumwe kwa divisire asi tapa kara ekuho. Yipo twa tokwere naJack kugwana ekuho posigongi oso. Ose kwa tokomene kukara vazuvhisi wokukarerera konyima zekuho. Jack kwa ya kere muzuvhisi gokukarerera konyima tupu zosigongi. Ame opo nomvhura 16 ntani na hepere kutengura kosure, nye mvhura ezi za kweme ko yipo na tamekere uzuvhisi wokukarerera.

Ame kwa tamekere sirugana souzuvhisi wokukarerera naStan Nicolson modoropa zaSouris momukunda gwaManitoba. Na ya dimbwilire asi uzuvhisi wokukarerera kapisi ureru. Yimaliwa yetu kwa sesupire, nye simpe twa twikilire kuzuvhisa. Ezuva limwe apa twa mene kuzuvhisa kwa tu kwete nzara zonene. Ya tu tetukisire apa twa ka gwene nsako zonondya pevero lyonzugo zetu. Dogoro naina eli kapi tuna diva asi yilye ga zi tulire po. Ngurova ozo ose kwa lire ngwendi vahompa. Ee etungiko musi kouwa mokudira kusigilira mawoko getu ga mye! Kouhura wokwedi oko siviha sange kwa ligwederere kupitakana omu na kere nare.

Konyima zomakwedi gongandi tava tu tumu kodoropa zaGilbert Plains za likara ure wonokilometa 240 namuzogo gwaSouris. Momazuva ogo, mwankenye mbungakriste kwa kere mo karata ezi nga zi likida novili edi ngava rugana vanavazinyetu mokuzuvhisa. Kwedi kumwe apa yirugana yokuzuvhisa ya tengwire monyima, yipo na geve siuyungwa mokukorangeda vanavazinyetu va liture mo. Konyima zepongo, muzuvhisi gokukarerera gomukurupe ogu ga kwere mugara gomuhapuli, kwa wizilire nge age kuna kulira asi: “Kani hetekerere ko nye sikando esi kapi kayi tompokere nge.” Name yipo na lilire makura tani hundire egusiropo.

Na ya dimbwilire asi nampili vanavazinyetu wovadinkantu ava vana kara simpe nononkondo nawo kuvhura kutura mapuko aga ava ya livere konyima. Nye tani ya dimburura hena asi mevango lyokusigilira mawoko ga mye, ya kara nomulyo kulirongera ko kepuko nokutwikira komeho. Ano yirugana yoyiwa ngatu yi gwanena mfeto.

Apa na kere nonomvhura 21 naya gwene mpito zokuza koSikora zaGiliyata ezi za ya pwire mwaMurongankuru 1950. Sinzi sava na ka kere nawo kosikora ozo kwa va tumine komukunda gwaQuebec omu ngava uyunga Rufransa moKanada. Momukunda ogo, Nombangi kwa di rwanesere. Makura tava ya tumu nge kodoropa zaVal-d’Or omu mwa kara mina ezi ava hambura ngorodo. Ezuva limwe kambunga ketu kwa ka zuvhisilire pepi nomukunda gwaVal-Senneville. Mupitisili gomomukunda ogo kwa uyungire asi tava tu tengeke nsene kapi tuna kutunda mo usimbu. Yipo na zire kompanguro ni ka mu rapote. Mupitisili ogo kwa mu futisire. *

Sihorokwa oso nayimwe hena yokulifana kwa kere ruha ‘romarwaneso gomoQuebec.’ Mukunda gwaQuebec kwa kere mepangero lyoNgereka zaKatolika ure wonomvhura 300. Vampitisili woVakatolika novanapolitika kwa rwanesere Nombangi daJehova. Kapi ya kere ureru ntani ose vasesu tupu twa kere, nye kapi twa sigilire mawoko getu ga mye. Vantu wonomutjima donongwa moQuebec  kwa purakenene. Na kere nompito zokurugana malirongo goBibeli navamwe ava va ya tambwire usili. Murongwa gwange gumwe kwa tundilire mepata lyovantu murongo. Epata nalinye kwa ya tamekere kukarera Jehova. Yirugana yawo youpampi kwa ninkisire wopeke va sige ngereka zawo zaKatolika. Ose kwa twikilire kuzuvhisa, ano konyima tatu ya fundu marwaneso ogo.

Momvhura 1956 yipo va tumine nge koHaiti. Sinzi sovatumwa wovape mosirongo sina kwa va digoperere kulironga Rufransa, nye vantu vamo ngava purakene. Mutumwa gumwe Stanley Boggus kwa tente asi, “Ose kwa hefe pokumona omu vantu vana kututambura nokutupurakena.” Pomuhowo ayo kwa kere ureru morwa na lirongere Rufransa moQuebec. Nye, konyima twa ya dimbwilire asi sinzi sovanavazinyetu ngava uyunga Rucreole. Yipo nye, mokuninka asi yi tu tompoke ngovatumwa, twa hepere kulironga eraka olyo. Yipo twa lirongere, ano konyima twa ya gwene mfeto.

Mokuvatera vanavazinyetu momunene, twa gwene epulisiro koMbungagendesi mokutoroka Ruhungu noyimbapiratjangwa yapeke moRucreole. Sivaro sava ngava zi komapongo kwa ya ligwederere. Mo-1950 sivaro sovazuvhisi kwa kere 99, ano koyiha yo-1960 sivaro sovazuvhisi kwa ya pitakanene po-800. Posiruwo oso yipo va tumine nge ni ka rugane koBeteli. Mo-1961 na ka haferere situmbukira sokupitisira Sikora zoYirugana yoUhompa. Ose kwa dewire vatareli wonombunga 40 ntani vazuvhisi wosiruwo nasinye. Kosigongi esi sa kere mwaMurongagona 1962, yipo twa korangedere vanavazinyetu wovagara va tamunune sirugana sawo sokuzuvhisa ntani vamwe kwa va horowere va kare vazuvhisi wosiruwo nasinye. Kapi ya kere ureru morwa marwaneso kwa vhukire.

Mo 23 Murongagona 1962, konyima tupu zosigongi, kwa tu kwete nomutumwa Andrew D’Amico koMberewa zomutayi, ano yimbapiratjangwa yoAwake zomo 8 Murongagona 1962 yomoRufransa kwa yi tu hokwene. Awake zimwe kwa temwinine eyi da rapotere nosaitunga domoRufransa asi moHaiti, vamwe simpe ngava rugana  ukarelikarunga ou wa likwatakana noumpure. Vamwe kapi va yi haferere nokugazara asi nyose twa tjenge sirongwa oso koMberewa zetu. Konyima zoyivike yongandi vatumwa kwa va tjidire mo mosirongo oso. * Nye vanavazinyetu ava va dewire kwa twikilire nosirugana sawo. Ngesi ame, nina hafa kweyi nina kukarera Jehova kumwe nawo morwa elididimiko lyawo ntani ezokomeho eli va tulire po. Awo ngesi vana kara noBibeli zoNew World Translation of the Holy Scriptures moRucreole, Bibeli ezi twa kwa zi ndindilire nononkondo.

Konyima zokuruganena moHaiti, tava tumu nge ni ka rugane sirugana soutumwa koCentral African Republic. Konyima na ya gwene situmbukira sokukara mutareli gokudingura ntani mutareli goMberewa zomutayi.

Momazuva gena, Yinyanga yoUhompa yoyinzi kapi ya kere moukaro wouwa. Na lirongere kukateta wayi nokuyadika etaratara. Wovanzi ngayi va tetukisa apa ngava mono omu nina kukondja. Eyi kwa tumangedere vanavazinyetu va lihameke mo mokutunga Yinyanga yawo nokuyiwapukurura. Vampitisili womaukarelikarunga ngava tu swaura morwa nongereka dawo kwa di tungire noyipereki ano detu nowayi. Nampili ngoso, twa twikilire kudika Yinyanga yoUhompa yowayi. Awo kwa hagekere kutuswaura apa ekundungu lyenene lya horokere mositata saBangui. Alyo kwa yambwire yipereki yongereka zimwe makura tayi ka gwira mositaura. Nye Yinyanga yetu yowayi kwa sikeme ndjikiti. Mokugendesa nawa sirugana soUhompa, ose kwa tungire Mberewa zomutayi zompe ntani nzugo zovatumwa momakwedi gatano tupu. *

Momvhura 1976 sirugana soUhompa kwa si hagekesere moCentral African Republic yipo va tumine nge konkurusitata N’Djamena mosirongo saChad. Tani ka ligwana naHappy muzuvhisi gosiruwo nasinye goupampi gokoCameroon. Ose kwa likwere mwa-1 Kudumogona 1978. Mokwedi oko yipo mwa horokere yita makura tatu tjwayukire kombindakano zosirongo oso. Apa ya hege tatu tengura nokukagwana embo lyetu alyo lina kara kamba zovakwayita. Ose kwa zumbanesere yimbapiratjangwa yetu newiwili lyamukadange ntani mauhwi aga va tu pere pekwareko lyetu. Nye kapi twa sigilire mawoko getu ga mye. Simpe twa twikilire kuruganena kumwe ntani twa kere neharo lyokutamununa sirugana setu.

Konyima zonomvhura mbali sirugana setu kwa si pulisilire hena moCentral African Republic. Yipo twa tengwire tu ka twikire sirugana setu sokudingura. Ose kwa ruganesere etuwa lyetu ngonzugo omu mwa kere mbete zokupeteka negarona lyomema lyonolita 200 noeyisikasi zokohasi ntani nesuga lyohasi. Sirugana sedinguro kwa digopere. Vaporosi ngava tu kondere yikando yoyinzi.

Yiruwo yoyinzi ako ngaku kara upyu wounene. Ngayi kara udigu poyiruwo yimwe kugwana mema gokugwanena po gekuho. Eyi yiyo nye vanavazinyetu ngava simine moyidiva ano awo ngava gwana mo mema aga ngava tura megarona mokuruganesa ko pekuho.

Momvhura 1980 tatu dirukire koNigelia. Ose kwa ka vaterere mokutunga Mberewa zomutayi ure wonomvhura mbali noukahe. Vanavazinyetu kwa rende nzugo zokulironda ezi twa hepere kuzungurura nokuziwapukurura. Ngurangura zimwe ame kwa rondere keguru lyetungo ni vatere kuzungurura. Poyiha yometaha tani humburukire kooku na ronderere. Mokuhumburuka tani somponoka nokugwa keguru. Ayo kwa monekere ngwendi nina remana unene nye apa ga ka konakonene nge ndokotora ta tantere mukadange asi: “Wa ha kara nosinka. Age kuna songonyoka tupu ntaantani a veruke.”

 Momvhura 1986 tatu dirukire koCôte d’Ivoire oku twa ka twikilire nosirugana setu sokudingura. Ose kwa ka dingwire hena sirongo saBurkina Faso. Kapi na gazarere asi konyima ngatu ya tunga mosirongo oso.

Momvhura 1956 yipo na tundire moKanada ano mo-2003 yipo na tengwire nokukarugana koBeteli zomoKanada kumwe naHappy. Ose kwa kere Vakanada nye kwa lizuvhire ngwendi asi ose Vaafrika.

Momvhura 2007 apa na kere nonomvhura 79 tatu tengura hena koAfrika. Ose kwa tu tumine koBurkina Faso oku na ka vaterere ngagumwe gomokomitiye zomberewa zetu. Mberewa ozo kwa ya zi ruganesere ngomberewa zetoroko ezi za kere megendeso lyomberewa zomutayi zaBenin. Ano mwaSiwogedi 2013 tava tu tumu koBeteli zomoBenin.

Nampili ngomu nina kurupa, ame simpe kwa hara sirugana sokuzuvhisa. Nomvhura ntatu da ka pita nevatero lyovakuronambunga ntani namukadange, ayo kwa hafesere nge apa varongwa vange vavali Gédéon naFrégis va gwene ekuho. Ngesi awo kukarera Jehova noupampi.

Ntaantani tupu kava tu tumine namukadange koMberewa zomutayi zomoAfrika Mbindakano, ano epata lyoBeteli kupakera nge mbili. Afrika Mbindakano kuna kara sirongo sauntambali moAfrika oku va tuma nge ni ya rugane. MwaSikukutu 2017 katu gwene etungiko lyenene. Kava tu zigidire tu ka kare petungiko lyoMberewa zonene zaWarwick moNew York. Silika oso kapi ngatu si divara.

Yearbook zomo-1994 pepenuno 255 kwa tanta asi: “Kwanavenye ava mwa lididimika nomvhura dononzi, tatu mu korangeda asi: ‘Koreni, yirugana eyi muna kurugana ngomu yi gwanena mfeto.’—2 Hist. 15:7.” Name namukadange tuna tokomene kuyirugana oyo nokukorangeda wopeke va rugane yokulifana.