NGOMU RWA tamekere rugendo rokuza koEuropa, munazinyetu George Young kwa tedere ko koyitundwamo yoyiwa kuhamena omu mbuto zoUhompa za lihanenene moBrasilia. * Ano ngomu rwa twikilire rugendo, munazinyetu George kwa tamekere kugazadara ko kosirugana esi nga ka rugana koSipanye nokoPortugal. Age kwa here kukawapaika yiuyungwa yamunazinyetu J. F. Rutherford nokukahanesa yitratate 300 000.

Apa munazinyetu George ga ka sikire mositata saLisbon mo-1925, amo kwa kere mo maudigu. Mo-1910 epangero eli ngali pangere kwa li hagekesere po ano ngereka zaKatolika kapi za kere hena nononkondo. Vantu kwa kere noumanguruki nye maudigu simpe kwa twikilire mosirongo oso.

Apa tupu munazinyetu George Young ga tulire po mawapaiko gosiuyungwa saRutherford, epangero yipo lya tulisire po noveta morwa koveli va here kuhomekera epangero. Hamutjanga gwaBritania kwa rondwere munazinyetu George asi vantu ngava mu rwanesa. Nye George kwa zire kosure zimwe a ka hundire nsene kuvhura va zi ruganese. Yipo va mu pere epulisiro.

Mo-13 Kudumonkuru, munazinyetu Rutherford yipo ga geve siuyungwa sendi. Vantu kwa si ndindilire nononkondo. Siuyungwa oso kwa si divisire pomapurakate nomonosaitunga. Siparatjangwa sosiuyungwa kwa kere asi “Omu no paruka narunye pevhu.” Varwanesi yipo va pwagesere sirongwa mosaitunga zawo mokurondora varesi vawo kuhamena “vaporofete woyimpempa.” Varwanesi owo kwa ka sikamene kevango oku va gaverere siuyungwa nokugava yimbapira kovantu omu mwa kere mbudi zoyimpempa kuhamena eyi nga rongo munazinyetu Rutherford.

Nye, vantu wokusika po-2 000 kwa zire va ka purakene kosiuyungwa, ano vamwe wokusika posivaro oso kwa va tengwidire morwa evango enunu. Vamwe ava va here kupurakena kwa lizenzere komarugodi, ano vamwe kwa hingilire keguru lyoyivera yokuhufenena.

Epongo olyo kapi lya gendere po nawa. Varwanesi kwa zigilire nokuzugumanga yipundi. Nye munazinyetu Rutherford ta rondo positafura a gave siuyungwa sendi nomukumo. Apa ga mene siuyungwa sendi, vantu wokusika po-1 200 kwa geve madina nonoaderesi dawo yipo va va pe yimbapiratjangwa yoBibeli. Ezuva eli lya kweme ko, siuyungwa samunazinyetu Rutherford kwa si pwagesere mosaitunga zedina O Século.

MwaSitarara 1925, Ruhungu romoRuputu yipo va tamekere kurunduruka moPortugal. (Ruhungu oro nare va ru pwagesere moBrasilia.) Posiruwo  oso, Virgílio Ferguson murongwa goBibeli gomoBrasilia kwa tulire po mawapaiko a dirukire koPortugal mokukavatera. Pomuhowo nga rugana kumwe namunazinyetu George Young moMberewa zomutayi zoValirongi woBibeli moBrasilia. Virgílio namukadendi Lizzie kwa ya zire hena va ka lipakerere naGeorge. Virgílio ga wapekere kudiruka morwa George kwa ya mu pere yitumbukira nayopeke kukwatera mo kudirukira koRusia.

Apa vakwayita va kwete sirongo saPortugal va si pangere, maudigu nomarwaneso kwa ya tamekere. Nye munazinyetu Virgílio kwa tokwere mokudira kudirukira nakopeke yipo a twikire kuvatera varongwa woBibeli va ture po ezokomeho. Age kwa pulire epulisiro yipo va ruganene mapongo membo lyendi. MwaSikukutu 1927, yipo va mu pere epulisiro.

Momvhura zokuhova ezi va pangerere vakwayita sirongo saPortugal, vantu wokusika po-450 kwa tulire mo ehundiro yipo va va tumine maRuhungu. Ntani hena, kupitira moyitratate notubukegona, usili kwa lihanenene koyirongo eyi ya kere mepangero lyaPortugal ngwendi Angola naAzores naCape Verde naEast Timor naGoa naMadeira ntani Mozambique.

Momvhura 1929, Manuel da Silva ogu nga rugana mosipata kwa zire kositata saLisbon. Apa ga ka tungire moBrasilia, ga zuvhire siuyungwa esi ga geve munazinyetu George. Siuyungwa oso kwa mu tumangedere a tambure usili. Manuel kwa tokomenene hena kuvatera munazinyetu Virgílio a tamunune sirugana sokuzuvhisa, yipo ga tamekere uzuvhisi wokukarerera. Ewapaiko eli va tulire po lyokunduruka nokugavera yimbapiratjangwa yoBibeli kwa pamekere nombungakriste donompe moLisbon.

Momvhura 1934, munazinyetu Ferguson namukadendi kwa tengwire ko Brasilia. Nye, usili wa lihanene nare. Nampili ngomu pwa kere maudigu morwa Yita yaUvali yoUzuni ntani noyita eyi ya kere moSipanye, kambunga kovanavazinyetu komoPortugal ka vhulire kukwaterera kousili. Mo-1947, kambunga oko kwa ya peme hena pampepo apa mutumwa gokuhova ogu ga tundire koGiliyata ga ya sikire moPortugal. Kutunda opo, sivaro sovazuvhisi kwa twikilire kuligwederera. Nampili ngomu epangero lya silikire sirugana soNombangi daJehova mo-1962, sivaro kwa twikilire kuligwederera. Apa Nombangi daJehova va di pulisilire paveta mwaSindimba 1974, sivaro sovazuvhisi womoPortugal kwa pitakanene po-13 000.

Naina, moPortugal nomoyirudi yimwe kukwatera mo Azores ntani Madeira omu ava uyunga Ruputu kuna kara mo vazuvhisi woUhompa 50 000. Vamwe wovazuvhisi owo, vazinyakurwawo yipo va kere apa munazinyetu Rutherford ga geve siuyungwa mo-1925.

Ose kuna kupandura Jehova novanavazinyetu ava va litulire mo unene mokuzuvhisa ‘ngovakareli vaJesus Kristusa’ mokuvatera vantu.—Upungwiro woyininke yanare moPortugal.