1. Mononkedi musinke natu ruganena kumwe naJehova?

APA Jehova ga mene kusita vantu, age kwa here va ruganene kumwe nendi yipo va sikise mo sitambo sendi. Nampili ngomu vantu va dira kusikilira mo, ava ava limburukwa Jehova kuvhura simpe kuruganena kumwe nendi. Pasihonena, ose kuyakara “varugani kumwe naKarunga” pokuzuvhisa mbudi zoUhompa nokutulisa po varongwa. (1 Kol. 3:5-9) Azo mfumwa kweyi Musiti gwanayinye ga tu pa mpito zokurugana kumwe nendi mosirugana esi somulyo. Nye kuzuvhisa nokutulisa po varongwa kapisi yido delike nonkedi atu ruganene kumwe naKarunga. Mosirongwa esi tatu ka tara nonkedi dimwe hena, pasihonena kuvatera vemepata lyetu novapuli vakwetetu ntani kutambura vagenda nokulizambera moyirugana yaJehova.—Koros. 3:23.

2. Morwasinke ya karera epuko kuhetakanesa eyi o ruganene Jehova kumwe neyi ava mu ruganene wopeke?

² Ngomu natu ka lironga sirongwa esi, wa ha hetakanesa eyi o ruganene Jehova kumwe neyi ava mu ruganene wopeke. Diworoka asi ukaro wetu nonomvhura detu noukanguki  ntani udivi wetu ya lisiga. Mupositoli Paurusa kwa tente asi: “Nkenye ogu a kona-kone yirugana yamwene, ntani nye a lifumadeke mwamwene, kapisi a liyereke namukwawo.”—Gar. 6:4.

3. Morwasinke natu uyungira asi ogu a pakere mbili epata lyendi kuruganena kumwe naKarunga?

³ Jehova kundindira ko kovakareli vendi va pakere mbili mapata gawo. Pasihonena, kuvhura o rugane yipo o pakere mbili yihepwa yava vemepata lyoge. Sinzi sovazinya kukara pembo yipo va pakere mbili vanona. Ano vadinkantu vamwe kupakera mbili vakurona vawo wokuvera. Yininke oyo mulyo. Bibeli kuuyunga asi: ‘Muntu ogu a dili kupakera mbili ekoro lyendi, unene vava vembo lyendi, ogo epuro ana patana, ano udona wendi wa ka pita, wogu ga dira kupura hasa.’ (1 Tim. 5:8) Nsene wa kara noyitumbukira yoyinzi mepata, kuvhura o lizuvhe asi kapi to vhuru kuruganena Jehova momunene. Nye ya ha kudompesa. Jehova kuhafa apa o pakere mbili vepata lyoge.—1 Kol. 10:31.

4. Ngapi vakurona nava tura muhowo Uhompa ntani yitundwamo musinke ayi kara?

⁴ Vakurona woVakriste kuruganena kumwe naJehova apa ava vatere vana vawo va ture po yitambo yopampepo. Vakurona wovanzi va yi rugana oyo, ngoyitundwamo vana vawo kwa lihameka mosirugana sosiruwo nasinye pokuza komavango gokoure. Vana vawo vamwe vatumwa ano vamwe kukavatera komavango gokoure ngovazuvhisi wokukarerera ano vamwe koBeteli. Apa vana vawo ava zi komavango gokoure, awo kapi ava vhuru kukara nawo nkenye apa. Nampili ngoso, vakurona owo kukorangeda vana vawo va twikire nosirugana sawo. Morwasinke? Awo kuhafa apa ava zuvhu asi vana vawo kuna kutura Uhompa muhowo. (3 Joh. 4) Nampo sinzi sawo kulizuvha ngwendi Hana ogu ga tente asi age kwa ‘pongwerere’ munwendi Samwere kwaJehova. Vakurona owo kutara mpito ozo asi azo mfumwa zonene. Awo kuyitara asi alyo etokoro lyewa va tura po.—1 Sam. 1:28.

5. Ngapi no vatera vanavazinyetu womombungakriste? (Tara efano pepenuno 23.)

⁵ Nsene kapi wa kara noyitumbukira yoyinzi mepata, kuvhura o vatere vanavazinyetu ava va kara noyitumbukira yoyinzi mepata nava ava vere ntani vakurupe. Kuvhura hena o tare nsene koveli vamwe mombungakriste ava vana hepa evatero. Ntani kuvhura hena o vatere munazinyetu ogu a pakere mbili vakondi vendi wovakurupe yipo a gwane ko nage mpito zokurugana yapeke. Ndi nampo kuvhura o vatere vamwe pokuvapitura komapongo ndi kuza nawo koyitora ndi mu ka dingure gumwe kosipangero. Pokuyirugana oyo, kuvhura yi kare asi Jehova kuna kukuruganesa mokuvatera wopeke.—Resa 1 Vakolinte 10:24.

6. Yisinke ya kwatera mo mokutambura vagenda?

⁶ Vantu vaKarunga kwava divira kokutambura vagenda. MoMatjangwa goRugereka goSikriste nkango “kutambura” kutanta asi “kupakera mbili vageni.” (Heb. 13:2) MoBibeli kwa kara mo yihorokwa eyi ayi tu rongo tu tambure vagenda. (Gen. 18:1-5) Kuvhura tu ruganese nkenye mpito mokuvatera “vapuli vakwetetu” ndi wopeke.—Gar. 6:10.

7. Mauwa musinke ngatu gwanena mo pokutambura ava va kara mosirugana sosiruwo nasinye?

 ⁷ Kuvhura hena o tambure vanavazinyetu womosirugana sosiruwo nasinye ava ava ya tu dingura. (Resa 3 Johanesa 5, 8.) Azo mpito zongwa ‘zokulikwafa-kwafa’ mepuro nava wopeke. (Rom. 1:11, 12) Koneka sihonena saOlaf. Age kwa tanta asi: “Nomvhura dononzi da ka pita, kwato gomombungakriste zetu ga tambwire mutareli gonombunga ogu ga kere mudike. Yipo na pulire vakondi vange wovahapuli nsene kuvhura tu mu pe mararo. Awo va yi kwatesere ko, nye hena va tente asi na hepere kurara pesofa. Azo kwa kere mpito zongwa ntani kwa kere sivike sosiwa. Name nomutareli gwina ngatu meneka tu zogere yininke yoyinzi apa ngatu lihaka. Makorangedo aga ga pere nge, kwa tumangedere nge ni tameke sirugana sosiruwo nasinye.” Olaf kwa kara mutumwa moyirongo yokulisiga-siga nomvhura 40 da ka pita.

8. Morwasinke twa hepera kulikida eharo nampili vantu kapi vana kutupurakena? Gava sihonena.

⁸ Ose kuvhura tu likide eharo kovageni mononkedi dokulisiga-siga nampili va dire kutulikida rupandu. Tarurura sihonena esi. Apa muzuvhisi gumwe gomoSipanye ga lirongere nomurongwa gwendi Yesica gokoEcuador ta dimburura asi age kuna kulira. Makura ta mu pura konda zeyi ga lililire. Makura Yesica ta tanta asi komeho a wize koSipanye age kwa kere moruhepo ano ezuva limwe kapi va kere nonondya edi ga hepere kupa munwendi. Yesica ga hetekerere ko kukumbwida munwendi ngomu ga kanderere. Konyima zosiruwo Nombangi daJehova mbali kwa ya mu dingwire, nye Yesica kwa va handukilire nokutaura simbapira esi va mu pere. Yesica ta va pura asi: “Edi yido nye nondya nani pa munwange ndi?” Vanavazinyetu vena va hetekerere ko kumuhengagwida nye kapi ga yi tambwire. Konyima, vanavazinyetu vena kwa ya sigire pevero lyonzugo zendi sikumba esi sa kere nonondya. Eyi kwa hafesere Yesica ntani ga li zuvhire udona kweyi ga dilire kuvapurakena pomuhowo. Age kwa tokomenene kukarera Jehova. Yosili, ugavi wovanavazinyetu vena kwa retere yitundwamo yoyiwa.—Muud. 11:1, 6.

9, 10. (a) Nompito musinke va kere nado Vaisraeli mosiruwo sanare? (b) Yitumbukira musinke yimwe va kara nayo vanavazinyetu wovagara mombungakriste?

⁹ Mosiruwo sanare, Vaisraeli va hepere kulizambera poyiruwo-noyiruwo. (Ex. 36:2; 1 Hist. 29:5; Neh. 11:2) Naina pana kara hena nompito omu no vhura kulizambera pokuruganesa siruwo noyiweka yoge ntani udivi woge mokuvatera vanavazinyetu. Ove ngo hafa ntani ngo gwanena mo mauwa gomanzi.

¹⁰ Bibeli kukorangeda vanavazinyetu wovagara va ruganene kumwe naJehova pokukondjera yitumbukira mombungakriste nokukara vapitisili. (1 Tim. 3:1, 8, 9; 1 Pet. 5:2, 3) Vanavazinyetu ava ava rugana oyo, kwa hara kuvatera vakwawo pampepo nomononkedi dimwe hena. (Yirug. 6:1-4) Va ku pura rumwe vakuronambunga o kare muvateli koyimbapiratjangwa nokuvatera kutjanga nomukunda dokuzuvhisira nokupakera mbili yihepwa yomoSinyanga ntani nayimwe ngoso ndi? Ava va kara noyitumbukira oyo va yi limonena asi ayo kureta ruhafo.

11. Ngapi munazinyetu gumwe ga gwanene mo mauwa apa ga lihamekere mosirugana sokutunga?

¹¹ Vanavazinyetu ava ava lihameke mosirugana saJehova kutulisa po vakaume wovape. Tarurura sihonena saMargie,  ogu ga rugene sirugana sokutunga Yinyanga yoUhompa nomvhura 18. Monomvhura odo age kwa dewire vanavazinyetu wovakadi. Age kwa tanta asi sirugana esi kwa vatera valizambeli va likorangede-korangede. (Rom. 1:12) Poyiruwo yomaudigu age kwa gwene makorangedo kovakaume vendi ava ga tulisire po mosirugana esi. Nove wa lihameka rumwe mosirugana sokutunga ndi? Yi kare asi wa kara noudivi ndi hawe, kuvhura o ka lihameke mo ndi?

12. Ngapi no vatera ava sina kundama simpagwa?

¹² Apa ayi horoka yimpagwa, vantu vaKarunga kugwana nompito dokuruganena kumwe nendi mokuvatera vanavazinyetu mononkedi dokulisiga-siga. Pasihonena, awo kugava yimaliwa. (Joh. 13:34, 35; Yirug. 11:27-30) Awo hena kuzeresa nokuwapukurura mavango aga yina horokere yimpagwa. Gabriela munazinyetu gokoPoranda, kwa hefe apa vanavazinyetu wokonombungakriste dopopepi va ya mu vaterere apa embo lyendi lya zungurukire koruhanzo. Age kwa tente asi: “Kapi nina hara kusimwitira eyi na zumbanesa ayo yininke tupu yopanyama. Nye nina hara kumutantera eyi na gwanena mo. Sihorokwa esi kwa vatera nge ni dimburure asi azo mfumwa kuhama kombunga zaJehova ntani ayo kureta ruhafo rorunene.” Wovanzi ava ava gwana evatero konyima zokuligwanekera nosimpagwa kuhafa unene. Ano vanavazinyetu ava ava ruganene kumwe naJehova mokuvatera ava ayi kundama yimpagwa nawo kuhafa unene.—Resa Yirugana 20:35; 2 Vakolinte 9:6, 7.

13. Ngapi omu kulizambera ayi nkondopeke elikwatakano lyetu naJehova? Gava sihonena.

¹³ Stephanie novazuvhisi vakwawo kwa gwene mpito zokuruganena kumwe naKarunga pokuvatera Nombangi edi da tjwayukilire koAmerika. Awo kwa paparere mambo yipo vatjwayuki owo va tunge mo. Stephanie kwa tanta asi: “Ayo kwa tu gumine komutjima pokumona omu va hefe ngomu  va gwene evatero kovanavazinyetu. Mapata gena kwa gazarere asi nyose twa va vaterere, nye usili wou asi yiwo va tu vaterere. Eharo lyawo nouumwe nepuro ntani ehuguvaro lyawo mwaJehova, kwa tu vatera tu hare unene Jehova ntani tu kare norupandu kwanayinye eyi atu gwana kombunga zendi.”

14, 15. (a) Nkareso musinke ga likidire muporofete Jesaya? (b) Ngapi omu vazuvhisi woUhompa nava honena nkareso zendi?

¹⁴ Ono hara kuruganena kumwe naJehova momunene ndi? Kuvhura o dirukire oku kuna hepa vazuvhisi ndi? Yimo, vakareli vaJehova kapi va hepa kudirukira kwapeke yipo va ka mu karere. Nye vamwe ukaro wawo kuvapulisira va diruke. Awo kwa kara nonkareso ngwendi ezi ga likidire muporofete Jesaya. Apa Jehova ga mu pulire asi: “Ogu nani tuma hena yilye? Yilye na kara ntumi zetu?” Age ta limburura asi: “Nyame ogu, tuma nge!” (Jes. 6:8) Nove wa kara neharo lyokulizambera mosirugana saJehova ndi? Mononkedi musinke no vhura kulizambera?

¹⁵ Jesus kwa uyungire kuhamena kuzuvhisa nokutulisa po varongwa asi: “Muzangu gwene munzi, nye varugani vasesu. Yipo nye nomu hundilira mwenyamuzangu, asi a tume komuzangu gwendi varugani.” (Mat. 9:37, 38) Kuvhura o ka rugane uzuvhisi wokukarerera oku kuna hepa evatero ndi? Ndi kuvhura o vatere gumwe yipo yi mu tompoke kuza oku kuna hepa vazuvhisi? Sinzi sovanavazinyetu va yi dimburura asi nkedi zongwa mokulikida eharo kwaJehova nokovantu kuna kara pokuzuvhisira konomukunda oku kuna hepa vazuvhisi. Kuvhura o gazadare ko nonkedi dimwe omu no tamununa sirugana soge ndi? Nsene o yi rugana oyo ngo hafa unene.

16, 17. Mononkedi musinke hena dimwe no vhura kutamununa sirugana soge?

¹⁶ Kuvhura o ka rugane koBeteli ndi o ka vatere komatungo pokaruwogona ndi mazuva gongandi mosivike? Pana hepa valizambeli va ka rugane nkenye oku vana kuvatuma ntani nankenye sirugana esi vana kuvapa. Eyi kutanta asi awo kuvhura kurugana oku kuna hepa evatero nampili ngomu va kara noudivi mosirugana sapeke. Nampili ngoso, Jehova kwa hara ava ava lizambere mokukarugana oku kuna hepa evatero.—Epis. 110:3.

¹⁷ Ono hara kugwana edeuro lyenene yipo o lihameke mo unene mosirugana saJehova ndi? Nsene yimo, kuvhura o ture mo ehundiro lyokuza koSikora zoVazuvhisi woUhompa. Sikora ezi kudeura vanavazinyetu ava va kara mosirugana sosiruwo nasinye yipo mbunga zaJehova zi va ruganese momunene. Ava ava tura mo ehundiro mokuza kosikora ezi va hepa kuliwapaikira kurugana nkeye sirugana vana va pe. Kuvhura o ture mo ehundiro yipo o tamunune sirugana soge ndi?—1 Kol. 9:23.

18. Mauwa musinke ngo gwana nsene o ruganena kumwe naJehova?

¹⁸ Ngovakareli vaJehova ose twa kara nougavi pokurugana uwa nokulikida nkenda neharo ntani kupakera mbili wopeke nkenye ezuva. Apa atu yi rugana oyo, ose kuhafa ntani kukara nombili. (Gar. 5:22, 23) Yi kare asi ukaro woge musinke, ove kuvhura o hafe pokuhonena ugavi waJehova ntani nokuruganena kumwe nendi.—Yis. 3:9, 10.