1, 2. (a) Nkareso musinke twa hepa kukara nazo ntani morwasinke? (b) Yisinke natu ka zogera mosirongwa esi?

NGOVAKRISTE, twa hepa kukara nonkareso zokukonakona nombudi yipo tu dive usili wene-wene. (Yis. 3:21-23; 8:4, 5) Nsene tu dira kukara nonkareso ozo, ureru kwaSatana nouzuni wendi u tu pukise. (Efe. 5:6; Koros. 2:8) Nye, nsene tu diva mauzera nagenye ose ngatu diva usili wene-wene. Yisewe 18:13 kutanta asi: “O hove tanko kuzuvha ko, ntani ono kulimburura. Nsene o dira kuyirugana, ugova woge neswau lyaamoge.”

² Mosirongwa esi tatu ka zogera maudigu gamwe aga atu ligwanekere nago pokupapara mauzera nokuyadiva usili wene-wene. Ntani tatu ka zogera hena magano gaKarunga noyihonena eyi nayi tu vatera tu tunge po nkareso zokukonakona nawa mauzera.

3. Morwasinke natu tulira pasirugana egano lyomoYisewe 14:15? (Tara efano.)

³ Naina, vantu kugwana nombudi dononzi koIntaneta nokotivi ntani koyikwakonentu yimwe hena. Vantu kugwana hena nombudi kovakaume vawo edi adi pitire konoselefoni.  Mokumona asi nombudi doyimpempa dina lihana unene, twa hepa kutakamesa nokukonakona nawa eyi atu zuvhu. Egano musinke nali tu vatera? Yisewe 14:15 kutanta asi: “Mugova kupura nkenye eyi, nye vanandunge kutakamesa nontambo dawo.”

4. Ngapi Vafilipi 4:8, 9 azi tu vatere tu horowore nombudi edi natu resa ntani morwasinke ya karera nomulyo kudiva mauzera nagenye? (Tara hena kakende “ Eyi nayi tu vatera tu gwane mauzera nagenye.”)

⁴ Mokutura po matokoro gomawa, twa hepa kudiva mauzera nagenye. Yipo nye, twa hepa kuhorowora nawa asi nombudi musinke natu resa. (Resa Vafilipi 4:8, 9.) Kapisi tu hepeke siruwo setu mokupurakena ndi kuresa nombudi koIntaneta edi da dira kukara nomauzera nawa-nawa. Nye unene po, twa hepa kunyokera po nombudi dovarwanesi usili. Sitambo sawo kuna kara sokuretera vakareli vaJehova masinganyeko kweyi va pura ntani sokupempura usili. Mauzera gokudira kugwanena po, kuvhura kuninkisa vamwe va ture po matokoro gomadona. Nombudi doyimpempa siponga unene.—1 Tim. 6:20, 21.

5. Mbudi musinke zondona va zuvhire Vaisraeli ntani ngapi za va kundamene?

⁵ Kupura nombudi doyimpempa kureta yitundwamo yoyidona. Pasihonena, koneka eyi ya horokere mosiruwo saMosesa apa nondadi murongo edi va tumine di ka nenge Sirongo sEtumbwidiro da ka retere mbudi zondona. (Num. 13:25-33) Mbudi zondona ezi va ka retere kwa dompesere Vaisraeli. (Num. 14:1-4) Morwasinke va lizuvhilire ngoso? Awo nampo kwa gazarere asi mokumona asi nondadi dononzi kwa ka retere mbudi zokulifana, ya va ninkisire va gazare asi nampo usili. Awo kwa nyokere kupurakena kombudi zongwa ezi va va reterere oJosuwa naKarebu. (Num. 14:6-10) Mevango lyokugwana mauzera nagenye nokuhuguvara mwaJehova, awo kwa pulire mbudi zina zondona. Ee, ugova musi va rugene!

6. Morwasinke ngayi dira kututetukisa nsene vantu ngava uyunga vakareli vaJehova momudona?

⁶ Twa hepa kutakamesa nsene tuna zuvhu nombudi dokuhamena Nombangi daJehova. Ntani hena twa hepa kudiworoka asi Satana kurundira vakareli vaJehova. (Ehor. 12:10) Jesus kwa rondwere asi varwanesi ngava tu ‘uyunga momudona.’ (Mat. 5:11) Nsene tu diworoka erondoro olyo, ayo kapi ngayi tu tetukisa nsene ngatu zuvha omu vantu vana kuuyunga vakareli vaJehova momudona.

7. Yisinke twa hepa kulipura komeho tu tume nombudi?

⁷ Ove gumwe ogu ga hara kutuma nombudi kovakweni ndi? Nsene yimo, apa o gwana mbudi ove nampo kulizuvha ngwendi mugavi mbudi ogu ga hara asi ngano yige na hova kuhanesa mbudi zongandi kovantu. Nye komeho o tume mbudi ozo lipura asi: ‘Mbudi ezi nina kutuma usili ndi? Nina kara nomauzera nagenye ndi?’ Nsene kapi ono diva mauzera nagenye, nyokera po kuzituma morwa kuvhura o tantere vapuli vakweni yimpempa.

8. Yisinke va rugana varwanesi moyirongo yimwe, ntani ngapi natu va kwatesa ko twa hana kuyidivira?

⁸ Pwa kara hena siponga nsene tu genderera kutuma nombudi. Moyirongo yimwe yirugana yetu kwa yi silika. Varwanesi womoyirongo oyo kuvhura kuhanesa nombudi doyimpempa yipo va tu ninkise tu dire kulihuguvara-huguvara. Tu tareni eyi ya horokere nare moRusia. Vaporosi ava  va divikwa asi KGB kwa hanesere yimpempa asi vampitisili woNombangi daJehova vana sigi usili. * Wovanzi kwa pulire yimpempa oyo, ngoyitundwamo awo kwa ligusire ko kombunga zaJehova. Nye konyima wovanzi kwa ka tengwire. Ano vamwe kapi va ka tengwire, awo kwa zumbire epuro lyawo. (1 Tim. 1:19) Ngapi natu nyokera po eyi ya horokere? Nyokera po kuhanesa nombudi doyimpempa ndi nombudi dina dili kukara nomaumbangi gokuzulilira. Wa ha kara ugova, nye divilisa asi ono kara nomauzera nagenye.

9. Yisinke hena nayi tu ninkisa tu dire kudiva usili wene-wene?

⁹ Mauzera gokudira kuzulilira kuna kara udigu umwe ou nau tu ninkisa tu dire kudiva usili wene-wene. Mbudi ezi zina dili kukara nousili wene-wene kuvhura kupukisa vantu. Ngapi natu nyokera po kutupukisa nombudi edi da dira kukara nawa-nawa nousili?—Efe. 4:14.

10. Yisinke ya ninkisire Vaisraeli wokorwautokero va hare kukarwisa vakwawo, nye yisinke va rugene ko?

¹⁰ Tu tareni eyi ya horokerere Vaisraeli ava va kere korwautokero womukuro gwaJorodana momazuva gaJosuwa. (Jos. 22:9-34) Awo kwa gwene mbudi asi Vaisraeli (vemezimo lyaRubena naGada noharufa zezimo lyaManase) ava va tungire korwaupumezuva waJorodana kwa tungire sizambero pepi naJorodana. Yimo, mbudi ozo kwa kere usili. Nye morwa kudira kudiva mauzera nagenye, Vaisraeli wokorwautokero kwa gazarere asi Vaisraeli vakwawo kwa rwanesere Jehova, makura yipo va tokwere kuza va ka va rwise. (Resa Josuwa 22:9-12.) Nye komeho va ka va rwise, awo kwa tumine ko vagara vamwe yipo va ka gwane mauzera nagenye. Mauzera musinke va ka gwene? Asi Vaisraeli vemezimo lyaRubena naGada noharufa zezimo lyaManase kwa tungire sizambero nositambo sokulidiworokera po nye kapisi sokuzambera. Awo  kwa si tungire yipo asi navenye ava va ya kweme ko konyima zawo va dive asi nawo kwa kere vakareli vaJehova wovalimburukwi. Vaisraeli vena nampo va hefe kweyi va gwene mauzera nagenye yipo va dire kukarwisa Vaisraeli vakwawo.

11. (a) Yisinke ya ninkisire Mefiboseti va mu tekure momudona? (b) Ngapi ngano omu Ndafita ga yi nyokerere po oyo?

¹¹ Nose kuvhura yi tu korese nsene vantu va hanesa yimpempa kutuhamena. Tu tareni sihonena sahompa Ndafita naMefiboseti. Ndafita kwa tengwidilire Mefiboseti sirongo sozinakuru, Sauru. (2 Sam. 9:6, 7) Nye konyima, Ndafita ta zuvhu nombudi doyimpempa kuhamena Mefiboseti. Ga hana kugwana mauzera nagenye, age kwa tokwere kumuhokona sirongo nasinye esi ga mu pere. (2 Sam. 16:1-4) Nye konyima zokuuyunga naMefiboseti, Ndafita ga dimbwilire epuko lyendi makura ta tengwidire Mefiboseti sirongo. (2 Sam. 19:24-29) Ngano Ndafita ga hovere kupapara mauzera nagenye, age ngano kapi ga hokwene Mefiboseti sirongo.

12, 13. (a) Yisinke ga rugene Jesus apa va mu rundilire? (b) Yisinke natu rugana nsene vantu va hanesa yimpempa kutuhamena?

¹² Ngapi nsene asi vana ku rundire? Jesus naJohanesa Mukuhwi nawo kwa va rundilire. (Resa Mateusa 11:18, 19.) Yisinke ga rugene Jesus apa va mu rundilire? Age kapi ga hepekere siruwo sendi mokulipopera. Nye age kwa korangedere vantu va tarurure eyi nga rugana neyi nga rongo. Jesus kwa tente asi: “Ukonentu waKarunga kumoneka moyirugana yawo asi awo kwa hungama.”—Mat. 11:19.

¹³ Nose kuvhura tu lirongere ko kosihonena saJesus. Poyiruwo yimwe vantu kuvhura va tu swaure ndi va tu uyunge momudona. Ano ayo kuvhura yi tu tumangede tu rugane ko yuma mokuzeresa edina lyetu. Nye, kosili sininke simwe twa hepa kurugana. Nsene gumwe a hanesa yimpempa kutuhamena, twa hepa tupu kutwikira kuparuka monkedi ezi nazi likida asi ayo kapisi usili. Ngwendi moomu asi yi likida sihonena saJesus, nkareso zetu zongwa, ngazi ninkisa vantu va dimburure asi eyi atu rugana usili.

14, 15. Ngapi kuhuguvara monondunge danyamwetu nayi kara siponga?

¹⁴ Pwa kara hena udigu umwe atu ligwanekere nawo pokupapara mauzera. Awo kuna kara kudira kusikilira mo kwetu. Ngapi nsene asi ose kwa karera Jehova nomvhura dononzi? Ose nampo twa ya kara noudivi wounzi ntani nonondunge. Vantu kuvhura va tu fumadeke morwa yeeyi twa diva yoyinzi. Eyi kuvhura kukara siponga kwetu.

¹⁵ Nsene tu huguvara monondunge danyamwetu, ayo kuvhura ngayi kare siponga kwetu. Ose kuvhura tu tokore kurugana yuma moomu tuna kulizuvha ndi moomu tuna yi harere. Kuvhura tu tokore kukohonona po udigu wongandi twa hana kugwana mauzera nagenye. Ayo siponga unene. Bibeli kuturondora asi twa ha hama konondunge danyamwetu.—Yis. 3:5, 6; 28:26.

16. Kuliza nosihonena esi, yisinke ya horokere morestauranda, ntani yisinke ga lipulire Tom?

¹⁶ Gazadara ko kosihonena esi. Ezuva limwe morestauranda mukuronambunga gedina Tom kwa tukukire apa ga mwene mukuronambunga mukwawo John ana hingire  kumwe nomukadi ga hana asi mukadendi. Tom kwa mwene John nomukadi ogo omu vana kuhafera nzogera nokuzoragana ntani nokulidingira. Ayo kwa mu handukisire. Ta lipura asi, ngesi tava ka lizumba namukadendi? Yisinke ngayi horokera mukadaJohn novana vendi? Tom ga yi mona omu ayi kundama mapata nsene vantu vana lizumbu. Ngano nove wa yi mwene, ngapi ngano wa lizuvhire?

17. Kuliza nosihonena esi, yisinke ga ya dimbwilire Tom konyima, ntani yisinke natu lirongera ko?

¹⁷ Nye, gazadara ko tanko. Nampili ngomu Tom ga gazarere asi John ana sigi mukadendi, nye ngoso ga divire mauzera nagenye ndi? Kongurova zezuva lina, Tom ta toonene ngodi John. Gazara tupu omu ga lizuvhire Tom apa ga zuvhire asi mukadi gwina kwa kere mumbyaJohn ogu ga kere morugendo. Awo nare va hura kulimona. John kwa gwene tupu mpito zokukalya nendi morestauranda morwa age kwa kere mo tupu novili dongandi modoropa ozo. Mukadendi kapi ya mu tompokere mokukamoneka. Nye sininke sosiwa seesi asi Tom kapi ga hanesere yininke eyi ga gazarere pomuhowo. Yisinke natu lirongera ko? Yi kare asi ediwo lyokuhura kupi twa kara nalyo, kapi ayi tanta asi twa diva mauzera nagenye.

18. Yisinke nayi horoka nsene tu demenena kweyi twa lizonena?

¹⁸ Kudira kulizuvha namunazinyetu gumwe kuna kara hena udigu umwe ou au tu ninkisa tu dire kupapara mauzera nagenye. Nsene tu demenena kweyi twa li zonena, ose nkenye apa ngatu gazarera munazinyetu ogo yoyidona. Ngoyitundwamo, ose ngatu pura nkenye nombudi doyimpempa edi ngatu zuvha kuhamena munazinyetu ogo. Sitwa musinke natu lirongera ko? Nsene tu kara nonkoko novanavazinyetu ose ngatu va pangura twa hana kudiva mauzera nagenye. (1 Tim. 6:4, 5) Mokudira kukara nonkoko twa hepa kunyokera po kukara nomfudu. Mevango lyokukara nomfudu twa hepa kuhara vanavazinyetu nokuvagusira po kutundilira komutjima.—Resa Vakorosi 3:12-14.

19, 20. (a) Magano musinke gaKarunga naga tu vatera yipo tu konakone nawa mauzera? (b) Yisinke ngatu ka lironga mosirongwa sokukwama ko?

¹⁹ Kugwana mauzera nokugakonakona kuna kara udigu morwa nombudi doyimpempa dina lihana ano dimwe kapi da kara nomaumbangi gokuzulilira ntani morwa kapi twa sikilira mo. Yisinke nayi tu vatera? Twa hepa kudiva magano gaKarunga nokugaruganesa. Egano limwe kuna kara asi ayo ugova nsene tu limburura ose twa hana kudiva mauzera nagenye. (Yis. 18:13) Egano limwe hena kutudiworokesa asi twa ha pura nkenye eyi ose twa hana kupura ko mauzera. (Yis. 14:15) Ano limwe hena kuna kara asi, yi kare asi ediwo lyokuhura kupi twa kara nalyo, kapisi tu huguvare monondunge danyamwetu. (Yis. 3:5, 6) Magano gaKarunga ngaga tu vatera tu dive mauzera nagenye, ano oyo ngayi tu vatera tu ture po matokoro gomawa.

²⁰ Nye pwa kara hena udigu umwe. Awo kuna kara udigu wokupangura kuliza neyi atu mono. Mosirongwa sokukwama ko ngatu ka lironga eyi nayi tu ninkisa tu pangure vakwetu neyi ngayi tu vatera tu yi nyokere po.