NGOVAKARELI vaJehova twa hepa elididimiko kupita pwanare morwa ose kuna kuparuka “pomazuva gopouhura.” (2 Tim. 3:1-5) Vantu wovanzi mouzuni ou kuna kara woyimbokauka kwa lihara tupu vene ntani awo kwato elipangero. Vantu wonkareso ozo kapi va kara nelididimiko. Twa hepa kulipura asi: ‘Name kupulisira nkareso zokudira kulididimika zi kundame nge ndi? Yisinke ayi tanta kulididimika? Ngapi omu nani tunga po sikara esi?’

Bibeli kwa faturura asi edidimiko kwa hamena mo yoyinzi kupitakana tupu kupita moudigu wongandi. Muntu gedidimiko kukara nehuguvaro ngomu ana kudidimika. Age kapi tupu a ligazara pwamwene nye kugazadara ko nampili ogu ana mu tekura momudona. Age hena kutwikira kukara nehuguvaro asi ngapa kara mbili pokatji kendi nogu ana mu zonene. Eyi yiyo Bibeli azi uyungire asi eharo kwa kwata “nedidimiko.” * (1 Kol. 13:4) Bibeli kutanta hena asi “ezaverero” ndi edidimiko kuna kara simwe ‘soyiyimwa yompepo.’ (Gar. 5:22, 23) Yisinke twa hepa kurugana mokukara nedidimiko?

Mokutunga po sikara sedidimiko, twa hepa kuhundira Jehova a tu pe mpepo zendi ezi a gava kowo va mu huguvara nokuhama kwendi. (Ruk. 11:13) Nampili ngomu mpepo zaKarunga za kara nononkondo, twa hepa kurugana ko yuma kuliza nomakanderero getu. (Epis. 86:10, 11) Eyi kutanta asi twa hepa kukondja nkenye ezuva yipo tu kare nonkareso zelididimiko. Nye nampili ngoso, ayo kapisi ureru kuzitunga po. Yisinke hena nayi tu vatera?

Ose ngatu tunga po edidimiko nsene tu teda ko kosihonena saJesus. Apa Paurusa ga uyungire kuhamena “muntu gomupe” eyi ya kwatera mo kukara “nedidimiko,” age kwa tumangedere hena Vakriste va ‘sige mbili zaKristusa, zi pangere monomutjima dawo.’ (Koros. 3:10, 12, 15) Pokuyirugana oyo, twa hepa kuhonena Jesus nokukara nepuro asi Karunga nga rugana ko yuma kuliza nosiruwo sendi. Nsene tu kwama sihonena saJesus ngatu twikira kudidimika, yi kare asi yisinke ngatu ligwanekera nayo.—Joh. 14:27; 16:33.

Ose kuna kundindira uzuni woupe ou ga tumbwidira Karunga, nye nampili ngoso twa hepa kutwikira kudidimika ngomu tuna kuteda ko omu Jehova a lididimikire maupirankondo getu. Bibeli kutuhengagwida  asi: “Hompa kapi a katapeke kusikisa mo etumbwidiro lyendi, moomu vana kuyitwaredera vamwe kekatapo. Nye age nkenda ana mu retere. Kapi ga hara asi ngapa zonauke nampili gumwe, age kwa hara asi navenye ngava litezurure.” (2 Pet. 3:9) Apa atu gazadara ko omu Jehova a lididimikire mapuko getu, ayo kututumangeda nose tu lididimikire mapuko govakwetu. (Rom. 2:4) Momaukaro musinke twa hepa edidimiko?

Pwa kara maukaro gomanzi aga twa hepa kulididimikira. Pasihonena, pwa hepa edidimiko mokupurakena komagano gava wopeke nampili tu lizuvhe asi magano getu mulyo. (Jak. 1:19) Ntani hena, pwa hepa edidimiko nsene vanavazinyetu vana tu handukisa. Mevango lyokuhanduka, ya wapa kugazadara ko omu Jehova naJesus ava lizuvhu kuhamena maupirankondo getu. Awo kapi ava demenene komapuko getu, nye awo kutara koyikara yetu yoyiwa ntani awo kutupa siruwo tu ture po marunduruko.—1 Tim. 1:16; 1 Pet. 3:12.

Ukaro umwe hena ou twa hepa elididimiko kuna kara apa gumwe atu rundire asi tuna rugana epuko. Ayo kuvhura yi tu handukise ntani tu hare kulipopera nyamwetu. Nye oyo kapisi yiyo azi tu rongo Bibeli. Azo kutanta asi: “Edidimiko lya pitakana elinenepeko. Walye o genderere kuhandukisa mutjima goge, yeeyi ehandu kwa kara monturo zegova.” (Muud. 7:8, 9) Nampili va tu rundire vantu, twa hepa kudidimika nokugazara komeho zokuuyunga. Oyo yiyo ga rugene Jesus apa va mu rundilire wopeke.—Mat. 11:19.

Vakurona nawo va hepa edidimiko apa ava vatere vana vawo va rundurure nkareso zawo nokunyokera po yininke yoyidona. Tarurura sihorokwa saMattias ogu a rugana koBeteli zaSkandinavia. Ngomudinkantu, Mattias ngava mu sindagura vanasure vakwawo morwa epuliro lyendi. Pomuhowo, vakondi vendi kapi va divire ukaro owo. Konyima tava ya dimburura asi munwawo ana kara nomasinganyeko kweyi ga lironga moBibeli. Gillis, oguhwe vaMattias kwa tanta asi: “Twa hepere kudidimika moukaro ou. Mattias pamwe nga pura asi: ‘Yilye Karunga? Ngapi nsene Bibeli kapisi Nonkango daKarunga? Ngapi omu natu yi diva asi eyi yiyo ana tu harere Karunga?’ Ntani nga pura nge hena asi: ‘Morwasinke nava pangwira nge nsene kapi na pura eyi mwa pura?’”

Gillis kwa tanta asi: “Munwetu pamwe nga tu pura nehandu, kapisi nyose ga handukilire nye age kwa handukire morwa nga lizuvhu asi ayo udigu kukwama usili.” Ngapi Gillis ga kohonwene po udigu owo? Age kwa tanta hena asi: “Ngani zogere namunwange novili dongandi. Yikando yoyinzi ngani mu purakene nokumupura mapuro yipo ni dive omu ana kulizuvha. Poyiruwo yimwe ngani mu tantere  yitwa yongandi yipo a ka gazadare ko komeho ngatu ya yi zogere hena. Ano poyiruwo yapeke name na hepere kukagazadara ko kweyi nga tantere nge munwange. Ngomu ngatu zogere nage nkenye apa, ga ya kwete egano mulyo gosizoweseso nomu Karunga ga tu hara ntani neyi ga karera mupangeli gomuwa. Ayo kwa gusire siruwo ntani kapi ya kere ureru, nye konyima ga ya tamekere kuhara Jehova. Name namukadange tuna hafa kweyi twa lididimikilire mokuvatera munwetu mosiruwo sendi soudinkantu.”

Gillis namukadendi kwa huguvarere mwaJehova ngomu va vaterere munwawo nelididimiko. Gillis kwa tanta asi: “Ame nkenye apa ngani tantere Mattias asi ose kwa mu here unene ntani ya tu ninkisire tu mu kanderere po unene kwaJehova a mu vatere ayi kwate egano.” Vakurona owo vana hafa kweyi va likidire sikara somulyo sedidimiko.

NgoVakriste wousili, twa hepa hena kulikida edidimiko apa atu pakere mbili gekoro ndi kaume ogu a vera-vera. Tarurura sihonena saEllen, * ogu nage ga tunga moSkandinavia.

Nomvhura ntantantu da ka pita, Mugara gwaEllen kwa sitire nonsipa yikando yivali ano eyi kwa zonagwire uruvi wendi. Ayo kwa mu digoperere kulikida malizuvho goruhafo noruguwo ndi gonkenda. Ou kuna kara ukaro woudigu kwaEllen. Age kwa tanta asi: “Na hepere kulitura mo mokukanderera nokulididimikira.” Age kwa tanta hena asi: “Etjangwa lyomoVafilipi 4:13 kuhengagwida nge, alyo kutanta asi: ‘Ame kuvhura nayinye nononkondo dogu a pameke nge.’” Nevatero lyaJehova, Ellen kuna kutwikira kulididimikira ukaro wendi.—Epis. 62:5, 6.

Jehova kwa tu tulira po sihonena sosiwa sedidimiko. (2 Pet. 3:15) MoBibeli kwa kara mo yihonena yoyinzi omu Jehova ga likidire edidimiko. (Neh. 9:30; Jes. 30:18) Pasihonena, ngapi ga lizuvhire Jehova apa Abirahamu ga mu pulire kuhamena etokoro lyendi lyokuzonagura po Sodoma? Bibeli kutanta asi Jehova kapi ga sembwilire Abirahamu. Nye age kwa lididimikilire nokupurakena ngomu Abirahamu ga pwagesere yinka yendi. Jehova kwa yi likidire asi age kwa purakenene Abirahamu pokumutantera asi kapi nga zonagura po hena Sodoma nampili mu kare vahungami murongo tupu. (Gen. 18:22-33) Jehova kutupurakena nkenye apa nelididimiko.

Edidimiko kuna kara sikara somulyo esi ga hepa kukara naso nkenye Mukriste. Nsene tu kondja mokukara nosikara sedidimiko, ngatu fumadeka Guhyetu gedidimiko neharo ntani ngatu hama ‘kwava ngava ka pinga eyi ga tumbwidira Karunga morwa epuro noudidimiki wawo moudigu.’—Heb. 6:10-12.