1. Yisinke tuna harere natuvenye vekoro lyetu?

MUNAZINYETU Pauline * kwa tanta asi: “Kutunda apa na tameka kulironga Bibeli, ame kwa here navenye vemekoro lyetu tu ka kare kumwe nawo moParadisa. Unene po, ame kwa here mugara gwange Wayne ntani namunwetu gomumati va karere Jehova.” Nove wa kara novanekoro ava va dira kudiva Jehova ndi? Nampo nove kulizuvha ngwendi Pauline ogu ga here vekoro lyendi va karere Jehova.

2. Mapuro musinke natu ka zogera mosirongwa esi?

² Kapi tatu vhuru kusininika vekoro lyetu va tambure mbudi zongwa, nye kuvhura tu va korangede yipo va gazadare ko kombudi ezi za kara moBibeli. (2 Tim. 3:14, 15) Morwasinke natu zuvhisira mbudi zongwa kekoro lyetu? Morwasinke natu gazadarera ko wopeke? Yisinke natu rugana yipo tu vatere vekoro lyetu va dive Jehova? Ngapi omu womombungakriste nava tu vatera?

3. Kuliza na-2 Peturusa 3:9, morwasinke natu zuvhisira mbudi zongwa kekoro lyetu?

³ Ntaantani tupu Jehova a ka zonagure po uzuni ou. Vantu ava “gwa tumbukira mwenyo gwanarunye” yiwo velike tupu ngava ka paruka. (Yirug. 13:48) Ose kuruganesa siruwo setu nononkondo detu yipo tu zuvhisire vantu ava twa dira kudiva. Yipo nye, twa hepa kuzuvhisira hena vekoro lyetu  yipo nawo va ya karere Jehova. Guhyetu geharo Jehova, “kapi ga hara asi ngapa zonauke nampili gumwe, age kwa hara asi navenye ngava litezurure.”—Resa 2 Peturusa 3:9.

4. Epuko musinke atu rugana apa atu rugana apa atu zuvhisire vekoro lyetu?

⁴ Twa hepa kudiva asi pwa kara nkedi zongwa nezi zondona omu natu zuvhisa mbudi ezi ngazi parura vantu. Pasihonena, apa atu zuvhisire vantu ava twa dira kudiva, ose kuuyunga nawo monkedi zongwa zombili. Nye apa atu zuvhisire vekoro lyetu, ose nampo kapi atu uyunga nawo monkedi zongwa.

5. Yisinke twa hepa kudiworoka komeho tu zuvhisire vekoro lyetu?

⁵ Apa atu gazadara ko sikando setu sokuhova kuzuvhisira vekoro lyetu, sinzi setu nampo kulivera nokulizuvha asi ngano twa va zuvhisilire monkedi zapeke. Mupositoli Paurusa kwa pukwilire Vakriste asi: “Nonkango deni adi kare nkenye apa donongwa donontovara domungwa, asi mu dive kulimburura nkenye ogu ana kumupura.” (Koros. 4:5, 6) Ya kara nomulyo tu diworoke etjangwa eli nsene kuna kuzuvhisira vekoro lyetu. Nsene tu dira kuyirugana, ose kuvhura ngatu va handukise mevango lyokuvavatera.

6-7. Gava sihonena esi sina kulikida mulyo gokugazadara ko yihepwa yovalikwali vetu wovahapuli.

⁶ Gazadara ko wopeke. Pauline ogu tuna tumbura ketameko kwa tanta asi: “Pomuhowo ame kwa here tupu kuzogera namugara gwange kuhamena Bibeli. Ose kapi ngatu zogere yininke yapeke.” Nampili ngoso, mugara gwendi Wayne, kapi ga divire nawa Bibeli ntani kapi ga kwete  egano eyi nga uyunga Pauline. Age kwa yi tere asi mukadendi nga gazadara tupu kuhamena ukareli wendi siruwo nasinye. Ntani age kwa kere nosinka asi mukadendi kuna kulipakerera kumwe nombunga zosiponga ntani va mu pukisa.

⁷ Pauline kwa tanta asi siruwo nasinye age nga kara novapuli vakwawo komapongo nomokuzuvhisa ntani konopati. Ntani age kwa tanta asi: “Poyiruwo yimwe apa Wayne nga wiza pembo, kapi nga ya gwana po muntu ntani nga lizuvhu mukuma.” Wayne nga rongora mukadendi namunwendi. Age kapi ga divire vantu ava nga kara nawo mukadendi namunwendi ntani kwa lizuvhire asi Pauline kwa here unene vakaume vendi kumupitakana. Eyi kwa ninkisire Wayne a tantere mukadendi asi ana hara kumuzumba. Kuvhura o gazadare ko omu Pauline ngano ga yi likidire asi age kugazadara ko yihepwa yamugara gwendi ndi?

8. Kuliza na-1 Peturusa 3:1, 2, yisinke ayi kundama po unene vekoro lyetu?

⁸ Tura po sihonena sosiwa. Eyi atu rugana kukundama unene vekoro lyetu kupitakana eyi atu uyunga. (Resa 1 Peturusa 3:1, 2.) Konyima, Pauline ga ya dimbwilire usili wononkango odo. Age kwa tanta asi: “Na yi divire asi Wayne ga tu hara ntani kapi ga here kuzumba nge. Nye apa ga uyungire nonkango odo, yipo na dimbwilire asi na hepa kusikisa mo eyi a uyunga Jehova kuhamena nonkwara. Na hepere kutura po sihonena sosiwa mevango tupu lyokuzogera nage kuhamena yoBibeli.” Pauline kwa tamekere kuzogera namugara gwendi yininke nayopeke mevango lyokumusininika va zogere kuhamena Bibeli. Wayne ga ya dimbwilire nkareso zongwa zamukadendi  ntani ga mwene munwendi kuna kumulimburukwa. (Yis. 31:18, 27, 28) Apa Wayne ga mwene omu Bibeli zina kuvatera epata lyendi, nage yipo ga tamekere kutambura mbudi zomoBibeli.—1 Kol. 7:12-14, 16.

9. Morwasinke natu twikilira kuvatera vekoro lyetu?

⁹ Twikira kuvatera vekoro lyoge. Jehova kwa tu tulira po sihonena, age nkenye apa kupa mpito vantu yipo va tambure mbudi zongwa nokukagwana mwenyo gwanarunye. (Jer. 44:4) Mupositoli Paurusa kwa tanterere Timoteusa a kovekede kuvatera wopeke. Pokuyirugana oyo, age nga vhura kukaparuka kumwe nava ngava mu purakene. (1 Tim. 4:16) Ose kwa hara vekoro lyetu ntani tuna hara va lironge usili womoNonkango daKarunga. Nkareso zaPauline nononkango dendi kwa kundamene mugara gwendi monaruwa. Ngesi age ana hafa morwa kuna kukarera Jehova kumwe namugara gwendi. Nage namugara gwendi kurugana uzuvhisi wokukarerera ntani Wayne ngesi mukuronambunga.

10. Morwasinke natu likidira elididimiko?

¹⁰ Lididimika. Apa atu paruka kuliza nonompango daKarunga, vekoro lyetu kuvhura kuvadigopera kutambura epuliro lyetu nomu atu paruka. Pomuhowo awo kudimburura asi kapi hena tuna kulihameka mo moupolitika nomoyipito youkarelikarunga. Vamwe vekoro lyetu kuvhura va tu nyenge. (Mat. 10:35, 36) Nye twa hepa kutwikira ngorooro kuvavatera. Nsene tu hageka, ose ngoso kuna kuvapangura asi kapi va wapera mwenyo gwanarunye. Jehova kapi ga tu pa situmbukira sokupangura wopeke, age kwa si gava kwaJesus. (Joh. 5:22) Nsene tu lididimika, konyima vekoro lyetu kuvhura ngava hare kupurakena kombudi zetu.—Tara kakende “ Ruganesa Intaneta zetu mokuronga.”

11-13. Yisinke ono lirongere ko monkedi omu Alice ga tekwire vakondi vendi?

¹¹ Kara nonondunge ntani kwaterera ketokoro lyoge. (Yis. 15:2) Gazadara ko kweyi ya horokerere Alice. Age kwa lirongere kuhamena Jehova apa ga kere ure novakondi vendi ava va dilire kupura mwaKarunga ntani awo kwa here youpolitika. Age ga dimbwilire asi ga hepa kuvatantera usimbu kuhamena yininke yoyiwa eyi ana kulironga. Alice kwa tanta asi: “Nsene o ndindira siruwo sosire, apa ngo yi va tantera ngayi va handukisa unene.” Alice nga tjangere vakondi vendi nombilive dokuhamena eyi azi rongo Bibeli koyirongwa eyi ga gazarere asi kuvhura va yi hafere, ngwendi eharo. (1 Kol. 13:1-13) Ntani nga pandura vakondi vendi kweyi va mu rerere nokumupakera mbili ntani nga va tumine mauhwi. Apa nga va dingura, age nga vatere ozina noyirugana yemembo. Pomuhowo, apa Alice ga va tanterere kuhamena ukareli wendi woupe, awo kapi va yi haferere.

¹² Posiruwo esi Alice nga dingura vakondi vendi, age kwa twikilire kuresa Bibeli zendi nkenye ezuva. Age kwa tanta asi: “Eyi kwa vaterere onane va dimburure omu Bibeli za kara nomulyo kwange.” Oguhwe kwa tokwere kulironga Bibeli yipo va dive eyi ya tjindjire munwawo ntani kwa here kugwana mapuko moBibeli. Alice kwa tanta hena asi: “Ame kwa va pere Bibeli nokuvatjangera mo mbudi.” Yisinke ya horokere konyima zosiruwo? Mevango lyokugwana mapuko, oguhwe vaAlice kwava tetukisire eyi va resere moBibeli.

¹³ Twa hepa kutwikira kukara nonondunge nampili kuna kutuhepeka ndi kuna kuturwanesa. (1 Kol. 4:12b) Pasihonena, Alice ga hepere kulididimika apa va mu rwanesere ozina. Age kwa tanta asi: “Apa  na gwene ekuho, oyina kwa uyungire asi ame ‘munona gomudona.’” Yisinke ga rugene ko? Age kwa tanta hena asi: “Nye ame kapi na hagekere kuvatantera kuhamena epuliro lyange, ame kwa va tanterere nefumadeko asi nina tokora kukara gumwe goNombangi daJehova ntani kapi ngani rundurura etokoro lyange. Ame kwa hetekerere ko kulikida oyina asi na va hara unene. Natuvenye kwa lilire ntani konyima tani va terekere nondya donongwa. Konyima zosiruwo, oyina va ya dimbwilire asi Bibeli kwa vaterere nge ni kare muntu gomuwa.”

14. Morwasinke natu kwaterera ketokoro lyetu nampili kuna kuturwanesa?

¹⁴ Ayo kuvhura yi guse vekoro lyetu siruwo komeho va ya dimburure asi sili tuna tokomene kukarera Jehova. Pasihonena, apa Alice ga tokwere kurugana uzuvhisi wokukarerera mevango lyokurugana eyi va mu harerere vakondi vendi, ayo kwa lilisire hena ozina. Nye age kwa kwaterere ketokoro lyendi. Age kwa tanta asi: “Nsene o va pulisira va tjindje etokoro lyoge limwe, awo kuvhura hena ngava tjindje nomatokoro goge gamwe. Nye nsene o kara nonondunge nokukwaterera ketokoro lyoge, vekoro lyoge vamwe ngava ku purakena.” Eyi yiyo ya horokerere Alice. Vakondi vendi navenye ngesi kuna kara vazuvhisi wokukarerera ntani oguhwe vakuronambunga.

15. Kuliza naMateusa 5:14-16 ntani 1 Peturusa 2:12, ngapi ‘yirugana yoyiwa’ yovanavazinyetu nayi vatera vekoro lyetu?

¹⁵ Jehova kuruganesa ‘yirugana yoyiwa’ yovantu womombungakriste yipo a koke vantu va wize kwendi. (Resa Mateusa 5:14-16; 1 Peturusa 2:12.) Nsene ove kwa  kwara mugara ndi mukadi gomuhapuli, age ga lidiva novanavazinyetu ndi? Pauline ogu tuna tumbura ketameko nga zigida vanavazinyetu kembo lyendi yipo va ka lidive kumwe namugara gwendi Wayne. Mugara gwendi kudiworoka omu munazinyetu gumwe ga mu vaterere a dive asi Nombangi vantu musinke. Wayne kwa tanta asi: “Munazinyetu ogo kwa lihundilire koyirugana nokuyatarera mbara kumwe name. Eyi ya ninkisire nge ni dimburure asi Nombangi nani nado kurugana yokulisiga-siga.”

16. Morwasinke natu zigidira vekoro lyetu komapongo?

¹⁶ Nkedi zimwe zongwa po omu natu vatera vekoro lyetu kuna kara pokuvazigida komapongo. (1 Kol. 14:24, 25) Epongo lyokuhova eli ga zire Wayne kuna kara lyoMurarero gwaHompa morwa alyo kwa kere lyesupi ntani kwa kere konyima zoyirugana. Age kwa tanta asi: “Kapi na kwete nawa egano siuyungwa, nye ame kudiworoka omu va tekwire nge vantu. Awo kwa tambwire nge nokumorora nge ntani na yi dimbwilire asi awo kapi va lininkisire.” Valikwali vamwe ngava vatere Pauline namunwendi komapongo ntani mokuzuvhisa. Yipo nye, apa Wayne ga tokwere asi ana hara kudiva ukareli wamukadendi, yipo ga pulire valikwali owo va lironge nage Bibeli.

17. Kosinke natu dira kulipa usima, nye morwasinke natu twikilira kuvatera vekoro lyetu?

¹⁷ Natuvenye kwa hara vekoro lyetu ngava karere Jehova. Nampili ngomu atu litura mo mokuvavatera, poyiruwo yimwe kuvhura va dire kutambura usili. Nsene yi horoka ngoso, twa ha lipa usima. Ose kapi tatu vhuru kusininika vantu va tambure usili. Nye nsene vekoro lyoge va mona ruhafo oru o gwana mokukarera Jehova, kuvhura ngayi va vatere. Va kanderera po. Uyunga kumwe nawo nonondunge. Twikira kuvazuvhisira. (Yirug. 20:20) Kara nehuguvaro asi Jehova nga tungika elituromo lyoge. Ano nsene vekoro lyoge va ku purakena, awo ngava ka paruka!