SIRONGWA SELIRONGO 32
Eharo lyeni li vhuke
“Ame kuna kumukandererera asi, eharo lyeni ngano tali vhuka unene.”—FIL. 1:9.
RUSUMO 106 Tunga po sikara seharo
ETWAROMO *
1. Wolye va tulisire po mbungakriste zomoFilipi?
APA mupositoli Paurusa naSirasa naRukasa ntani naTimoteusa va ka sikire mositata esi ngava pangere Varoma sedina Filipi, awo kwa ka gwene vantu wovanzi ava va here kupurakena kombudi zongwa. Vanavazinyetu owo vane kwa tulisire po mbungakriste moFilipi nokutameka kuponga kumwe membo, nampo lyomukadi gedina Lidiya, ogu ga kere mupuli.—Yirug. 16:40.
2. Maudigu musinke za ligwanekerere nago mbungakriste ozo zompe?
2 Konyima, mbungakriste ezi zompe kwa ligwanekerere nomaudigu. Satana kwa ninkisire vantu ava va dilire kuhara usili va rwanese Paurusa novakwawo yipo va hageke kuzuvhisa. Paurusa naSirasa kwa va kwete nokuvatoona noyiuro ntani nokuvatura modorongo. Konyima zapa va pwege modorongo, awo kwa zire va ka dingure varongwa wovape nokuvakorangeda. Paurusa naSirasa ntani Timoteusa kwa tundire mositata oso, nye ayo kumoneka asi Rukasa kwa kere. Yisinke va rugene vanavazinyetu womombungakriste ozo zompe? Jehova kwa va pere mpepo zendi zokupongoka ezi za va vaterere va twikire kumukarera noupampi. (Fil. 2:12) Paurusa kwa hefe pokumona vanavazinyetu owo kuna kutwikira kukarera Jehova.
3. Kuliza noVafilipi 1:9-11, yininke musinke ga tumbwire Paurusa mekanderero lyendi?
3 Konyima zonomvhura murongo, Paurusa kwa tjangerere mbilive kombungakriste zomoFilipi. Pokuresa mbilive ezi, kuvhura o dimburure omu Paurusa ga here vapuli vakwawo. Age kwa tjenge asi: “Na mu diworoka unene namuvenye norutjima romwaJesus Kristusa.” (Fil. 1:8) Age kwa tente asi age kwa va kandererere po. Paurusa kwa kanderere kwaJehova yipo eharo lyawo li kure unene, va horowore yoyiwa po, va kare vana kuhuka awo hena va pire usima kovantu ndi va dire kuvapundukisa ntani va yime yiyimwa youhungami. Nose kuvhura tu lirongere ko kononkango daPaurusa. Tu zeni tu ka rese eyi Paurusa ga tjangerere Vafilipi. (Resa Vafilipi 1:9-11.) Tatu ka konakona yininke yimwe eyi ga tumbwire nomu natu yi tura pasirugana.
EHARO LYENI LI VHUKE
4. (a) Kuliza na-1 Johanesa 4:9, 10, ngapi omu Jehova ga tu likida asi ga tu hara? (b) Ngapi omu natu hara Karunga?
4 Jehova kwa tu likida asi ga tu hara unene apa ga tumine Munwendi a ya tu fire kononzo detu. (Resa 1 Johanesa 4:9, 10.) Mokumona asi age ga tu hara, ayo kututumangeda nose tu mu hare. (Rom. 5:8) Ngapi omu natu hara Karunga? Jesus kwa limbwilire epuro olyo apa ga tanterere Mufalisayi gumwe asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mat. 22:36, 37) Twa hepa kuhara Karunga nomutjima gwetu nagunye. Ntani tuna hara eharo lyetu kwendi li kure nkenye ezuva. Paurusa kwa tanterere Vafilipi asi eharo lyawo lya hepa ‘kuvhuka unene.’ Yisinke natu rugana yipo tu hare unene Karunga?
5. Yisinke natu rugana yipo tu hare unene Karunga?
5 Mokuninka asi tu hare Karunga, ntudi twa hepa kumudiva. Bibeli kutanta asi: “Ogu ga dira kuhara mukwawo, ogo kapi ga diva Karunga, yeeyi Karunga yige eharo.” (1 Joh. 4:8) Mupositoli Paurusa kwa tente asi eharo lyetu kwaKarunga ngali kura nsene tu kara ‘nediwo noukonentu’ kumuhamena. (Fil. 1:9) Apa twa tamekere kulironga Bibeli, ose kwa tamekere kuhara Karunga nampili ngomu twa divire yoyisesu kumuhamena. Ngomu twa twikilire kulironga kuhamena Jehova, ose kwa ya tamekere kumuhara unene. Eyi yiyo ya karera nomulyo tu lironge Bibeli nkenye ezuva nokuteda ko kweyi tuna kulironga.—Fil. 2:16.
6. Yisinke natu lirongera ko ketjangwa eli lya-1 Johanesa 4:11, 20, 21?
6 Eharo eli ga tu likida Karunga kututumangeda nose tu hare hena vanavazinyetu. (Resa 1 Johanesa 4:11, 20, 21.) Nampo kuvhura tu gazare asi ayo ureru kuhara vanavazinyetu morwa natuvenye kukarera Jehova ntani kuhonena yikara yendi yoyiwa. Ntani ose kuhonena Jesus ogu ga tu likida eharo lyenene pokutufira. Nye nampili ngoso, poyiruwo yimwe kuvhura yi tu digopere kusikisa mo mpango zokuhara vapuli vakwetu. Pasihonena, tu tareni eyi ya horokere mombungakriste zoVafilipi.
7. Yisinke natu lirongera ko kepukururo eli ga geve Paurusa kwaEwodiya naSintike?
7 Ewodiya naSintike kwa kere vanavazinyetu womupampi ava “ngava rugana unene kumwe” naPaurusa. Nye awo nampo kwa pulisilire madiro kulizuvha ga va ninkise va dire kukara vakaume. Mombilive ezi Paurusa ga tumine kombungakriste ezi va kere vanavazinyetu owo, age kwa tumbwire Ewodiya naSintike nokuvapukurura va ‘lize mutjima gumwe.’ (Fil. 4:2, 3) Paurusa kwa tanterere hena mbungakriste mudima asi: “Nayinye omu yi rugane mwa hana mavhunguto ndi esinganyeko.” (Fil. 2:14) Yosili, mapukururo gaPaurusa kwa vaterere vanavazinyetu owo vavali ntani nava womombungakriste yipo va lihare unene.
Morwasinke natu demenena koyikara yoyiwa yovanavazinyetu? (Tara paragarafu 8) *
8. Yisinke nayi tu ninkisa tu dire kuhara vanavazinyetu, ntani yisinke natu rugana yipo tu va hare?
8 Ngwendi Ewodiya naSintike, poyiruwo yimwe nose kutudigopera kuhara vanavazinyetu morwa ose kudemenena komapuko gawo. Natuvenye kulipuka nkenye ezuva. Nsene tu demenena komapuko govakwetu, ayo ngayi tu digopera kuvahara. Pasihonena, nsene munazinyetu a dira kuzeresa Sinyanga soUhompa kumwe nose, ayo kuvhura yi tu handukise. Nsene tu gazadara nkenye apa komapuko aga ga rugana munazinyetu ogo, ayo ngayi tu handukisa unene ntani kapi ngatu mu hara. Nsene yimo o lizuvhu ngoso kwagumwe gomombungakriste, ya wapa kugazadara ko kositwa esi: Jehova kumona mapuko getu ntani naga a tura munazinyetu ogo. Nye nampili ngomu atu tura mapuko, age ga tu hara natuvenye. Yipo nye, twa hepa kuhonena Jehova nokudemenena koyikara yoyiwa yovanavazinyetu. Nsene tu kondja mokuhara vanavazinyetu, ose ngatu kara mouumwe wounene.—Fil. 2:1, 2.
“YOYIWA PO”
9. Yisinke yininke “yoyiwa po” eyi ga tumbwire Paurusa mombilive ezi ga tjangerere Vafilipi?
9 Jehova kwa gendesere Paurusa a tjangere Vakriste womoFilipi asi va ‘horowore yoyiwa po.’ Nose twa hepa kurugana yokulifana. (Fil. 1:10) Yininke eyi yoyiwa po kwa kwatera mo kuyererepeka edina lyaKarunga, sitambo sendi ntani mbili nouumwe womombungakriste. (Mat. 6:9, 10; Joh. 13:35) Nsene tu tura muhowo yininke eyi meparu lyetu, ayo ngayi likida asi twa hara Jehova.
10. Yisinke natu rugana yipo Jehova a tu tare asi twa kuhuka?
10 Paurusa kwa tente hena asi twa hepa ‘kukuhuka.’ Eyi kapi yina kutanta asi twa hepa kusikilira mo. Kapi tatu vhuru kusikilira mo ngwendi Jehova. Nye nsene tu kara neharo lyenene ntani nokuhorowora yoyiwa po, Jehova nga tu tara asi twa kuhuka. Nkedi zimwe omu natu likida eharo kuna kara pokukondja tu dire kupundukisa vakwetu.
11. Morwasinke natu dilira kupundukisa wopeke?
11 Kupundukisa wopeke kuna kara sininke sosinene. Ngapi omu natu pundukisa wopeke? Ose kuvhura tu pundukise wopeke kupitira moyilihafeso yetu neyi atu dwara ntani noyirugana eyi tuna kuhorowora. Kuvhura tu rugane yininke eyi ga dira kusilika Jehova. Nye nsene ayo kuna kupundukisa ezwi lyokomutjima lyovakwetu, twa hepa kurugana ko yuma. Jesus kwa tente asi nsene tu pundukisa vakwetu, ose twa fira kutumangerera emumanya monsingo, tu ka dame nalyo mefuta.—Mat. 18:6.
12. Yisinke natu lirongera ko kweyi va rugene vazuvhisi wokukarerera wovalikwali?
12 Koneka omu vazuvhisi wokukarerera wovalikwali va sikisire mo erondoro lyaJesus. Awo kwa kere mombungakriste kumwe novalikwali ava va gwene ekuho, ava va kulira mepata lyonoveta dononzi. Valikwali owo wovape kwa yi pulire asi Vakriste nokutarera si nomuvi nampili donongwa deedi. Apa va zuvhire asi vazuvhisi owo wokukarerera kava ka tarerere muvi, ayo kwa va tetukisire. Eyi kwa ninkisire vazuvhisi owo wokukarerera va hageke kuza konomuvi dogoro apa valikwali owo wovape va ya dewire nawa ezwi lyawo lyokomutjima nokudiva yoyiwa neyi yoyidona. (Heb. 5:14) Eyi va rugene vazuvhisi owo wokukarerera kwa likidire asi awo kwa hara valikwali owo wovape mononkango nomoyirugana.—Rom. 14:19-21; 1 Joh. 3:18.
13. Ngapi omu natu vhura kuninkisa gumwe a ture nzo?
13 Nkedi zimwe omu natu pundukisa vakwetu kuna kara pokuvaninkisa va ture nzo. Ngapi natu vhura kuyirugana? Gazadara ko kosihonena esi. Murongwa goBibeli ogu nga nu unene marovhu, ngesi kapi ana kara hena mupika gomarovhu. Age ga yi dimburura asi ga hepa kuhageka kunwa marovhu. Makura ta tura po ezokomeho nokugwana ekuho. Konyima, munazinyetu gumwe ta mu zigida kopati ntani ta korangeda munazinyetu ogo a nwe marovhu pokutanta asi: “Ngesi o Mukriste, wa kara nompepo zokupongoka. Simwe soyiyimwa yazo kuna kara elipangero. Nsene o lipangera, kapi no nwa unene.” Gazara tupu eyi nayi horoka nsene munazinyetu ogo gomupe a tambura magano ogo gepuko!
14. Ngapi omu mapongo aga tu vatere tu ture pasirugana mapukururo gomoVafilipi 1:10?
14 Mapongo getu goSikriste kutuvatera tu ture pasirugana mapukururo gomoVafilipi 1:10. Sokuhova, ago kutudiworokesa eyi a tara Jehova asi mulyo. Sauvali, ago kutuvatera tu ture pasirugana eyi tuna kulironga yipo tu kare tuna kuhuka. Ntani sautatu, ago kutukorangeda tu ‘lihara-hare nokurugana yirugana yoyiwa.’ (Heb. 10:24, 25) Apa ava tu korangeda vanavazinyetu, ayo kutuvatera tu hare unene Karunga novanavazinyetu. Nsene tu hara Karunga novakwetu, ayo ngayi tu vatera tu dire kupundukisa vanavazinyetu.
TWIKIRENI KUYIMA “YIYIMWA YOUHUNGAMI”
15. Yisinke ayi tanta kuyima “yiyimwa youhungami”?
15 Paurusa kwa kanderere po Vafilipi yipo vava “zwide yiyimwa youhungami.” (Fil. 1:11) “Yiyimwa youhungami” kwa kwaterere mo kuhara Jehova novapuli vakwawo ntani kutantera ko wopeke kuhamena Jesus ntani nehuguvaro lyawo lyokomeho. Vafilipi 2:15 kwa ruganesa hena sifanekeso simwe esi asi: “Mu paime mokatji kawo ngwendi nombungururu.” Nonkango edi kutudiworokesa nonkango edi ga tanterere Jesus varongwa vendi asi: “One nyone uzera wouzuni.” (Mat. 5:14-16) Jesus kwa pangera hena vasikuli vendi va ‘tulise po varongwa’ ntani age kwa tente asi awo ngava kara “nombangi . . . dogoro nokooku wa ka twa uzuni.” (Mat. 28:18-20; Yirug. 1:8) Yipo nye, ose kuyima “yiyimwa youhungami” apa atu lihameke unene mokuzuvhisa.
Apa mupositoli Paurusa ga kere modorongo zemembo moRoma, age kwa tjangerere mbilive mbungakriste zomoFilipi. Posiruwo sooso hena, Paurusa kwa ruganesere nkenye mpito a zuvhisire vanomeni ntani kwava ngava ya mu dingura (Tara paragarafu 16)
16. Ngapi etjangwa lyomoVafilipi 1:12-14 ali likida asi kuvhura tu paime ngwendi nombungururu nampili moukaro woudigu? (Tara efano lyopontunda.)
16 Yi kare asi moukaro musinke tuna kara, ose kuvhura tu paime ngwendi nombungururu. Poyiruwo yimwe, yininke eyi ayi tu ninkisa tu dire kuza mokuzuvhisa kuvhura kutuvatera tu zuvhise. Pasihonena, apa mupositoli Paurusa ga tjangerere mbilive Vafilipi, age kwa kere modorongo zemembo moRoma. Nampili ngomu ga kere modorongo, age kwa zuvhisilire ava ngava mu takamesa ntani nava ngava ya mu dingura. Paurusa kwa zuvhisire nomupampi nampili ngomu ga kere modorongo ntani eyi kwa vaterere Vakriste vakwawo va kare “nomupampi mokuuyunga nonkango daKarunga va hana woma.”—Resa Vafilipi 1:12-14; 4:22.
Papara nompito nkenye apa yipo o lihameke mokuzuvhisa (Tara paragarafu 17) *
17. Gava sihonena omu vanavazinyetu va yima yiyimwa youhungami moukaro woudigu.
17 Sinzi sovanavazinyetu, nawo kwa kara nompito zokuhonena uradi waPaurusa. Awo kwa tunga moyirongo omu va silika sirugana setu, nye awo kupapara nonkedi dimwe yipo va zuvhise. (Mat. 10:16-20) Mosirongo simwe omu va silika sirugana setu, mutareli gonombunga kwa tanterere vazuvhisi asi va hepa kuzuvhisira vanekoro novamusinda novanasure vakwawo novarugani vakwawo ntani kwava va diva. Konyima zonomvhura mbali, nombungakriste domosirongo oso kwa ligwederere unene. Nampo mosirongo omu twa kara, sirugana setu kapi va si silika. Nye kuvhura tu lirongere ko yoyinzi kovanavazinyetu owo. Nose twa hepa kupapara nompito yipo tu vhure kuzuvhisa. Nsene tu yi rugana, Jehova nga tu pa nonkondo nampili yi tu karere udigu.—Fil. 2:13.
18. Yisinke tuna tokomene kurugana?
18 Ngano natuvenye tu tokomeneni kukwama mapukururo gaPaurusa aga ga tjangerere Vafilipi. Tu horoworeni yoyiwa po nokukuhuka nokunyokera po kupundukisa wopeke nokuyima yiyimwa youhungami. Nsene tu yi rugana, eharo lyetu ngali vhuka ntani ngatu retera mfumwa Guhyetu geharo, Jehova.
RUSUMO 17 “Na Hara”
^ para. 5 Twa hepa kuhara vanavazinyetu unene kupitakana pwanare. Mbilive ezi va tjangerere Vafilipi kutuvatera tu likide unene eharo nampili ngomu tuna kuligwanekera nomaudigu.
^ para. 54 EFANO: Ngomu vana kuzeresa Sinyanga soUhompa, munazinyetu Joe, ta hageke kuzeresa nokuzogera namunazinyetu gumwe namunwendi. Eyi yina handukisa Mike ogu ana kuzeresa. Ta litantere mwene asi ‘Joe ga hepa kuhageka kuuyunga a wize a ya zerese.’ Konyima Mike ta mono Joe kuna kuvatera munazinyetu gomukurupe. Makura ta yi mu diworokesa a demenene koyikara yaJoe yoyiwa.
^ para. 58 EFANO: Mosirongo omu va silika sirugana setu, munazinyetu kuna kutantera ko mukwawo kuhamena mbudi zoUhompa va hana kuyidimburura wopeke. Konyima, munazinyetu gokulifana kuna kuzuvhisira mukwawo koyirugana pometaha.
