KOSILI sirugana esi wa hara kurugana mombungakriste nye kapi o sirugana ndi? Nampo aso kuna kara sirugana esi a rugana munazinyetu gumwe. Ndi nampo aso kuna kara sirugana esi ngo rugana nare. Nampo ove kapi hena ono kurugana sirugana oso morwa ukurupe ndi uvera ndi udigu woyimaliwa ndi nampo kuna kupakera mbili epata lyeni. Ove nampo wa gava sirugana soge sanare kwavamwe morwa marunduruko aga gana kuhoroka mombunga zaJehova. Yi kare asi konda musinke, nampo kuvhura o lizuvhe asi kapi ono kurugana hena yoyinzi mosirugana saJehova. Yosili, poyiruwo yimwe kuvhura o lizuvhe ngoso. Nye nampili ngoso, yisinke nayi ku vatera yipo o dire kudompa mutjima ndi o kare nonkoko? Ngapi omu no twikira kukara noruhafo?

Kuvhura tu lirongere ko kwaJohanesa Mukuhwi kuhamena omu natu twikira kukara noruhafo. Johanesa kwa haferere sirugana sendi, nye nampo age kapi ga divire asi yisinke ngayi horoka komeho. Ntani age nampo kapi ga yi ndindilire asi nga kara modorongo siruwo sosire kupitakana esi nga zuvhisa. Nye nampili ngoso, Johanesa kwa twikilire kukara noruhafo meparu lyendi mudima. Yisinke ya mu vaterere? Ngapi natu twikira kukara noruhafo nampili kuna kuligwanekera neyi twa dira kundindira?

Momvhura 29 koyiha yaKudumogona, Johanesa kwa tamekere sirugana esi ga mu pere Jehova mokuvatera vantu va liwapaikire ewizo lyaMesiyasa. Age kwa tente asi: “Litezurureni, yeeyi Untungi weguru pepi una kara.” (Mat. 3:2; Ruk. 1:12-17) Sinzi sovantu kwa purakenene. Vantu wovanzi kwa tundire koure va wize mokuyapurakena, ano sinzi sawo kwa litezwilire nokuvakuhwa. Johanesa kwa rondwere hena vampitisili womaukarelikarunga ava ngava limono asi va pongoka, kuhamena mpanguro ezi za kere komeho nsene kapi vana kulitjindja. (Mat. 3:5-12) Ntani age hena kwa rugene sirugana somulyo po apa ga kuhwire Jesus koyiha yaSikukutu momvhura 29. Kutunda pena, Johanesa nga tantere vantu va kwame Jesus, Mesiyasa getumbwidiro.—Joh. 1:32-37.

Sirugana saJohanesa kwa kere nomulyo, eyi yiyo ya ninkisire Jesus a uyunge asi: “Kutupu ogu va hampuruka vakadi ga pita Johanesa Mukuhwi.”  (Mat. 11:11) Yosili, Johanesa kwa haferere eyi ga tompwere mosirugana sendi. Ngwendi Johanesa, vantu wovanzi naina kuhafera eyi va tompora mosirugana saJehova. Gumwe govanavazinyetu owo kuna kara Terry. Nage namukadendi Sandra kwa rugana sirugana sosiruwo nasinye nomvhura dokupitakana 50. Terry kwa tanta asi: “Ame kwa hafera yirugana yokulisiga-siga. Ame kwa kere muzuvhisi gokukarerera noMunabeteli nomuzuvhisi gosiruwo nasinye nomutareli gonombunga nomutareli gonomukunda, ano ngesi ame kuna kara hena muzuvhisi gosiruwo nasinye.” Ayo kutuhafesa apa atu gwana yitumbukira mombunga zaJehova. Nye ngomu natu ka yi lironga kosihonena saJohanesa, twa hepa kurugana ko yuma yipo tu kare noruhafo nsene ukaro wetu una runduruka.

Johanesa Mukuhwi kwa kere noruhafo morwa kwa kere norupandu kositumbukira esi ga kere naso. Pasihonena, konyima zapa Jesus ga gwene ekuho, sivaro sovarongwa vaJohanesa kwa tamekere kusesupa, nye vaJesus kwa ligwedererere. Varongwa vaJohanesa va kere nosinka yipo va zire kwaJohanesa nokukamutantera asi: “Ogu wa sanseka, ko tara si, ta kuhu sa, ano navenye yiyo vana kuza kwendi.” (Joh. 3:26) Johanesa kwa va limbwilire asi: “Yige muvandekeli ogu ga hamena mbandeki. Ano ogu ga likwata ukwawo nombandeki, nye a sikame pwendi, a mu purakene, age kuhafera unene ezwi lyomuvandekeli. Yiyo nye lina sikilire mo nye ehafo lyange.” (Joh. 3:29) Johanesa kapi ga hetakanesere sirugana sendi kwaJesus ndi a gazare asi sirugana sendi ngesi kwato mulyo. Nye age kwa twikilire kukara noruhafo morwa kwa tere situmbukira sendi sokukara ‘mukwawo zombandeki’ asi mulyo.

Nkareso zaJohanesa kwa mu vaterere a twikire kukara noruhafo nampili ngomu sirugana sendi sa kere udigu. Pasihonena, kutunda kehampuruko lyendi, Johanesa kwa kere Munasili ntani age kwa mu silikire kunwa vhinyu. (Ruk. 1:15) Jesus kwa uyungire kuhamena Johanesa asi: “Johanesa eyi ga wiza, kapi nga li ndi a nwe.” Nye Jesus novarongwa vendi kapi va kere Vanasili ntani awo ngava paruka ngwendi vantu navenye. (Mat. 11:18, 19) Ntani hena, Johanesa kapi nga rugana yitetu nye ga divire asi varongwa vaJesus kukwatera mo novarongwa vendi wopomuhowo, kwa va pere nonkondo dokurugana yitetu. (Mat. 10:1; Joh. 10:41) Mevango lyokuhetakanesa eyi ngava tompora varongwa vendi vanare nava vaJesus, Johanesa kwa demenene kosirugana esi ga mu pere Jehova.

Nsene nose tu kara norupandu kositumbukira esi tuna kara naso mosirugana saJehova, ayo ngayi tu vatera tu kare noruhafo. Terry ogu tuna tumbura ketameko kwa tanta asi: “Ame kwa demenenene nkenye apa kosirugana esi na gwene.” Ano ngesi apa a gazadara kuhamena eparu lyendi mosirugana sosiruwo nasinye, age kwa tanta asi: “Ame kapi ani livere, nye kudiworoka tupu omu na hafera sirugana sange.”

Kuvhura tu kare noruhafo mosirugana saJehova nsene tu gazadara ko kweyi ayi ninkisa nkenye sirugana si kare nomulyo. Sirugana setu kutupa mpito tu kare “varugani kumwe naKarunga.” (1 Kol. 3:9) Ngwendi moomu tupu uhwi au kara siruwo sosire nsene tu u pakera mbili, nose nsene tu gazadara ko kosirugana esi twa gwana sokurugana naKarunga, ayo ngayi tu ninkisa tu kare noruhafo. Kapi ngatu hetakanesa eyi twa tompora neyi vana kutompora vakwetu. Ntani kapi ngatu tara sirugana esi va gwana vakwetu asi mulyo unene kupitakana esi twa kara naso.—Gar. 6:4.

Johanesa nampo ga yi divire asi sirugana sendi ngasi haga, nye nampo kapi ga yi ndindilire asi ngasi haga usimbu. (Joh. 3:30) Konyima zomakwedi ntazimwe kutunda apa ga kuhwire Jesus, hompa Herodesa kwa tulire Johanesa modorongo momvhura 30. Nye age kwa twikilire kuzuvhisa modorongo. (Mar. 6:17-20) Yisinke ya mu vaterere a twikire kukara noruhafo nampili ngomu ga ligwanekerere nomaudigu? Age kwa demenenene kweyi ya kere nomulyo po kwaJehova.

Apa Johanesa ga kere modorongo, age nga zuvhu nombudi kuhamena eyi ana kurugana Jesus. (Mat. 11:2; Ruk. 7:18) Johanesa ga yi pulire asi Jesus kwa kere Mesiyasa, nye nampo ga lipulire omu Jesus nga sikisa mo mauporofete nagenye aga va  pumbire kuhamena Mesiyasa. Mokumona asi Johanesa ga yi divire asi Mesiyasa nga kara hompa, age nampo kwa gazarere asi Jesus ntaantani a kare Hompa, ntani ga gazarere nsene Jesus nga mu mangurura mo modorongo. Johanesa ga here kudiva yoyinzi kuhamena eyi nga rugana Jesus, makura yipo ga tumine varongwa vendi vavali va ka pure Jesus asi: “Ove nyove ogu asi ngo wiza ndi tu ndindire nagepeke?” (Ruk. 7:19) Apa va ka tengwire, Johanesa nampo kwa va purakenene nelituromo. Awo kwa mu tanterere asi Jesus kwa verwire vaveli ntani kwa va tumine va ya tantere Johanesa asi: “Vatwiku kuna kumona, yirema kuna kugenda, vanayingondwe kuna kuveruka, yipuru-puru kuna kuzuvha, vafe kuna kupinduka, ano vahepwe kuna kuvaudisira Mbudi zoNgwa.”—Ruk. 7:20-22.

Mbudi ezi va mu tanterere varongwa vendi kwa mu korangedere. Ayo kwa likidire asi Jesus kwa sikisire mo mauporofete aga va pumbire kuhamena Mesiyasa. Nampili ngomu Jesus ga dilire kugusa Johanesa modorongo, Johanesa ga yi divire asi sirugana sendi kapi sa kere somawoko-woko. Nampili ngomu ga kere moukaro owo, age kwa hefe.

Nsene tu demenena kweyi a tara Jehova asi mulyo, ayo ngayi tu vatera tu lididimikire maudigu nehafo ngwendi Johanesa. (Koros. 1:9-11) Kuvhura tu lididimikire nsene tu resa Bibeli nokuteda ko. Eyi ngayi tu vatera tu dive asi sirugana setu kapisi somawoko-woko. (1 Kol. 15:58) Sandra kwa tanta asi: “Kuresa egaununo limwe lyomoBibeli nkenye ezuva kwa vatera nge ni hedere Jehova pepi. Ntani ayo kuvatera nge ni demenene kwendi mevango lyokudemenena komaudigu gange.” Nose kuvhura tu demenene konombudi dokuhamena omu vanavazinyetu vana kuruganena Jehova. Nsene tu yi rugana, ayo ngayi tu vatera tu dire kudemenena koukaro wetu. Sandra kwa tanta hena asi: “Elikwamo lyoJW Broadcasting^® kutuvatera tu dive nawa mbunga zaJehova. Ntani alyo kutuvatera tu kare noruhafo mosirugana setu.”

Johanesa nga zuvhisa “nononkondo ngwendi muporofete Eliya.” Ngwendi Eliya, nage kwa kere nomalizuvho “ngwendi nyose.” (Ruk. 1:17; Jak. 5:17) Nsene tu honena Johanesa pokudemenena kosirugana setu nokukara norupandu, nose ngatu kara noruhafo yi kare asi yisinke ngatu ligwanekera nayo.