EPURO kutupa nonkondo dononene. Pasihonena, nampili ngomu Satana ga hara kuteza po elikwatakano lyetu naJehova, epuro kutuvatera tu ‘dimise yikutji yomundiro, eyi a ponyesa Mudona.’ (Efe. 6:16) Nsene tu kara nepuro, ose ngatu lididimikira maudigu gomanene. Jesus kwa tanterere varongwa vendi asi: “Nsenesi epuro lyeni li hura pombuto zomositareta, one kuvhura tupu kutantera ndundu ezi asi, ‘Tunda po apa, o hedere pena,’ makura tazi hedere po.” (Mat. 17:20) Mokumona asi epuro kuvhura kutunkondopeka pampepo, ya wapa kulipura mapuro aga asi: Yisinke epuro? Ngapi omu mutjima gwetu agu kundama epuro lyetu? Ngapi omu natu nkondopeka epuro lyetu? Ntani mwalye natu tura epuro lyetu?—Rom. 4:3.

Yinzi ya kwatera mo mepuro kupitakana tupu kupura eyi za uyunga Bibeli, morwa nampili ‘nompepo donondona nado da yi pura asi Karunga yipo ga kara ado hena kukankama.’ (Jak. 2:19) Yisinke epuro?

Bibeli kwa faturura epuro mononkedi mbali. Zokuhova, “epuro yilyo ehuguvaro lya pama lyoyininke eyi twa ndindira.” (Heb. 11:1a) Nsene wa kara nepuro, ove kuvhura o yi pure nawa-nawa asi nayinye eyi ga uyunga Jehova usili ntani ngayi ka sika mo. Pasihonena, Jehova kwa tanterere Vaisraeli asi: “Na paka po egwanekero nomutenya nomasiku, asi ngayi kare po nkenye apa posiruwo sayo; ano egwanekero olyo nokanunu si kuliteza po. Nomukereli gwange Ndafita nage yimo na paka po nendi egwanekero.” (Jer. 33:20, 21) Ove kusinganyeka asi nampo ezuva limwe, ezuva kapi ngali puma ndi likatoke ndi? Nsene kapi wa kara nomasinganyeko gangoso, kuvhura nye o singanyeke asi Musiti kapi nga sikisa mo eyi ga tanta ndi? Hawe!—Jes. 55:10, 11; Mat. 5:18.

Zauvali, epuro kuna kara maumbangi ndi “undipo woyininke eyi atu dili kumona.” Ndi “undipo woyininke” eyi aga dili kumona meho getu nye yipo ya kara. (Heb. 11:1b) Monkedi musinke? Tu tante asi munona ta ku pura asi: ‘Ngapi wa yi diva asi mpepo yipo za kara?’ Nampili ngomu wa dira kumona mpepo, kuvhura omu vatere a gazadare ko yininke eyi ayi likida asi mpepo yipo sili za kara. Pasihonena, mpepo yizo atu heseresa ntani mpepo yizo azi pepe nayimwe ngoso. Nsene munona ayi pura asi yininke oyo yipo ya kara, age kuvhura a ya yi kwate egano asi kuvhura tu pure moyininke eyi atu dili kumona. Mokulifana, epuro nalyo kwa korera momaumbangi gene-gene.—Rom. 1:20.

Mokumona asi epuro kwa korera momaumbangi gene-gene, eyi kulikida asi nsene tuna hara kukara nepuro ntudi twa hepa kukara ‘nediwo lyousili’ pomuhowo. (1 Tim. 2:4) Nye ayo kapi ya gwanena po kukara tupu nediwo lyousili. Mupositoli Paurusa kwa tjenge asi: “Yeeyi muntu age kupura momutjima gwendi.” (Rom. 10:10) Muntu ga hepa kutara usili asi mulyo kupitakana tupu kuupura. Nsene muntu a tara usili asi mulyo, ayo ngayi mu tumangeda a paruke monkedi ezi azi hafesa Karunga. (Jak. 2:20) Muntu ogu a dili kutara usili asi mulyo kuvhura a dire kutambura umbangi wene-wene morwa age kukwaterera  kweyi ga pura ndi kurugana eyi ga hara. (2 Pet. 3:3, 4; Juda 18) Eyi yiyo ya ninkisire vantu vamwe wosiruwo sanare va dire kukara nepuro nampili ngomu va mwene yitetu. (Num. 14:11; Joh. 12:37) Mpepo zokupongoka kuvatera tupu vantu ava va hara usili yipo va kare nepuro.—Gar. 5:22; 2 Tes. 2:10, 11.

Hompa Ndafita kuna kara gumwe ogu ga kere nepuro lyokupama. (Heb. 11:32, 33) Nye nampili ngoso, kapisi vantu navenye vemekoro lyendi va kere nepuro. Pasihonena, gazara kuhamena mukurwaNdafita gedina Eliyaba. Apa Golyata ga swawire Vaisraeli, Ndafita kwa guvire. Eliyaba kwa handukilire Ndafita, eyi kwa likidire asi age kapi ga kere nepuro mwaJehova. (1 Sam. 17:26-28) Kwato gumwe va reta nepuro ntani kwato gumwe gokuvhura kulipinga kovakondi vendi. Yipo nye, Ndafita kwa kere nepuro morwa ga kere nelikwatakano naKarunga.

Omu Ndafita ga tungire po epuro lyokupama kuyigwana mEpisarome 27. (Velise 1) Ndafita kwa tedere ko kweyi ga pitire meparu ntani nomu Jehova ga mu vaterere kononkore dendi. (Velise 2, 3) Age kwa haferere kuza konkongoronzugo zaJehova. (Velise 4) Ndafita nga karere Karunga kumwe novakwawo konkongoronzugo. (Velise 6) Age nga kanderere kwaJehova nkenye apa. (Velise 7, 8) Ndafita kwa here hena Karunga a mu ronge. (Velise 11) Epuro kwa kere nomulyo unene kwaNdafita, eyi yiyo ya mu ninkisire a tante asi: “Kupi ngano nina kara ndi kapi na kere nepuro?”—Velise 13, NW.

Nove kuvhura o kare nepuro ngwendi lyaNdafita, nsene o honena nkareso zendi nokurugana eyi va tjanga mEpisarome 27. Mokumona asi twa hepa ediwo yipo tu kare nepuro, nsene o lironga nkenye apa Nonkango daKarunga ntani noyimbapiratjangwa yetu, ayo ngayi ku rerupira kutunga po siyimwa esi sompepo zokupongoka. (Epis. 1:2, 3) Nsene kuna kulironga, litulira po siruwo sokuteda ko. Nsene tu teda ko kweyi tuna kulironga, ayo ngayi tu ninkisa tu kare norupandu kwaJehova. Ano ngomu rupandu rwetu kwaJehova runa kunkondopara, ayo ngayi tu ninkisa tu hare kulikida epuro lyetu pokukarera Jehova komapongo ntani nokutantera ko wopeke kuhamena ehuguvaro lyetu lyokomeho. (Heb. 10:23-25) Ntani ose kuyilikida hena asi twa kara nepuro apa atu twikire ‘kukanderera, twa hana kudwapa.’ (Ruk. 18:1-8) Yipo nye “omu kanderere narunye” kwaJehova nokuhuguvara asi “age kumupakera mbili.” (1 Tes. 5:17; 1 Pet. 5:7) Epuro kutuninkisa tu rugane youhunga, ano apa atu rugana youhunga, ayo kupameka epuro lyetu.—Jak. 2:22.

Komeho va ka mu dipage, Jesus kwa tanterere varongwa vendi asi: “Huguvareni Karunga oku  hena mu huguvare nge ame.” (Joh. 14:1) Eyi kulikida asi kapisi tu likide tupu epuro mwaJehova gelike nye hena twa hepa kupura mwaJesus. Ngapi omu no yi likida asi wa pura mwaJesus? Tu tareni nonkedi ntatu omu no yi rugana.

Zokuhova, tara sizoweseso ngouhwi ou ga ku pa Jehova. Mupositoli Paurusa kwa tente asi: “Ano mwenyo ogu na kara nago morutu oru, kuna kerere nago mokupura MunwaKarunga, ogu ga hara nge, yiyo ga gavera nge mwenyo gwendi panzambo.” (Gar. 2:20) Nsene wa pura mwaJesus, eyi kutanta asi ove wa yi pura asi Jesus nyove ga fira, ntani nonzo doge ngava di dongonona po morwa nzambo ezi ga geve. Ove wa kara hena nehuguvaro lyokukaparuka narunye, ntani nzambo zendi kukulikida nawa-nawa asi Karunga ga ku hara. (Rom. 8:32, 38, 39; Efe. 1:7) Nsene wa yi pura asi sizoweseso kuvhura si ku vatere, ayo ngayi ku vatera o dire kulizuvha unzoni.—2 Tes. 2:16, 17.

Zauvali, Hedera Jehova pepi pokukanderera kwendi kupitira monzambo zaJesus. Mokumona asi twa gwana sizoweseso, ose kuvhura kukanderera kwaJehova nemanguruko yipo atu “fire nkenda, zi tu kwafe paapa tuna zi hepere.” (Heb. 4:15, 16; 10:19-22) Kukanderera kutuvatera tu twikire kunyokera po maheteko.—Ruk. 22:40.

Zautatu, limburukwa Jesus. Mupositoli Johanesa kwa tjenge asi: “Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.” (Joh. 3:36) Koneka asi Johanesa kwa hetakanesere kukara nepuro nokudira kuzuvha ndi kudira kulimburukwa. Yipo nye, kuvhura o likide asi wa pura mwaJesus pokumulimburukwa. Ove kulimburukwa Jesus apa o kwama “veta zaKristusa,” ezi za kwatera mo eyi nga rongo nonompangera dendi. (Gar. 6:2) Kuvhura hena o limburukwe Jesus pokukwama mavyukiso aga a gava kupitira ‘momukareli gokulimburukwa gonondunge.’ (Mat. 24:45) Nsene o limburukwa Jesus, ove ngo funda po maudigu gomanene aga ngo ligwanekera nago.—Ruk. 6:47, 48.

Sikando simwe, mugara gumwe kwa likwamberere kwaJesus asi: “Na pura, kwafa nge mouhapuli wange!” (Mar. 9:24) Mugara gwina kwa kere nepuro, nye age kwa linunupikire morwa ga yi divire asi ga hepa epuro lyenene. Ngwendi mugara gwina, natuvenye ngatu ligwanekera nomaukaro meparu apa ngatu hepa epuro. Ntani natuvenye kuvhura tu pameke epuro lyetu ngesi. Ngomu tuna yi mono, kuvhura tu pameke epuro lyetu pokulironga Nonkango daKarunga ntani nokuteda ko. Eyi ngayi tu vatera tu kare norupandu kwaJehova. Kuvhura hena tu pameke epuro lyetu nsene tu karera Jehova kumwe novakwetu ntani nokutantera ko wopeke kuhamena ehuguvaro lyetu lyokomeho ntani pokukanderera narunye. Ntani unene po, nsene tu pameka epuro lyetu, ose ngatu gwanena mo uwa. Nonkango daKarunga kututantera asi: ‘One vakwetu, litungireni ketateko lyepuro lyeni lyokupongokerera. Yipo mu kare meharo lyaKarunga.’—Juda 20, 21.