1. Yisinke atu hafere mombunga zaJehova?

ASO sininke somulyo unene kukara mombunga zaJehova! Ose kwa kara moparadisa zopampepo omu mwazura vantu wombili noruhafo. Yinke o rugana mombunga zaJehova?

2. Sifanekeso musinke ga ruganesere Paurusa monombilive dimwe edi ga tjenge?

² Kuvhura tu lirongere ko yoyinzi kuhamena sirongwa esi, kosifanekeso esi ga ruganesa mupositoli Paurusa monombilive dendi dimwe. Monombilive odo, Paurusa kwa hetakanesere mbungakriste korutu romuntu. Age hena kwa hetakanesere nkenye gumwe mombungakriste komaruha gorutu.—Rom. 12:4-8; 1 Kol. 12:12-27; Efe. 4:16.

3. Magano musinke gatatu natu ka lironga mosirongwa esi?

³ Mosirongwa esi tatu ka lironga magano gatatu kuhamena sifanekeso esi ga ruganesere Paurusa. Pomuhowo tatu ka lironga asi nkenye gumwe ga kara nosirugana * mombunga zaJehova. Sauvali, natu ka zogera eyi natu rugana nsene ose kulizuvha asi kapi twa kara nosirugana mombunga zaJehova. Ano sautatu, natu ka zogera asi morwasinke twa hepera kulitura mo tusikise mo sirugana setu mombungakriste.

4. Yisinke azi tu rongo Varoma 12:4, 5?

⁴ Sirongwa sokuhova esi natu lirongera ko kosifanekeso esi ga ruganesere Paurusa sesi asi nkenye gumwe gwetu ga kara  nosirugana mombunga zaJehova. Paurusa kwa tamekere sifanekeso sendi pokuuyunga asi: “Ose kwa kara nomaruha gomanzi morutu rumwe tupu. Ano maruha aga kapi aga rugana sirugana simwe tupu. Nose ngorooro tupu, nampili tu kare tu vanzi, nye rutu rumwe tupu mwaKristusa. Nye momalikaro ose kulikwatakana moomu aga likwatakana maruha gorutu.” (Rom. 12:4, 5) Yisinke ga tembe Paurusa? Nkenye gumwe gwetu ga kara nosirugana mombungakriste ntani natuvenye mulyo kwaJehova.

5. Mauhwi musinke ga gava Jehova kombungakriste?

⁵ Apa atu gazadara ko ava va kara noyirugana mombungakriste, ose nampo kugazara usimbu kuhamena ava ava pitisire. (1 Tes. 5:12; Heb. 13:17) Yimo, kupitira mwaKristusa, Jehova kwa pa “vantu mauhwi” mombungakriste. (Efe. 4:8) Mauhwi aga kwa hamena mo womoMbungagendesi, vavateli womoMbungagendesi, vapitisili woBeteli, vatareli wonombunga, varongi wonoSikora, vakuronambunga, ntani vakwafimbunga. Vanavazinyetu navenye ava kuvahorowora mpepo zokupongoka mokupakera mbili nonzwi daJehova nokudinkondopeka mombungakriste.—1 Pet. 5:2, 3.

6. Kuliza no-1 Vatesaronika 2:6-8, yisinke vanavazinyetu ava za horowora mpepo zokupongoka ava kondjere kurugana?

⁶ Vanavazinyetu wovagara kwa va horowora mpepo zokupongoka yipo va vhure kusikisa mo yitumbukira yokulisiga-siga. Ngwendi moomu maruha gokulisiga-siga gorutu, ngwendi mahoko nonompadi ayi rugana mokupopera rutu, vanavazinyetu ava za horowora mpepo zokupongoka kurugana unene yipo va vatere mbungakriste nazinye. Awo kapi ava papara mfumwa zavene, nye awo kulitura mo mokukorangeda nokunkondopeka vanavazinyetu navenye womombungakriste. (Resa 1 Vatesaronika 2:6-8.) Tatu pandura sili Jehova kovanavazinyetu ava ava rugana unene va vatere vapuli vakwawo.

7. Mauwa musinke ava hafere ava ava rugana sirugana sosiruwo nasinye?

⁷ Vamwe mombungakriste kuvahorowora va kare vatumwa, vazuvhisi wosiruwo nasinye ntani vazuvhisi wokukarerera. Vanavazinyetu mouzuni mudima kwa tura sirugana sokuzuvhisa nokutulisa po varongwa ngosirugana sawo separu lyawo nalinye. Mokuyirugana oyo, awo va vatera sinzi sovantu va kare varongwa vaJesus. Vanavazinyetu ava ava rugana sirugana sosiruwo nasinye nampili ngomu va dira kuweka yininke yoyinzi, Jehova ga va tungika sili unene. (Mar. 10:29, 30) Ose twa hara unene vanavazinyetu ava ntani ose tuna hafa kweyi va hamena kombungakriste!

8. Morwasinke nkenye muzuvhisi ga karera nomulyo kwaJehova?

⁸ Ngoso, vanavazinyetu ava za horowora mpepo zokupongoka ntani ava ava rugana sirugana sosiruwo nasinye, velike va kara nosirugana mombungakriste ndi? Hawe! Nkenye muzuvhisi mulyo kwaJehova ntani kombungakriste. (Rom. 10:15; 1 Kol. 3:6-9) Somulyo po kombungakriste kuna kara kutulisa po varongwa vaJesus Kristusa. (Mat. 28:19, 20; 1 Tim. 2:4) Vazuvhisi navenye ava va hamena kombungakriste ava va gwana ekuho ndi ava va dira kugwana ekuho, awo kutura sirugana sokuzuvhisa muhowo meparu lyawo.—Mat. 24:14.

9. Morwasinke vanavazinyetu wovakadi va karera nomulyo kwetu?

⁹ Jehova ga yi likida asi ga fumadeka vanavazinyetu wovakadi pokuvapa sirugana mombungakriste. Age ga hara unene vazinya novakadikwara novafisavayawo ntani novanavazinyetu wovakadi ava va dira kukwara yipo va mu karere noulimburukwi. Bibeli yikando  yoyinzi kwa tumbura vanavazinyetu wovakadi ava va hafesere Karunga. Awo kwa tulisa po sihonena sosiwa, mokukara nounongo, nepuro, noupampi, nouradi nougavi ntani yirugana yimwe hena yoyiwa. (Ruk. 8:2, 3; Yirug. 16:14, 15; Rom. 16:3, 6; Fil. 4:3; Heb. 11:11, 31, 35) Ose kupandura unene Jehova kweyi twa kara novanavazinyetu wovakadi mombungakriste ava va kara noyikara yoyiwa ngwendi oyo.

10. Morwasinke vakurupe va karera nomulyo?

¹⁰ Ose kuhafa kweyi twa kara novakurupe mombunga. Monombungakriste dimwe kwa kara mo vanavazinyetu wovagara novanavazinyetu wovakadi wovakurupe ava va karera Jehova eparu lyawo nalinye. Ano vakurupe vamwe kwa ya lironga usili ntaantani tupu moukurupe wawo. Yi kare asi moukaro musinke, vanavazinyetu owo wovakurupe kuligwanekera noudigu wouvera ntani maudigu gamwe au retesa po ukurupe. Maudigu ogo kuvhura kuvaninkisa va dire kusikisa mo yoyinzi mombungakriste nomokuzuvhisa. Nye nampili ngoso, vakurupe ava kulitura mo unene yipo va vhure kusikisa mo eyi vana kuvhura ko ntani awo kuruganesa nonkondo dawo mokukorangeda nokudeura womombungakriste. Ose kugwanena mo uwa mounongo wawo. Yosili awo mulyo unene kwaJehova ntani kwetu.—Yis. 16:31.

11-12. Ngapi omu va ku korangeda vadinkantu womombungakriste zeni?

¹¹ Gazadara ko kuhamena vadinkantu. Awo kuligwanekera nomaudigu gokulisiga-siga mouzuni ou a ku pangera Satana muzonaguli. Maudigu ogo pamwe kuvhura kuhamena mo magano gepuko aga ava vhuru kugava. (1 Joh. 5:19) Nye nampili ngoso, ose kutukorangeda sili pokumona vadinkantu omu va ku gava malimbururo kepongo, omu va ku lihameka mokuzuvhisa ntani nomu vana kupopera epuro lyawo kosure. Yosili vadinkantu one mwa kara nosirugana somulyo mombungakriste!—Epis. 8:2.

¹² Vanavazinyetu wovagara novanavazinyetu wovakadi vamwe kukara nomasinganyeko  ndi awo kulizuvha asi kapi va kara nosirugana mombungakriste. Yinke na yi vhura kutuvatera natuvenye tu lizuvhe asi twa kara nosirugana mombungakriste? Tu zeni tu ka yi konakone.

13-14. Morwasinke vamwe ava lizuvhire asi awo kwato mulyo mombungakriste?

¹³ Tu zeni tu ka lironge egano lyauvali kosifanekeso saPaurusa esi ga ruganesere. Age kwa fatwilire udigu ou ava ligwanekere nawo vamwe. Awo kulipura nsene asi awo mulyo mombungakriste. Paurusa kwa tjenge asi: “Nsene nye ngano zi tanta mpadi asi, “Morwa ame kapisi ni kuwoko, kapi na hamena korutu ame” – yiyo nye nayi zi ninkisa zi dire kukara ruha rokorutu ndi? Ndi nsene nye ngano ku tanta kutwi asi, “Morwa ame kapisi nyame eho, kapi na hamena korutu ame” – yiyo nye nayi ku ninkisa ku dira kukara ruha rokorutu ndi?” (1 Kol. 12:15, 16) Yisinke ga here kuturonga Paurusa?

¹⁴ Nsene o li hetakanesa nyamoge navamwe mombungakriste kuvhura ngo ya limone asi ove kwato mulyo. Vamwe mombungakriste kwa kara nouhwi wokuronga nawa, kuwapaika nawa yininke, ndi kupitisira nawa. Nampo ove kulizuvha asi kapi to vhuru kuyisikisa mo ngwendi moomu ava yi rugana awo. Nye eyi kulikida asi wa linunupika. (Fil. 2:3) Nye takamesa. Yeeyi nsene o lihetakanesa nkenye apa kumwe nava va diva nawa yininke, kuvhura nga yi kudompese. Kuvhura o li zuvhe ngwendi moomu ga yi uyungire Paurusa asi ove kapi wa kara nosirugana mombungakriste. Yisinke nayi kuvatera yipo o nyokere po malizuvho ga ngoso?

15. Kuliza no-1 Vakolinte 12:4-11, yisinke twa hepa kudiva kuhamena mauhwi aga twa kara nago?

¹⁵ Diva asi Jehova kwa geve mauhwi gokulisiga-siga koVakriste womouye wokuhova, nye navenye kapi va gwene mauhwi gokulifana. (Resa 1 Vakolinte 12:4-11.) Jehova kwa va pere mauhwi gokulisiga-siga, nye nkenye Mukriste kwa kere nomulyo. Neina mpepo  zokupongoka kapi a zi tupe mauhwi pasitetu. Nose Vakriste kapi twa kara nomauhwi gokulifana, nye natuvenye mulyo kwaJehova.

16. Epukururo musinke ga geve Paurusa twa hepa kusikisa mo?

¹⁶ Mevango lyokulihetakanesa novakwetu, twa hepa kusikisa mo epukururo eli ga geve mupositoli Paurusa asi: “Nkenye ogu a kona-kone yirugana yamwene, ntani nye a lifumadeke mwamwene, kapisi a liyereke namukwawo.”—Gar. 6:4.

17. Mauwa musinke natu gwanena mo nsene tu kwama epukururo lyaPaurusa?

¹⁷ Nsene tu kwama epukururo lyaPaurusa nokulikona-kona nyamwetu, ngatu ya dimburura asi nose twa kara nomauhwi. Pasihonena, Mukuronambunga gumwe kuvhura a dire kukara murongi gomuwa, nye kuvhura a kare muzuvhisi gomuwa nokutulisa po varongwa. Ndi pamwe kuvhura a dire kudiva kuwapaika nawa yininke ngwendi vakuronambunga vakwawo, nye nampo age mukuronambunga ogu va mangurukira sinzi sovanavazinyetu ntani age kuvapa mavyukiso gomawa gomoBibeli. Ndi age pamwe ga kara nonkareso zongwa zokutambura vagenda. (Heb. 13:2, 16) Nsene tu dimburura eyi natu vhura kurugana ndi mauhwi getu, ngatu lizuvha ruhafo ntani nga yi tu hafesa hena eyi twa kugava kombungakriste. Ntani eyi ngayi tu ninkisa tu dire kufira vanavazinyetu mfudu ava va kara nomauhwi aga ga lisiga naga getu.

18. Yisinke natu rugana yipo tu dive kuronga nawa?

¹⁸ Yi kare asi sirugana musinke twa kara naso mombungakriste, ya wapa natuvenye tu tokomene kutura po ezokomeho mosirugana setu ntani nokurugana eyi natu vhura kusikisa mo. Mokutuvatera tu wapukurure, Jehova kugava edeuro lyewa kupitira mombunga zendi. Pasihonena, momapongo getu gomokatji kosivike, ose kugwana mavyukiso omu natu vhura kuzuvhisa nawa. Ove kuna kusikisa mo mavyukiso ogo ndi?

19. Yisinke no rugana nsene ono hara kusikisa mo yihepwa yokuza koSikora zoVazuvhisi woUhompa?

¹⁹ Edeuro limwe lyewa mombunga zaJehova kuna kara Sikora zoVazuvhisi woUhompa. Sikora ezi wokuza ko kuna kara vanavazinyetu ava va kara mosirugana sosiruwo nasinye wonomvhura dokutundilira 23-65. Mevango lyokugazadara ko nokonda dononzi deyi nodilira kuza ko, gazadara ko nokonda dononzi deyi nozira ko. Rugana eyi nayi kuvatera yipo o wapere kuza koSikora ozo. Nevatero lyaJehova ntani nelituromo lyanyamoge, yininke eyi nayimoneka ngwendi kapi to yi vhuru, kuvhura oyi vhure.

20. Yisinke natu lirongera ko moVaroma 12:6-8?

²⁰ Egano lyautatu natu lirongera ko kosifanekeso esi ga ruganesere Paurusa, kuligwana moVaroma 12:6-8. (Resa.) Paurusa apa kwa likidire hena nkenye gumwe mombungakriste ga kara nomauhwi gokulisiga-siga. Nye sikando esi age kwa ya nkondopekere asi yi kare asi uhwi musinke twa kara nawo ndi udivi, twa hepa kuuruganesa mokukorangeda nokunkondopeka womombungakriste.

21-22. Yisinke natu lirongera ko kwaRobert naFelice?

²¹ Gazadara ko kosihonena samunazinyetu Robert. Age kwa ka ruganenene kosirongo sa hana asi somvharerwa zendi. Konyima yipo va mu tumine koBeteli zomosirongo somvharerwa. Nampili ngomu va mu korangedere asi eyi va mu rundwilire mosirugana nasopeke, kapisi asi kapi ana kusisikisa mo, age kwa tanta asi: “Kukara nomutaro gomudona kuhamena nyamwange, gwa ninkisire nge ni lizuvhe ngwendi kwato eyi nani vhura kusikisa mo. Makwedi gomanzi ame ngani lizuvhu  ngwendi nihageke sirugana sange soBeteli.” Ngapi munazinyetu ogu ga ya gwene hena ruhafo? Mukuronambunga mukwawo kwa mu diworokesere omu Jehova a tu deura mosirugana setu, yipo a vhure kuturuganesa nawa mosirugana sosipe esi ana tu pe. Robert ga yi dimbwilire asi ga hepere kunyokera po kudemenena kweyi ga rugene nare nokudemenena eyi na vhura kusikisa mo ngesi.

²² Munazinyetu Felice Episcopo kwa ligwanekerere noudigu ngawoowo. Nage namukadendi kwa ka mene koSikora zaGiliyata mo-1956 ntani awo kwa kere mosirugana sokudingura nombunga moBolivia. Mo-1964 yipo va gwene ko munona gomumati. Munazinyetu Felice kwa tanta asi: “Ayo kwa tu digoperere kusiga sirugana setu. Eyi kwa guvisire nge ure womvhura. Nye nevatero lyaJehova na ya rundwilire nkareso zange ntani nokuyatwikira nositumbukira setu sokurera munwetu.” Nove kuna kara moukaro ngwendi waRobert naFelice ndi? Nove pamwe kudompa mutjima morwa kapi ono kara nositumbukira esi wa kere naso nare ndi? Nsene yimo, demenena kweyi ono kurugana ngesi mokukarera Jehova nokuvatera vanavazinyetu, nsene oyi rugana ngoso, ngo hafa. Litura mo unene mokuruganesa uhwi noudivi mokuvatera wopeke, makura ngo gwana ruhafo ngomu ono kukorangeda mbungakriste.

23. Kosinke natu vhura kudemenena ntani yisinke ngatu ka zogera mosirongwa sokukwama ko?

²³ Natuvenye mulyo sili kwaJehova. Age ana hara tu hamene kombunga zendi ndi kepata lyendi. Nsene tu litulira po siruwo tu tede ko kweyi natu vhura kurugana mokunkondopeka nokukorangeda vanavazinyetu ntani nokulitura mo unene tu sikise mo sirugana setu, ose kapi ngatu lizuvha hena asi kapi twa kara nosirugana mombungakriste! Nye ngapi kuhamena omu a tu tara wopeke mombungakriste? Ngapi omu natu vhura kuyilikida asi twa va hara? Mosirongwa sokukwama ko ngatu ka zogera sirongwa oso somulyo.