1. Ngapi omu sinzi sovanavazinyetu vana kurugana paapa va hulira mosirugana saJehova?

 OSE twa kara noyirugana yoyinzi eyi twa hepa kurugana ngomu uzuni una kuhedera pepi nehagero. (Mat. 24:14; Ruk. 10:2; 1 Pet. 5:2) Natuvenye tuna hara kukarera Jehova paapa twa hulira. Vanavazinyetu vamwe kuna kutamununa sirugana sawo sokuzuvhisa. Vamwe vana hara kukara vazuvhisi wokukarerera. Vamwe vana hara kuza koBeteli ndi mokulihameka mokutunga mavango aga atu ruganesa moukareli wetu. Ano sinzi sovanavazinyetu wovagara kwa kurugana paapa va hulira yipo va kare vakwafimbunga novakuronambunga. (1 Tim. 3:1, 8) Jehova kumuhafesa apa a mono nkareso zovanavazinyetu zelizambero ezi ava tura po mokumukarera.—Epis. 110:3; Jes. 6:8.

2. Ngapi atu lizuvhu nsene kapi tuna sikisa mo yitambo yetu yimwe yopampepo?

² Poyiruwo yimwe, kuvhura yi tu dompese nsene kapi tuna kusikisa mo yitambo yetu yimwe mombunga zaJehova. Ntani kuvhura tu dompe mutjima nsene kapi tuna kugwana yitumbukira morwa nampo ukurupe ndi nokonda dimwe. (Yis. 13:12) Ou yiwo ukaro ga li gwanekerere nawo Melissa. * Age kwa here kuza koBeteli ndi kosure zoVazuvhisi woUhompa, nye age kwa tanta asi: “Ngesi kapi nina wapere yitumbukira oyo morwa nomvhura dange da pitakana. Ame kudompa mutjima poyiruwo yimwe.”

3. Yisinke va hepa kurugana vadinkantu vamwe yipo va wapere yitumbukira mombunga zaJehova?

 ³ Komeho vadinkantu va wapere yitumbukira yimwe yomombunga zaJehova, va hepa kulikida yikara yoyiwa. Pasihonena, vamwe kuvhura va kare nonondunge nokutura po matokoro usimbu ntani va kara neharo lyokurugana sirugana saJehova. Nye koruha rumwe va hepa kukara nosikara selididimiko nokurugana nawa sirugana sawo ntani nokufumadeka wopeke. Nsene o litura mo unene mokutunga po yikara yoyiwa, kuvhura ngo gwane yitumbukira mombunga zaJehova. Gazadara ko kweyi ya horokerere Nick. Apa ga kere nonomvhura 20, age kwa guvire unene morwa kapi va mu tulire a kare mukwafimbunga. Age kwa tanta asi: “Ame kwa lizuvhire ngwendi koyili eyi nina kudira kusikisa mo.” Nye Nick kapi ga hagekere kutunga po yikara yoyiwa. Age nga rugana paapa ga hulira mombungakriste ntani nomokuzuvhisa. Ngesi age kuna kara gumwe gomoKomitiye zoBeteli.

4. Yisinke natu ka zogera mosirongwa esi?

⁴ Ove ono guwu morwa nampo kapi wa sikisa mo sitambo soge mombunga zaJehova ndi? Nsene yimo, kanderera kwaJehova nokumutantera omu ono kulizuvha. (Epis. 37:5-7) Ntani pura vanavazinyetu ava va kura pampepo va ku pe ko magano omu no wapukurura monkedi omu o karere Jehova, makura hetekera ko kutura pasirugana magano ogo. Nsene o yi rugana ngoso, kuvhura ngo gwane situmbukira ndi kuvhura ngosikise mo sitambo soge. Nye ngwendi Melissa ogu tuna tumbura muhowo, ove nampo kuvhura yi dire kukutompoka kusikisa mo yitambo yoge mombunga zaJehova. Nye ngapi omu no twikira kukara noruhafo? Mokulimburura epuro olyo, sirongwa esi tasi ka zogera (1) omu natu gwana ruhafo, (2) omu natu hafa unene ntani (3) yitambo eyi no litulira po yipo o hafe unene.

5. Yisinke natu rugana yipo tu kare noruhafo? (Muudisi 6:9)

⁵ Muudisi 6:9 kwa faturura eyi nayi tu vatera tu kare noruhafo. (Resa.) Muntu ogu a demenene kweyi ga kara nayo kuhafa nkenye apa. Nye muntu ogu a demenene nkenye apa koyininke eyi ga dira kukara nayo, kapi a kara noruhafo. Yisinke tuna kulirongera ko? Ose ngatu kara noruhafo nsene yi tu gwanena po eyi twa kara nayo.

6. Sifanekeso musinke natu ka lironga ngesi ntani yisinke natu ka lirongera ko?

⁶ Kuvhura sili yi ku gwanene po eyi wa kara nayo ndi? Vantu wovanzi kugazara asi kapi tayi vhuru kukara ngoso morwa ose kwa hara kulironga yininke yoyipe. Nye nampili ngoso, ose kuvhura kugwana ruhafo moyininke eyi twa kara nayo. Ngapi omu natu yi rugana? Tu zeni tu ka tare sifanekeso saJesus soyimaliwa esi sa kara mwaMateusa 25:14-30. Tatu ka lironga omu natu twikira kukara noruhafo moyininke eyi twa kara nayo.

7. Faturura sifanekeso saJesus sokuhamena yimaliwa.

⁷ Mosifanekeso saJesus, mugara kwa here kuza kougenda. Komeho a ze, age kwa pere vakareli vendi yimaliwa yipo va rugane ngesefa. * Mugara ogo ga yi divire asi vakareli vendi kwa kara nevhuliko lyokulisiga, makura yipo ga pere mukareli gwendi gumwe yimaliwa yitano ano ogu gumwe yimaliwa yivali ano gwautatu kwa mu pere simaliwa simwe. Vakareli vavali wokuhova kwa rugene unene yipo va gwanene po yimaliwa yoyinzi poyimaliwa eyi va va pere. Nye mukareli gwautatu kapi ga rugene ko yuma mokugwederera ko  kosimaliwa sendi, ano muhona kwa mu tjidire mo mosirugana sendi.

8. Morwasinke ngano mukareli gokuhova ga karerere noruhafo unene?

⁸ Mukareli gokuhova ngano ga hefe unene kweyi hekurwendi ga mu pere yimaliwa yitano. Yimaliwa eyi ga mu pere kwa kere yoyinzi ntani ayo kwa likidire asi hekurwendi kwa mu huguvarere. Nye ngapi kuhamena mukareli gwauvali? Age ngano ga dompere mutjima morwa kapi ga gwene yimaliwa yoyinzi ngwendi eyi va pere mukareli gokuhova. Nye yisinke ga rugene?

9. Yisinke ga dilire kuuyunga Jesus kuhamena mukareli gwauvali? (Mateusa 25:22, 23)

⁹ Resa Mateusa 25:22, 23. Jesus kapi ga uyungire asi mukareli gwauvali kwa guvire nokuhanduka morwa yeeyi ga gwene yimaliwa yivali. Ntani Jesus kapi ga tente asi mukareli ogo kwa sivanene nokuuyunga asi ‘morwasinke hekurwange ana pere nge yimaliwa yoyisesu? Nsene asi hekurwange kapi a gazara asi ame murugani gomuwa, tani zi nye ni ka vhumbike yimaliwa yendi yipo ni ka ruganene yimaliwa yanyamwange.’

10. Yisinke ga rugene ko mukareli gwauvali poyimaliwa yendi eyi va mu pere?

¹⁰ Mukareli gwauvali kwa rugene unene ngwendi mukareli gokuhova, age kwa tere situmbukira esi ga mu sigilire hekurwendi asi mulyo unene. Ngoyitundwamo age kwa gwanene po hena yimaliwa yivali. Hekurwendi kwa tungikire mukareli ogo koyirugana yendi yoyiwa. Hekurwendi kwa hefe ntani kwa pere hena mukareli gwendi yirugana yoyinzi.

11. Yisinke natu rugana yipo tu kare noruhafo rorunene?

 ¹¹ Mokulifana, ose kuvhura kugwana ruhafo nsene tu tambura nkenye situmbukira esi vana kutupa mombunga zaJehova. Lihameka mo noupampi mokuzuvhisa ntani rugana unene mombungakriste. (Yirug. 18:5; Heb. 10:24, 25) Liwapaikira nawa komapongo yipo o ka gave malimbururo gokukorangeda. Sikisa mo nkenye ruha oru nava kupa mepongo lyomokatji kosivike. Nsene vana kupura o ka vatere sirugana simwe mombungakriste, yi rugana nosiruwo ntani kara gokuhuguvara. Wa ha gazara asi sirugana esi vana kupe kwato mulyo ntani kwa ku mana tupu siruwo soge. Rugana paapa wa hulira o dive nawa sirugana soge. (Yis. 22:29) Nsene o litura mo unene moyirugana yoge yopampepo ntani nayimwe, ngo tura po ezokomeho usimbu ntani ngo hafa. (Gar. 6:4) Ngayi ku rerupira hena kuhafesa ko wopeke apa ngava gwana yitumbukira eyi wa hara.—Rom. 12:15; Gar. 5:26.

12. Yisinke ya vaterere vanavazinyetu ava vavali yipo va kare noruhafo rorunene?

¹² To diworoka munazinyetu Melissa ogu ga kere neharo lyokuza koBeteli ntani koSure zoVazuvhisi woUhompa ndi? Nampili ngomu ga dilire kusikisa mo yitambo oyo, age kwa tanta asi: “Ame kulitura mo unene mosirugana souzuvhisi wokukarerera ntani nokulihameka mononkedi dokulisiga-siga dokuzuvhisa. Eyi kwa retera nge ruhafo rorunene.” Ngapi omu ga lizuvhire Nick apa ga dilire kugwana situmbukira sokukara mukwafimbunga? Age kwa tanta asi: “Ame kudemenena kweyi ani vhuru kurugana, pasihonena, kulihameka mokuzuvhisa ntani kugava malimbururo momapongo. Ame hena kwa tulire mo ehundiro lyokuza koBeteli, ano mvhura zokukwama ko yipo va tambwire nge.”

13. Yitundwamo musinke ngayi kara nsene o litura mo mositumbukira soge esi ono kara naso ngesi? (Muudisi 2:24)

¹³ Nsene o rugana paapa wa hulira mokulitura mo moyitumbukira eyi ono kara nayo ngesi, ove ngo gwana hena yitumbukira yimwe komeho. Eyi yiyo ya horokerere munazinyetu Nick. Nye nsene kapi ono kugwana yitumbukira yimwe ngwendi Melissa, ove simpe kuvhura o hafe kweyi ono kutompora mosirugana saJehova. (Resa Muudisi 2:24.) Ntani ngo kara noruhafo rorunene pokudiva asi ove kuna kuhafesa Jesus Kristusa.

14. Yisinke twa hepa kudiworoka kuhamena yitambo yetu yopampepo?

¹⁴ Nsene asi ose kuna kukarera Jehova momunene, ayo ngoso kutanta asi kapi tatu vhuru kumuruganena hena unene kupitakana opo ndi? Hawe. Twa hepa kulitulira po yitambo yopampepo yipo tu kare vazuvhisi wovawa ntani nokuvatera vanavazinyetu. Ayo ngayi tu tompoka nsene tu vatera vakwetu mevango tupu lyokuligazara nyamwetu.—Yis. 11:2; Yirug. 20:35.

15. Yitambo musinke nayi kuvatera o gwederere koruhafo roge?

¹⁵ Yitambo musinke no vhura kulitulira po? Pura Jehova a ku vatere o dive yitambo eyi no vhura kusikisa mo. (Yis. 16:3; Jak. 1:5) Kuvhura o litulire po simwe soyitambo eyi vana tumbura  moparagarafu zokuhova. Pasihonena, kurugana uzuvhisi wokuvatera, kukara muzuvhisi gokukarerera, kurugana koBeteli ndi kulihameka mokutunga mavango goukareli wetu. Kuvhura hena o lironge eraka lyapeke ndi kuvhura o ka zuvhisire komukunda gwapeke. Komauzera gomanzi kuhamena yitambo eyi, tara mobuke Kwa zi wapaika mokurugana mpango zaJehova egaununo 10  ntani zogera kumwe novakuronambunga womombungakriste zeni. * Nsene o rugana unene yipo o sikise mo yitambo yoge, wopeke ngava mona ezokomeho lyoge ntani ngo hafa unene.

16. Yisinke no rugana nsene kapi ono kusikisa mo sitambo songandi?

¹⁶ Yisinke no rugana nsene kapi ono kusikisa mo simwe soyitambo eyi tuna zogere mosirongwa esi? Litulira po sitambo sapeke esi no vhura kusikisa mo. Tu zogereni yitambo eyi yina kukwama ko.

17. Kuliza na-1 Timoteusa 4:13, 15, ngapi munazinyetu gomugara na kara murongi gomuwa?

¹⁷ Resa 1 Timoteusa 4:13, 15. Nsene asi ove munazinyetu gomugara ogu wa gwana ekuho, hetekera ko kulitulira po sitambo sokukara muuyungi ndi murongi gomuwa. Morwasinke? Morwa nsene o yi rugana ngoso, vantu ava ngo ronga ngava gwanena mo uwa. Litulira po sitambo sokulironga nokusikisa mo nkenye sikara va tumbura mombapira Litura mo mokuresa nokuronga. Lironga sikara simwe posikando, liyomberesa kembo ntani tura pasirugana nkenye sikara esi ono kulironga nsene kuna kugava siuyungwa. Pura ko magano komupukuruli gokuvatera ndi kovakuronambunga vamwe ava “ava rugana unene mokuudisa nomokuronga.” * (1 Tim. 5:17) Wa ha demenena tupu komagano aga ono kulironga, nye hena demenena omu no vatera vapurakeni woge va nkondopeke epuro lyawo ndi va korangeda va  ture pasirugana eyi vana kulironga. Nsene o yi rugana ngoso, ove ngo hafa unene ntani nawo ngava hafa.

18. Yisinke nayi tu vatera yipo yi tu tompoke mokuzuvhisa?

¹⁸ Natuvenye kwa kara nositumbukira sokuzuvhisa nokutulisa po varongwa. (Mat. 28:19, 20; Rom. 10:14) Ono hara kuwapukurura nkedi zoge zokuzuvhisa ndi? Lironga mbapira Litura mo mokuresa nokuronga ntani tura po yitambo eyi nayi kuvatera o ture pasirugana eyi ono kulironga. Kuvhura hena o gwane magano gamwe gomawa mombapira zetu zekepongo Eparu lyetu noyirugana yetu yokuzuvhisa ntani nonovidiyo dokuhamena omu no zogera novantu edi ava likida mepongo lyomokatji kosivike. Heteka magano gokulisiga-siga yipo o dive asi nkedi musinke zongwa po. Nsene o tura pasirugana magano ogo, ove ngo kara muzuvhisi gomuwa ntani ngo hafa unene.—2 Tim. 4:5.

19. Ngapi omu no vhura kutunga po yikara yoSikriste?

¹⁹ Nsene kuna kulitulira po yitambo, ya kara nomulyo hena o litulire po sitambo sokutunga po yikara eyi ayi hafesa Jehova. (Gar. 5:22, 23; Koros. 3:12; 2 Pet. 1:5-8) Yisinke no rugana o sikise mo sitambo oso? Pasihonena, tu tante asi ono hara kunkondopeka epuro lyoge. Ove kuvhura o rese yirongwa ya kara moyimbapiratjangwa yetu eyi ya zogera kuhamena omu no nkondopeka epuro lyoge. Ove ngo gwanena mo uwa melikwamo lyo-JW Broadcasting^® omu ava likida yihonena yovanavazinyetu ava ava likida epuro nampili momaudigu. Makura hetekera ko kudiva nonkedi dimwe omu no honena epuro lyawo.

20. Ngapi natu kara noruhafo rorunene ntani ngapi natu nyokera po kudompa mutjima?

²⁰ Tuna si huguvara asi natuvenye kulizuvha ngwendi tu ruganene Jehova momunene kupitakana omu tuna kumuruganena ngesi. Mouzuni woupe natuvenye ngatu ka karera Jehova momunene. Ose kuvhura kugwederera koruhafo rwetu nsene tu demenena kweyi tuna kuvhura kusikisa mo ngesi ntani kapi ngayi tu dompesa. Nye somulyo po unene, ngatu fumadeka nokuyererepeka Jehova “Karunga goruhafo.” (1 Tim. 1:11) Tu twikireni kukara noruhafo mweyi atu ruganene Jehova ngesi.