SIRONGWA SELIRONGO 32
Nkondopeka epuro lyoge moMusiti
“Epuro yilyo . . . undipo woyininke eyi atu dili kumona.”—HEB. 11:1.
RUSUMO 11 Unsitwe kuyererepeka Karunga
ETWAROMO *
1. Yisinke wa lironga kuhamena Musiti?
NSENE asi ove kwa ku rerera mousili, ove nampo wa lironga kuhamena Jehova kutunda unona woge. Ove kwa ku rongere asi Jehova yige Musiti ogu ga kara noyikara yoyiwa ntani ga kara hena nositambo sosiwa kovantu.—Gen. 1:1; Yirug. 17:24-27.
2. Ngapi omu vamwe ava tara vantu ava va pura moMusiti?
2 Sinzi sovantu kapi va yi pura asi Karunga ogu ga sita yininke nayinye yipo ga kara. Nye awo kwa yi pura asi yininke kwa wiza po pwayene ntani ayo kwa liforoma simwe nasimwe. Ano vamwe ava va pura yininke eyi kuna kara vantu ava va lironga unene. Awo kuuyunga asi unsitwe wa yi likida asi Bibeli mepuko za kara ntani awo kuuyunga asi vantu ava ava pura moMusiti kuna kara vantu ava va dira kulironga ndi wovagova.
3. Morwasinke ya karera nomulyo tu nkondopeke epuro lyetu?
3 Kuvhura yininke eyi ava uyunga vantu ava va lironga yi tu ninkise tu kare nomasinganyeko kuhamena Musiti gwetu ndi? Ayo kwa korera mweyi twa pulira asi Jehova yige Musiti gwetu. Ose kwa pura moMusiti morwa nampo kwa tu tanterere tu yi pure ngoso ndi? Ndi nampo ose kwa li tulilire po siruwo yipo tu konakone nyamwetu maumbangi? (1 Kol. 3:12-15) Yi kare asi siruwo sokuhura kupi twa karera Jehova, natuvenye twa hepa kutwikira kunkondopeka epuro lyetu. Nsene tu yi rugana ngoso, ose kapi ngatu pulisira masanseko goyipempa aga ga lilimba noNonkango daKarunga ga tu pukise. (Koros. 2:8; Heb. 11:6) Sirongwa esi tasi ka tu vatera pokukazogera (1) nokonda dimwe deyi vantu wovanzi va dilira kupura moMusiti, (2) nomu natu tunga po epuro mwaJehova ntani (3) nomu nonkondopeka epuro lyoge moMusiti.
MORWASINKE VANTU WOVANZI VA DILIRA KUPURA MOMUSITI?
4. Kuliza noVahebeli 11:1, kosinke lya korera epuro lyosili?
4 Vantu vamwe kugazara asi kukara nepuro kutanta asi kupura moyininke pwa hana maumbangi. Nye kuliza noBibeli, olyo kapisi epuro lyousili. (Resa Vahebeli 11:1.) Bibeli kufaturura asi mokukara nepuro pwa hepa umbangi, nye nampili ngomu atu dili kumona Jehova naJesus ntani noUhompa wemeguru, nye ose twa yi pura asi oyo yipo ya kara. (Heb. 11:3) Munazinyetu gumwe gomugara ogu ga lirongera unsitwe kwa uyunga asi: “Epuro lyetu kwa korera koyininke eyi twa pura.”
5. Morwasinke vantu wovanzi va yi pulira asi eparu kwa wiza po pwalyene pwa hana Musiti?
5 Kuvhura tu lipure asi: ‘Morwasinke vantu wovanzi va pulira asi Karunga kapisi yige Musiti gwanayinye nsene asi pwa kara maumbangi aga aga likida asi yige ga yi sita?’ Vamwe kapi simpe va konakona maumbangi ogo pwavene. Robert ogu ana kara ngesi Mbangi zaJehova kwa tanta asi: “Mokumona asi kosure kapi ngava tu rongo kuhamena unsitwe, ame kwa yi pulire asi unsitwe kwa wiza po pwawene. Apa na kere nonomvhura 22 yipo na li gwene noNombangi daJehova nokulironga asi pwa kara maumbangi aga aga likida asi Karunga yige ga sita yininke nayinye.” * Tara kakende “ Mbudi zomulyo kovakurona.”
6. Morwasinke vamwe ava dilire kuyipura asi Karunga yipo ga kara?
6 Vamwe kapi va pura moMusiti morwa awo kutanta asi awo kupura tupu moyininke eyi ava mono. Nye nampili ngoso, awo kwa pura moyininke yimwe eyi ayi dili kumoneka. Pasihonena, awo va yi pura asi mpepo yipo za kara morwa va kara noumbangi ou au likida asi yipo za kara. Epuro eli va tumbura moBibeli kwa korera komaumbangi ‘goyininke eyi atu dili kumona.’ (Heb. 11:1) Twa hepa siruwo nononkondo yipo tu lironge maumbangi pwanyamwetu nye vantu wovanzi kapi va hara kuyirugana eyi. Muntu ogu a dili kukonakona maumbangi ogo pwamwene, kuvhura a uyunge asi Karunga kapisi yipo ga kara.
7. Vantu navenye ava va lironga kapi va pura mwaKarunga ndi? Faturura.
7 Konyima zokukonakona maumbangi, vadivi unsitwe vamwe kwa ya yi dimburura asi Karunga yipo ga kara. * Vamwe kuvhura va lizuvhe ngwendi Robert ogu ka tu tumbura muhowo ogu ga gazarere asi kapi pwa kara Musiti morwa esito lyouzuni kapi ava lirongo kounivesiti. Nye nampili ngoso, sinzi sovadiviunsitwe va ya diva Jehova ntani nokumuhara. Ngwendi vadivi unsitwe ava, nose twa hepa kunkondopeka epuro lyetu mwaKarunga yi kare asi twa li ronga ndi hawe. Kwato ogu na vhura kuyituruganena po nye twa hepa kuyirugana nyamwetu.
NGAPI OMU NO TUNGA PO EPURO MOMUSITI?
8-9. (a) Epuro musinke natu ka limburura ngesi? (b) Uwa musinke ngo gwanena mo nsene o lironga kuhamena unsitwe?
8 Ngapi omu no tunga po epuro moMusiti? Tu zeni tu ka zogere ko nonkedi ne.
9 Lironga kuhamena unsitwe. Ove kuvhura o tunge po epuro moMusiti pokutara kweyi ga sita ngwendi yikorama, yimeno ntani nonombungururu. (Epis. 19:1; Jes. 40:26) Ngomu ngo twikira kulironga yininke oyo, ove ngo ya dimburura nawa-nawa asi Jehova yige Musiti. Moyimbapiratjangwa yetu mwa kara yirongwa eyi ya faturura momunene kuhamena unsitwe. Nampili yi kare asi ayo kukudigopera mokuyikwata egano, nye twikira kuyilironga. Kuvhura hena o tarere novidiyo kointaneta zetu jw.org. Ako ngo gwana ko novidiyo donongwa dokuhamena kounsitwe edi va zogerere poyigongi yomazuva gatatu monomvhura dongandi dina ka pita.
10. Gava sihonena sina kulikida asi kweli ogu ga sita yininke. (Varoma 1:20)
10 Nsene kuna kulironga kuhamena unsitwe, hetekera ko kudiva eyi yina kukuronga kuhamena Musiti gwetu. (Resa Varoma 1:20.) Pasihonena, ezuva kugava upyu nouzera, nye nohonga dimwe dezuva siponga. Nye nampili ngoso, koyili yininke yimwe eyi ayi popere vantu konohonga odo dosiponga. Yininke musinke oyo ntani ngapi omu ayi horoka? Evhu kwa kara noozone layer ezi azi kondere nohonga dezuva dosiponga. Nsene asi ezuva kwa ku reta upyu unene, mpepo ezi ava tumbura asi ozone layer kuligwederera yipo zi kandane upyu ou una kutunda kezuva. Yosili, yininke nayinye eyi kulikida asi pwa kara Musiti gonondunge ntani geharo.
11. Kupi no gwana mauzera aga naga nkondopeka epuro lyoge moMusiti? (Tara kakende “ Yiruganeso eyi nayi kuvatera o nkondopeke epuro lyoge moMusiti.”)
11 Ove kuvhura o gwane mauzera gomanzi kuhamena unsitwe moWatch Tower Publications Index ndi pokurugana epaparo ko jw.org. Kuvhura o tameke noyirongwa ntani nonovidiyo edi da kara koruha “Was It Designed?” Yirongwa oyo yisupi ntani novidiyo nado nonsupi, ntani ayo kwa gava mauzera gokutetukisa kuhamena yikorama noyisitwa yimwe. Ako hena kwa kara ko yihonena yovadiviunsitwe ava va honena unsitwe yipo va rugane yininke.
12. Yininke musinke yimwe twa hepa kutarurura nsene kuna kulironga Bibeli?
12 Lironga Bibeli. Mulirongi ogu tuna tumbura ketamekero lyosirongwa esi kapi gayi pulire pomuhowo asi Musiti yipo ga kara. Nye mwaza siruwo, age ga ya pulire moMusiti. Age kwa tanta asi: “Epuro lyange kapi lya korerere tupu mweyi na lirongere kuhamena unsitwe. Nye alyo kwa korerere hena mweyi na lirongere moBibeli.” Ove nampo nare wa diva Bibeli. Nye nampili ngoso, mokuninka asi o nkondopeke epuro lyoge moMusiti, wa hepa kutwikira kulironga Nonkango daKarunga. (Jos. 1:8; Epis. 119:97) Pasihonena, gazadara ko omu Bibeli za faturura yininke eyi ya horoka nare. Gazadara ko mauporofete aga ga sikilira mo ntani nomu ya liza yininke eyi va tjanga vatjangi wokulisiga-siga. Pokuyirugana ngoso, ove ngo nkondopeka epuro lyoge ntani nokuyipura asi Karunga yige ga tu sita ntani yige ga retesa po Bibeli.—2 Tim. 3:14; 2 Pet. 1:21.
13. Mpango musinke zimwe zongwa atu gwana moNonkango daKarunga?
13 Nsene kuna kuresa Nonkango daKarunga, koneka omu naga kuvatera mapukururo aga ga kara mo. Pasihonena, Bibeli nare za rondora asi edowo lyokudowokera yimaliwa siponga ntani kureta “kukora kokunene.” (1 Tim. 6:9, 10; Yis. 28:20; Mat. 6:24) Erondoro olyo kuna kara simpe nomulyo momazuva getu ndi? Buke zimwe ezi za faturura nkareso zovantu wopomazuva gopouhura kwa tanta asi: “Yiruwo yoyinzi, vantu ava va kara nemona lyenzi kapi va kara noruhafo rwene-rwene ntani awo kwa kara nosinka sosinene. Nampili vantu ava va hara kugwana yimaliwa yoyinzi, awo kapi va kara noruhafo ntani awo kukara nomauvera gomanzi.” Yosili, erondoro lyomoBibeli lyokuhamena kunyokera po kudowokera yimaliwa kuvhura kutuvatera. Kuvhura o gazadare ko nompango dimwe domoBibeli edi da kuvatera ndi? Apa atu gazadara ko komagano gomawa aga ga kara moBibeli, ayo kutuvatera tu huguvare unene momagano gokutunda koMusiti gwetu. (Jak. 1:5) Ngoyitundwamo, ose ngatu hafera unene eparu.—Jes. 48:17, 18.
14. Yisinke ngo ya dimburura kuhamena Jehova nsene o lironga Bibeli?
14 Lironga Bibeli nositambo sokudiva Jehova momunene. (Joh. 17:3) Ngomu ngo lironga Bibeli, ngo ya dimburura yikara yaJehova, ano yikara oyo yiyo hena atu mono moyininke eyi ga sita. Pokulironga kuhamena yikara yaJehova, ngayi tu vatera tu yi pure asi Jehova yipo ga kara. (Ex. 34:6, 7; Epis. 145:8, 9) Ngomu ngo ya diva Jehova momunene, epuro lyoge ngali pama ntani ngo mu hara unene, ano ukaume weni ngau nkondopara.
15. Mauwa musinke ngo gwanena mo nsene o tantera ko wopeke eyi wa pura?
15 Tantera ko wopeke kuhamena epuro lyoge eli wa kara nalyo mwaKarunga. Nsene o yi rugana, epuro lyoge ngali pama. Nye ngapi nsene ogu ono kuzuvhisira a kara nomasinganyeko asi Karunga kapi ga kara po ntani kapi ono diva omu no mu limburura? Hetekera ko kugwana elimbururo moyimbapiratjangwa yetu ntani no ka zogera nendi. (1 Pet. 3:15) Kuvhura hena o pure ko evatero komunazinyetu gumwe ogu ga kara noudivi. Yikare asi muntu ogu ko zuvhisilire na ka tambura elimbururo lyomoBibeli ndi hawe, nye ove ngo gwanena mo uwa mepaparo eli ono rugana. Epuro lyoge ngali pama. Ngoyitundwa mo, ove kapi ngo pura magano govantu ava ava moneka ngwendi nondunge ndi va lironga ndi ava ava uyunga asi kapi pwa kara Musiti.
NKONDOPEKA EPURO LYOGE!
16. Yisinke ngayi horoka nsene kapi tuna kutwikira kunkondopeka epuro lyetu?
16 Yikare asi nare twa gusa kukarera Jehova ndi hawe, twa hepa kutwikira kunkondopeka epuro lyetu. Morwasinke? Morwa nsene kapi tuna kutakamesa, kapi ngatu kara nepuro lyokupama. Diworokeni asi epuro kwa hamena mo umbangi woyininke eyi atu dili kumona. Yininke eyi atu dili kumona, ureru kuyidivara. Eyi yiyo nye Paurusa ga uyungire asi nsene tu dira kukara nepuro, ayo kwa fana ngwendi “nonzo edi adi tu lidingire.” (Heb. 12:1) Yisinke natu rugana yipo tu twikire kukara nepuro lyokupama?—2 Tes. 1:3.
17. Yisinke nayi tu vatera tu kare nepuro lyokupama?
17 Sokuhova, likwambera kwaJehova mpepo zokupongoka ntani yi rugana nkenye apa. Morwasinke? Morwa epuro kuna kara simwe soyiyimwa yompepo. (Gar. 5:22, 23) Kapi tatu vhuru kutunga po epuro nokulinkondopeka pwa hana evatero lyompepo zokupongoka. Nsene tu twikira kuhundira Jehova mpepo zokupongoka, age nga zi tu pa. (Ruk. 11:13) Kuvhura hena tu kanderere asi: “Hompa, tu gwederera ko kepuro lyetu.”—Ruk. 17:5.
18. Kuliza nEpisarome 1:2, 3, uhwi musinke womulyo natu hafera?
18 Sauvali, resa Bibeli nkenye ezuva. (Resa Episarome 1:2, 3.) Apa va tjenge Episarome eli, Vaisraeli tupu wovasesu va kere noVeta zaKarunga. Nye nampili ngoso, vahompa ntani vapristeli va kere noVeta zaKarunga. Ano konyima zankenye nomvhura ntambali, “vagara novakadi novanona” ntani novanayirongo ava va tungire moIsraeli, ngava pongo kumwe yipo vava resere Veta zaKarunga. (Deut. 31:10-12) Momazuva gaJesus, vantu wovasesu tupu va kere nomagango ntani ago kwa kere monosinagoge. Nye sinzi sovantu neina va kara nonoBibeli. Yosili Bibeli kuna kara uhwi womulyo unene. Ngapi natu likida rupandu kouhwi ou woBibeli?
19. Yisinke natu rugana yipo tu twikire kunkondopeka epuro lyetu?
19 Ose kuvhura kulikida rupandu kouhwi woBibeli ezi twa gwana pokuziresa nkenye ezuva. Twa hepa kulitulira po siruwo pokuziresa nkenye ezuva nye kapisi paapa tupu tuna gwanene siruwo. Epuro lyetu ngali nkondopara nsene tu lironga Bibeli nkenye ezuva.
20. Yisinke natu tokomena kurugana?
20 Mokulisiga ‘novakonentu ntani novanandunge’ womouzuni ou, epuro lyetu kwa li tatekera kuliza neyi ya kara moBibeli. (Mat. 11:25, 26) Ose twa lironga moBibeli nokonda deyi uzuni una donapere ntani neyi ngaka rugana ko Jehova komeho. Yipo nye, tu twikireni kunkondopeka epuro lyetu ntani nokuvatera wovanzi yipo nawo va pure moMusiti gwetu. (1 Tim. 2:3, 4) Tu twikireni kundindira siruwo apa navenye vepevhu ngava ka hamberera Jehova nokukauyunga nonkango edi da kara mEhororo 4:11 asi: “Karunga gwetu gononkondo Jehova, ove wa wapera kukufumadeka nokukuyererepeka, morwa nyove wa sita yininke nayinye ntani yininke nayinye kwa karera po morwa mpango zoge.”
RUSUMO 2 Edina lyoge Jehova
^ para. 5 Bibeli kuuyunga asi Jehova yige Musiti gwanayinye. Nye vantu wovanzi kapi va yi pura ngoso. Awo kwa pura asi eparu kwa wiza po tupu pwalyene. Nsene tu nkondopeka epuro lyetu mwaKarunga nomoBibeli, eyi ava uyunga vantu kapi ngayi tu ninkisa tu kare nomasinganyeko. Sirongwa esi tasi ka faturura omu natu nkondopeka epuro lyetu.
^ para. 5 Konosure dononzi, vamitili kapi ava rongo asi Karunga yige Musiti gwanayinye. Awo kapi va hara kuyirugana oyo morwa kapi va hara kusininika vanona va pure mwaKarunga.
^ para. 7 Magano govantu ava va lironga unene wokupitakana po 60 kukwatera mo vadivi unsitwe ava va pura moMusiti, kuvhura kugagwana moWatch Tower Publications Index. Tara konhi zoruha “Science,” siparatjangwa asi “scientists expressing belief in creation.” Magano gamwe kuvhura kugagwana moBuke zepaparo zoNombangi daJehova. Koruha “Science and Technology,” tara siparatjangwa asi “‘Interview’ (Awake! series).”
