1-2. Yisinke natu kazogera mosirongwa esi?

NGAPI o lizuvhu nsene asi yininke eyi kondindire kapi yina ya siki posiruwo esi koyiharere? Ove nohanduka ndi? Yisewe 13:12 kutanta asi: “Endindiro nsene li teka po, yigo mutjima guna teka po.” Nye ngapi nolizuvha nsene o zuvha asi pwa kara nokonda donongwa deyi yininke yoge yi na dilire kuyasika nosiruwo? Ayo ngayi kuninkisa o lididimikire ntani nokundindira.

² Mosirongwa esi tatu kazogera nompango dimwe domoBibeli edi nadi tu vatera tu tunge po ‘nkareso zokundindira.’ (Mika 7:7) Ntani tatu kazogera hena maukaro gavali omu twa hepa kulikida nkareso zokundindira kwaJehova a rugane ko yuma. Ano konyima, natu kazogera yininke yoyiwa eyi ga tumbiwidira Jehova kwava ava likida nkareso zokundindira.

3. Yisinke tuna kulirongera ko kompango ezi za kara moYisewe 13:11?

³ Yisewe 13:11 kuturonga konda zeyi natu karera nelididimiko. Etjangwa eli kutanta asi: “Yokugwana ugawo woge popareru, usimbu hena kuuzumbanesa. Yokuugwanena popadigu, yimo ngorooro ngo kara nawo.” Yisinke tuna kulirongera ko kovelise ezi? Muntu gonondunge kurugana yininke kuliwora ntani nelididimiko, ano age kugwanena mo yitundwamo yoyiwa.

4. Yisinke a li tanta etjangwa lyomoYisewe 4:18?

⁴ Yisewe 4:18 kututantera asi: “Nzira ezi ava gendi vahungami, ngwendi ezuva lina kusa, taku zere tupu taku zere dogoro  mutenya tagu wiza.” Nonkango edi kwa tamba omu Jehova a vatere vantu vendi va kwate egano sitambo sendi kanunu-kanunu. Nye velise ezi kwa tamba hena omu Vakriste ava tura po ezokomeho lyopampepo meparu lyawo. Ayo kugusa siruwo komuntu a ture po ezokomeho lyopampepo. Nsene tulironga nawa Nonkango daKarunga nokutura pasirugana eyi atu gwana moNonkango daKarunga, nokombunga zaJehova ose ngatu tunga po yikara ngwendi eyi ga kere nayo Jesus. Ntani ose ngatu diva nawa Karunga. Tu tareni omu Jesus ga fanekesere sitwa oso.

5. Sihonena musinke ga ruganesere Jesus esi asi likida asi ayo kugusa siruwo yipo muntu a ture po malitjindjo?

⁵ Jesus kwa ruganesere sifanekeso mokufaturura omu mbudi ezi atu zuvhisa azi kuru monomutjima dava va hara kupurakena. Age kwa tente asi: ‘Mbuto kutameka kumena tazi kuru nye mukuni kapi gayidiva omu ayi gendi. Eyi ayi ninkisa mbuto ziyime, evhu lyene: pomuhowo ruhatji, ntani mutwe, ntani nye momutwe nondanda dene-dene.’ (Mar. 4:27, 28) Sitwa musinke ga here kufaturura Jesus? Age kwa fatwilire asi ngwendi moomu tupu simeno asi kuru kuliwora, muntu ogu a tambura mbudi zoUhompa nage kugusa siruwo mokutura po malitjindjo. Pasihonena, ngomu varongwa vetu woBibeli ava hedere pepi naJehova, ose kuya dimburura malitjindjo aga vatura po. (Efe. 4:22-24) Nye twa hepa kudiworoka asi Jehova yige ga ninkisa mbuto ozo zikure.—1 Kol. 3:7.

6-7. Yisinke tuna kulirongera ko monkedi omu Jehova ga sitire uzuni?

⁶ Mwankenye eyi a rugana Jehova, age kuruganesa siruwo yipo a sikise mo yirugana yendi. Age kuyirugana oyo yipo a fumadeke edina lyendi ntani yipo wopeke vagwanene mo mauwa. Pasihonena, tu tareni omu Jehova ga sitire evhu kanunu-kanunu yipo vantu va parukire po.

⁷ Bibeli kwa faturura omu Jehova ga sitire evhu eli po kuuyunga asi: “Age kwa tokora asi kupi ngauhulira.” (Joba 38: 5, 6) Jehova kwa ruganesere hena siruwo yipo a kona-kone eyi  ga sitire. (Gen. 1:10, 12) Gazara tupu omu va lizuvhire vaengeli apa va mwene yininke eyi ga sitire Jehova kanunu-kanunu. Awo nampo kwa hefe unene. Ano eyi kwa va ninkisire ‘va tameke kuzigira noruhafo.’ (Joba 38:7) Yisinke tuna ku lirongera ko? Ayo kwa gusire Jehova nomvhura dononzi mokusita evhu, nye apa Jehova ga tere nayinye eyi ga sitire makura “tayi mu zi komutjima.”—Gen. 1:31.

8. Yisinke natu kazogera ngesi?

⁸ Yihonena eyi tuna zogere yina tu vatere tu dimburure asi ose kuvhura ku gwana nompango moBibeli edi nadi tu vatera tu kare nonkareso zelididimiko. Ngesi ta tu kazogera maukaro gavali omu twa hepa kulikida nkareso zokundindira kwaJehova a rugane ko yuma.

9. Ukaro musinke umwe ou twa hepa kundindira yipo Jehova a rugane ko yuma?

⁹ Twa hepa kundindira kwaJehova yipo a limburure makanderero getu. Apa atu kanderere kwaJehova a tu peko nonkondo tulididimikire udigu wongandi ndi tu funde po upirankondo wetu, kuvhura tu lizuvhe asi Jehova kapi ana kulimburura usimbu ekanderero lyetu. Morwasinke Jehova a dilire kulimburura makanderero getu usimbu-simbu?

10. Morwasinke twa hepera kulididimikira yipo Jehova a limburure makanderero getu?

¹⁰ Jehova kupurakena komakanderero getu. (Epis. 65:2) Age ku tara makanderero getu asi twa kara nepuro mwendi. (Heb. 11:6) Jehova ana hara hena tu rugane ko yuma kuliza neyi atu kanderere ntani tu rugane mpango zendi. (1 Joh. 3:22) Yipo nye, ayo ya kara nomulyo tu kare nonkareso zokulididimika ntani nokurugana ko yuma kuliza neyi atu kanderere nsene kuna ku hetekera ko kunyokera po nkareso zondona ndi maupirankondo getu. Eyi ga uyungire Jesus kutuvatera tu dimburure asi makanderero getu gamwe kapi ava ga limburura konyima tupu zokukanderera. Age kwa uyungire asi: “Omu hundire ngava mu pe, omu papare ngomu gwane, omu ngongore, makura ngava mu zegwilire. Yeeyi nkenye ogu a hundire kumupa, ogu a papara kugwana, ano ogu a ngongora kumuzegwilira.” (Mat. 7:7, 8) Nsene tu kwama epukururo eli nokukanderera nkenye apa, ngatu kara nehuguvaro asi Guhyetu gemeguru nga purakena komakanderero getu ntani nga ga limburura.—Koros. 4:2.

11. Ngapi Vahebeli 4:16 azi tu vatere nsene kuna kulizuvha asi makanderero getu kapi vana kugalimburura usimbu?

¹¹ Nampili ngomu atu mono asi makanderero getu kwa ku gusa siruwo mokugalimburura, nye Jehova ga tumbwidira asi ngaga limburura posiruwo sokuwapera ndi paapa yina karere hepero. (Resa Vahebeli 4:16.) Yipo nye, kapisi tupe Jehova usima nsene kapi ana kulimburura usimbu ekanderero lyetu. Pasihonena, vantu wovanzi kwa kanderera nomvhura dononzi asi Uhompa waKarunga u wize u ya hagekese po uzuni ou woudona. Jesus ga uyungire hena asi twa hepa kuyirugana ngoso. (Mat. 6:10) Nye ayo ugova nsene muntu a zumbanesa epuro mwaKarunga, morwa asi uhura kapi una kuwiza posiruwo esi ga u ndindira. (Hab. 2:3; Mat. 24:44) Twa hepa kutwikira kundindira mwaJehova ntani nokukara nepuro mwendi. Uhura nga u wiza posiruwo sokuwapera, morwa Jehova ga horowora nare ezuva novili apa ngayi horoka. Ano ezuva olyo ngali kara siruwo sokuwapera kovantu navenye.—Mat. 24:36; 2 Pet. 3:15.

12. Posiruwo musinke ayi tu digopere unene kulididimikira?

 ¹² Twa hepa kulididimikira nokundindira dogoro ngava rugane ko yuma koudona wongandi. Vantu womouzuni ou rorunzi awo kutekura momudona vantu va hana asi worudi rwawo ndi womompo zawo ndi womosirongo sawo. Vamwe kuvatekura momudona, morwa mauvera aga va kara nago. Nombangi daJehova dononzi kwa di tekura momudona morwa epuliro lyawo. Nsene kuna kututekura momudona twa hepa kudiworoka nonkango edi ga uyungire Jesus. Age kwa tente asi: “Ogu nga didimika dogoro kouhura, yige nga yoworoka.” (Mat. 24:13) Nye yisinke norugana nsene ono diva nzo ezi ana tura gumwe gomombungakriste? Nsene asi vakuronambunga vana diva eyi kayi horokere, ngondindira mwawo yipo ngava kohonone po udigu owo monkedi omu gayi harera Jehova ndi? Yisinke nava rugana vakuronambunga nsene gumwe ana tura nzo zonene?

13. Yisinke Jehova ana harere vakuronambunga varugane nsene gumwe ana tura nzo zonene?

¹³ Apa vakuronambunga ava dimburura asi kweli gumwe ogu ga tura nzo mombungakriste, awo kupura Jehova a va peko unongo yipo va kwate egano ukaro ngomu tupu gayi harera. (Jak. 3:17) Sitambo sawo kuna kara sokuvatera munzoni ali tezurure. (Jak. 5:19, 20) Awo hena kurugana paapa va hulira yipo va popere mbungakriste ntani nokuhengagwida ava vana koresa. (2 Kol. 1:3, 4) Apa vakuronambunga ava kona-kona unzoni ou ga rugana gumwe, awo pomuhowo kupapara mauzera yipo va dive eyi ya horokere, ano eyi kuvhura kugusa siruwo. Awo kukanderera nokuruganesa mapukururo gomoBibeli, yipo va vatere monkedi zongwa muntu ogo ana tura nzo. (Jer. 30:11) Nampili ngomu vakuronambunga ava dili kundindira siruwo sosire, nye awo kapi ava tura po etokoro usimbu-simbu. Mbungakriste ngazi gwanena mo mauwa nsene vakuronambunga va kwama mavyukiso gokutunda kwaJehova. Nye nampili vakuronambunga va kohonona po udigu owo monkedi zongwa, ayo simpe ngayi koresa muntu ogu ana tura nzo. Nsene nove yimo o lizuvhu ngoso, yisinke norugana yipo yidire kukukoresa?

14. Sihorokwa musinke somoBibeli nasi kuvatera o lididimikire nsene asi Mukriste mukweni ga ku koresa unene?

¹⁴ Pweli ogu ga ku koresa ndi nampo munazinyetu? Kuvhura o gwane yihonena yoyiwa  moNonkango daKarunga eyi ayi tu rongo tu ndindire kwaJehova mo ku kohonona po udigu owo. Pasihonena, nampili ngomu Josefa va mu hepekere vakuru vendi monkedi zondona, nye age kapi ga va handukilire. Age kwa demenene po kukarera Jehova, ano Jehova kwa mu tungikire morwa elididimikiro lyendi. (Gen. 39:21) Konyima Josefa kwa ya gusilire po ava va mu tekwire momudona. Ntani ga dimbwilire omu Jehova ga mu tungikire. (Gen. 45:5) Ngwendi Josefa, ose ku gwana ehengagwido apa atu hedere pepi naJehova ntani nokundindira mwendi nga rugane ko yuma posiruwo sokuwapera.—Epis. 7:17; 73:28.

15. Yisinke ya vaterere munazinyetu gumwe gomukadi ali didimikire eyi ya mu horokerere?

¹⁵ Yimo, nampo kapi va tu tekura rumwe ngwendi moomu va tekwire Josefa momudona. Nye yikare asi monkedi musinke vana kututekura momudona, ayo kutukoresa. Nsene tu tura pasirugana nompango domoBibeli, ngadi tu vatera tu gwanene mo mauwa nsene twa kara noudigu nagumwe, kukwatera mo ogu a dili kukarera Jehova. (Fil. 2:3, 4) Tu tareni ko sihonena simwe. Munazinyetu gomukadi, kwa mu koresere apa ga dimbwilire asi murugani mukwawo nga muuyunga momudona kovakwawo. Mevango lyo kurugana ko yuma usimbu, munazinyetu ogo gomukadi kwa gazadarere ko kosihonena saJesus. Apa Jesus ngava mu swaura vantu, age kapi nga ninki asi nage a va swaure. (1 Pet. 2:21, 23) Ano sihonena saJesus kwa mu ninkisire a dire kurugana ko yuma kweyi yahorokere. Konyima, munazinyetu ogo kwa ya dimbwilire asi murugani mukwawo nga vere ntani kwa kere nosinka unene. Munazinyetu ga ya yi dimbwilire asi nampo murugani mukwawo kapi ga yirugene mowina. Munazinyetu gomukadi kwa hefe sili mo kudiva asi age kwa lididimikilire eyi ya mu horokerere ntani ga kere nombili.

16. Yisinke na yi ku hengagwida nsene kuna kulididimikira maudigu? (1 Peturusa 3:12)

¹⁶ Nsene asi ove kwa kuhepa morwa kwa kutekura momudona ndi walye nokonda dimwe hena dapeke, diworoka asi Jehova kwa ‘kara pepi nava wokudompa nomutjima.’ (Epis. 34:18) Age ga ku hara sili unene kweyi o likida  elididimiko ntani nokumutwika maudigu goge. (Epis. 55:22) Age yige a pangura navenye vepevhu, age kumona nayinye eyi ayi horoka. (Resa 1 Peturusa 3:12.) Nsene asi ove kuna kuligwanekera nomaudigu aga ono kudira kuvhura kukohonona po, diworoka asi ayo mulyo kundindira mwaJehova a rugane ko yuma.

17. Kuliza naJesaya 30:18, yisinke ga tumbwidira Jehova?

¹⁷ Ntaantani tupu Guhyetu gemeguru a ka tu pe mauwa kupitira moUhompa wendi. Jesaya 30:18 kutanta asi: “HOMPA kuna kundindira a mu fire nkenda. Age ana liwapaikire kumuzaverera, morwa age nkenye apa kurugana eyi ya hungama. Verago vaava ava huguvara mwaHOMPA.” Ava ava ndindire mwaJehova ngava gwana mauwa ngesi ntani mouzuni woupe komeho.

18. Mauwa musinke ngatu ka gwana komeho?

¹⁸ Apa vantu vaKarunga ngava ka hwilira mouzuni woupe, awo kapi hena ngava ka kara noyinka ndi nomaudigu aga vana ku pita neina. Udona nokukora kapi ngayi ka kara ko hena. (Ehor. 21:4) Ose kapi ngatu ka kara nosinka seyi twa hepa morwa ngatu ka kara neyi yoyinzi. (Epis. 72:16; Jes. 54:13) Esi ngasi ka kara sili siruwo sosiwa!

19. Yisinke ana kutuwapaikira ngesi Jehova?

¹⁹ Jehova kuna kutuwapaika ngesi pokutuvatera tu funde po yikara yoyidona, nokutunga po yikara eyi ga hara yipo ngatu ka paruke mepangero lyendi. Wa ha dompa mutjima ntani wa ha hageka kukarera Jehova. Eparu lyewa kuna kukundindira komeho! Ngomu tuna kundindira eparu lyewa komeho, tu twikireni kulididimika nokundindira mwaJehova, dogoro nga mane kusikisa mo eyi ga hara kurugana.