1. Yininke musinke yoyiwa va sikisa mo sinzi sovadinkantu?

 NKENYE mvhura, mayovi govadinkantu kugwana ekuho. Nove wa gwana ekuho ndi? Nsene yimo, vanavazinyetu womombungakriste vana hafa kweyi wa gwana ekuho ntani Jehova nage ana hafa. (Yis. 27:11) Gazadara ko tupu koyininke yoyiyinzi yoyiwa eyi wa sikisa mo. Pasihonena, ove wa lironga momunene Bibeli, nampo ure wonomvhura dongandi. Eyi wa lironga ya ku ninkisa o yi pure nawa-nawa asi Bibeli kuna kara Nonkango daKarunga. Nye unene po, ove wa ya diva noku ya hara ogu ga retesa po Bibeli. Eharo lyoge lyokuhara Jehova kwa nkondopara, ano eyi kwa kuninkisa o li gave kwendi ntani nokugwana ekuho. Ove kwa tura po etokoro lyewa sili!

2. Yisinke natu ka zogera mosirongwa esi?

 ² Tuna si huguvara asi epuro lyoge kwa li hetekere mononkedi dokulisiga-siga komeho o ya gwane ekuho. Nye ngomu ono kukura, ove ngo li gwanekera nomaudigu gamwe hena. Satana nga hetekera ko kukuninkisa o hageke kuhara Jehova ntani yipo o hageke kumukarera. (Efe. 4:14) Wa ha yi pulisira yi ku horokere oyo. Yisinke nayi kuvatera o twikire kulimburukwa Jehova ntani o sikise mo etumbwidiro lyoge lyokumukarera? Wa hepa kutwikira kutura po ezokomeho yipo o kondjere kukara Mukriste ogu ga kura pampepo. (Heb. 6:1) Nye ngapi no vhura kuyirugana oyo?

3. Yisinke va hepa kurugana Vakriste navenye konyima zokugwana ekuho?

³ Konyima zokugwana ekuho, natuvenye twa hepa kukwama epukururo eli ga geve mupositoli Paurusa koVakriste womoEfeso.  Age kwava korangedere va kare “vakurona.” (Efe. 4:13) Eyi kutanta asi va hepere kutura po ezokomeho lyopampepo. Ose kuvhura kukwata egano eyi ga tembe Paurusa apa ga hetakanesere ekuro lyopampepo nomu a kuru munona. Vakurona womukeke ogo, awo kwa mu hara unene ntani kumuhafera. Nye age kapi nga twikira ngorooro kukara mukeke. Mwaza siruwo, age nga hepa kusiga “yininke yosinona nayinye.” (1 Kol. 13:11) Eyi yalifana noVakriste. Konyima zokugwana ekuho, ose twa hepa kutwikira kutura po ezokomeho. Tu zeni tu ka zogere ko magano gamwe aga naga ka tu vatera yipo tu yi sikise mo oyo.

4. Sikara musinke nasi vhura kukuvatera yipo o ture po ezokomeho lyopampepo? Faturura. (Vafilipi 1:9)

⁴ Twikira kuhara Jehova unene. Yimo, ove wa hara nare Jehova. Nye wa hepa kumuhara unene. Ngapi omu no yi rugana oyo? Mupositoli Paurusa kwa tumbwire nkedi zimwe omu natu yi rugana, moVafilipi 1:9. (Resa.) Paurusa kwa kanderere asi eharo lyoVafilipi, li “kure unene-nene.” Yipo nye, ose kuvhura tu hare unene Jehova. Ngapi omu natu yi rugana eyi? Ose kuvhura kuyirugana eyi pokugwana ‘ediwo lyousili nonondunge nadinye.’ Moomu tuna kudiva Jehova unene yimo hena ngatu mu hara unene ntani nokuhafera yikara yendi ntani monkedi omu a rugana yininke. Eharo lyetu lyokuhara kumuhafesa ngali nkondopara ntani ose kapi tuna hara kumuguvisa. Ose kurugana paapa twa hulira yipo tu kwate egano eyi ana tu harere tu rugane ntani nomu natu yi rugana.

5-6. Ngapi omu natu twikira kuhara Jehova unene? Faturura.

⁵ Jesus kwa honenene nawa-nawa yikara yaJehova, yipo nye nsene tu diva nawa Jesus, ose ngatu hara unene Jehova. (Heb. 1:3) Nkedi zongwa po zokudiva nawa Jesus kuna kara pokulironga yihorokwa yomoMavangeli gane. Nsene asi ove simpe kapi o resa Bibeli nkenye ezuva, ove kuvhura kutameka ngesi pokuresa yihorokwa eyi ya zogera kuhamena Jesus. Ngomu ono kuresa yihorokwa eyi ya zogera kuhamena Jesus, demenena po unene koyikara yendi. Age kwa kere goureru kuhedera ntani nga likida eharo kovanona pokuvalidingira. (Mar. 10:13-16) Jesus kwa kere muntu gombili ntani goureru kuhedera ntani varongwa vendi kapi va kere nowoma wokumutantera omu ngava li zuvhu. (Mat. 16:22) Monkedi zangesi, Jesus kwa honenene oGuhwe vemeguru. Jehova nage ureru kumuhedera. Ose kuvhura kumuhedera kupitira mekanderero. Apa atu kanderere kwendi, ose kuvhura kumutantera nkenye eyi kuhamena omu tuna kugazara ndi omu tuna kulizuvha. Ose tuna kara nehuguvaro asi age kapi ngatu pangura. Age ga tu hara ntani kutupakera mbili.​—1 Pet. 5:7.

⁶ Jesus kwa likidire nkenda kovantu. Mupositoli Mateusa kwa uyungire asi: “Apa ga mwene mbunga zovantu, ta va fire nkenda morwa yeeyi va va sigilire va hepe ngwendi nonzwi da hana musita.” (Mat. 9:36) Makura ngapi omu a lizuvhu Jehova? Jesus kwa uyungire asi: “Otate vemeguru nawo kapi va hara asi potunona otu pa zumbane nampili kamwe.” (Mat. 18:14) Nonkango edi kutuhafesa sili, morwa ado kulikida asi Jehova ga tu hara unene. Moomu tuna kudiva nawa Jesus, yimo hena ngatu twikira kuhara Jehova unene.

7. Ngapi omu kukara noVakriste ava va kura pampepo nayi kuvatera?

⁷ Ove kuvhura o lironge omu no hara Jehova unene ntani nokukara Mukriste ogu ga kura pampepo pokulitulira po siruwo sokukara kumwe novapuli vakweni ava va kura pampepo womombungakriste zeni. Dimburura ruhafo oru vana kara naro. Awo kapi ava li vere ketokoro eli va tura po lyokukarera Jehova. Va pura va ku tantere kuhamena yihorokwa eyi va li gwanekera nayo ngomu va karera Jehova. Va pura va ku pe ko magano, nsene ono kara netokoro lyomulyo eli ono hara kutura po. Diworoka asi  ‘vapukuruli wovanzi kuninkisa yininke yi tompoke.’​—Yis. 11:14.

8. Yisinke no rugana nsene ono kara nomasinganyeko kuhamena eyi za uyunga Bibeli?

⁸ Nyokera po masinganyeko goge. Ngomu tupu vana yi tumbura  moparagarafu 2, Satana nga hetekera ko kukuninkisa o dire kutura po ezokomeho lyopampepo. Nkedi zimwe omu na vhura kuyirugana eyi kuna kara pokukuninkisa o kare nomasinganyeko kuhamena marongo gamwe gomoBibeli aga wa lironga asi kapisi usili. Pasihonena, gumwe kuvhura a hetekere ko kukuninkisa o yi pure asi Karunga kapisi yige ga tu sita, nye ose kwa wiza po morwa elisinto. Apa wa kere munona, ove nampo kapi ngo gazara yininke oyo, nye nampo ove ngesi kuna kuyikuronga kosure. Yininke eyi ava kurongo vamitili woge kosure, nampo kuvhura yi moneke ngwendi usili. Nye nampili ngoso, awo nampo kapi va hetekera ko kugwana mauzera nsene asi Musiti yipo ga kara. Diworoka mpango ezi za kara moYisewe 18:17, ezi azi uyunga asi: “Ogu a howo kuuyunga mompanguro kumoneka nkenye apa asi monzira ana kara, dogoro nange ana kumupuragera gokumuvyuka ntani.” Mevango lyokupura nkenye eyi o lirongo kosure, ove wa hepa kulironga nawa eyi adi uyunga Nonkango daKarunga, Bibeli. Rugana epaparo moyimbapiratjangwa yetu. Zogera kumwe novanavazinyetu ava nawo va pulire melisinto pomuhowo. Va pura va ku tantere eyi ya va ninkisa va yi pure asi pwa kara Musiti ogu ga tu hara. Nonzogera dangesi kuvhura kukuvatera yipo o gwane mauzera aga aga likida asi Musiti yipo ga kara.

9. Yisinke ono kulirongera ko kosihorokwa saMelissa?

⁹ Munazinyetu gomukadi Melissa kwa gwanena mo uwa mepaparo eli ga rugene kuhamena unsitwe. * Age kwa tanta asi: “Kosure, vamitili ngava faturura elisinto monkedi ezi ngazi ninkisa vantu va yi pure asi usili. Pomuhowo, ame kapi na here kurugana epaparo morwa ame kwa kere nowoma asi nampo ngani ya dimburura asi elisinto usili. Nye ame na gazadarere ko asi Jehova kuna tu harere tu kare nomaumbangi kuhamena epuliro lyetu, makura yipo na tamekere kurugana epaparo. Ame kwa resere buke Is There a Creator Who Cares About You? ntani nombapira Was Life Created? ntani The Origin of Life​—Five Questions Worth Asking. Mauzera ogo kuna kara yininke eyi na hepere. Ame kulizuvha asi ngano na hovere kuyirugana pomuhowo.”

10-11. Yisinke nayi kuvatera yipo o nyokere po magazaro gomadona? (1 Vatesaronika 4:3, 4)

 ¹⁰ Nyokera po yirugana yoyidona. Posiruwo soudinkantu, malizuvho gokuligwanekera panyama kuvhura kunkondopara unene ntani vamwe kuvhura va ku sininike o hondere. Eyi yiyo ana hara Satana o rugane. Yisinke nayi kuvatera o nyokere po maheteko? (Resa 1 Vatesaronika 4:3, 4.) Nsene kuna kukanderera kwaJehova, mu tantera omu ono kulizuvha ntani mu pura a ku vatere yipo o nkondopare. (Mat. 6:13) Diworoka asi Jehova kuna hara kukuvatera, nye kapisi a ku pangure. (Epis. 103:13, 14) Bibeli kuvhura hena kukuvatera. Melissa ogu tuna tumbura, ngayi mu digopere kunyokera po magazaro gomadona. Age kwa tanta asi: “Kuresa Bibeli nkenye ezuva kwa vatera nge ni nyokere po magazaro gange gomadona. Eyi kwa diworokesere nge asi ame kwa hamena kwaJehova ntani asi na hepa kumukarera.”​—Epis. 119:9.

¹¹ Wa ha hetekera ko kukohonona po maudigu goge pwanyovelike. Uyunga novakondi woge kuhamena maudigu goge. Ayo kapisi ureru kuzogera kuhamena yininke eyi o ligwanekere nayo, nye ayo ya kara nomulyo o yi rugane ngoso. Melissa kwa tanta asi: “Ame ngani kanderere kwaJehova yipo a penge ko uradi makura yipo na zogerere notate kuhamena udigu wange. Ano konyima zoyo, ame kwa lizuvhire ko hansa. Ame na yi divire asi Jehova ga haferere nge.”

12. Yisinke nayi kuvatera o ture po matokoro gomawa?

¹² Kwama nompango domoBibeli. Ngomu ono kukura, vakurona woge ngava kupulisira o ture po matokoro ganyamoge. Nye yininke yinzi simpe eyi wa dira kudiva meparu. Ngapi omu nonyokera po kurugana yininke yepuko eyi nayi zonagwisa po elikwatakano lyoge naJehova? (Yis. 22:3) Munazinyetu gomukadi Kari kwa faturura eyi ya mu vatera yipo a ture po matokoro gomawa. Age kwa ya dimburura asi Vakriste ava va kura pampepo kapi va hepa noveta edi nadi va pangera yipo va dive eyi nava rugana meparu lyawo. Age kwa uyunga asi: “Ame na hepere kukwata egano omu Jehova a tara yininke nye kapisi kukwama tupu noveta.” Nsene kuna kuresa Bibeli lipura nyamoge asi: ‘Yisinke sina kuronga nge sihorokwa esi kuhamena omu Jehova a tara yininke? Sihorokwa esi sa kara nonompango edi nadi vatera nge yipo ni rugane yininke youhunga ndi? Nsene asi yimo, ngapi omu nani gwanena mo uwa nsene ni tura pasirugana nompango edi domoBibeli?’ (Epis. 19:7; Jes. 48:17, 18) Pokuresa Bibeli ntani nokuteda ko kweyi ono kuresa, ayo ngayi kuvatera yipo yi ku karere ureru kutura po matokoro aga ngaga hafesa Jehova. Ngomu ngo twikira kutura po ezokomeho lyopampepo, ove ngo ya dimburura asi kapi wa hepa noveta mwankenye ukaro morwa ngo ya kwata egano omu Jehova a tara yininke.

13. Ngapi omu vakaume wovawa nava kuvatera? (Yisewe 13:20)

¹³ Horowora vakaume ava va hara Jehova. Ngomu tupu ka tu yi tumbura, vakaume ava o horowora ngava kuvatera o kare Mukriste ogu ga kura pampepo. (Resa Yisewe 13:20.) Munazinyetu gomukadi Sara kapi hena ga ya kere noruhafo. Nye pwa ya horokere yuma yimwe eyi ya mu vaterere yipo a ya kare hena noruhafo. Sara kwa tanta asi: “Ame kwa ya gwene vakaume wovawa posiruwo souhunga. Name namunazinyetu gumwe gomukadi ngatu liwapaikire kumwe Ruhungu rwElirongo nkenye sivike. Kaume zange gumwe kwa vaterere nge ni tameke kugava malimbururo komapongo. Morwa evatero lyovakaume vange, ame na ya tamekere kurugana elirongo lyanyamwange lyoBibeli ntani na ya tamekere kukanderera. Ame kwa ya tamekere kutulisa po elikwatakano lyokupama kumwe naJehova ntani na ya tamekere hena kukara noruhafo.”

14. Ngapi omu Julien ga tulisire po vakaume wovawa?

¹⁴ Ngapi omu kutulisa po vakaume ngayi  kuvatera o ture po ezokomeho? Julien, ogu ngesi ana kara mukuronambunga, kwa uyunga asi: “Apa na kere munona ame ngani tulisa po vakaume wovawa apa ngani zuvhisa kumwe nawo. Awo kwa kere vakaume woupampi ntani kwa vaterere nge omu nani vhura kuhafera sirugana sokuzuvhisa. Yipo na ya litulilire po sitambo sokurugana mosirugana sosiruwo nasinye. Ame na ya dimbwilire hena asi konda zeyi na dililire kukara novakaume wovanzi wovawa morwa ame kwa tulisire po tupu vakaume wonomvhura dange. Ano konyima, ame kwa ya tulisire po vakaume wovawa koBeteli. Sihonena sawo kwa vaterere nge ni horowore yilihafeso yoyiwa ntani eyi kwa vaterere nge ni hedere Jehova pepi.”

15. Erondoro musinke ga geve Paurusa kwaTimoteusa kuhamena vakaume? (2 Timoteusa 2:20-22)

¹⁵ Yisinke no rugana nsene o dimburura asi kutulisa po ukaume nagumwe gomombungakriste kuvhura ngayi tulise elikwatakano lyoge naJehova mosiponga? Paurusa ga yi divire asi vamwe womombungakriste kapi va kere nonkareso zoSikriste, makura yipo ga tanterere Timoteusa a li kare ure novantu vangoso. (Resa 2 Timoteusa 2:20-22.) Ukaume wetu naJehova mulyo unene. Ose kwa rugana paapa twa hulira yipo tu hedere pepi Jehova, yipo nye ose kapi tuna hara kukara novakaume ava ngava zonagwisa po ukaume wetu kumwe naJehova.​—Epis. 26:4.

16. Yitambo musinke no vhura kulitulira po?

¹⁶ Litulira po yitambo yomulyo. Litulira po yitambo eyi nayi kuvatera o nkondopeke epuro lyoge ntani eyi nayi kuvatera o kare Mukriste ogu ga kura pampepo. (Efe. 3:16) Pasihonena, nampo kuvhura o li tulire po sitambo sokuwapukurura nkedi zoge zokulironga Bibeli ntani nokuziresa nkenye ezuva. (Epis. 1:2, 3) Ndi nampo kuvhura o hetekere ko kukanderera nkenye apa ntani kutundilira komutjima. Ndi nampo wa hepa kutakamesa yilihafeso eyi o horowora ndi omu o ruganesa siruwo soge. (Efe. 5:15, 16) Jehova nga hafa apa nga ku mona kuna kurugana paapa wa hulira yipo o ture po ezokomeho lyopampepo.

17. Mauwa musinke atu gwanene mo apa atu vatere wopeke?

¹⁷ Ove ngo kara Mukriste ogu ga kura pampepo nsene o vatera wopeke. Jesus kwa tente asi: “Kugava kureta ruhafo kupitakana kutambura.”  (Yirug. 20:35) Ove ngo gwanena mo uwa nsene o ruganesa siruwo soge nononkondo doge mokuvatera wopeke. Pasihonena, ove nampo kuvhura o li tulire po sitambo sokuvatera vakurupe womombungakriste zeni ntani nava wokuvera-vera. Ove nampo kuvhura kuvavatera pokukava randangera yihepwa yawo ntani nomu nava ruganesa yikwakonentu. Nsene asi ove munazinyetu gomugara, litulira po sitambo sokukara mukwafimbunga yipo o vatere momunene vanavazinyetu womombungakriste. (Fil. 2:4) Ove hena kuvhura kulikida eharo kovantu wopeke pokuvazuvhisira mbudi zongwa zoUhompa waKarunga. (Mat. 9:36, 37) Nsene kuvhura, litulira po sitambo sokulihameka mo mosirugana sosiruwo nasinye.

18. Ngapi omu kulihameka mosirugana sosiruwo nasinye nasi kuvatera o ture po ezokomeho lyopampepo?

¹⁸ Sirugana sosiruwo nasinye kuvhura kukuvatera yipo o li hameke mo mononkedi dokulisiga-siga yipo o ture po ezokomeho lyopampepo. Kukara muzuvhisi gokukarerera kuvhura kukuvatera yipo ngo ka kare poSikora zoVazuvhisi woUhompa. Ove kuvhura ngo ka vatere koBeteli ndi kuvhura ngo li hameke mo mosirugana somatungo. Munazinyetu gomudinkantu gomukadi Kaitlyn ogu a rugana uzuvhisi wokukarerera, kwa tanta asi: “Kulihameka mokuzuvhisa kumwe novanavazinyetu ava va kura pampepo kwa vatera nge ni kure pampepo konyima zapa na gwene ekuho. Sihonena sawo kwa tumangeda nge ni lironge Bibeli momunene ntani kwa vatera nge ni wapukurure nkedi zange zokuronga.”

19. Mauwa musinke ngo gwanena mo ngomu ono kutwikira kutura po ezokomeho lyopampepo?

¹⁹ Ove ngo gwanena mo mauwa gomanzi, ngomu ono kutura po ezokomeho lyopampepo. Ove kapi ngo ruganesa nonkondo doge koyininke ya hana mulyo. (1 Joh. 2:17) Ove ngo nyokera po kukora oku atu ligwanekere nako apa atu tura po matokoro gomadona. Nye mevango lyoyo, yininke ngayi ku tompoka ntani ngo hafa. (Yis. 16:3) Sihonena soge sosiwa ngasi korangeda vapuli vakweni, yi kare asi vanona ndi vakurona. (1 Tim. 4:12) Ntani unene po, ove ngo kara nombili ntani ngo kara noruhafo oru aru tundu pokuhafesa Jehova ntani pokutulisa po ukaume wounene kumwe nendi.​—Yis. 23:15, 16.