1. Mauwa musinke atu gwanene mo apa atu zogere novapuli vakwetu kuhamena omu twa genda tu ya kare vamwe woNombangi daJehova?

 “NGAPI OMU wa genda o ya kare gumwe goNombangi daJehova?” Tuna si huguvara asi ove kwa limburura epuro olyo yikando yoyinzi. Olyo kuna kara epuro limwe eli munazinyetu a tu pura nsene ana hara kutudiva momunene. Ose kuhafa pokudiva omu vanavazinyetu va ya diva Jehova noku mu hara ntani ose kuyihafera pokuvatantera nokonda dimwe deyi twa harera kukara vamwe woNombangi daJehova. (Rom. 1:11) Nonzogera odo kutuvatera tu dimburure omu ya kara nomulyo kukara gumwe goNombangi daJehova. Ntani eyi kutuvatera tu tokomene “kukwaterera kousili,” eyi kutanta asi kutwikira kuparuka monkedi ezi nazi ninkisa Jehova a tu tungike ntani yipo a tu hafere.​—3 Joh. 4.

2. Yisinke natu ka zogera mosirongwa esi?

² Mosirongwa esi tatu ka tarurura nokonda dimwe deyi twa harera usili ndi kukara gumwe goNombangi daJehova. Natu ka zogera hena omu natu twikira kuyilikida asi ose twa hara usili. Twa si huguvara asi eyi natu ka zogera nayi ka tu vatera tu pandure Jehova kweyi ga tu kokera kousili. (Joh. 6:44) Na yi ka tu vatera hena tu kare neharo lyenene lyokutantera ko wopeke usili womoBibeli.

3. Konda musinke zomulyo po unene zeyi twa harera usili?

³ Ose kwa hara usili morwa nokonda dononzi. Konda zomulyo po unene zeyi twa harera usili kuna kara asi morwa twa hara Jehova, ntundiliro zousili. Kupitira moNonkango dendi Bibeli, ose  twa ya mu diva asi age munankondo ogu ga sita eguru nevhu ntani age Guhyetu gemeguru geharo ogu atu pakere mbili. (1 Pet. 5:7) Ose twa yi diva asi Karunga gwetu “Mufenkenda, age Karunga gombili noMudidimiki. Uwa wendi unzi, age Mulimburukwi.” (Ex. 34:6) Jehova kwa hara uhungami. (Jes. 61:8) Ayo kumukoresa komutjima apa atu mono kuna kuhepa ntani age ga liwapaikira kukahagekesa po maruhepo nagenye posiruwo esi ga tura po. (Jer. 29:11) Ose kuna kundindira nononkondo siruwo oso sosiwa. Ano ozo kuna kara konda zimwe zeyi twa harera unene Jehova.

4-5. Morwasinke mupositoli Paurusa ga hetakanesere ehuguvaro lyetu kosisikameso?

⁴ Konda musinke hena zimwe zeyi twa harera usili? Usili kuturetera mauwa. Tuzeni tu ka tare sihonena esi sina kukwama ko. Usili womoBibeli kwa kwatera mo ehuguvaro lyetu lyokomeho. Mupositoli Paurusa kwa fatwilire omu ehuguvaro olyo lya kara nomulyo apa ga tjenge asi: “Ehuguvaro lyetu kwa fana ngwendi sisikameso separu lyetu, alyo kwa kora ntani lyosili.” (Heb. 6:19) Ngwendi moomu tupu sisikameso asi ninkisa wato u dire kugenda, ehuguvaro lyetu lyokomeho kutuvatera tu kare tuna litura apa atu ligwanekere nomaudigu.

⁵ Apa Paurusa ga uyungire nonkango odo, age kwa uyungire kuhamena ehuguvaro lyemeguru eli va kara nalyo Vakriste wovagwavekwa. Nye nonkango edi kwa tamba hena koVakriste ava vana kundindira nononkondo yipo va ka paruke narunye moParadisa pevhu. (Joh. 3:16) Yosili kulironga kuhamena ehuguvaro lyomwenyo gwanarunye kwa ninkisa eparu lyetu li kare nositambo.

6-7. Ngapi omu Yvonne ga gwanena mo mauwa pokulironga yininke yokomeho?

⁶ Tu zogereni kuhamena sihonena samunazinyetu gomukadi Yvonne. Age kapi ga kulira mousili ntani apa ga kere munona age kwa tjilire nomfa. Age kudiworoka nonkango edi ga dilire kudivara edi asi: “Ezuva limwe eparu ngali haga.” Age kwa uyunga asi: “Nonkango odo kwa ninkisire nge ni dire kurara masiku nokugazadara kuhamena meho. Ame kwa lipulire asi ‘morwasinke atu parukire nomvhura dononsesu ntani nokufa’? Ame kapi na kwete egano konda zeyi atu parukire nye ame kapi na here kufa.”

⁷ Ano konyima apa Yvonne ga ya kere mudinkantu, age kwa ya ligwene kumwe noNombangi daJehova. Age kwa tanta asi: “Ame kwa ya tamekere kuyipura asi ame kuvhura kukara nehuguvaro lyokuparuka narunye moParadisa pevhu.” Ngapi omu kulironga usili womoBibeli ya vatera munazinyetu ogu gomukadi? Age kwa uyunga hena asi: “Ame ngesi kapi ani pindauka masiku nokukara nosinka seyi yokomeho ndi ni kare nosinka sonomfa.” Yosili munazinyetu Yvonne kwa hara usili womoBibeli ntani age kuhafera kutantera ko wopeke kuhamena ehuguvaro lyendi lyokomeho.​—1 Tim. 4:16.

8-9. (a) Ngapi omu mugara gumwe gomosifanekeso simwe saJesus ga tere ugawo ou ga gwene? (b) Ngapi omu o tara usili?

⁸ Usili womoBibeli kwa kwatera mo hena mbudi zongwa zokuhamena Uhompa waKarunga. Jesus kwa hetakanesere usili woUhompa owo kougawo ou wa horama. MwaMateusa 13:44, Jesus kwa uyungire asi: “Uhompa wemeguru kwa lifana nougawo ou wa horama mepya, ou ga gwene mugara makura ta u horeke. Age kwa hefe unene makura ta zi a ka randese nayinye eyi ga wekere, ta ya randa olyo epya.” Konekeni asi mugara ogo kapi ga paparere ugawo wina. Nye konyima zapa ga u gwene age kwa tulire po malizambero gomanene yipo a u gwane ndi u kare wendi. Ntani age kwa randesere nayinye eyi ga wekere. Morwasinke? Morwa ga yi divire asi ugawo wina kwa kere nomulyo unene. Awo kwa kere nomulyo unene kupitakana yininke nayinye eyi ga hepere kusiga.

 ⁹ Nove yimo o lizuvhu ngoso kuhamena usili ndi? Yimo! Ose twa yi diva asi kwato eyi ya kara mouzuni ou eyi ya kara nomulyo unene kupitakana ruhafo oru atu gwana ngesi pokukarera Jehova ntani nehuguvaro eli twa kara nalyo lyokukagwana mwenyo gwanarunye komeho moUhompa waKarunga. Situmbukira esi twa kara naso sokukara nelikwatakano lyokupama naJehova kuna kara nomulyo unene kupitakana yininke nayinye yapeke. Ose ngatu hafa unene nsene tu tokomena ‘kumuhafesa.’​—Koros. 1:10.

10-11. Yisinke ya tumangedere Michael yipo a ture po malitjindjo gomanene meparu lyendi?

¹⁰ Sinzi setu kwa tura po malizambero gomanene yipo Jehova a tu hafere. Vamwe kwa hageka yirugana yawo yokufuta yimaliwa yoyinzi. Ano vamwe kwa hetekera ko kunyokera po kungawopa. Ano vamwe hena kwa tjindja monkedi omu ngava paruka apa va lirongere kuhamena Jehova. Oyo yiyo ga rugene munazinyetu gomugara Michael. Age kapi ga kulira mousili. Apa ga kere mudinkantu age kwa mu dewire kudana karate. Age kwa uyunga asi: “Ayo kwa kere nomulyo kwange mokukara nina pama parutu. Poyiruwo yimwe ngani lizuvhu asi kwato gokuvhura kufunda nge.” Nye apa ga tamekere kulironga Bibeli, Michael kwa ya dimbwilire omu Jehova a tara nyanya. (Epis. 11:5) Michael kwa uyunga kuhamena valikwali woNombangi daJehova ava ngava mu rongo Bibeli asi: “Awo kapi va tanterere nge asi ni hageke kudana karate nye awo kwa twikilire tupu kuronga nge usili womoBibeli.”

¹¹ Ngomu Michael ga twikilire kulironga kuhamena Jehova, ayo kwa mu vaterere yipo a mu hare unene. Ayo kwa mu gumine unene komutjima apa ga ya dimbwilire nkenda ezi ga kara nazo Jehova kovakareli vendi. Mwaza siruwo Michael ga ya dimbwilire asi ga hepere kutura po etokoro lyenene meparu lyendi. Age kwa tanta asi: “Ame na yi divire asi ngayi karera nge udigu kuhageka karate. Nye ame na yi divire asi ayo ngayi hafesa Jehova ntani nayi pulire nawa-nawa asi kukarera Jehova mulyo unene kupitakana nkenye eyi.” Michael ga yi divire asi usili ou ga gwana kwa kara nomulyo unene, eyi yiyo ya mu ninkisire a ture po malitjindjo gomanene meparu lyendi.​—Jak. 1:25.

12-13. Ngapi omu usili womoBibeli wa vatera Mayli?

¹² Mokulikida mulyo gousili, Bibeli kuhetakanesa usili koramba ezi azi tema momundema. (Epis. 119:105; Efe. 5:8) Mayli ogu ga kara moAzerbaijan, kulikida rupandu kevatero eli ga gwana mononkango daKarunga. Vakondi vendi kwa kara momaukarelikarunga gokulisiga. Oguhwe Vamusilema ano ozina Vajuda. Age kwa uyunga asi: “Nampili ngomu na dilire kukara nomasinganyeko asi Karunga yipo ga kara, nye ame simpe na kere nomapuro gomanzi. Ame ngani lipura asi ‘morwasinke Karunga ga sitira vantu ntani morwasinke muntu na hepera eparu lyendi mudima ano konyima zoyo va ka mu hepeke momundiro gwanarunye?’ Mokumona asi vantu ngava uyunga asi nkenye eyi ngayi horoka Karunga yige ngayi retesa po, ame ngani lipura asi ‘ngoso Karunga kupangera vantu ntani kuhafera kutarera vantu omu vana kuhepa ndi?’”

¹³ Mayli kwa twikilire kupapara malimbururo komapuro aga nga lipura. Mwaza siruwo ga ya tamekere kulironga Bibeli ntani nokuyakara gumwe goNombangi daJehova. Age kwa uyunga asi: “Magano gomoBibeli kwa vaterere nge ni kare muntu goruhafo. Efatururo eli na gwana mononkango daKarunga kwa vatera nge ni kare nombili zomomutjima.” Ngwendi Mayli, natuvenye kuhamberera Jehova ogu ga tu “horowora mo momundema, yipo [tu] wize mouzera wendi wokutetura.”​—1 Pet. 2:9.

14. Yisinke nayi tu vatera tu hare unene usili womoBibeli? (Tara hena kakende “ Yininke yimwe eyi natu hetakanesa kousili womoBibeli.”)

¹⁴ Eyi kuna kara tupu yihonena yoyisesu eyi  ayi likida omu usili wa kara nomulyo. Twa si huguvara asi ove kuvhura o gazadare ko hena nokonda dimwe. Kuvhura o litulire po sitambo sokurugana elirongo lyanyamoge lyoBibeli yipo o konakone nokonda dimwe deyi twa hepera kuhara usili. Moomu tuna kuhara unene usili, yimo hena ngayi tu vatera tu gwane nonkedi dimwe omu natu yi likida asi twa hara usili.

15. Nkedi musinke zimwe omu natu yi likida asi twa hara usili?

¹⁵ Ose kuvhura kuyilikida asi twa hara usili womoBibeli, pokulironga nkenye apa Bibeli ntani noyimbapiratjangwa yetu. Yikare asi nomvhura dokuhura kupi twa kara mousili, simpe yinzi twa hepa kulironga. Sifo soRuhungu rokuhova kwa uyungire asi: “Yininke yinzi yoyimpempa mouzuni ou, ano ayo kuvhura kutukarera udigu kudimburura usili. Mokuninka asi o gwane usili, ove ntudi wa hepa kuupapara. . . . Ove wa hepa kulitura mo unene yipo asi ou gwane. . . . Hetekera ko nkenye apa kugwana mausili gomoBibeli.” Yimo, kulironga kwa hepa elituromo, nye mauwa manzi ga kara mo nsene tu yi rugana ngoso.

16. Nkedi musinke o ruganesa pokulironga ezi azi kuvatere unene? (Yisewe 2:4-6)

¹⁶ Kapisi natuvenye atu hafere kuresa nokulironga. Nye Jehova kwakutuzigida tu twikire  ‘kupapara’ yipo tu kwate egano usili. (Resa Yisewe 2:4-6.) Ose ngatu gwanena mo uwa nkenye apa nsene tupu tu yi rugana oyo. Corey kwa uyunga asi apa a rugana elirongo lyendi lyoBibeli, age kudemenena velise zimwe posikando. Age kwa faturura asi: “Ame kuresa nonkango dokonhi nadinye ntani kuresa Matjangwa gamwe hena ntani nokurugana ko hena mapaparo gamwe. . . . Nkedi ezi kuvatera nge yipo ni lironge yininke yoyinzi.” Yikare asi nose kuruganesa nkedi ozo ndi nkedi zimwe hena zapeke, ose kuyilikida asi twa hara usili pokulitulira po siruwo tu lironge nokulitura mo unene.​—Epis. 1:1-3.

17. Yisinke ayi tanta kuparuka kuliza nousili womoBibeli? (Jakopo 1:25)

¹⁷ Yimo, ose twa yi diva asi ayo kapi tupu ya gwanena po mokulironga usili. Mokuninka asi tu gwanene mo uwa, ose twa hepa kuparuka kuliza nousili womoBibeli, ano eyi kutanta asi kusikisa mo eyi atu lirongo. Nsene tu yi rugana oyo, ose ngatu kara noruhafo rousili. (Resa Jakopo 1:25.) Ngapi natu yi diva asi ose kuna kuparuka kuliza nousili womoBibeli? Munazinyetu gumwe gomugara kwa gava ko egano asi twa hepa kukonakona eparu lyetu yipo tu dimburure nsene asi ose kuna kutura pasirugana eyi atu lirongo ntani nokudimburura apa twa hepa kuwapukurura. Mupositoli Paurusa kwa uyungire asi: “Yi kare asi marunduruko musinke twa tura po, tu twikireni monkedi zokulifana.”​—Fil. 3:16.

18. Morwasinke twa hepera kurugana paapa twa hulira yipo tu “kwaterere kousili”?

¹⁸ Gazara tupu mauwa aga atu gwanene mo apa atu rugana paapa twa hulira yipo tu twikire “kukwaterera kousili”! Ayo kapi ayi tu retere tupu uwa meparu lyetu nye hena kuhafesa Jehova novapuli vakwetu. (Yis. 27:11; 3 Joh. 4) Edi kuna kara nokonda domulyo po unene deyi natu harera usili ntani deyi natu parukira kuliza nousili womoBibeli.