1. Kuliza no-1 Vatesaronika 5:11, sirugana musinke twa hepa kurugana natuvenye?

 MBUNGAKRISTE zeni za tunga rumwe ndi za wapukurura rumwe Sinyanga soUhompa ndi? Nsene yimo, ove nampo kuna kudiworoka epongo lyeni lyokuhova eli mwa pongerere mevango olyo. Ove kwa pandwire Jehova ketungo olyo. Ove nampo kwa hefe unene nokuhara kulira ntani ya ku karerere udigu kudimba rusumo rokuhova mepongo olyo. Yinyanga yetu yoUhompa kwa yi tunga nawa ntani kuyererepekesa ko Jehova. Nye ose kuyererepeka unene Jehova apa a tu lihameke mo mosirugana sapeke setungo. Sirugana oso kwa hamena mo yininke yomulyo unene kupitakana tupu sirugana sokutunga etungo. Amo kwa hamena mo kunkondopeka vantu ava ava wiza komatungo ogo goukareli. Eyi yiyo ga rugene mupositoli Paurusa apa ga tjenge nonkango edi da kara mo-1 Vatesaronika 5:11, omu sina tundu siparatjangwa setu.​—Resa.

2. Yisinke natu ka zogera mosirongwa esi?

² Mupositoli Paurusa kuna kara gumwe gosihonena sosiwa unene, ogu ga divire kunkondopeka vapuli vakwawo. Age kwa va likidire nkenda. Mosirongwa esi, natu ka zogera omu Paurusa ga vaterere vapuli vakwawo (1) va lididimikire maudigu, (2) va kare nombili novapuli vakwawo, (3) va nkondopeke epuro lyawo mwaJehova. Tu zeni tu ka tare omu natu mu honena ntani nomu natu nkondopeka vanavazinyetu neina.​—1 Kol. 11:1.

3. Ehetakano musinke ga kere nalyo Paurusa?

³ Paurusa kwa here unene vapuli vakwawo. Nage nga ligwanekere nomaudigu. Yipo nye, ayo ngayi mu karere ureru kulikida nkenda vapuli vakwawo apa ngava li gwanekere nomaudigu. Sikando  simwe, Paurusa kapi ga kere noyimaliwa ntani ga hepere kugwana yirugana yipo a lirerese ko mwene nava ga tungire nawo. (Yirug. 20:34) Age nga rugana yirugana yokutunga notenta. Apa ga ka sikire moKolinte, pomuhowo age kwa ka rugene naAkura ntani naPilisikira, ava nawo ngava rugana sirugana sonotenta. Nye nkenye Esabata, age nga zuvhisire Vajuda ntani noVagereka. Ano apa Sirasa naTimoteusa va ka sikire, “Paurusa ta litura mo unene mokuzuvhisa mbudi.” (Yirug. 18:2-5) Paurusa kapi ga divarere sitambo sendi, sokukarera Jehova. Mokumona asi Paurusa kwa tulire po sihonena sosiwa sokurugana unene moyirugana yokuzuvhisa ntani noku pakera mbili yihepwa yendi, eyi ya mu karerere ureru mokukorangeda vapuli vakwawo. Age kwa va diworokesere va dire kupulisira makondjeso gemeparu ntani nosinka sokupakera mbili mapata gawo yipo yi va ninkise va divare yininke “yomulyo po unene,” eyi kwa hamena mo kurugana nayinye eyi ya hepa po mokukarera Jehova.​—Fil. 1:10.

4. Ngapi omu Paurusa naTimoteusa va vaterere vapuli vakwawo yipo va lididimikire mahepeko?

⁴ Konyima zapa tupu mbunga zompe va zi tulisire po moTesaronika, vapuli wovape womombungakriste ozo, kwa ligwanekerere nomarwaneso gomanene. Apa mbunga zovarwanesi za dilire kugwana oPaurusa naSirasa, makura yipo va purututire ‘vapuli vamwe va va tware kovapangeli womositata,’ oku tava zigire asi: “Vagara ava kurwanesa mpangera zahompa gwaRoma.” (Yirug. 17:6, 7) Yosili eyi kwa tukukisire Vakriste wovape apa va dimbwilire asi vantu womositata kuna kuvarwanesa. Awo ngano va hagekere kulitura mo unene mokukarera Jehova, nye Paurusa kapi ga yi pulisilire oyo yi horoke. Nampili ngomu Paurusa naSirasa va hepere kutunda mo mositata, awo kwa divilisire asi mbungakriste ozo zompe kuna kuzipakera mbili monaruwa. Paurusa kwa diworokesere Vakriste womoTesaronika asi: ‘Twa mu tumine Timoteusa mukwetu . . . , yipo epuro lyeni li ya pame, ntani yipo maudigu ga dire kumugusa nonkondo.’ (1 Tes. 3:2, 3) Timoteusa nage kwa ligwanekerere nomahepeko modoropa zawo zomoLisitira. Age ga limonenene omu Paurusa ga nkondopekere vapuli vakwawo womoLisitira. Pokumona yitundwamo yoyirugana eyi ga rugene Jehova, eyi kwa vaterere Timoteusa yipo a vhure kuhengagwida vapuli vakwawo wovape, pokuvatantera asi nawo ngayi va genda po tupu monaruwa yininke.​—Yirug. 14:8, 19-22; Heb. 12:2.

5. Ngapi omu munazinyetu gomugara Bryant ga gwanenene mo uwa mevatero eli ga mu pere mukuronambunga?

⁵ Mononkedi musinke hena dimwe Paurusa ga nkondopekere vapuli vakwawo? Komeho va tengure koLisitira nokoIkoniya ntani nokoAntiyokiya, Paurusa naBaranabasa kwa “horowere vagara vamwe mwankenye mbungakriste.” (Yirug. 14:21-23) Yosili vagara owo va horowere, kwa hengagwidire nombungakriste odo ngwendi moomu tupu ava yi rugana vakuronambunga neina. Ka konekeni nonkango edi ga uyunga munazinyetu gomugara gedina Bryant. Age kwa uyunga asi: “Apa na gwanesere nomvhura 15, otate kwa tundire membo ntani onane kwa va gusire mombunga. Ame kwa lizuvhire ngwendi asi nyamelike na kara ntani ame kwa guvire.” Yisinke ya vaterere Bryant yipo a lididimikire? Age kwa uyunga asi: “Mukuronambunga gomombungakriste zetu gedina Tony, nga zogere name komapongo ntani nopoyiruwo yimwe hena. Age nga simwitire nge yihorokwa yovanavazinyetu vamwe ava ngava ligwanekere nomaudigu, nye nampili ngoso awo simpe kwa kere noruhafo. Age kwa reserere nge etjangwa lyemEpisarome 27:10 ntani rorunzi nga zogere name kuhamena Hesekiyeli ogu nga karere Jehova noulimburukwi nampili ngomu oguhwe va dilire kukara nosihonena sosiwa.” Ngapi omu evatero eli lya vaterere Bryant? Bryant kwa uyunga asi: “Nekorangedo lyaTony, ame kwa ya li tulilire po sitambo sokulihameka mosirugana sosiruwo  nasinye.” Vakuronambunga, diviliseni asi wolye ava nava vhura kuhepa ekorangedo mombungakriste, ngwendi Bryant.​—Yis. 12:25.

6. Ngapi omu Paurusa ga ruganesere masimwititi govakareli vaJehova vanare mokunkondopeka vapuli vakwawo?

⁶ Paurusa kwa diworokesere vapuli vakwawo asi mbunga zonene zonombangi kwa lididimikilire maudigu morwa Jehova kwa va nkondopekere. (Heb. 12:1) Paurusa gayi divire asi masimwititi govakareli vaJehova vanare ava ya tompokere kulididimikira nkenye udigu, kuvhura kukorangeda vapuli vakwawo ntani kuvhura kuvavatera va demenene ‘kositata saKarunga gomunamwenyo.’ (Heb. 12:22) Eyi ya lifana na neina. Ayo kutunkondopeka apa atu resa kuhamena omu Jehova ga vaterere Ngidiyona, Baraka naNdafita naSamwere ntani navamwe hena. (Heb. 11:32-35) Ntani ayo kutukorangeda hena apa atu resa kuhamena yihonena yomomazuva getu, yovanavazinyetu ava va likidire epuro. Komberewa zetu zonene zoNombangi daJehova, rorunzi ose kugwana nombilive dovanavazinyetu ava va nkondopeka epuro lyawo pokuresa masimwititi govakareli vaJehova wovalimburukwi womomazuva getu.

7. Yisinke ono kulirongera ko kepukururo lyaPaurusa eli lyakara moVaroma 14:19-21?

⁷ Ose kunkondopeka vanavazinyetu apa atu rugana yininke eyi ayi retesa mbili mombungakriste. Ose kapi atu pulisire magano gokulisiga-siga aga twa kara nago ga tu gaunune. Ntani ayo kutuhafesa apa atu sikisa mo nompango domoBibeli. Tu zeni tu ka tare sihonena esi sina ku kwama ko. Mombungakriste zomoRoma kwa kere mo Vakriste woVajuda ntani nava wovapagani. Apa Veta zaMosesa va zi hagekesere po, vakareli vaJehova kapi va hepere hena kukwama noveta odo dokuhamena kulya nondya dongandi. (Mar. 7:19) Kutunda nye posiruwo oso, Vakriste vamwe woVajuda kwa tamekere kulya nondya domarudi nagenye gokulisiga-siga. Nye nampili ngoso, Vakriste vamwe woVajuda kwa lizuvhire asi ayo kapi ya kere uhunga kulya nondya odo. Ukaro ou kwa ninkisire mbungkriste zi ligaunuke. Paurusa kwa likidire mulyo gokutulisa po mbili ntani age kwa uyungire asi: “Hansa kudira kulya nyama ndi kunwa vhinyu ndi kurugana nkenye eyi nayi pundukisa mukweni.” (Resa Varoma 14:19-21.) Yipo nye, Paurusa kwa vaterere vapuli vakwawo va dimburure omu madiro kulizuvha ogo ga kundamene mbungakriste ntani age hena ga liwapaikilire kutjindja nkareso zendi yipo a dire kupukisa wopeke. (1 Kol. 9:19-22) Nose kuvhura kunkondopeka vanavazinyetu ntani nokutulisa po mbili mombungakriste nsene tu dira kulitatana nawo kuhamena yuma yopamundinda.

8. Yisinke ga rugene ko Paurusa apa udigu wounene wa horokere mombungakriste zomosiruwo sovapositoli, ou wa kundamene mbili zomombungakriste?

⁸ Paurusa kwa tura po sihonena sosiwa sokutulisa po mbili kumwe nava ngava dili kukwatesa ko yininke yomulyo. Pasihonena, vamwe ava va hamenene kombungakriste zomosiruwo sovapositoli vanare, kwa geve egano asi Vakriste wovapagani va hepere kuvarugana yovamba yipo va dire kuvarugana momudona Vajuda. (Gar. 6:12) Paurusa kwa nyokerere po nononkondo egano olyo. Nye mevango lyokuninka asi va kwame eyi ga here va rugane, age kwa linunupikire pokupura ko mavyukiso kovapositoli ntani nokovakuronambunga womoJerusarema. (Yirug. 15:1, 2) Mokumona asi Paurusa kwa kohwenene po udigu owo monkedi zangesi, nkareso zendi kwa vaterere Vakriste owo yipo va twikire kukara noruhafo ntani yipo va twikire kukara nombili mombungakriste.​—Yirug. 15:30, 31.

9. Ngapi omu natu vhura kukwama sihonena saPaurusa?

⁹ Nsene udigu wounene u horoka, ose twa hepa kutulisa po mbili pokugwana mavyukiso kwava ga horowora Jehova yipo va pakere mbili  mbungakriste. Rorunzi, mavyukiso gomoBibeli kuvhura kugagwana moyimbapiratjangwa ndi momavyukiso aga za gava mbunga zaJehova. Nsene tu demenena kokukwama mavyukiso ogo mevango tupu lyokukwama eyi tuna hara kurugana, ose ngatu tulisa po mbili mombungakriste.

10. Yisinke hena yimwe eyi ga rugene Paurusa yipo a tulise po mbili mombungakriste?

¹⁰ Paurusa kwa tulisire po mbili apa ga tumbwire yikara yoyiwa yovapuli vakwawo, nye kapisi nkareso zawo zondona. Kouhura wombilive ezi Paurusa ga tjangerere Varoma, Paurusa kwa tumbwire vapuli vakwawo wovanzi komadina gawo ntani momaukaro gomanzi, Paurusa kwa gwederere ko yininke yoyiwa kuvahamena ndi kwa tumbwire yininke yopamundinda yokuvahamena. Ose kuvhura kuhonena Paurusa, pokutumbura ndi pokudemenena koyikara yoyiwa yovanavazinyetu. Apa atu rugana ngoso, ose kutulisa po ukaume wokunkondopara kumwe novanavazinyetu ntani ose kugwederera ko keharo eli twa kara nalyo mombungakriste.

11. Ngapi natu tulisa po mbili nsene pana horoka madiro kulizuvha mokatji ketu?

¹¹ Poyiruwo yimwe, nampili Vakriste ava va kura pampepo, nawo kuvhura kudira kulizuvha ndi kuvhura kulitangwisa. Oyo yiyo ya horokerere Paurusa nakaume kendi gomunene Baranabasa. Vagara ava vavali kwa litatanene kuhamena nsene asi kuvhura va ze naMarukusa morugendo rwawo rokukwama ko romosirugana sawo soutumwa. Awo kwa kere ‘nonomutangu dononene’ pokatji kawo, makura yipo va ligaunukire. (Yirug. 15:37-39) Nye Paurusa naBaranabasa ntani naMarukusa, ya va tompokere kutulisa po mbili pokatji kawo. Eyi kwa likidire asi awo kwa tere kutulisa po mbili nouumwe mombungakriste asi kwa kere sininke somulyo unene. Ano Paurusa konyima kwa ya uyungire momuwa kuhamena Marukusa naBaranabasa. (1 Kol. 9:6; Koros. 4:10) Nose twa hepa kukohonona po madiro kulizuvha aga natu vhura kukara nago nava womombungakriste ntani nokutwikira kudemenena koyikara yawo yoyiwa. Monkedi zangoso, ose ngatu retesa po mbili nouumwe.​—Efe. 4:3.

12. Maudigu musinke gamwe aga ava ligwanekere nago vanavazinyetu?

¹² Ose kunkondopeka vanavazinyetu apa atu nkondopeke epuro lyawo mwaJehova. Vanavazinyetu vamwe kuvaswaura vekoro lyawo wovahapuli ndi varugani vakwawo ndi vanasure vakwawo. Vamwe kwa kara nomauvera gomanene, ano vamwe kuna kuvadigopera kunyokera po malizuvho gokukoresa. Simpe hena vanavazinyetu vamwe kwa gwana ekuho nomvhura dononzi dina ka pita ntani awo kwa ndindira siruwo sosire yipo uzuni ou u hage po. Maukaro aga kuvhura kuheteka epuro lyoVakriste neina. Vakriste womombungakriste zomosiruwo sanare, nawo ngava li gwanekere nomaudigu gokulifana. Yisinke ga rugene ko Paurusa mokunkondopeka vapuli vakwawo?

13. Ngapi omu Paurusa nga vatere vapuli vakwawo ava ngava swaura morwa epuliro lyawo?

¹³ Paurusa kwa ruganesere Matjangwa mokunkondopeka epuro lyovapuli vakwawo. Pasihonena, nampo Vakriste wovaJuda kapi va divire omu nava limburura munekoro ogu ga kere asi muhapuli, ogu nga uyunga asi Vajuda kwa kere mulyo unene kupitakana Vakriste. Twa sihuguvara asi mbilive ezi ga tjangerere Paurusa Vahebeli kwa korangedere Vakriste owo. (Heb. 1:5, 6; 2:2, 3; 9:24, 25) Awo va vhulire kuruganesa magano gomombilive ozo yipo va dive omu nava limburura vanekoro vawo wovahapuli ava ngava va rwanesa. Neina, nose kuvhura kuvatera vanavazinyetu ava vana kuligwanekera nomaswauro va ruganese yimbapiratjangwa yetu yipo va faturure nokonda deyi va pulira mepuliro lyawo. Ntani nsene asi vadinkantu vetu kuvasindagura morwa yeeyi va pura mounsitwe, ose kuvhura ku va vatera va gwane mauzera mombapira Was Life  Created? ntani The Origin of Life—Five Questions Worth Asking, mokuvalikida va yi pure asi eparu kwa wiza po morwa Musiti.

14. Yisinke ga rugene Paurusa, nampili ngomu nga li tura mo unene mosirugana sokuzuvhisa ntani nokuronga?

¹⁴ Paurusa kwa korangedere vapuli vakwawo va likide eharo kupitira ‘moyirugana yoyiwa.’ (Heb. 10:24) Age kapi tupu nga vatere vapuli vakwawo mweyi nga uyunga, nye hena mweyi nga rugana. Pasihonena, apa vapuli vakwawo va li gwanekerere nerumbu, Paurusa kwa vaterere pokugava yininke eyi va hepere. (Yirug. 11:27-30) Nampili ngomu Paurusa nga li tura mo unene mosirugana sokuzuvhisa ntani nokuronga, age nkenye apa nga papara nonkedi omu navhura kuvatera ava va hepere evatero noyihepwa yawo yopanyama. (Gar. 2:10) Pokuyirugana ngoso, age kwa nkondopekere vapuli vakwawo yipo va yi pure asi Jehova ngava pakera mbili. Neina, ose kunkondopeka epuro lyovanavazinyetu apa atu lizambere siruwo setu, nonkondo detu ntani noudivi wetu yipo tu vatere moyimpagwa. Ose hena kuyirugana oyo apa atu gava yigava koyirugana yomouzuni mudima. Monkedi zangesi ntani nomononkedi hena dimwe dapeke, ose kuvatera vanavazinyetu yipo va kare nehuguvaro mwaJehova asi age kapi ngava siga.

15-16. Ngapi natu tekura ava va dira kukara nepuro lyokupama?

¹⁵ Paurusa kwa twikilire kuvatera ava va dilire kukara nepuro lyokupama. Age kwa va likidire nkenda ntani nga uyunga nawo monkedi zongwa zeharo. (Heb. 6:9; 10:39) Pasihonena, mombilive zendi nazinye ezi ga tjangerere Vahebeli, rorunzi age kwa ruganesere mo nkango “ose,” mokulikida asi nage ga hepere kutura pasirugana mapukururo aga ga va pere. (Heb. 2:1, 3) Ngwendi Paurusa, nose kutwikira kuvatera ava va dira kukara nepuro lyokupama. Ose hena kuvankondopeka pokulikida elituromo mwawo. Monkedi zangesi, ose kuyilikida asi twa va hara. Mbuuyungiso zongwa kuvhura kukorangeda wopeke.

 ¹⁶ Paurusa kwa hengagwidire vapuli vakwawo asi Jehova nga mono yirugana yawo yoyiwa eyi ngava rugana. (Heb. 10:32-34) Ose kuvhura kurugana yokulifana pokuvatera mupuli mukwetu ogu ga dira kukara nepuro lyokupama. Ose hena kuvhura tu mu pure atu tantere asi ngapi omu ga genda yipo a wize mousili ndi kuvhura tu mu korangede a gazadare ko yiruwo eyi ga li zuvhire asi Jehova kwa mu vaterere. Ose kuvhura tu ruganese mpito ozo yipo tu mu huguvarese asi Jehova kapi ga divara yirugana yeharo eyi ga rugana ntani asi Jehova kapi nga mu siga nampili komeho. (Heb. 6:10; 13:5, 6) Nonzogera edi kuvhura kukorangeda vanavazinyetu yipo va twikire kukarera Jehova.

17. Udivi musinke twa hepa kutunga po?

¹⁷ Ngwendi moomu tupu murugani ogu a rugana koyirugana yetungo a wapukurura ediwo lyendi lyokutunga mwaza siruwo, nose kuvhura ku ya diva omu natu nkondopeka vanavazinyetu mwaza siruwo. Ose kuvhura kuvatera vanavazinyetu yipo va gwane nonkondo dokulididimikira maudigu, pokuvatantera ko yihorokwa yava va lididimikilire maudigu mosiruwo sanare. Ose kuvhura kuretesa po mbili pokutumbura yininke yoyiwa eyi atu mono mwava wopeke, apa ava tu swaura, ntani ose kuvhura kuretesa po mbili apa madiro kulizuvha aga horoka. Ntani ose kuvhura kutwikira kunkondopeka epuro lyovanavazinyetu pokuzogera nawo kuhamena mausili gomoBibeli, ntani pokuvatera nkenye ogu ga tengura monyima.

18. Yisinke ono tokomene kurugana?

¹⁸ Vanavazinyetu ava ava rugana koyirugana yokomatungo, awo vantu woruhafo ntani ya va gwanena po eyi va kara nayo. Nose kuvhura kugwana ruhafo ntani kuvhura yi tu gwanene po eyi twa kara nayo, pokuvatera vanavazinyetu yipo va nkondopeke epuro lyawo. Mokulisiga nomatungo aga aga kurupa ntani nokugwa, yitundwamo yoyirugana yetu ngayi kara yanarunye. Ngano tu “twikireni kulikorangeda-korangeda noku linkondopeka-nkondopeka.”​—1 Tes. 5:11.