1. Yisinke nayi tu vatera tu hafere kulironga mauporofete gomoBibeli?

 MUNAZINYETU gomugara gomudinkantu gedina Ben kwa uyunga asi: “Ame kwa hara kulironga mauporofete gomoBibeli.” Nove yimo o lizuvhu ngoso ndi? Ndi ove kulizuvha asi mauporofete gomoBibeli udigu unene ku ga kwata egano? Ove kuvhura hena nampo o lizuvhe asi kulironga mauporofete gomoBibeli kwato kutovara. Nye nampili ngoso, moomu ono kulironga kuhamena eyi Jehova ga tulira mauporofete moNonkango dendi, ove kuvhura ngo ya tjindje mutaro goge kuhamena mauporofete.

2. Yisinke natu ka zogera mosirongwa esi?

² Mosirongwa esi, ta tu ka zogera eyi natu lirongera ko komauporofete gomoBibeli ntani ta tu ka lironga hena eyi nayi tu vatera yipo tu ga lironge. Ano konyima ntani natu ka kona-kona mauporofete gavali gomobuke zaNdaniyera, yipo tu ka tare omu kukwata egano mauporofete ogo gavali nayi vhura kutuvatera ngesi.

3. Yisinke twa hepa kurugana mokuninka asi tu kwate egano mauporofete gomoBibeli?

³ Twa hepa kupura evatero nsene tuna hara kukwata egano mauporofete gomoBibeli. Konekeni sifanekeso esi sina kukwama ko. Gazara asi ove kuna ka dingura evango eli wa dira kudiva, nye kaume ogu ono kugenda nage age ga diva nawa evango olyo. Age ga diva nawa-nawa oku muna kutambera ntani ga diva oku sa za nkenye sitaura. Pwa hana masinganyeko, ove ngano wa yi haferere kweyi kaume koge ga yi tambwire kuza kumwe nove! Jehova kwa kara ngwendi kaume ogo ga tu vaterere. Age ga diva nawa-nawa meho zetu. Yipo nye mokuninka asi tu kwate egano mauporofete gomoBibeli, twa hepa kupura evatero lyaJehova nelinunupiko.—Ndan. 2:28; 2 Pet. 1:19, 20.

4. Morwasinke Jehova ga tulira mauporofete moNonkango dendi Bibeli? (Jeremiya 29:11) (Tara hena efano.)

⁴ Ngwendi nkenye mukurona gomuwa, Jehova kuna harere vana vendi meho zongwa. (Resa Jeremiya 29:11.) Nye mokulisiga nankenye  mukurona, Jehova kuvhura kupumba eyi ngayi horoka komeho ntani age nkenye apa mouhunga a kara. Age kwa tura mauporofete moNonkango dendi Bibeli yipo asi tu vhure kudiva yihorokwa yomulyo komeho yihoroke. (Jes. 46:10) Mauporofete gomoBibeli kuna kara mauhwi gomawa gokutunda kwaGuhyetu gemeguru. Nye ngapi omu noyipura nawa-nawa asi eyi za pumba Bibeli sili ngayi ka sika mo?

5. Yisinke navhura kulirongera ko mudinkantu gona kweyi ya horokerere Max?

⁵ Kosure, vadinkantu vetu rorunzi kwa va kundurukida vantu ava va dira kukara nefumadeko koBibeli. Poyiruwo yimwe, yininke eyi ava uyunga ntani neyi ava rugana kuvhura kuninkisa mudinkantu gona goMbangi zaJehova yipo a kare nomasinganyeko kuhamena yininke eyi ga pura. Konekeni eyi ya horokera munazinyetu gomugara gedina Max. Age kwa uyunga asi: “Apa na kere mudinkantu, ame kwa tamekere kusinganyeka vakondi vange nsene asi awo kwa rongere nge kuhamena ukareli wousili ntani nsene asi sili Karunga yige ga retesa po Bibeli.” Yisinke va rugene ko vakondi vendi? Age kwa tanta asi: “Awo kwa kere vana litura, nampili ngomu nayi divire asi awo kwa kere nosinka.” Vakurona vaMax kwa limbwilire mapuro gendi kutundilira moBibeli. Max kwa rugene ko hena yuma. Age kwa uyunga asi: “Ame kwa lirongere mauporofete gomoBibeli pwanyamwange ntani ame ngani zogere eyi ngani lirongo kumwe novadinkantu vakwetu womombungakriste.” Yitundwamo musinke ya ya kere? Max kwa uyunga asi: “Konyima zoyo, ame kwa ya yi pulire asi Karunga yige ga retesa po Bibeli!”

6. Yisinke wa hepa kurugana nsene asi ove kwa kara nomasinganyeko ntani morwasinke?

⁶ Kapisi hepero o lizuvhe nomuga nsene asi ove kuna kutameka kukara nomasinganyeko ngwendi Max, kuhamena nsene asi eyi ya kara moBibeli usili. Nye ayo ya kara nomulyo o rugane ko yuma usimbu-simbu. Masinganyeko kwa kara ngwendi nkerewe. Nsene tu dira kurugana ko yuma, ayo kuvhura kuzonagura yuma yomulyo nakauke-nakauke. Mokunyokera po masinganyeko aga naga vhura kuzonagura epuro lyoge, wa hepa kulipura nyamoge asi, ‘Ame napura eyi azi uyunga Bibeli kuhamena meho ndi?’ Nsene kapi ono divilisa nawa-nawa, ove wa hepa kulironga mauporofete gomoBibeli aga ga sikiliramo nare. Tu zeni tu ka zogere omu novhura kuyirugana oyo.

7. Sihonena musinke ga tura po Ndaniyera kuhamena omu natu lironga mauporofete? (Ndaniyera 12:10) (Tara hena efano.)

⁷ Ndaniyera kwa tulire po sihonena sosiwa kuhamena omu natu lironga mauporofete. Ndaniyera kwa lirongere mauporofete nositambo souhunga. Age kwa here kudiva usili. Ndaniyera kwa linunupikire hena, age ga yi divire asi Jehova nga mu vatera yipo a kwate egano mauporofete nsene tupu ga twikilire kukara pepi nendi ntani noku mu limburukwa. (Ndan. 2:27, 28; resa Ndaniyera 12:10) Ndaniyera kwa yi likidire asi ga linunupika pokuhuguvara mwaJehova yipo a mu vatere. (Ndan. 2:18) Ndaniyera nga rugana hena epaparo. Age nga papara malimbururo momaruha goBibeli aga ga kere ko posiruwo esi ga kere age simpe muzuni. (Jer. 25:11, 12; Ndan. 9:2) Ngapi omu nohonena Ndaniyera?

8. Morwasinke vamwe ava nyokere kuyipura asi mauporofete gomoBibeli kusika mo, nye yisinke twa hepa kurugana?

⁸ Gazadara ko nokonda deyi ono kulirongera mauporofete. Ove kulironga mauporofete morwa ono hara kudiva usili ndi? Nsene asi yimo, Jehova  nga ku vatera. (Joh. 4:23, 24; 14:16, 17) Nye nampili ngoso, vantu vamwe kulironga Bibeli morwa nokonda dapeke. Vamwe kulironga Bibeli morwa vana hara kuhetekera ko kuyilikida asi Karunga kapisi yige ga retesa po Bibeli. Awo kugazara asi nsene asi Bibeli kapisi kwaKarunga za tunda, awo kuvhura va litokwere po tupu vene kuhamena youhunga neyi yepuko. Nye nampili ngoso, ose twa hepa kulironga nositambo souhunga. Mokugwederera ko, ose twa hepa sikara somulyo yipo tu kwate egano mauporofete gomoBibeli.

9. Sikara musinke sa hepa po mokuninka asi tu kwate egano mauporofete gomoBibeli? Faturura.

⁹ Linunupika. Jehova kwa tumbwidira asi nga vatera vantu wokulinunupika. (Jak. 4:6) Yipo nye, twa hepa kukanderera kwendi a tu vatere yipo tu kwate egano mauporofete gomoBibeli. Nsene tu linunupika, ose hena nga tu tambura evatero lyokutunda komukareli gokulimburukwa ogu ana kuruganesa Jehova yipo a tu pe nondya dopampepo posiruwo souhunga. (Ruk. 12:42) Jehova age Karunga ogu ga dira kuhara epiyagano, yipo nye ayo ya wapa kugazara asi age nga ruganesa mbunga zimwe tupu yipo a tu vatere tu kwate egano mausili aga ga kara moNonkango dendi.—1 Kol. 14:33; Efe. 4:4-6.

10. Yisinke ono kulirongera ko kweyi ga rugene Esther?

¹⁰ Rugana epaparo. Tameka pokulironga uporofete ou wa hara. Oyo yiyo ga rugene munazinyetu gomukadi gedina Esther. Age kwa here kudiva ko yoyinzi kuhamena mauporofete aga ga pumba kuhamena ewizo lyaMesiyasa. Age kwa uyunga asi: “Apa na kere nonomvhura 15, ame kwa tamekere kupapara umbangi ou a u likida asi mauporofete aga kwa ga tjenge sili komeho zosiruwo saJesus.” Eyi ga lirongere kuhamena nobukegango edi va gwene mefuta lyokufa, kwa mu vaterere ayi pure. Age kwa uyunga asi: “Gamwe gomauporofete ogo kwa ga tjenge komeho zosiruwo saKristusa. Yipo nye mauporofete ogo ga hepere kukara asi gokutunda kwaKarunga.” Esther kwa uyunga asi: “Ame na hepere kuresa yininke yikando yongandi yipo niyikwate egano.” Nye age ana hafa kweyi ga rugene. Age kwa uyunga asi: “Konyima zokurugana epaparo lyenene kuhamena mauporofete gongandi gomoBibeli, ame navhulire kuya yi limonena nawa-nawa nyamwange asi eyi za uyunga Bibeli usili!”

11. Ngapi omu ngatu gwanena mo mauwa nsene tu yi pura asi eyi za uyunga Bibeli usili?

¹¹ Apa atu mono mauporofete gamwe gomoNonkango daKarunga omu ga sikiliremo, ose kuhuguvara unene mwaJehova ntani nomo mavyukiso gendi aga atu gwana kwendi. Mokugwederera ko, mauporofete gomoBibeli kutuvatera tu twikire kukara nehuguvaro lyokomeho yikare asi maudigu musinke tuna kuligwanekera nago ngesi. Tu zeni tuka zogere ko nakauke kuhamena mauporofete gavali aga ga tjenge Ndaniyera aga gana kusikiliramo ngesi. Nsene tu kwata egano mauporofete aga ose kuvhura kutura po matokoro gomawa.

12. Yisinke da fanekesa nompadi ‘dosivera sokuvhonga nerova’? (Ndaniyera 2:41-43)

¹² Resa Ndaniyera 2:41-43. Monzodi ezi Ndaniyera ga fatwilire hompa Nebukadenesara, nompadi defano eli ga mwene hompa kwa di ruganesere ‘kosivera sokuvhonga nerova.’ Pokuhetakanesa uporofete ou kumwe nomauporofete aga ga kara mobuke zaNdaniyera ntani nemEhororo, ose kuvhura kuuyunga asi mambwara kwafanekesa epangero lyaBritaniya naAmerika, epangero lyononkondo  lyouzuni mudima. Ndaniyera kwa uyungire kuhamena epangero eli lyononkondo pokutanta asi “ruha rumwe rosirongo ngaru kara nonkondo, ano oru rumwe kapi ngaru paka nonkondo.” Morwasinke ruha rumwe rosirongo nga ru karera nononkondo ano oru ruha rumwe kapi nga ru paka nonkondo? Morwa vantu ava va fanekesa erova, ngava sesupika nonkondo depangero olyo li dire kupama ngwendi sivera. b

13. Mausili musinke gomulyo natu vhura kulirongera ko kouporofete ou?

¹³ Ose kulirongera ko mausili gomulyo kefano eli ga fatwilire Ndaniyera. Ose kuvhura tu lirongere ko yoyinzi, unene po konompadi defano olyo. Pomuhowo, epangero lyaBritaniya naAmerika lyononkondo lyouzuni mudima kwa likida nonkondo dalyo mononkedi dongandi. Pasihonena, epangero lyaBritaniya naAmerika, nalyo kwa kere mokatji koyirongo eyi ya vhulire kufunda yita yokuhova yoUzuni ntani yita yauvali yoUzuni . Nye nampili ngoso, epangero eli lyononkondo kwa zumbanesa nonkondo dalyo ntani ngorooro ngali twikira kuzumbanesa nonkondo dalyo morwa vantu womoyirongo yalyo kulirwanesa vene navene ntani kurwanesa epangero. Sauvali, epangero lyaBritaniya naAmerika ngali kara epangero lyononkondo lyouzuni mudima eli ngali hulilira kupangera komeho Uhompa waKarunga ngau ya zonagure po mapangero nagenye govantu. Nampili ngomu yirongo yapeke ngayi hetekera ko poyiruwo noyiruwo mokulirumbasana kumwe nepangero lyaBritaniya naAmerika, awo kapi ngava vhura kulipinganesera po. Ose twa yi diva oyo morwa “emanya” eli lyafanekesa Uhompa waKarunga nga li zonagura nompadi, ruha rwefano oru rwa fanekesa epangero lyaBriyaniya naAmerika.—Ndan. 2:34, 35, 44, 45.

14. Ngapi omu kukwata egano uporofete wokuhamena nompadi dosivera ntani nerova nau tu vatere tu ture po matokoro gomawa?

¹⁴ Wa yi pura asi uporofete waNdaniyera ou wa zogera kuhamena nompadi dosivera nerova asi usili ndi? Nsene asi yimo, eyi ngayi vhura kukundama monkedi omu o paruka. Ove kapi ngo demenena mokuhetekera ko kugwana yimaliwa yoyinzi ndi o gwane yiweka yoyinzi, morwa wa yidiva asi ntaantani tupu uzuni ou woudona ngava ka u zonagure po. (Ruk. 12:16-21; 1 Joh. 2:15-17) Kukwata egano uporofete ou, ngayi kuvatera o mone mulyo gosirugana sokuzuvhisa nokuronga. (Mat. 6:33; 28:18-20) Konyima zokulironga uporofete ou, ove kuvhura o lipure nyamoge mapuro aga: ‘Matokoro aga ani tura po kulikida asi ame nayi pura nawa-nawa asi Uhompa waKarunga ntaantani tupu ngau ya zonagure po mapangero nagenye govantu ndi?

15. Yilye “hompa gokomuzogo” ntani “hompa gokombindakano” neina? (Ndaniyera 11:40)

¹⁵ Resa Ndaniyera 11:40. MwaNdaniyera egaununo 11 kuuyunga mo kuhamena vahompa vavali, ndi mapangero gavali aga aga lirumbasana gene-nagene. Pokuhetakanesa uporofete ou kumwe nomauporofete gapeke gomoBibeli, ose kuvhura kudimburura asi “hompa gokomuzogo” kuna kara Russia kumwe noyirongo eyi ayi mu kwatesa ko ntani asi “hompa gokombindakano” kuna kara Britaniya naAmerika, epangero lyononkondo lyouzuni mudima. c

16. Maudigu musinke ava ligwanekere nago vantu vaKarunga ava va kara mepangero ‘lyahompa gokomuzogo?’

¹⁶ Vantu vaKarunga ava a pangere “hompa gokomuzogo” kuna kulididimikira mahepeko aga aga tundilire kwahompa ogu. Nombangi daJehova dimwe kwa di toona noku va tura modorongo morwa epuro lyawo. Mahepeko aga ga tundilira ‘kwahompa gokomuzogo,’ kwa nkondopeka epuro lyawo mwaJehova ntani nomoNonkango dendi. Morwasinke? Morwa vanavazinyetu va yi diva asi mahepeko aga vana kuligwanekera nago vantu vaKarunga, kusikisa mo nonkango douporofete edi  ga tjenge Ndaniyera. d (Ndan. 11:41) Kudiva yininke oyo ngayi tu vatera hena nose yipo tu twikire kukara nehuguvaro lyokupama ntani noku twikira kulimburukwa Jehova.

17. Maudigu musinke va li gwanekera nago vantu vaKarunga ava va kara mepangero ‘lyahompa gokombindakano?’

¹⁷ Mosiruwo sanare, “hompa gokombindakano” kwa hepekere hena vantu vaJehova. Pasihonena, oyo kwa horokere posiruwo soyita yokuhova yoUzuni ntani yauvali yoUzuni, apa sinzi sovanavazinyetu va va tulire modorongo ntani apa vanona vamwe woNombangi daJehova va va tjidire mo mosure morwa kudira kulihameka moupolitika. Monomvhura dantani, ulimburukwi wovakareli vaJehova ava va kara mepangero lyahompa gokombindakano kwa u heteka mononkedi dapeke. Pasihonena, posiruwo esi ava rugana ehoroworo, Mukriste kuvhura nampo a kare meheteko lyokuninka asi a kwatese ko mbunga politika zongandi ndi muntu gongandi ogu vana hara kuhorowora. Nampili ngomu ana kudira kuhorowora, age nampo kuvhura a lizuvhe asi ngano mbunga politika zongandi zi vene ehoroworo. Nye nampili ngoso, mokudira kulihameka moupolitika, twa hepa kutakamesa  kuhamena yininke eyi a tu rugana ntani kuhamena hena yininke eyi atu gazara nomu atu lizuvhu kuhamena yuma yongandi!—Joh. 15:18, 19; 18:36.

18. Ngapi omu au tu kundama unkore ou wa kara pokatji ka “hompa gokomuzogo” ntani na “hompa gokombindakano”? (Tara hena efano.)

¹⁸ Vantu ava va dira kukara nepuro momauporofete gomoBibeli, kuvhura ngava kare nosinka sosinene apa ngava mona “hompa gokombindakano” kuna ‘kurwisa’ “hompa gokomuzogo.” (Ndan. 11:40) Vahompa navenye ava va kara noyirwiso yononkondo yokuvhura kuzonagura po yininke nayinye eyi ayi parukire pevhu. Nye ose twa yi diva asi Jehova kapi nga pulisira yininke oyo yihoroke. (Jes. 45:18) Yipo nye mevango lyokukara nosinka kuhamena eyi ngayi horoka komeho, unkore ou wa kara pokatji ka “hompa gokomuzogo” ntani na “hompa gokombindakano” kunkondopeka epuro lyetu. Ayo kulikida asi uzuni ou pepi una kara nehagero.

19. Yisinke twa hepa kutambura kuhamena mauporofete gomoBibeli?

¹⁹ Ose kapi twa diva omu mauporofete gamwe gomoBibeli nga ga sikilira mo. Nampili muporofete Ndaniyera, nage kapi ga kwete egano yininke nayinye eyi ga tjenge. (Ndan. 12:8, 9) Nye nampili ngomu atu dili kudiva asi ngapi omu uporofete wongandi ngau sikilira mo, ayo kapi ayi tanta asi awo kapi ngau sikilira mo. Ose kuvhura kukara nehuguvaro asi Jehova ngatu vatera tu kwate egano yininke eyi twa hepa kudiva posiruwo souhunga, ngwendi moomu tupu gayi rugene mosiruwo sanare.—Amosa 3:7.

20. Mauporofete musinke gomoBibeli gokuhafesa aga nga ga ka sikiliramo ntaantani ntani yisinke twa hepa kutwikira kurugana?

²⁰ Ediviso lyokuhamena “mbili nompora” ngava li divisa. (1 Tes. 5:3) Ano konyima zoyo, mapangero gomouzuni ou ngaga homokera maukarelikarunga goyimpempa noku ga zonagura po. (Ehor. 17:16, 17) Makura ntani nga ga homokera vantu vaKarunga. (Hes. 38:18, 19) Yihorokwa eyi ngayi twaredesa koyita yokuhulilira yaHarumagedoni. (Ehor. 16:14, 16) Ose kuvhura kukara nehuguvaro asi yihorokwa eyi ntaantani tupu ngayi horoke. Ano posiruwo esi, tu twikireni kulikida rupandu kwaGuhyetu gemeguru pokulirongera ko komauporofete gomoBibeli ntani pokuvatera vantu wopeke yipo va rugane yokulifana.