Mosirongwa oso, ose kwa lirongere mo asi kosili sininke simwe somulyo unene esi asi kundama vantu navenye ntani novaengeli. Aso kuna kara kupongora edina lyenene lyaJehova. Upangeli ndi asi nkedi zaJehova zongwa zokupangera, kwa likwatakana nokupongora edina lyaJehova. Mokulifana, ulimburukwi womuntu nawo kuna kara sininke simwe hena somulyo unene esi sa likwatakana nokupongora edina lyaJehova.

Morwasinke nye tuna kuuyungira ngesi asi edina lyaJehova ntani nokupongora edina lyendi kuna kara sininke somulyo po unene? Tu zeni tu ka zogere ko nokonda ntatu.

Zokuhova, Satana kwa homokera edina lyaJehova, mosikunino saEdeni. Mapuro goyimpempa aga Satana ga pulire Eva kwa likidire asi Jehova kapisi Karunga gougavi ntani asi mavyukiso aga ga geve kwa Adamu naEva kapisi mawa. Makura Satana yipo ga uyungire yininke eyi ga dilire kuuyunga Jehova. Age kwa uyungire nawa-nawa asi Karunga munayimpempa. Yipo nye monkedi zangoso, age kwa nyatekesere edina lyaJehova. Age kwa ya kara “Muzonaguli” eli ali tanta asi “murwanesi.” (Joh. 8:44) Mokumona asi Eva ga pulire yimpempa yaSatana, age kapi ga limburukwire Karunga ntani kwa rwanesere upangeli wendi. (Gen. 3:1-6) Dogoro naina, Satana simpe kuna kutwikira kutanta yimpempa kuhamena Jehova. Vantu ava ava limburukwa yimpempa oyo, kuvakarera ureru kudira kulimburukwa Jehova. Kovantu vaKarunga, kuswaura edina Jehova kuna kara sininke sosidona unene. Azo yizo konda zonene po zeyi mouzuni muna vhukire ruhepo noudona.

Zauvali, mokuninka asi vantu navenye va gwanene mo uwa, Jehova ana tokomene kukapongora edina lyendi nokuka li zeresa komaswauro nagenye. Oyo mulyo unene kwaJehova. Eyi yiyo nye ga uyungilire asi: “Ame ngani likida nomuhoko upongoki wedina lyange lyenene.” (Hes. 36:23) Ntani Jesus kwa yi zeresere asi sininke musinke somulyo po unene nasi kara momakanderero govakareli navenye vaJehova wovalimburukwi apa ga uyungire asi: “Edina lyoge ava li pongore.” (Mat. 6:9) Yikando yoyinzi Bibeli kunkondopeka mulyo gokuyererepeka edina lyaKarunga, Jehova. Tu tareni ko yihonena yongandi. “Hamberereni edina lyaHOMPA lya fumana.” (1 Hist. 16:29; Epis. 96:8) “Dimbeni mu fumadeke edina lyendi.” (Epis. 66:2) “Ame kuna hara kuudisa unene woge narunye-narunye.” (Epis. 86:12) Sikando simwe esi Jehova ga uyungire kutundilira meguru kuna kara pontembeli moJerusarema, apa Jesus ga uyungire asi: “Tate, yererepeka edina lyoge.” Makura Jehova yipo ga limbwilire asi: “Na li yererepeka ntani ngani li yererepeka hena.”—Joh. 12:28. a

Zautatu, sitambo saJehova kwa likwatakana nedina lyendi. Gazadara ko: Yisinke ngayi kwama  ko konyima zeheteko lyokuhulilira, konyima zehagero lyoNomumvho Eyovi edi nga pangera Kristusa? Ngapi omu vantu navenye novaengeli ngava lizuvha kuhamena edina lyaJehova posiruwo oso? Mokugwana elimbururo, tu diworokeni yininke yivali eyi, ulimburukwi wovantu ntani upangeli waJehova. Ngoso vantu ava va kere valimburukwi nga yi va karera simpe udigu kulimburukwa ndi? Hawe. Awo ngava sikilira mo ntani posiruwo oso awo vana piti nare meheteko. Ntani kapi ngayi kara hepero mokuyilikida asi nkedi zaJehova zokupangera yizo zongwa po. Posiruwo oso, navenye vemeguru nava vepevhu ngava kara mouumwe ntani ngava tambura upangeli waJehova. Nye ngapi kuhamena edina lyaJehova?

Posiruwo oso, nkenye gumwe nga diva edina Jehova, ntani kapi ngali nyata nampili nakauke. Nye edina Jehova yilyo ngali kara sininke somulyo po unene pevhu. Morwasinke? Morwa ngava ka mona omu Jehova ana kutwikira kurugana yininke yokutetukisa. Gazadara ko: Mokumona asi Jesus nga ka gava upangeli naunye kwaJehova, makura Karunga nga kara “Mupangeli gwanayinye.” (1 Kol. 15:28) Konyima zoyo, vantu vepevhu ngava hafera “umanguruki wounene wokukara vana vaKarunga.” (Rom. 8:21) Ntani Jehova ngaka sikisamo sitambo sendi mokukakara nepata eli lya kara mouumwe omu mwa hamena vana vendi vemeguru nava vepevhu.—Efe. 1:10.

Ngapi omu epata lyaJehova ngali lizuvha konyima zapa ngayi horoka nayinye eyi? Twa si huguvara asi simpe ngatu kara neharo lyenene tu hamberere edina lyaJehova. Mutjangi gepisarome Ndafita kwa tjenge asi: “Fumadekeni HOMPA . . . Fumadekeni edina lyendi lya fumana narunye-narunye.” (Epis. 72:18, 19) Ose ngatu ka gwana nokonda dokuyirugana ngoso dogoro narunye.

Edina lyaJehova kwa kwatera mo nayinye yokumuhamena. Unene po edina lyendi kutudiworokesa eharo lyendi. (1 Joh. 4:8) Ose ngatu twikira kudiworoka asi Jehova kwa tu sita morwa ga tu hara ntani asi kwa tu pa sizoweseso morwa ga tu hara ntani asi nkedi zendi zokupangera azo zahungama ntani age kupangera monkedi zeharo. Nye ose ngatu ka twikira kukamona omu Jehova ana kutulikida eharo. Ose ngatu ka twikira kuhedera pepi naGuhyetu nokukahamberera edina lyendi lyewa dogoro narunye.—Epis. 73:28.