1. Kuliza noVahebeli 12:1, yisinke twa hepa kurugana yipo tu ka sike kehagero lyelirombero lyetu lyeparu?

 BIBELI kuhetakanesa eparu lyetu koVakriste ava vana kara melirombero. Vaduki ava ngayi tompoka kukandembura rugodi ngava ka gwana mwenyo gwanarunye. (2 Tim. 4:7, 8) Ose twa hepa kurugana nainye eyi natu vhura kurugana ko yipo tu twikire kuduka, unene po mokumona asi pepi-pepi nokundembura tuna kara. Mupositoli Paurusa ogu ya tompokere kumana kuduka elirombero lyendi lyeparu kwa tumbwire yininke eyi nayi tu vatera yipo ngayi tu tompoke melirombero eli tuna kuduka. Age kwa tu tantera ‘tu zumbe nkenye mudigo makura tu duke nedidimiko melirombero eli va tu tulira po.’—Resa Vahebeli 12:1.

2. Yisinke ayi tanta ‘kuzumba nkenye mudigo’?

² Apa Paurusa ga tjenge asi twa hepa ‘kuzumba nkenye mudigo,’ ngoso age kwa tembe asi kwato mudigo ogu ga hepa kusimba Mukriste ndi? Hawe, oyo kapisi yiyo ga tembe. Nye age kwa tembe asi twa hepa kuhageka kusimba nkenye mudigo ogu guna dili kukara hepero. Mudigo gwangoso kuvhura kutukondera tu dire kuza komeho ntani kuvhura kutuninkisa tu roroke. Mokuninka asi tu lididimikire, twa hepa kugenderera kudimburura nsene asi ose kuna simbi mudigo gwa hana hepero ntani nokuhageka kugusimba. Nye nampili ngoso, ose kapi tuna hara kusiga nomudigo edi twa hepa kusimba. Nsene tu hageka kusimba nomudigo edi ose kapi ngatu kara melirombero eli. (2 Tim. 2:5) Nomudigo musinke twa hepa kusimba?

3. (a) Kuliza noVagarata 6:5, yininke musinke twa hepa kusimba? (b) Yisinke natu ka zogera mosirongwa esi ntani morwasinke?

 ³ Resa Vagarata 6:5. Paurusa kwa tumbwire yininke eyi twa hepa kusimba. Age kwa tjenge asi: “Nkenye ogu kusimba mudigo gwamwene.” Movelise ezi, Paurusa kwa tembe kweyi a ndindire ko Karunga kwankenye gumwe gwetu, yininke eyi twa hepa kusimba pwanyamwetu. Mosirongwa esi ta tu ka zogera eyi ya hamena mo ‘momudigo gwetu’ ntani nomu natu gu simba. Natu ka dimburura hena nomudigo edi da dira kukara hepero edi nampo a tu simbi ntani natu ka lironga omu natu di zumba. Kusimba mudigo gwetu ntani nokuzumba nomudigo edi da dira kukara hepero ngayi tu vatera tu ka ndembure elirombero lyokukagwana mwenyo.

4. Morwasinke ya dilira kukara udigu kusikisa mo mugano geligawo lyetu? (Tara hena efano.)

⁴ Mugano geligawo lyetu. Apa twa ligeve kwaJehova, ose kwa gene asi ngatu mu karera ntani nokurugana mpango zendi. Twa hepa kusikisa mo mugano ogo. Kusikisa mo eligawo lyetu, aso situmbukira sosinene, nye aso kapisi mudigo.  Aso kapisi udigu kusirugana morwa Jehova kwa tu sita yipo tu rugane mpango zendi. (Ehor. 4:11) Age kwa tu sita neharo lyokumudiva ntani lyokumukarera ntani kwa tu sita yipo tu mu fane. Ano ngoyitundwamo, ose kumuhedera pepi ntani ose kugwana ruhafo pokurugana mpango zendi. (Epis. 40:8) Ntani hena apa atu rugana mpango zaKarunga nokukwama Munendi, ose ‘kugwana epwizumuko.’—Mat. 11:28-30.

5. Yisinke nayi kuvatera o sikise mo eligawo lyoge? (1 Johanesa 5:3)

⁵ Ngapi omu no vhura kusimba mudigo? Yininke yivali eyi yina kukwama ko kuvhura kukuvatera. Sokuhova, twikira kunkondopeka eharo lyoge kwaJehova. Ove kuvhura kuyirugana oyo pokuteda ko unene koyininke nayinye yoyiwa eyi ga ku ruganena ntani komatungiko aga ngaka kuruganena komeho. Moomu eharo lyoge lyokuhara Karunga lina kukura, yimo hena ngayi ku karera ureru kumulimburukwa. (Resa 1 Johanesa 5:3.) Sauvali, honena Jesus. Age ya mu tompokere kurugana mpango zaKarunga morwa age nga kanderere kwendi yipo a mu vatere ntani nga demenene komfeto ezi za mu kere komeho. (Heb. 5:7; 12:2) Ngwendi Jesus, kanderera kwaJehova yipo a ku pe nonkondo ntani twikira kukara nehuguvaro lyomwenyo gwanarunye. Ngomu ono kuhara unene Karunga ntani nokuhonena Munendi, ayo ngayi kutompoka kusikisa mo eligawo lyoge.

6. Morwasinke twa hepera kusikisa mo yitumbukira yemepata? (Tara hena efano.)

⁶ Yitumbukira eyi twa kara nayo mepata. Melirombero lyetu lyokukagwana mwenyo, ose twa hepa kuhara unene Jehova naJesus kupitakana omu twa hara ekoro lyetu. (Mat. 10:37) Nye eyi kapi ayi tanta asi kuvhura tupu tu sigilire yitumbukira yemepata ngwendi asi ayo kutukondera tu dire kuhafesa Karunga naKristusa. Mokulisiga, mokuninka asi tu hafese Karunga naKristusa, ose twa hepa kusikisa mo yitumbukira yetu yemepata. (1 Tim. 5:4, 8) Nsene tu yi rugana, ose ngatu hafa. Jehova ga yi diva asi mapata ngaga hafa apa vanturagumbo novagolikadi ava lilikida eharo nokulitekura nefumadeko, napa vakurona ava hara vana vawo nokuva deura ntani apa vanona ava limburukwa kovakurona vawo.—Efe. 5:33; 6:1, 4.

7. Ngapi omu nosikisa mo situmbukira esi wa kara naso mepata?

⁷ Ngapi omu no vhura kusimba mudigo? Yikare asi situmbukira musinke wa kara naso mepata, huguvara mounongo ou wa kara moBibeli mevango tupu lyokuhuguvara momalizuvho goge, mompo ndi o rugane yininke eyi ava uyunga vantu ava va lironga asi wa hepa kuyirugana. (Yis. 24:3, 4) Ruganesa nawa yimbapiratjangwa yetu. Amo kwa kara mo magano gomulyo kuhamena omu no tura pasirugana nompango domoBibeli. Pasihonena, yirongwa yokulikwama “Help for the Family” kwa kara mo mauzera gomawa sili kuhamena makondjeso aga ava ligwanekere nago neina valikwali, vakurona ntani vadinkantu. b Tokomena kutura pasirugana eyi azi uyunga Bibeli nampili yi kare asi vamwe vemepata kapi ava yi rugana. Nsene oyi rugana, epata lyeni ngali gwanena mo uwa ntani one ngomu hafera matungiko aga aga tundu kwaJehova.—1 Pet. 3:1, 2.

8. Ngapi omu matokoro getu naga vhura kutukundama?

⁸ Situmbukira esi twa kara naso kuhamena matokoro aga atu tulisa po. Jehova kwa tu pa uhwi wemanguruko wokutulisa po matokoro ganyamwetu ntani age kuna tu harere tu hafere mauwa aga aga tundu pokutulisa po matokoro gomawa. Nye age kapi a tu kondere tu dire kuligwanekera noyitundwamo yokutulisa po matokoro  gomadona. (Gar. 6:7, 8) Morwa konda ozo, ose kutambura yitundwamo yomatokoro getu gomadona, nonkango detu donondona, ntani noyirugana yetu yoyidona. Kuliza neyi twa rugana, ezwi lyetu lyokomutjima kuvhura li tu zogerere. Nye nampili ngoso, pokudiva asi ose ngatu ligwanekera noyitundwamo yomatokoro aga atu tura po, ayo kuvhura kututumangeda tu tante nonzo detu nokutura po malitjindjo ntani nokunyokera po kurugana mapuko gokulifana. Kurugana yininke yangoso kuvhura kutuvatera tu twikire melirombero lyokukagwana mwenyo.

9. Yisinke no rugana nsene asi ove kwa tura po etokoro lyedona? (Tara hena efano.)

⁹ Ngapi omu no vhura kusimba mudigo? Yisinke no rugana nsene asi wa tura po etokoro lyedona? Yi diva asi ove kapi to vhuru kutjindja yininke eyi ya horoka nare. Wa ha ruganesa siruwo nononkondo doge mokuhetekera ko kulikida eyi wa karerere mouhunga ndi o hetekere ko ku pa wopeke usima ketokoro lyoge lyedona eli wa tura po. Nye mevango lyoyo, tambura mapuko goge ntani rugana paapa wa hulira moukaro ou ono kara posiruwo oso. Nsene asi ove kwa kulizuvha unzoni kepuko eli wa rugana, kanderera kwaJehova nelinunupiko, tambura epuko lyoge ntani mupura a ku gusire po. (Epis. 25:11; 51:3, 4) Pura egusiropo kovantu ava wa zonena ntani nsene asi hepero, gwana evatero kovakuronambunga. (Jak. 5:14, 15) Lirongera ko komapuko goge ntani hetekera ko kunyokera po kurugana mapuko gokulifana. Ngomu ono kuyirugana, ove kuvhura kukara nehuguvaro asi Jehova ngaku likida nkenda ntani nga ku pa evatero eli wa hepa.—Epis. 103:8-13.

10. Morwasinke malizuvho gokuhara kurugana nkenye apa yoyinzi ga karera mudigo gomunene? (Vagarata 6:4)

¹⁰ Kulizuvha asi twa hepa kurugana nkenye apa yoyinzi. Ose kulipa nyamwetu mudigo apa atu lihetakanesa nava wopeke. (Resa Vagarata 6:4.) Nsene tu twikira kulihetakanesa nava wopeke, ose kuvhura ngatu kare nonkareso zomfudu ntani nonkareso zokurumbasana. (Gar. 5:26) Nsene tu hetekera ko kurugana yininke eyi vana kurugana vantu wopeke nampili yi kare asi kapi tatu vhuru kuyirugana, ose kuvhura tu likorese nyamwetu. Ntani mokumona asi “Endindiro nsene li teka po, yigo mutjima guna teka po” ayo kuvhura kutudompesa mokulitulira po yitambo eyi ngatu dira kusikisa mo. (Yis. 13:12) Pokuyirugana ngoso, ayo kuvhura kutugusa nonkondo ntani kuvhura kutuninkisa tu dire kuza komeho melirombero lyeparu.—Yis. 24:10.

11. Yisinke nayi kuvatera o nyokere po kulizuvha nkenye apa asi wa hepa kurugana yoyinzi?

¹¹ Ngapi omu no zumba mudigo ogo? Wa ha ndindira ko kwanyamoge asi o rugane yoyinzi kupitakana eyi ana kundindira koge Jehova. Age kapi a ndindire ko koge asi o gave eyi wa dira kukara nayo. (2 Kol. 8:12) Yi pura nawa-nawa asi Jehova kapi a hetakanesa eyi o rugana neyi ava rugana wopeke. (Mat. 25:20-23) Age kuhafera eyi o mu ruganene nomutjima goge nagunye, ulimburukwi woge, ntani elididimiko lyoge. Linunupika ntani dimburura asi kuvhura o dire kurugana yininke nayinye eyi ono hara kurugana ngesi morwa nomvhura doge, ukanguki woge ndi morwa ukaro woge. Ngwendi Barasirayi, ove kuvhura o nyoke kutambura yitumbukira nsene asi ukanguki woge ndi nomvhura doge ngayi kuninkisa yi ku karere udigu mokusikisa mo situmbukira songandi. (2 Sam. 19:35, 36) Ngwendi Mosesa, tambura evatero ntani gava yitumbukira kwava wopeke posiruwo sokuwapera. (Ex. 18:21, 22) Nsene o linunupika, ove kapi ngo ndindira ko kwanyamoge yoyinzi eyi nayi vhura kukupa mudigo melirombero lyoge lyokukagwana mwenyo.

12. Kuvhura tu lizuvhe unzoni komatokoro gomadona aga ava tura po vantu wopeke ndi? Faturura.

¹² Kulizuvha unzoni komatokoro gomadona aga ava tura po wopeke. Ose kapi tatu  vhuru kutulira po wopeke matokoro ntani kapi tatu vhuru kuvakondera nkenye apa mokudira kuligwanekera noyitundwamo yoyidona yomatokoro gawo gomadona aga va tura po. Pasihonena, munona gomumati ndi gomukadona kuvhura a tokore kuhageka kukarera Jehova. Etokoro olyo kuvhura kuguvisa vakondi. Nye nampili ngoso, vakondi ava ava li pe vene usima komatokoro aga ava tura po vana vawo, kulipa vene mudigo gomunene. Ogo kapisi yigo mudigo ana kundindira ko Jehova kwawo va simbe.—Rom. 14:12.

13. Ngapi omu mukurona na tara matokoro gomadona aga a tura po munendi?

¹³ Ngapi omu no zumba mudigo ogo? Yi diva asi Jehova kwa tu pa natuvenye umanguruki. Age kupulisira nkenye muntu yipo a ture po matokoro gamwene. Oyo kwa kwatera mo nsene asi ta karere Jehova ndi hawe. Jehova ga yi diva asi ove mukurona ogu ga dira kusikilira mo, age kuna hara tupu o rugane eyi no vhura kurugana ko. Matokoro aga a tulisa po munoge kuna kara situmbukira samwene nye kapisi soge. (Yis. 20:11) Nye ove simpe nampo kuvhura o twikire kugazara mapuko aga wa rugana ngomukurona. Nsene asi yimo, tantera Jehova kuhamena omu ono kulizuvha ntani mupura a ku gusire po. Age ga yi diva asi ove kapi to vhuru kutengura kosiruwo esi sa ka pita nokutjindja yininke eyi ya horokere. Ntani hena age kapi a ndindireko koge yipo o kondere munoge a dire kuzangura eyi ga kuna. Diworoka asi nkenye eyi nga rugana ko munoge yipo a tengure kwaJehova, age nga li wapaikira kumutambura.—Ruk. 15:18-20.

14. Morwasinke twa hepera kuzumba mudigo gokulizuvha unzoni nkenye apa?

¹⁴ Kulizuvha unzoni nkenye apa. Apa atu tura nzo, ayo kapisi epuko kulizuvha unzoni. Nye nampili ngoso, kulizuvha unzoni wounene kapisi mudigo ogu twa hepa kusimba. Ago kuna kara mudigo ogu twa hepa kuzumba. Ngapi omu natu yi diva asi ose kulizuvha unzoni wounene? Nsene asi twa tanta nzo zetu nokulitezurura ntani nokurugana ko yininke eyi twa hepa kurugana yipo tu nyokere po nzo zokulifana, ose kuvhura kukara nehuguvaro asi Jehova ga tu gusira po. (Yirug. 3:19) Konyima zokurugana yininke oyo, Jehova kapi ana tu harere hena tu twikire kulizuvha  unzoni. Age ga yi diva asi nsene tu twikira kulizuvha unzoni, ayo ngayi tu koresa. (Epis. 31:10) Nsene tu guva unene, ose kuvhura nampo ngatu hageke kuduka melirombero lyokukagwana mwenyo gwanarunye.—2 Kol. 2:7.

15. Yisinke nayi ku vatera nsene asi ove kulizuvha unzoni wounene? (1 Johanesa 3:19, 20) (Tara hena efano.)

¹⁵ Ngapi omu no zumba mudigo ogo? Nsene asi ove kutwikira kulizuvha unzoni wounene, demenena ‘kedongweneno po’ eli a gava Karunga. (Epis. 130:4) Apa Jehova a gusire po ava ava li tezurura sili, age kutumbwidira asi: “Kapi ngani diworoka hena mausima gawo.” (Jer. 31:34) Eyi kutanta asi Jehova kapi hena nga gazara nonzo edi ga ku gusira po. Yipo nye, wa ha tara yitundwamo yononzo doge ngoumbangi ou una kulikida asi kapi ga ku gusira po. Ntani ya ha ku guvisa morwa nampo yeeyi wa zumbanesa yitumbukira yoge yimwe mombungakriste. Jehova kapi a twikire kugazara kuhamena nonzo doge ntani nove kapi wa hepa kudigazara.—Resa 1 Johanesa. 3:19, 20.

16. Ngovaduki, yisinke twa hepa kukwata egano?

¹⁶ Ngomu tuna kuduka melirombero, twa hepa ‘kuduka monkedi ezi nazi tu ninkisa tu ka gwane mfeto.’ (1 Kol. 9:24) Ose kuvhura kuyirugana oyo nsene tu kwata egano elisigo eli lya kara pokatji konomudigo edi natu simba ntani nonomudigo edi natu zumba. Mosirongwa esi ose kuna zogere mo tupu yihonena yongandi kuhamena yininke eyi twa hepa kusimba ntani yininke eyi twa hepa kuzumba. Nye pwa kara hena yininke yimwe eyi twa hepa kusimba neyi natu zumba. Jesus kwa uyungire asi kuvhura tu “lizumbilire momakurulya nomomakurunwa nomoyinka youzuni ou.” (Ruk. 21:34) Etjangwa eli ntani nomatjangwa gapeke kuvhura kukuvatera o dimburure malitjindjo aga nampo wa hepa kutura po ngomu ono kuduka melirombero lyokukagwana mwenyo.

17. Morwasinke natu yi pulira nawa-nawa asi ose ngatu ka gwana mfeto zeparu melirombero eli tuna kuduka?

¹⁷ Ose kuvhura kuyipura nawa-nawa asi ose ngatu ka gwana mfeto zeparu melirombero eli tuna kuduka morwa Jehova kutupa nonkondo edi twa hepa. (Jes. 40:29-31) Yipo nye, twikira kuduka! Honena mupositoli Paurusa, ogu ga dukire unene yipo a ka gwane mfeto ezi za mu kere komeho. (Fil. 3:13, 14) Kwato gokuvhura kukudukira po melirombero eli nye nevatero lyaJehova, ayo kuvhura yi ku tompoke. Jehova kuvhura kukuvatera o simbe nomudigo doge ntani nokuzumba nomudigo edi dina dili kukara hepero. (Epis. 68:19) Nevatero lyaJehova, ayo ngayi kutompoka kuduka melirombero nelididimiko ntani nokukagwana mfeto.