SIRONGWA SELIRONGO 31
RUSUMO 12 Jehova Karunga goMunene
Eyi ga rugana Jehova a tu zowore kononzo nonomfa
“Karunga kwa here uzuni unene-nene yiyo ga u pere Munendi gelike a huru.”—JOH. 3:16.
OKU SINA DEMENENE SIRONGWA
Jehova kutuvatera tu twikire kulimburukwa nokumukarera yipo ngatu ka gwane mwenyo gwanarunye nokukamanguruka konzo.
1-2. (a) Yisinke nzo, ntani yisinke ga tu tumbwidira Jehova? (Tara hena “Efatururo lyonkango”) (b) Yisinke natu ka zogera mosirongwa esi ntani nomoyirongwa yimwe eyi yina kara moRuhungu oru? (Tara hena sirongwa pepenuno 32 sosiparatjangwa “Kovaresi.”)
ONO hara kudiva omu Jehova ga ku hara ndi? Lironga kuhamena eyi ga ku ruganena yipo a ku zowore kononzo nokonomfa. Nzo a kuna kara nkore zonene ezi no dira kufunda po pwanyamoge. Natuvenye kuzona nkenye ezuva ntani kufa morwa nzo. (Rom. 5:12) Nye pwa kara mbudi zongwa. Jehova kwa tu tumbwidira asi nga ka tu zowora kononzo nonomfa.
2 Jehova kwa vatera vananzo va mu karere nomvhura dokupitakana po-6 000. Morwasinke? Morwa ga tu hara. Kutunda ketameko, Jehova kwa vatera vantu va rwanese nzo. Karunga ga yi diva asi nzo kutwaredesa konomfa ntani kapi ana hara tu fe. Age kwa tu harera tu paruke narunye. (Rom. 6:23) Jehova ana ku harere nove ngo paruke narunye. Mosirongwa esi tatu ka zogera mapuro gatatu. (1) Ehuguvaro musinke ga gava Jehova kovantu? (2) Ngapi omu vantu womosiruwo sanare va hafesere Jehova? (3) Ngapi omu Jesus ga ya tu zowora kononzo nonomfa?
EHUGUVARO MUSINKE GA GAVA JEHOVA KOVANTU?
3. Yisinke ya ninkisire Adamu naEva va zone?
3 Apa Jehova ga sitire mugara nomukadi, age kwa va harere va hafe. Age kwa va pere evango lyewa oku nava tunga nouhwi wononkwara ntani situmbukira sosiwa. Age kwa va harere va zwide evhu nokulininka li kare paradisa. Jehova kwa va pere mpangera zimwe tupu zoureru nokuvarondora asi nsene va dira kuzilimburukwa ngava fa. Yisinke ya kweme ko? Muengeli gomudona ogu ga dilire kuhara Karunga ntani Adamu naEva, kwa va zedere va zone. Awo kwazonene morwa kapi va huguvarere Jehova. Kutunda ezuva olyo, awo kwa ya ligwanekerere noyitundwamo ngwendi ukurupe ntani kwa ya fire. Eyi ga uyungire Jehova ya sikire mo.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Morwasinke Jehova ga nyengera nzo? (Varoma 8:20, 21)
4 Jehova kwa tura sihorokwa oso moBibeli yipo tu lirongere ko. Aso kuturonga asi Jehova kwa nyenga nzo morwa azo kutugusa ko kwendi ntani kutwaredesa konomfa. (Jes. 59:2) Eyi yiyo ga zederere Adamu naEva va zone. Apa Adamu naEva va zonene, Satana nampo kwa gazarere asi ana zonagwisa po sitambo saJehova kovantu. Age kapi ga divire eharo eli ga kara nalyo Jehova. Jehova kapi ga tjindjire sitambo sendi kovantu, age kwa va pere ehuguvaro morwa ga va hara. (Resa Varoma 8:20, 21.) Jehova ga yi divire asi vantu vamwe womoruvharo rwaAdamu naEva ngava mu hara ntani ngava tambura evatero lyendi yipo va nyokere po kuzona. Mokumona asi Jehova Guhyawo ntani Musiti gwawo, age kwa va ninka va kare nelikwatakano nage nokuvazowora konzo nonomfa. Ngapi ga yi rugana?
5. Ehuguvaro musinke Jehova ga geve kovantu? Faturura. (Genesis 3:15)
5 Resa Genesis 3:15. Jehova kwa pere vantu ehuguvaro pokuvatantera asi age nga zonagura po Satana. Karunga kwa pumbire asi ‘ruvharo’ ngaru ya zowora vantu. Ruvharo oro ngaru ya zonagura po Satana ntani nokuyahagekesa po yirugana nayinye eyi ga retesa po kutundilira moEdeni. (1 Joh. 3:8) Nye pomuhowo Satana nga hepeka ruvharo oro pokururemeka kosinsinsina nokurudipaga. Oyo kwa guvisire unene Jehova. Jehova ga pulisilire ruvharo oro ru hepe yipo ru parure vantu kononzo nonomfa.
NGAPI OMU VANTU WONONZO NAVA HAFESA JEHOVA NOKUMUHEDERA PEPI?
6. Yisinke ga rugene Abeli naNowa yipo va hedere Jehova pepi?
6 Jehova kwa yi likida mwaza nomvhura omu vantu nava mu hedera pepi. Abeli yige muntu gokuhova ga limburukwire Karunga konyima zapa Adamu naEva va rwanesere Karunga moEdeni. Abeli kwa geve nzambo kwaJehova morwa ga mu here, age kwa zembe nzwigona morwa musita gononzwi ga kere. Jehova ga tambwire nzambo ozo ndi? Bibeli kutanta asi “Jehova kwa haferere Abeli nonzambo zendi.” (Gen. 4:4) Jehova kwa tambwire hena nonzambo dovantu ava ngava mu limburukwa ngwendi Nowa. (Gen. 8:20, 21) Eyi kulikida asi Jehova kuvhura kututambura ntani kuvhura tu mu hedere pepi nampili ngomu twa kara tuvananzo. b
7. Yisinke natu lirongera ko kwaAbirahamu?
7 Jehova kwa pulire Abirahamu mugara ogu ga kere nepuro lyenene, a zambe munendi Isaka. Esi kwa kere sininke sosidigu unene kwaAbirahamu nye age ga limburukwire. Apa ga here kudipaga munendi Karunga ta mu hagekesa. Sihorokwa esi kuturonga eyi gaya rugane Jehova komeho. Jehova kwa ya geve Munendi ngonzambo morwa ga hara vantu.—Gen. 22:1-18.
8. Yisinke da fanekesere nonzambo edi ngava gava Vaisraeli? (Levitikus 4:27-29; 17:11)
8 Konyima zonomvhura, Jehova kwa geve Veta koVaisraeli va zambe yikorama yipo va va gusire po nonzo dawo. (Resa Levitikus 4:27-29; 17:11.) Nonzambo odo kwa fanekesere omu Jehova ga ya geve nzambo zongwa po ezi za ya zowora vantu kononzo. Jehova kwa pumbire kupitira movaporofete kuhamena Munendi ogu ga ya hepere nokufa. Jesaya kwa pumbire asi MunaKarunga ngava ya mu zamba ngwendi nzwi. (Jes. 53:1-12) Jehova kwa rugene sininke sosiwa sili, age kwa geve Munendi ngonzambo yipo a tu zowore kononzo nonomfa.
NGAPI OMU JESUS GA YA TU ZOWORA?
9. Yisinke ga uyungire Johanesa Mukuhwi kuhamena Jesus? (Vahebeli 9:22; 10:1-4, 12)
9 Johanesa Mukuhwi kwa mwene Jesus Munasareta momvhura 29, nokutanta asi: “Tareni, Nzwigona zaKarunga ezi azi gusa po nonzo douzuni!” (Joh. 1:29) Nonkango edi kulikida asi Jesus kwa kere ruvharo oru va pumbire. Jesus kwa zembe eparu lyendi. Age kwa ya zowora vantu kononzo.—Resa Vahebeli 9:22; 10:1-4, 12.
10. Ngapi omu Jesus ga yi likidire asi age ‘kwa wizira’ vananzo?
10 Jesus kwa vaterere vantu ava da rorwere nonzo nokuvazigida va kare varongwa vendi. Age ga yi divire asi vantu kuhepa morwa nzo. Age kwa vaterere vantu ava ngava hepa unene morwa kuzona. Jesus kwa ruganesere sifanekeso esi asi: “Vakanguki kapi va hepa ndokotora, vaveli yiwo va mu hepa.” Age kwa uyungire hena asi: “Ame kapi na wizira vahungami, nye vananzo na wizira.” (Mat. 9:12, 13) Jesus kwa sikisire mo nonkango odo. Age kwa gusilire po nonzo domukadi ogu ga kuhwire nompadi dendi nomahodi. (Ruk. 7:37-50) Jesus kwa rongere mukadi goMusamaliya nampili ngomu mukadi ogo nga hondere. (Joh. 4:7, 17-19, 25, 26) Karunga kwa pere Jesus hena nononkondo a guse po yininke yimwe eyi da retesa po nonzo, ngwendi nomfa. Jesus kwa pindwire vantu koufe kukwatera mo vagara novakadi ntani vanona novakondi.—Mat. 11:5.
11. Morwasinke vananzo va mangurukilire Jesus?
11 Eyi yiyo vantu ava ngava zono va mangurukilire Jesus ntani kapi va mu tjilire morwa age ngava fire nkenda nokuvakwata egano. (Ruk. 15:1, 2) Jesus kwa pandadekere nokutekura nawa ava va pulire mwendi. (Ruk. 19:1-10) Jesus kwa likidire nkenda neharo ngwendi oGuhwe monkedi omu nga va tekura nokuvauyungisa. (Joh. 14:9) Jehova kwa hara unene vantu ntani ana hara yi va tompoke kurwanesa nzo. Jesus kwa vaterere vantu yipo va sige nkareso zawo zondona nokumukwama.—Ruk. 5:27, 28.
12. Yisinke ga rongere Jesus kuhamena nomfa dendi?
12 Jesus ga divire eyi ngayi mu horokera, age kwa tanterere varongwa vendi asi ngava mu hepeka nokumupampara kositji. (Mat. 17:22; 20:18, 19) Jesus ga yi divire asi nzambo zendi ngazi gusa po nonzo ngwendi moomu ga tente Johanesa novaporofete. Jesus kwa rongere asi konyima zapa nga fa, nga “kokera vantu navenye” kwendi. (Joh. 12:32) Vantu kuvhura va hafese Jehova nsene va tambura Jesus ngaHompa gwawo ntani nokukwama sihonena sendi. Nsene va twikira kuyirugana ngava va “mangurura mo mononzo.” (Rom. 6:14, 18, 22; Joh. 8:32) Eyi yiyo Jesus ga lizamberere pokufa nomfa donondona.—Joh. 10:17, 18.
13. Ngapi omu Jesus ga fire ntani yisinke adi tu rongo nomfa dendi kuhamena Jehova? (Tara hena efano.)
13 Jesus kwa mu horwere murongwa gwendi nokumuhepeka nokumukwata nokumuswaura ntani kwa mu dipagere. Vakwayita kwa mu dipagere pokumupampara kositji. Jehova kwa mu koresere unene eyi ya horokerere Jesus. Age kapi ga hagekesere po yininke yoyidona eyi ya horokerere Munendi. Nsene asi Jehova ga here unene Munendi, morwasinke ga mu pulisililire a hepe nokufa? Morwa eharo. Jesus kwa uyungire asi: “Yeeyi Karunga kwa here uzuni unene-nene yiyo ga u pere Munendi gelike a huru yipo asi nkenye ogu a mu pura ngava dire kukamuzonagura po nye nga ka gwane mwenyo gwanarunye.”—Joh. 3:16.
Jehova kwa zuvhire kukora kokunene apa ga pulisilire Munendi va mu dipage yipo a tu zowore kononzo nokonomfa (Tara paragarafu 13)
14. Yisinke azi ku rongo nzambo zaJesus?
14 Nzambo zaJesus kuna kara silikidiso sosinene asi Jehova kwa hara unene vantu. Azo kulikida omu Jehova ga ku hara. Jehova kwa lididimikire kukora ogu ga pitire Munendi yipo a ku zowore kononzo nonomfa. (1 Joh. 4:9, 10) Yosili Jehova kuna hara kutuvatera tu twikire kumulimburukwa nampili ngomu twa pira kusikilira mo, ano komeho age ngaka gusa po nzo.
15. Yisinke natu rugana yipo va tu gusire po nonzo detu?
15 Jehova kutugusira po nonzo detu morwa nzambo zaJesus. Twa hepa kurugana ko yuma yipo Jehova a tu gusire po. Yisinke natu rugana? Johanesa Mukuhwi ntani naJesus kwa uyungire asi: “Litezurureni, yeeyi Uhompa waKarunga pepi una kara.” (Mat. 3:1, 2; 4:17) Elitezururo kuna kara nkedi ezi atu yi likida asi tuna hara kukarera Jehova nampili ngomu twa pira kusikilira mo ntani tuna hara tu mu hedere pepi. Yisinke ayi tanta kulitezurura ntani yisinke nayi tu vatera tu twikire kulimbukwa Jehova nampili ngomu twa pira kusikilira mo? Sirongwa sokukwama ko ngasi ka limburura mapuro ogo.
RUSUMO 18 Rupandu kosizoweseso
a EFATURURO LYONKANGO: MoBibeli, nkango “nzo” kutamba koyirugana yoyidona ndi kudira kuparuka kuliza nonompango daJehova. Nzo kuvhura hena kutamba kediro kusikilira mo lyetu ndi nzo ezi twa pinga kwaAdamu. Ose kufa morwa nzo ezi twa pinga.
