1. Yisinke ayi tanta kulitezurura?

 NSENE tuna zono, ayo ya kara nomulyo tu litezurure. Bibeli kutanta asi muntu ogu a litezurura, age kuhageka kurugana yininke yoyidona nokutokomena kudira kuyirugana hena.—Mat. 3:8; Yirug. 3:19; 2 Pet. 3:9.

2. Morwasinke twa hepera kudiva eyi ayi tanta kulitezurura? (Nehemiya 8:9-11)

² Natuvenye twa hepa kudiva eyi ayi tanta kulitezurura. Morwasinke? Morwa ose kuzona nkenye ezuva. Mokumona asi ose womoruvharo rwaAdamu naEva, natuvenye kwa pinga nzo ntani nomfa eyi yiyo twa hepera kulitezurura. (Rom. 3:23; 5:12) Nampili Paurusa ogu ga kere nepuro lyenene, nage ngayi mu digopere kurugana youhunga. (Rom. 7:21-24) Ngoso eyi kutanta asi nkenye apa ngatu guva morwa ose vananzo ndi? Hawe, Jehova munankenda ntani ana tu harere tu hafe. Tu tareni sihonena soVajuda womosiruwo saNehemiya. (Resa Nehemiya 8:9-11.) Jehova kapi ga here va twikire kuguva morwa nonzo dawo danare, nye age kwa va harerere va hafe pokumukarera. Jehova ga yi diva asi kulitezurura kureta ruhafo. Ano eyi yiyo a tu rongere kuhamena elitezururo. Nsene tu litezurura, Guhyetu Jehova nga tu gusira po.

3. Yisinke natu ka zogera mosirongwa esi?

³ Mosirongwa esi tatu ka zogera kuhamena elitezururo. Tatu ka zogera yininke yitatu. Sokuhova, tatu ka lironga eyi Jehova ga rongere Vaisraeli kuhamena kulitezurura. Sauvali, tatu ka lironga omu Jehova a vatere vantu va litezu rure. Sautatu, tatu ka zogera eyi ga rongere Jesus varongwa vendi kuhamena kulitezurura.

EYI JEHOVA GA RONGERE VAISRAELI KUHAMENA KULITEZURURA

4. Yisinke Jehova ga rongere muhoko goVaisraeli kuhamena kulitezurura?

⁴ Apa Jehova ga pere muhoko goVaisraeli noveta dendi, awo kwa mu tumbwidilire asi ngava di limburukwa. Ngano va twikilire kulimburukwa noveta odo, Jehova ngano ga va poperere nokuvatungika. Jehova kwa va tanterere asi: “Veta ezi nina kumupa naina kapisi udigu kuzilimburukwa ntani kapi za kara ure none.” (Deut. 30:11, 16) Jehova kwa va tanterere asi nsene kapi ngava mu limburukwa nokukarera yikarunga yoyimpempa age kapi ngava popera. Nampili ngoso Jehova ga vhulire kuvatambura nsene asi awo va litezwilire ntani ‘nokutengura kwaKarunga gwawo Jehova nokumulimburukwa.’ (Deut. 30:1-3, 17-20) Jehova ga tulisire po elikwatakano kumwe nawo nokuvatungika hena.

5. Ngapi Jehova ga yi likidire asi kapi ga sigilire Vaisraeli? (2 Vahompa 17:13, 14)

⁵ Yikando yoyinzi Vaisareli kapi ngava limburukwa Jehova. Awo ngava hondere nokukarera yikarunga yoyipempa. Eyi kwa va ninkisire va hepe. Jehova simpe nga hetekere ko kuvavatera va twikire kumukarera. Age nga tumu vaporofete vendi yikando yoyinzi, yipo va ka tantere vantu vendi va litezurure.—Resa 2 Vahompa 17:13, 14.

6. Ngapi Jehova ga ruganesere vaporofete vendi va ronge Vaisraeli eyi va hepera kulitezurura? (Tara hena efano.)

⁶ Yikando yoyinzi Jehova nga ruganesa vaporofete vendi va rondore nokupukurura Vaisraeli. Pasihonena, Jehova kwa tanterere Jeremiya a tantere Vaisraeli asi: “Tengura kwange . . . kapi ngani ku handukilira po dogoro narunye. Simwe po pura asi o munzoni hena asi wa vyuka Hompa, Karunga goge.” (Jer. 3:12, 13) Jehova kwa tanterere Jowera  a tantere hena Vaisraeli asi: “Litezurureni nawa–nawa, mu tengwire kwange.” (Jow. 2:12, 13) Age kwa tanterere Jesaya a tantere hena Vaisraeli asi: “Likuhweni mu likuhure. Hagekeni udona naunye ou nina kumona muna kurugana.” (Jes. 1:16-19) Jehova kwa tanterere Hesekiyeli a tantere Vaisraeli asi: “One kugazara asi ame kuhafera nomfa domuntu gomudona ndi? . . . Hawe, ame kwa mu harera, ni mu mone ana litezurura a kare nomwenyo. . . . Ame kapi na hara asi pa fe gumwe. . . . Sigeni nonzo deni mu kare nomwenyo.” (Hes. 18:23, 32) Jehova kuhafa apa a mono vantu kuna kulitezurura morwa ana hara ngava ka paruke narunye. Eyi kutanta asi Jehova kuvatera tupu muntu konyima zapa a litezurura. Tu zogereni ko yihonena yimwe.

7. Yisinke sina kuturonga sihorokwa saHoseya naGomere?

⁷ Jehova kwa ruganesere sihonena saGomere mukadaHoseya, yipo a ronge vantu vendi. Konyima zapa ga honderere, Gomere kwa sigire Hoseya a ze komugara gwapeke. Yisinke ga rugene ko Jehova koukaro ou? Jehova ogu ga diva eyi ya kara momutjima kwa tanterere Hoseya asi: “Zende hena o ka hore mukadi ogu a hondere nosihora. To mu hara moomu tupu hana harera ame simpe Israeli, nampili ngomu ga vyuka kovakarunga peke.” (Hos. 3:1; Yis. 16:2) Gomere mukadaHoseya kwa twikilire kuhondera. Jehova kwa tanterere Hoseya a gusire po mukadendi yipo va litengwide. a Sihonena esi kulikida omu Jehova ga lizuvhire kuhamena Vaisraeli ava ngava pili kuzuvha. Nampili ngomu ngava tura-tura nonzo dononene, age simpe kwa va here ntani ga twikilire kuvavatera yipo va litezurure nokutjindja nkareso zawo. Sihonena esi kulikida asi Jehova, mukonakoni gonomutjima, nga vatera muntu ogu simpe ana kutwikira kutura nzo zononene yipo a litezurure ndi? (Yis. 17:3) Tanko tu yi konakone.

OMU JEHOVA A VATERE VANANZO VA LITEZURURE

8. Yisinke ga rugene Jehova a vatere Kaini yipo ngano a litezurure? (Genesis 4:3-7) (Tara hena efano.)

⁸ Kaini kwa kere mbeli zaAdamu naEva ntani age kwa pingire nzo zawo. Bibeli kutanta asi: “Yirugana yendi kwa kere yoyidona.” (1 Joh. 3:12) Eyi yiyo nampo Jehova ga dililire ‘kuhafera Kaini nonzambo zendi’ ezi ga geve. Mevango lyokutjindja nkareso zendi, “Kaini ta handuka unene ntani ta guwu.” Yisinke ga rugene ko Jehova? Age kwa uyungisire naKaini. (Resa Genesis 4:3-7.) Jehova kwa uyungire naKaini monkedi zombili. Age kwa mu rondwere asi ehandu lyendi tali mu ninkisa a zone nye Kaini kapi ga purakenene. Age kapi ga pulisilire Jehova a mu vatere a litezurure. Mokumona asi Kaini kapi ga purakenene kwaJehova, ngoso Jehova ga tokwere asi kapi nga vatera hena nkenye munanzo a litezurure ndi? Hawe.

9. Ngapi Jehova ga vaterere Ndafita a litezurure?

⁹ Jehova kwa here unene hompa Ndafita. Age kwa tumbwire Ndafita asi mugara “ogu ga za nge komutjima. (Yirug. 13:22) Nampili ngoso, Ndafita kwa tulire nonzo dononene, age kwa honderere ntani kwa dipagere. Kuliza noVeta zaMosesa, Ndafita ngano va hepere kumudipaga. (Lev. 20:10; Num. 35:31) Nye Jehova kwa here kuvatera Ndafita a li tezurure. b Nampili ngomu Ndafita ga dilire kulikida elitezururo posiruwo oso, Jehova kwa tumine muporofete Natana a ka mu uyungise. Natana kwa ruganesere sifanekeso esi sa vaterere Ndafita a kwate egano nonzo edi ga tulire. Makura Ndafita yipo ga litezwilire. (2 Sam. 12:1-14) Ndafita kwa tjenge episarome eli lya likidire asi age ana litezurura. (Episarome 51) Episarome olyo kwa hengagwida vananzo wovanzi apa ava li resa ntani kuvatumangeda va litezurure. Ayo kutuhafesa kweyi Jehova ga vaterere mukareli gwendi Ndafita a litezurure.

10. Ngapi o lizuvhu kweyi Jehova a tu lididimikire ntani nokutugusira po?

¹⁰ Jehova kwa nyenga nonzo nadinye. (Epis. 5:4, 5) Mokumona asi natuvenye vananzo, age kutuvatera tu nyokere po kuzona zona morwa ga tu hara. Age nkenye apa kuvatera vantu ava va tura nonzo dononene va litezurure ntani va mu hedere pepi. Ayo kutuhafesa pokudiva asi Jehova ana hara kutugusira po. Apa atu gazadara ko omu Jehova a lididimikire nokutugusira po, ayo kutuvatera tu twikire kumulimburukwa ntani nokulitezurura usimbu nsene tuna tura nzo. Ngesi tu zogereni eyi ga rongere Jesus varongwa vendi kuhamena kulitezurura.

EYI GA RONGERE JESUS VARONGWA VENDI KUHAMENA KULITEZURURA

11-12. Sifanekeso musinke ga ruganesere Jesus mokuturonga asi Jehova kutugusira po? (Tara efano.)

¹¹ Apa sa sikire mo siruwo sokuwiza Mesiyasa pevhu, Jehova kwa gendesere Johanesa mukuhwi a zuvhisire vantu nokuvakorangeda va litezurure. Jesus nage kwa rongere vantu mulyo gokulitezurura apa ga tamekere sirugana sendi sokuzuvhisa.—Mat. 3:1, 2; 4:17.

¹² Yikando yoyinzi Jesus nga rongo vantu asi oGuhwe kwa hara kutugusira po nonzo detu. Age kwa ruganesere sifanekeso kuhamena mumati gokuzumbana. Mumati ogo kwa sigire embo lyawo nokukaparuka eparu  lyedona nye ‘apa ga dimbwilire asi kwa rugene ugova,’ ta tengura kembo. Yinke va rugene ko oguhwe? Jesus kwa uyungire asi apa mumati ogo ga kere “simpe ure, oguhwe nare vana mu mono, tava mu fire nkenda makura tava duka va ka mu lidingire, tava mu ncumita unene.” Mumati ogo kwa here a kare gumwe govarugani membo lyoguhwe, nye oguhwe kwa mu gusilire po nokumutumbura asi “munange” ntani awo kwa mu tambwire membo. Oguhwe kwa uyungire asi age “kwa zumbanene nye ngesi ana moneka.” (Ruk. 15:11-32) Komeho a wize pevhu Jesus, nga mono omu oGuhwe ngava gusire po vananzo ava ngava litezurura. Sifanekeso esi ga ruganesere Jesus kulikida omu Guhyetu Jehova ga kara nonkenda.

13-14. Yisinke ga lirongere mupositoli Peturusa kuhamena kulitezurura, ntani yisinke ga rongere kuhamena kulitezurura? (Tara hena efano.)

¹³ Mupositoli Peturusa kwa lirongerere ko kwaJesus kuhamena omu Jehova a gusire po ava ava litezurura. Jesus nga gusire po Peturusa ogu nga tura mapuko gomanzi. Pasihonena, apa Peturusa ga patanene yikando yitatu asi kapi ga diva Jesus, age kwa lilire unene. (Mat. 26:34, 35, 69-75) Konyima zapa Jesus va mu vhumbwire, age kwa monekerere Peturusa yipo a mu uyungise. (Ruk. 24:33, 34; 1 Kol. 15:3-5) Jesus kwa yi ruganenene eyi yipo a gusilire po Peturusa ntani nokumuhengagwida.—Mar. 16:7.

¹⁴ Kuliza nosihorokwa oso, Peturusa ga kwete egano eyi ayi tanta kulitezurura nokugusira po. Konyima zoPentekoste, Peturusa kwa uyungisire Vajuda pokuvafatwilira asi yiwo va dipagerere Mesiyasa. Nampili ngoso, age kwa va korangedere asi: “Litezurureni nye, mu tengure kwaKarunga yipo nonzo deni va di mu dongwenene po ntani yipo Jehova nga mu retere yiruwo yepwizumuko.” (Yirug. 3:14, 15, 17, 19) Peturusa kwa yi li kidire asi kulitezurura kuninkisa munanzo a tengure kwaKarunga. Eyi kutanta asi ta sigi yirugana yoyidona nomagazaro gendi gomadona yipo a hafese Karunga. Peturusa kwa yi likidire hena asi Jehova nga dongonona po nonzo dawo nadinye. Konyima zonomvhura dononzi, Peturusa kwa ya korangedere Vakriste asi: “Jehova . . . kumulididimikira morwa kapi ga hara asi ngapa ka zonauke nampili gumwe, nye age kwa hara asi navenye va litezurure.” (2 Pet. 3:9) Eli kuna kara ekorangedo lyewa koVakriste nsene vana tura nonzo kukwatera mo nonzo dononene.

15-16. (a) Sirongwa musinke ga lirongere mupositoli Paurusa kuhamena kugusira po? (1 Timoteusa 1:12-15) (b) Yisinke ngatu ka zogera mosirongwa sokukwama ko?

¹⁵ Paurusa kwa rugene yininke yoyidona kupitakana eyi ava rugana vantu vamwe. Age nga hepeke unene varongwa vaKristusa. Sinzi soVakriste kwa gazarere asi age kapi nga vhura kulitezurura. Jesus ga yi divire asi Paurusa kuvhura a rundurure nkareso zendi nokulitezurura. Jesus noGuhwe kwa mwene yikara yoyiwa mwaPaurusa. Jesus kwa tente asi: “Mugara ogu yige nina horowora.” (Yirug. 9:15) Jesus kwa rugene sitetu yipo a vatere Paurusa a litezurure. (Yirug. 7:58–8:3; 9:1-9, 17-20) Konyima zapa Paurusa ga litezwilire age nkenye nga pandura Karunga naJesus konkenda ezi va mu likida. (Resa 1 Timoteusa 1:12-15.) Paurusa kwa rongere asi: “Karunga nkenda ana kukufira ntani ana hara kukuvatera o litezurure.”—Rom. 2:4.

¹⁶ Ngapi Paurusa ga gendesere udigu wokuhamena ruhonda, oru ga zuvhire mombungakriste zoVakolinte? Age kwa u gendesere monkedi ezi za likidire asi Jehova kulikida eharo kwava a pisura ntani kulikida nkenda kwava ava litezurura. Mosirongwa sokukwama ko, ngatu ka zogera sihorokwa esi momunene.