SIRONGWA SELIRONGO 33
RUSUMO 130 Tu ligusire po
Omu mbungakriste nazi honena Jehova nsene gumwe ana tura nzo zonene
“Nsene pana zono gumwe, ose twa kara nomupopeli.”—1 JOH. 2:1.
OKU SINA DEMENENE SIRONGWA
Tatu ka lironga eyi natu lirongera ko kombungakriste zomoKolinte omu va yi gendesere apa gumwe gomombunga zawo ga tulire nzo zonene.
1. Yisinke ana hara Jehova nava rugana vantu navenye?
JEHOVA kwa sita vantu noumanguruki wokutokora eyi nava rugana. Ose kuruganesa umanguruki owo apa atu tura po matokoro. Etokoro lyomulyo po eli natu vhura kutura po kuna kara kuligava kwaJehova nokumukarera. Jehova kuna hara vantu navenye va ligave kwendi nokumukarera. Morwasinke? Morwa age kwa hara vantu ntani kwa va harere yininke yoyiwa. Age kuna hara vantu va tulise po ukaume nage ntani ngava paruke narunye.—Deut. 30:19, 20; Gar. 6:7, 8.
2. Yisinke ana hara Jehova va rugane vantu ava va tura nzo zonene? (1 Johanesa 2:1)
2 Jehova kapi a sininike vantu va mu karere. Age kwa pa muntu umanguruki wokutokora eyi ana hara kurugana. Ngapi nsene Mukriste ogu ga gwana ekuho a tura nzo zonene? Nsene kapi ana kulitezurura, va hepa kumugusa mombunga. (1 Kol. 5:13) Nampili ngoso, Jehova simpe ana hara muntu ogo a litezurure nokutengura kwendi. Eyi yiyo ga gaverere sizoweseso yipo vantu ava ava litezurura va vhure kuvagusira po. (Resa 1 Johanesa 2:1.) Karunga gwetu geharo kukorangeda ava va tura nzo zonene va litezurure.—Sak. 1:3; Rom. 2:4; Jak. 4:8.
3. Yisinke natu ka lironga mosirongwa esi?
3 Jehova kuna hara tumu honene monkedi omu a tara nzo ntani novantu ava ava tura nzo zonene. Mosirongwa esi tatu ka lironga omu natu vhura kumuhonena. Ngomu natu ka lironga sirongwa esi, konekeni (1) eyi za rugene mbungakriste zomoKolinte apa gumwe gomombunga zawo ga tulire nzo zonene, (2) eyi ga va tanterere mupositoli Paurusa nava rugana apa ga litezwilire muntu ogo, ntani (3) tatu ka lironga omu a lizuvhu Jehova kuhamena Vakriste ava ava tura nzo zonene.
EYI VA RUGENE VAKRISTE VANARE APA GUMWE GA TULIRE NZO ZONENE
4. Yisinke ya horokere mombungakriste zomoKolinte? (1 Vakolinte 5:1, 2)
4 Resa 1 Vakolinte 5:1, 2. Morugendo rwendi rwautatu routumwa, Paurusa kwa zuvhire yininke yoyidona eyi ya horokere mombungakriste zompe zomoKolinte. Mugara gomombungakriste ozo nga ligwanekere panyama nozina wositumbwena. Nampili vantu ava ngava dili kukarera Karunga va yi divire asi yininke oyo yidona. Vantu womombungakriste kapi va rugene ko yuma, awo nampo kwa gazarere asi kapisi epuko nsene muntu ogo a twikira kukara mombunga. Vamwe nampo kwa gazarere asi awo kuna kulikida muntu ogo nkenda ngwendi moomu ayi rugana Jehova. Jehova kapi a tarerere udona mokatji kovantu vendi. Yininke yokunyata eyi nga rugana mugara gwina kwa swaukisire mbungakriste. Age hena ngano ga ninkisire vakriste vakwawo va honene nkareso zendi. Mavyukiso musinke ga geve Paurusa kombungakriste?
5. Yisinke ga tanterere Paurusa eyi nazi rugana mbungakriste ntani yisinke ga tembe? (1 Vakolinte 5:13) (Tara hena efano.)
5 Resa 1 Vakolinte 5:13. Jehova kwa gendesere Paurusa a tjangere mbilive kombungakriste ozo, omu mwa kere mavyukiso asi muntu ogu a dili kulitezurura va hepa kumugusa mombunga. Ngapi omu va hepere kumutekura vantu wombungakriste zawo? Paurusa kwa va tanterere asi: “Hagekeni kulikwatakana nage.” Yisinke ga tembe Paurusa? Age kwa fatwilire asi mpangera ozo kwa kwaterere mo ‘kudira kulya’ nomuntu ogo. (1 Kol. 5:11) Apa atu li kumwe novantu, ayo ureru kuzogerera nawo nokuliyika unene. Yipo nye, Paurusa kwa tembe asi womombungakriste kapisi va likwatakane nomuntu ogo, morwa kuvhura ngayi ture vantu wombungakriste mosiponga. (1 Kol. 5:5-7) Nsene wombungakriste va dira kukara nomuntu ogo, nga yi mu vatera a dimburure asi age kwa tura nzo zonene ntani nga yi mu vatera a livere nokulitezurura.
Jehova kwa gendesere Paurusa a tjange mbilive mokutantera vakuronambunga va guse mombungakriste muntu ogu a dili kulitezurura (Tara paragarafu 5)
6. Yisinke za rugene mbungakriste apa za gwene mbilive zaPaurusa, ntani ngapi ya kundamene mugara ogu ga tulire nzo zonene?
6 Konyima zapa ga tumine mbilive koVakriste womoKolinte, Paurusa kwa lipulire nsene asi nava ka tambura eyi ga va tjangera ndi hawe. Konyima, Titusa kwa reterere Paurusa mbudi zongwa. Vantu kwa tambwire nawa mbudi ezi ga va tuminine Paurusa. (2 Kol. 7:6, 7) Awo kwa kweme mavyukiso gendi, ntani hena, apa ga pitire po makwedi gongandi kutunda apa ga va tuminine mbilive zina, mugara gwina ga tulire nzo zonene, kwa litezwilire. Age kwa rundwilire nkareso zendi ntani ta tameke kukwama nompangera daJehova. (2 Kol. 7:8-11) Sikando esi mavyukiso musinke ga geve Paurusa kombungakriste?
OMU MBUNGAKRISTE ZA TEKWIRE MUGARA OGU GA LITEZWILIRE
7. Yisinke ga rugene mugara ogu ga tulire nzo zonene apa va mu gusire mombungakriste? (2 Vakolinte 2:5-8)
7 Resa 2 Vakolinte 2:5-8. Paurusa kwa tente asi “eyi mwa mu pukurura ya gwana.” Eyi kutanta asi mugara gwina apa va mu gusire mo mombungakriste, ya mu vaterere a litezurure, yipo nye, kapi ya kere hena hepero va twikire kumutengeka.—Heb. 12:11.
8. Yisinke hena Paurusa ga tanterere mbungakriste nazi rugana?
8 Makura Paurusa yipo ga tanterere mbungakriste asi: “Ngesi mu gusireni po nomutjima nagunye nokumuhengagwida,” mupuli mukweni ogu ga tura nzo zonene ntani ‘mu hareni unene.’ Konekeni asi Paurusa kapi tupu ga tanterere vakuronambunga va tengwidire muntu mombungakriste, nye va hepere kulikida muntu ogo mombuuyungiso zawo ntani moyirugana yawo asi va mu gusira po ntani va mu hara. Pokuyirugana ngoso, awo kwa yi likidire nawa-nawa asi va mu tambura mombungakriste.
9. Morwasinke vamwe va dilire kuhara kugusira po muntu ogu ga litezwilire?
9 Vantu vamwe womombungakriste nampo kapi va yi haferere pomuhowo apa va tengwidilire mugara gwina mombungakriste. Morwasinke tuna kuuyungira ngoso? Yininke eyi ga rugene kwa swaukisire mbungakriste ntani vamwe kwa va handukisire. Ano vamwe kwa lizuvhire asi awo kukondja paapa va hulira va limburukwe Jehova, yipo nye, kapi na yi wapa kutengwidira mombungakriste muntu ogu ga tura nzo zonene. (Hetakanesa Rukasa 15:28-30.) Morwasinke mbungakriste za heperere kulikida eharo lyousili komuntu ogu va tengwidilire mombunga?
10-11. Yisinke nayi vhura kuhoroka nsene vakuronambunga va dira kugusira po muntu ogu ana litezurura?
10 Yisinke nayi vhura kuhoroka nsene vakuronambunga va nyoka kutengwidira muntu ogu ga litezurura mombungakriste, ndi nsene vantu wombungakriste va dira kumulikida eharo? Age kuvhura nga ru mu ‘dinine po ruguwo.’ Age kuvhura nga lizuvhe asi kapi ngayi vhura hena kukarera Jehova ntani kuvhura nga hageke kuwapukurura elikwatakano lyendi naJehova.
11 Ano vanavanzinyetu nsene va nyoka kugusira po muntu ogu ga litezurura, nawo kuvhura ngava ture elikwatakano lyawo naJehova mosiponga. Morwasinke? Morwa ayo ngayi likida asi kapi vana kuhonena Jehova ogu a gusire po vantu ava ava litezurura, nye awo kuhonena Satana ogu ga kara nonyanya ntani kwato nkenda. Satana kuvhura ngava ruganese yipo va hagekese muntu ogo mokukarera Jehova.—2 Kol. 2:10, 11; Efe. 4:27.
12. Ngapi omu mbungakriste nazi vhura kuhonena Jehova?
12 Ngapi omu mbungakriste zomoKolinte za hepere kuhonena Jehova, nye kapisi Satana? Awo va hepere kugusira po muntu gwina ngwendi moomu ayi rugana Jehova. Koneka eyi za uyunga Bibeli kuhamena Jehova. Ndafita kwa tjenge asi Jehova ga liwapaikira “kudongonona po nonzo.” (Epis. 86:5) Mika kwa tjenge asi: “HOMPA, kutupu Karunga ogu ga ku fana. Ove kudongonona po nonzo dovantu woge ava va hupa po.” (Mika 7:18) Ano Jesaya kwa tente asi: “Mudinikarunga a sige nonzira dendi, ano mudona a sige magazaro gendi. Va litezwilire kwaHOMPA Karunga gwetu; age mufenkenda kapi a likata-kata kudongwenena po.”—Jes. 55:7.
13. Morwasinke va heperere kutengwidira mugara gwina ga litezwilire mombungakriste? (Tara kakende “ Siruwo sokuhura kupi sa pitire po komeho va tengwidire mugara gomoKolinte mombungakriste?”)
13 Mokuhonena Jehova, mbungakriste zomoKolinte za hepere kutambura mugara gwina nokumulikida asi va mu hara. Pokutambura muntu gwina mombungakriste ngwendi moomu ga va tanterere Paurusa, awo kwa likidire asi awo ‘kulimburukwa mwanayinye.’ (2 Kol. 2:9) Makwedi gomasesu tupu ga pitire po, makura tava mu tengwidire mombungakriste, nye nampili ngoso, ayo ya mu vaterere a litezurure. Yipo nye, kapi ya kere hepero va guse siruwo sosire komeho zokumutengwidire mombungakriste.
HONENA UHUNGAMI NONKENDA ZAJEHOVA
14-15. Yisinke tuna lirongere ko kweyi za rugene mbungakriste zomoKolinte apa gumwe gomombunga zawo ga zonene? (2 Peturusa 3:9) (Tara hena efano.)
14 Eyi za rugene mbungakriste zomoKolinte apa gumwe gomombunga zawo ga zonene, kwa yi tjanga moBibeli yipo “yi tu ronge.” (Rom. 15:4) Ayo kuturonga asi Jehova kapi a tarerere muntu gokudira kulitezurura a kare mokatji kovantu vendi. Vamwe kuvhura va gazare asi morwa Jehova nkenda, age kuvhura a pulisire muntu gokudira kulitezurura a twikire kukara mokatji kovakareli vendi, nye Jehova kapisi yimo a likida nkenda zendi ngoso. Nampili ngomu ga kara nonkenda, Jehova kapi a tarerere yirugana yoyidona ntani nompango dendi kapi adi runduruka. (Juda 4) Nsene a pulisira vantu wokudira kulitezurura va kare mombungakriste, kapi nga yi likida nkenda ntani mbungakriste ngazi kara mosiponga.—Yis. 13:20; 1 Kol. 15:33.
15 Nye nampili ngoso, ose twa lironga asi Jehova kapi ana hara nampili gumwe nga ka zonauke po. Age kuna hara kuparura vantu. Age kufira nkenda vantu ava ava litezurura nokuhara kumukarera hena. (Hes. 33:11; resa 2 Peturusa 3:9.) Yipo nye, apa ga litezwilire mugara gwina gomoKolinte nokuhageka kurugana yirugana yendi yoyidona, Jehova kwa gendesere Paurusa a tantere mbungakriste zi gusire po mugara ogo nokumutambura mombungakriste.
Mbungakriste kuna kuhonena Jehova pokulikida eharo nonkenda komuntu ogu vana tengwidire mombungakriste (Tara paragarafu 14-15)
16. Ngapi ono kulizuvha kuhamena Jehova konyima zokulironga omu va mu tekwire mugara gomoKolinte?
16 Eyi za rugene mombungakriste zomoKolinte yina tu vatere tu dive asi Jehova kwa kara neharo ntani kwa hara eyi ya hungama nousili. (Epis. 33:5) Yininke eyi tuna lirongo kututumangeda tu hamberere Karunga. Ose kupandura kweyi ga kara nonkenda, morwa natuvenye tuvananzo ntani twa hepa egusiropo lyendi. Ose hena kupandura Jehova, morwa age ga tu pa sizoweseso esi asi tu vatera yipo va tu gusire po. Ayo kuhengagwida mokudiva asi Jehova ga hara vantu vendi ntani ana va harere yininke yoyiwa!
17. Yisinke ngatu ka zogera moyirongwa yokukwama ko?
17 Nsene gumwe a tura nzo zonene mombungakriste naina, ngapi omu vakuronambunga nava honena eharo lyaJehova nokuvatera muntu a litezurure? Nkareso musinke nava kara nazo womombungakriste nsene vakuronambunga va tokora kugusa muntu mombungakriste ndi nsene tava tengwidire muntu mombungakriste? Mapuro ogo ngava ka ga zogera moyirongwa yokukwama ko.
RUSUMO 109 Hara nomutjima nagunye
