1. Yisinke ayi horoka apa gumwe a tura nzo zonene?

 MOSIRONGWA sina ka pita, ka tu lirongere omu mupositoli Paurusa ga gendesere udigu wokuhamena nzo ezi ga tulire gumwe mombungakriste zomoKolinte. Munanzo gwina kapi ga litezwilire ntani va hepere kumugusa mo mombungakriste. Nampili ngoso, Karunga kuvhura kuvatera muntu ogu ga tura nzo zonene a litezurure moomu lina yi likida etjangwa omu sina tundu sirongwa esi. (Rom. 2:4) Ngapi omu vakuronambunga nava vatera munanzo a litezurure?

2-3. Yisinke natu rugana nsene munazinyetu ana tura nzo zonene ntani morwasinke?

² Komeho vakuronambunga va va vatere munazinyetu, va hepa kudiva asi nzo musinke ga tura. Yisinke natu rugana nsene munazinyetu ga tura nzo zonene ezi nazi mu ninkisa va mu guse mombunga? Twa hepa kumukorangeda a ze kovakuronambunga a ka va tantere udigu wendi.—Jes. 1:18; Yirug. 20:28; 1 Pet. 5:2.

³ Yisinke natu rugana nsene kapi ana hara kuza kovakuronambunga? Twa hepa kuyitantera vakuronambunga yipo va vatere munazinyetu ogo, eyi kulikida asi twa hara munazinyetu ogo. Nsene munanzo kapi ana kulitezurura, age kapi nga kara nelikwatakano naJehova. Age nga ninkisa vantu va uyunge momudona kuhamena Jehova novantu vendi. Nampili yikare udigu kuyitantera vakauronambunga, ose kuyirugana morwa twa hara Jehova nogu ana zono.—Epis. 27:14.

 OMU VAKURONAMBUNGA AVA VATERE MUNANZO

4. Sitambo musinke ava kara naso vakuronambunga apa ava hingire nomunanzo?

⁴ Apa gumwe a zono, vakuronambunga kuhorowora vakuronambunga vatatu yipo va zogere nomuntu ogo. a Vakuronambunga owo va hepa kulinunupika nokudiva apa da hagera nonkondo dawo. Awo va yi diva asi nampili ngomu ava vatere muntu a litezurure, awo kapi tava vhuru kumusininika. (Deut. 30:19) Vakuronambunga va yi diva asi vananzo vamwe kapi ava litezurura ngwendi moomu ga litezwilire hompa Ndafita. (2 Sam. 12:13) Vananzo vamwe kunyoka kutambura mavyukiso gaJehova. (Gen. 4:6-8) Nye sitambo sovakuronambunga sokuvatera munanzo a litezurure. Yisinke va hepa kudiworoka vakuronambunga apa hingire nomunanzo?

5. Yisinke nava rugana vakuronambunga nsene kuna kuzogera nomunanzo? (2 Timoteusa 2:24-26) (Tara hena efano.)

⁵ Vakuronambunga kutara munanzo asi age mulyo kwaJehova ntani kuna fana ngwendi nzwi zokuzumbana. (Ruk. 15:4, 6) Apa ava hingire nogu ana zono, vakuronambunga kapisi va uyunge nonyanya ndi va mu tekure momudona ntani sitambo sawo kapisi sokupuragera tupu mapuro nokugwana mauzera. Awo va hepa kulikida yikara eyi ya kara mwa 2 Timoteusa 2:24-26. (Resa.) Vakuronambunga va hepa kukara nougomoki nombili ngomu vana kukondja mokuvatera munanzo a tjindje nkareso zendi.

6. Yisinke nava rugana vakuronambunga komeho va ka zogere nogu ana zono? (Varoma 2:4)

⁶ Vakuronambunga va hepa kuliwapaikira. Awo kuhonena omu Jehova a tekura vananzo pokudiworoka nonkango edi ga uyungire Paurusa asi: “Karunga nkenda ana kukufira ntani ana hara kukuvatera o litezurure.” (Resa Varoma 2:4.) Vakuronambunga va hepa kudiworoka asi awo vasita ntani va hepa kukwama mavyukiso gaKristusa. (Jes. 11:3, 4; Mat. 18:18-20) Komeho vakuronambunga vatatu va ka zogere nogu ana zono, awo kukanderera yipo va sikise mo sitambo sawo sokumuvatera a li tezurure. Awo kurugana epaparo moMatjangwa nomoyimbapiratjangwa yetu ntani awo kukanderera yipo va gwane unongo. Awo kutarurura hena eyi ya ninkisire muntu ogo a zone.—Yis. 20:5.

7-8. Ngapi omu vakuronambunga nava honena elididimiko lyaJehova?

⁷ Vakuronambunga kuhonena elididimiko lyaJehova. Awo kudiworoka omu Jehova ga vaterere vananzo mosiruwo sanare.  Pasihonena, Jehova kwa uyungisire Kaini nombili nokumutantera yitundwamo nsene kapi ana kutjindja nkareso zendi. Jehova kwa tanterere hena Kaini asi nga mu hafera nsene a limburukwa. (Gen. 4:6, 7) Jehova kwa tumine muporofete Natana a ka pukurure Ndafita, ntani age kwa ruganesere sifanekeso esi sa vaterere Ndafita a litezurure. (2 Sam. 12:1-7) Yikando yoyinzi, Jehova nga ‘tuma tumine’ vaporofete vendi va ka rondore Vaisraeli ava ngava dili kulimburukwa. (Jer. 7:24, 25) Age kapi ga ndindilire asi dogoro va lituzurure ntani nga va vatera nye kwa twikilire kuvakorangeda yipo va litezurure.

⁸ Vakuronambunga kukwama sihonena saJehova apa ava vatere ava va tura nzo zonene. Va hepa kutekura ogu ana zono ‘nelididimiko’ ngwendi moomu va yi tumbura mwa-2 Timoteusa 4:2. Yipo nye, mukuronambunga ga hepa kulitura nokulididimika yipo a vatere munanzo a rugane youhunga. Nsene mukuronambunga a handuka nokunyegenya, kuvhura yininkise ogu ana zono a dire kupurakena komapukururo govakuronambunga nokunyoka kulitezurura.

9-10. Ngapi omu vakuronambunga nava vatera munanzo a dimburure nzo ezi ga rugana?

⁹ Vakuronambunga kuhetekera ko kudiva eyi ya ninkisa muntu ogo a zone. Pasihonena, muntu ogo kwa tengura monyima morwa ga hageka kurugana elirongo lyendi lyoBibeli ndi kwa hageka kuza mokuzuvhisa ndi? Age kwa hageka kukanderera kwaJehova nkenye apa ndi? Age kwa pulisira madowo gomadona ga mu pukise ndi? Age kwa tulisa po vakaume wovadona ntani nokuhorowora yilihafeso yoyidona ndi? Ngapi omu yininke nayinye eyi ya kundama magazaro nomadowo gendi? Age ga diva omu yirugana yendi yoyidona ya kundama Jehova ndi?

¹⁰ Nsene vakuronambunga va pura munanzo mapuro gokuwapera, va hana kupura mapuro aga naga ninkisa muntu a gave mauzera aga gana kara asi kapisi hepero kovakuronambunga va ga dive awo ngava mu vatera a rundure nkareso zendi zondona. (Yis. 20:5) Kuvhura hena va ruganese yifanekeso va vatere muntu ogo a dimburure nzo ezi ga rugana ngwendi moomu Natana ga yi rugene kwaNdafita. Posikando sokuhova esi nava zogera nogu ga zona, age nampo kuvhura a lizuvhe unzoni konzo ezi ga rugana ntani kuvhura a litezurure.

11. Ngapi Jesus ga tekwire vananzo?

¹¹ Vakuronambunga kuhetekera ko kuhonena Jesus. Jesus kwa vaterere Paurusa pokumupura epuro lyokuwapera asi: “Sauru, Sauru, morwasinke ono kuhepekera nge?” Jesus kwa mu vaterere a dimburure asi eyi ga rugene kwa kere epuko. (Yirug. 9:3-6) Jesus kwa uyungire kuhamena mukadi “Jesebeli” asi: “Ame kwa mu pa siruwo a litezurure.”—Ehor. 2:20, 21.

12-13. Yisinke nava rugana vakuronambunga mokuvatera ogu ana zono a litezurure? (Tara hena efano.)

¹² Mokuhonena Jesus vakuronambunga kapi ava gazarere asi ogu ana zono kapi nga litezurura. Vamwe kulitezurura sikando sokukuhova esi ava zogere novakuronambunga nye vamwe kugusa siruwo. Yipo nye, vakuronambunga kuvhura va tulise po mawapaiko gokuzogera nage yikando yongandi. Nampo konyima zokuhingira novakuronambunga sikando sokuhova, Mukriste ogo ga tura nzo kuvhura a tameke kugazadara ko unene kweyi va mu tantere vakuronambunga. Age kuvhura a tameke kulinunupika nokukanderera kwaJehova a mu gusire po. (Epis. 32:5; 38:18) Ano sikando sokukwama ko nga ya hingira  novakuronambunga, munanzo kuvhura a tjindje nkareso zendi.

¹³ Vakuronambunga va hepa kulikida nkenda ogu ana zono yipo yi mu vatere a litezurure. Awo kukanderera kwaJehova a tungike elituromo lyawo nokuhuguvara asi munanzo na dimburura epuko eli ga tura nokulitezurura.—2 Tim. 2:25, 26.

14. Yilye nawa-nawa a vatere munanzo a litezurure ntani morwasinke?

¹⁴ Ose kuhafa apa a litezurura ogu ana zono. (Ruk. 15:7, 10) Nampili ngomu vakuronambunga ava hetekere ko kuvatera munanzo a tjindje nkareso zendi, nye yilye nawa-nawa a vatere munanzo a litezurure? Diworoka eyi ga tjenge Paurusa kuhamena vananzo asi: “Karunga nampo nava ninkisa va litezurure.” (2 Tim. 2:25) Jehova yige a vatere Mukriste a tjindje magazaro nonkareso zendi. Paurusa kwa fatwilire yininke yoyiwa eyi ayi horoka apa munanzo a litezurura. Muntu ogo kuvhura a kare nediwo lyousili nokuwapukurura magazaro gendi ntani a pweke mosiraha saSatana.—2 Tim. 2:26.

15. Ngapi omu vakuronambunga nava twikira kuvatera munanzo ogu ga litezurura?

¹⁵ Apa munanzo a litezurura, vakuronambunga kutwikira kumudingura yipo va mu vatere a nkondopeke epuro lyendi ntani a nyokere po yiraha yaSatana nokurugana youhunga. (Heb. 12:12, 13) Vakuronambunga kapi va va pulisira va tantere ko nampili muntu gumwe eyi ga zona munazinyetu. Yisinke za hepa ko kudiva mbungakriste?

“PUKURURA MOYITARAMEHO NAVENYE”

16. Kuliza na-1 Timoteusa 5:20, yisinke ga tembe Paurusa pokuruganesa nkango “moyitarameho”?

¹⁶ Resa 1 Timoteusa 5:20. Paurusa kwa tjangerere mukuronambunga mukwawo Timoteusa yipo a dive omu na gendesa udigu wovantu “ava ava zono.” Yisinke ga tembe? Apa ga ruganesere nkango “moyitarameho” kapi ga tembe kombungakriste nazinye nye kwa tembe kovantu wongandi ava va divire  nonzo edi ga rugene Mukriste. Kuvhura yi kare asi vantu owo va yi mwene ndi kwayi va tantere muntu mwene ogu ga zona. Vakuronambunga ngava tantera vantu owo asi vana kohonona po udigu owo ntani ogu ga zona vana mu vyukisa.

17. Yisinke nava rugana vakuronambunga nsene nzo za gumwe zina divikwa mombungakriste ndi ngazi divikwa konyima ntani morwasinke?

¹⁷ Poyiruwo yimwe vanavazinyetu wovanzi mombungakriste kuvhura va diva nzo ezi ga tura gumwe ndi ngazi ya divikwe konyima. Moukaro owo nkango “moyitarameho” ta mu hamene mbungakriste nazinye. Mukuronambunga nga divisa mbungakriste asi munazinyetu vana mu pisura. Morwasinke? Paurusa kwa uyungire asi: “Yipo yi kare erondoro kwanavenye” va nyokere po nonzo dononene.

18. Yisinke nava rugana vakuronambunga nsene munazinyetu gonomvhura zokonhi zo-18 ga tura nzo zonene?

¹⁸ Yisinke nava rugana vakuronambunga nsene munazinyetu gonomvhura dokonhi zo-18 ga tura nzo zonene? Mbunga zovakuronambunga ngazi tura po mawapaiko yipo vakuronambunga vavali va zogere namunazinyetu ogo kumwe novakondi vendi wovakriste. b Vakuronambunga ngava pura vakondi asi yisinke va rugana ko mokumuvatera a litetuzure. Nsene munazinyetu ogo ana kara nonkareso zongwa ntani kuna kutambura mapukururo govakondi, vakuronambunga vavali kuvhura va tokore asi tava yi sigire vakondi va twikire kumuvatera. Vakuronambunga va yi diva asi aso situmbukira  sovakurona va ronge nokupukurura munawo. (Deut. 6:6, 7; Yis. 6:20; 22:6; Efe. 6:2-4) Mwaza siruwo, vakuronambunga ngava gwanekera novakurona va tare nsene kuna kuvatera munawo. Nye ngapi nsene munazinyetu ogo gomudinkantu kapi ana kulitezurura ntani kuna kutwikira kurugana yoyidona? Moukaro owo vakuronambunga vatatu ngava zogera nage novakurona vendi wovakriste.

“JEHOVA GA KARA NONKENDA ZONENE”

19. Ngapi omu vakuronambunga nava honena Jehova nsene kuna kuzogera nomuntu ogu ga tura nzo?

¹⁹ Jehova kundindira ko kovakuronambunga va zerese mbungakriste. (1 Kol. 5:7) Awo hena vana hara vananzo va litezurure. Apa ava vatere ogu ana zono, awo kukara nehuguvaro asi nga litezurura. Morwasinke? Morwa vana hara kuhonena Jehova ogu “ga kara nonkenda zonene.” (Jak. 5:11) Tu tareni omu mupositoli Johanesa ga tekwire vapuli vakwawo neharo. Age kwa tjenge asi: “Vana vange wokuhara, ame kuna kumutjangera yininke eyi, yipo mu dire kuzona. Nye nsene pweli ogu ana kuzona, twa kara nomukwafi ogu ga kara naGuhya, age yige Jesus Kristusa ogu a rugana youhunga.”—1 Joh. 2:1.

20. Yisinke ngatu ka zogera mosirongwa sokuhulilira?

²⁰ Poyiruwo yimwe Mukriste kunyoka kulitezurura. Nsene yihoroka ngoso, va hepa kumugusa mo mombungakriste. Ngapi omu vakuronambunga ava gendesa ukaro ou? Ngatu ka yi zogera mosirongwa sokuhulilira.