SIRONGWA SELIRONGO 35
RUSUMO 123 Limburukwa upangeli waKarunga
Omu vakuronambunga nava vatera ava va gusa mombunga
“Meguru ngamu kara ruhafo nsene munzoni gumwe a litezurura kupitakana vantu 99 wovahungami ava va dira kuhepa elitezururo.”—RUKASA 15:7.
OKU SINA DEMENENE SIRONGWA
Eyi vantu vamwe ava va gusire mombunga ntani nomu vakuronambunga nava vatera vantu vangoso va litezurure ntani va kare hena nelikwatakano naJehova.
1-2. (a) Ngapi Jehova a tara vananzo ava ava dili kulitezurura? (b) Yisinke ana harere Jehova vantu ava va tura nzo?
JEHOVA Karunga kapi a tarerere umbondo; age kwa nyenga nonzo. (Epis. 5:4-6) Age kwa tu harera tu fumadeke nompango dendi domoBibeli. Nampili ngoso, age kapi a tu ndindire tu rugane nayinye yokuhungama morwa ga diva asi ose kapi twa sikilira mo. (Epis. 130:3, 4) Nye age kapi ga hara vantu wovadona ava ava tara “nkenda zaKarunga ngompito zokurugana yirugana yokunyata.” (Juda 4) Eyi yiyo Bibeli a zi tantere asi ‘vantu wovadona ngava va zonagura po’ poyita yaHarumagedoni.—2 Pet. 3:7; Ehor. 16:16.
2 Nye Jehova kapi ana hara asi ngapa ka zonauke nampili gumwe. Ngwendi moomu tupu ka tu yi zogerere moyirongwa yina ka pita, Bibeli kulikida nawa-nawa asi Jehova “kwa hara asi navenye va litezurure.” (2 Pet. 3:9) Vakuronambunga nawo kuhonena Jehova apa ava vatere nelididimiko vantu ava va zona yipo va litezurure, va kare hena nelikwatakano naJehova. Nye vamwe kapi va hara kulitezurura. (Jes. 6:9) Awo kutwikira noyirugana yawo nampili ngomu vakuronambunga ava kondjo yipo va va vatere. Yisinke nava rugana vakuronambunga moukaro owo?
“GUSENI MO MUNTU GOMUDONA MOKATJI KENI”
3. (a) Kuliza noBibeli, yisinke va hepa kurugana muntu ogu ana kudira kulitezurura? (b) Morwasinke natu uyungira asi munanzo mwene a tokora kumugusa mombunga?
3 Nsene muntu kapi ana hara kulitezurura, vakuronambunga va hepa kukwama epukururo eli lya kara moBibeli mo-1 Vakolinte 5:13. Azo kutanta asi: “Guseni mo muntu gomudona mokatji keni.” Nampili ngoso muntu ogu ga zona, mwene a tokora kumugusa mombunga. Age kuzangura eyi ga kuna. (Gar. 6:7) Morwasinke tuna kuuyungira ngoso? Morwa age kunyoka kutambura evatero lyovakuronambunga ava vana kukondja va mu vatere a litezurure. (2 Vah. 17:12-15) Yirugana yendi kulikida asi age kapi ana hara kulimburukwa nompango daJehova.—Deut. 30:19, 20.
4. Morwasinke ava yi divisire mombungakriste nsene gumwe vana mu gusa mombunga?
4 Apa gumwe ava mu gusa mombunga ayo kuyidivisa mombungakriste, yipo va yi dive asi age kapi ana kara hena gumwe goNombangi daJehova. Sitambo seyi ava yi divisire kapisi sokufisa nomuga muntu ogu ga zona. Nye sokudivisa womombungakriste yipo va kwame epukururo lyomoBibeli, va “hageke kulikwatakana” nomuntu ogo ntani va dire “nampili kulya. . . nage.” (1 Kol. 5:9-11) Morwasinke Jehova ga gavera epukururo olyo? Mupositoli Paurusa kwa tente asi “yihahesogona kuhahesa yiduva nayinye.” (1 Kol. 5:6) Nsene munanzo va dira kumugusa mombunga, ayo kuvhura kuninkisa ava vana kuhetekera ko kulimburukwa nompango daJehova, va dire kutwikira kuyirugana.—Yis. 13:20; 1 Kol. 15:33.
5. Ngapi omu twa hepa kutara muntu ogu va gusa mombunga ntani ehuguvaro musinke twa hepa kukara nalyo?
5 Ngapi omu twa hepa kutara mupuli mukwetu ogu va gusa mombunga? Nampili ngomu natu dira kukara kumwe nage, twa hepa kumutara asi age nzwi zokuzumbana ntani twa hepa kukara nehuguvaro. Nsene nzwi zina zumbana, azo kuvhura kukatengura. Diworokeni asi asi munazinyetu ogo ga ligeve kwaJehova. Nye ngesi age kapi ana kusikisa mo eligawo lyendi, ano eyi kuna kara siponga kwendi. (Hes. 18:31) Nye mokumona asi Jehova kwa kara nonkenda ntani nsene siruwo simpe kosili, twa hepa kukara nehuguvaro asi nga tengura. Ngapi omu vakuronambunga nava yi likida asi va kara nehuguvaro lyokulifana nsene kuna kuvatera muntu ogu va gusa mombunga?
OMU VAKURONAMBUNGA AVA VATERE AVA VA GUSA MOMBUNGA
6. Yisinke ngava rugana vakuronambunga mokuvatera muntu ogu va gusa mombunga?
6 Apa gumwe ava mu gusa mombunga, vakuronambunga kuhageka kumuvatera yipo a tengure kwaJehova ndi? Hawe. Apa ngava divisa muntu ogu ana kudira kulitezurura asi tava mu gusa mombunga, vakuronambunga ngava mu tantera eyi ga hepa kurugana yipo a tengure mombunga. Nye vakuronambunga kapi ngava hagera popo. Yikando yoyinzi, awo ngava mu divisa asi vana hara kugwanekera nage konyima zomakwedi gongandi, yipo ngava tare nsene ana tjindji magazaro gendi. Nsene munazinyetu ogo nga yi tambura kugwanekera novakuronambunga konyima zomakwedi gongandi, awo ngava mu korangeda posiruwo oso a litezurure. Ano nsene asi posiruwo oso simpe kapi ana hara kulitezurura, vakuronambunga ngava tura po hena mawapaiko gokugwanekera nage yipo va mu vatere a litezurure.
7. Ngapi omu vakuronambunga ava honene nkenda zaJehova apa ava ruganene kumwe nomuntu ogu va gusa mombunga?
7 Vakuronambunga kuhetekera ko kuhonena nkenda zaJehova apa ava ruganene kumwe nomuntu ogu va gusa mombunga. Pasihonena, Jehova kapi ga ndindilire Vaisraeli va tengure kwendi ga hana kurugana ko yuma. Nye age kwa rugene ko yuma nampili komeho va litezurure. Ngwendi moomu ka tu yi mwene mosirongwa sauvali, Jehova kwa likidire asi age ga kara nonkenda apa ga tanterere Hoseya a tantere mukadendi a tengure. Nye mukadendi posiruwo oso kwa twikilire noyirugana yendi yoyidona. (Hos. 3:1; Mara. 3:7) Yipo nye, ngwendi Jehova vakuronambunga nawo vana hara munanzo a tengure, ntani awo kurugana ko yuma yipo yi mu rerupire kutengura.—Resa Jeremiya 3:12.
8. Ngapi omu sifanekeso saJesus somumati gokuzumbana asi tu vatere tu kwate egano omu a lizuvhu Jehova kuhamena vantu ava va gusa mombunga? (Rukasa 15:7)
8 Diworokeni sifanekeso saJesus somumati gokuzumbana, esi katu zogerere mosirongwa sauvali. Apa oguhwe va mwene munwawo kuna kutengura kembo, awo “tava duka va ka mu lidingire, tava mu ncumita unene.” (Ruk. 15:20) Mosifanekeso oso, guhya kapi ga ndindilire munendi a likwambere va mu gusire po. Nye age kwa dukilire munendi morwa ga mu hara. Vakuronambunga nawo kukondja va tekure ava va gusa mombunga monkedi zokulifana. Awo vana hara nonzwi edi dokuzumbana di tengure kwaJehova. (Ruk. 15:22-24, 32) Apa munanzo a tengura kwaJehova, ayo kuhafesa vantu vemeguru ntani vepevhu.—Resa Rukasa 15:7.
9. Yisinke ana harere Jehova va rugane ava va zona?
9 Dogoro papa tuna lirongo asi Jehova kapi a pulisire vantu ava vana kudira kulitezurura va twikire kukara mombungakriste. Nye nampili ngoso, age kapi a sigilire vantu ava va tura nonzo. Age ana hara va tengure. Bibeli kulikida omu a lizuvhu Jehova kuhamena vananzo ava ava litezurura mwaHoseya 14:4. Azo kutanta asi: “Vantu vange ngani va tengwidira kwange. Ngani va hara nomutjima gwange nagunye; kapi ngani va handukira hena.” Esi kuna kara sihonena sosiwa kovakuronambunga! Awo va hepa kunomena vantu ava va gusa mombunga, yipo va va vatere nsene kuna kulikida asi vana hara kulitezurura. Nonkango edi kuna kara hena ekorangedo lyewa kwava va siga Jehova. Age ga va hara ntani ana hara va tengure usimbu.
10-11. Ngapi omu vakuronambunga ngava vatera vantu ava va gusa mombunga nare?
10 Ngapi kuhamena vantu ava va gusa mombunga nare? Ntani ngesi nampo ngesi pana piti nomvhura dononzi? Vantu vangoso nampo nare va hageka yirugana yawo yoyidona, eyi vava gusilire mombunga. Ano vamwe nampo kapi vana kudiworoka eyi vava gusilire mombunga. Nye yikare asi siruwo sokuhura kupi va mu gusa muntu mombunga, vakuronambunga va hepa kupapara muntu ogo yipo va mu dingure. Pendinguro olyo, vakuronambunga ngava kanderera kumwe nage ntani nokumukorangeda a tengure mombunga. Nsene muntu kwa mu gusa mombunga nomvhura dononzi, age kuvhura a hepe evatero lyokulironga kuhamena Jehova nomausili gomoBibeli. Yipo nye, nsene a tanta asi ana hara kutengura mombunga, vakuronambunga kuvhura va ture po mawapaiko yipo a lironge Bibeli nagumwe komeho va mu tengwidire mombunga. Nye nampili ngoso vakuronambunga yiwo velike wokutura po mawapaiko gangoso.
11 Yipo nye, vakuronambunga va hepa kuhetekera ko kuhonena Jehova mokupapara vantu ava va gusa mombunga nokuvakorangeda va tengure. Ano nsene munanzo a litezurura ntani a siga yirugana yendi yoyidona, age va hepa kumutengwidira mombunga usimbu.—2 Kol. 2:6-8.
12. (a) Maukaro musinke va hepa kutakamesa vakuronambunga? (b) Morwasinke ya karera epuko kugazara asi Jehova kapi nga likida nkenda vantu vamwe? (Tara hena nonkango dokonhi.)
12 Nye momaukaro gamwe, vakuronambunga va hepa kutakamesa komeho zokutengwidira muntu mombunga. Pasihonena, nsene muntu kwa mu gusire mombunga morwa kukwatera munona kononkondo, ndi kurwanesa usili ndi kwa genda mulikwali gwendi konhi yipo a mu zumbe, vakuronambunga va hepa kudivilisa nawa-nawa asi age ana litezurura. (Mara. 2:14; 2 Tim. 3:6) Awo va hepa kupopera siunda saJehova. Nye twa hepa kudiworoka asi Jehova kutambura vananzo navenye ava ava litezurura kutundilira komutjima nokuhageka yirugana yawo yoyidona. Yipo nye, nampili ngomu vakuronambunga va hepa kutakamesa kuhamena vantu ava ava tekura vakwawo momudona, awo kapisi va gazare asi Jehova kapi a likida nkenda vantu vangoso. a—1 Pet. 2:10.
EYI NAVA RUGANA WOMOMBUNGAKRISTE
13. Elisigo musinke lya kara po monkedi omu atu tekura muntu ogu va pisura ntani nogu va gusa mombunga?
13 Ngwendi moomu katu yi lirongere mosirongwa sina ka pita, poyiruwo yimwe muntu kumudivisa asi vana mu pisura. Moukaro owo, ose kutwikira kukara kumwe nage morwa twa yi diva asi age ana litezurua ntani ana hageke yirugana yendi yoyidona. (1 Tim. 5:20) Age kwa hamena kombungakriste ntani ga hepa kulikwatakana novanavazinyetu yipo a gwane makorangedo. (Heb. 10:24, 25) Nye eyi ya lisida nomuntu ogu a va gusa mombunga. Ose kuhageka “kulikwatakana nage” ntani “nampili kulya noku lya si nage.”—1 Kol. 5:11.
14. Ngapi vakriste nava ruganesa ezwi lyawo lyokomutjima eli va deura kuliza noBibeli nava tekura muntu ogu va gusa mombunga? (Tara hena efano.)
14 Kuliza neyi tuna zogere, ngoso ayo kuna kutanta asi kapi tatu vhuru kuzigida kepongo muntu ogu va gusa mombunga, ndi tu mu morore nsene ana wiza kepongo ndi? Hawe. Nampili ngomu natu dira kukara nomuntu ogu va gusa mombunga, vakriste kuvhura va ruganese ezwi lyawo lyokomutjima eli va deura kuliza noBibeli nsene kuvhura va zigide muntu ogu va gusa mombunga komapongo nsene asi age ekoro lyawo ndi kaume gwawo gwanare. Ngapi omu natu mu tekura nsene ana wiza kepongo? Nare, ose kapi ngatu morora muntu ogo. Nye ngesi nkenye Mukriste ga hepa kuruganesa ezwi lyendi lyokomutjima moukaro ou. Vamwe kuvhura li va pulisire ezwi lyawo lyokomutjima kumorora muntu ogu va gusa mombunga ndi kumutambura nsene ana wiza komapongo. Nye nampili ngoso, kapi tatu vhuru kuzogera nage siruwo sosire, ndi tu kare nage poyiruwo yapeke.
Vakriste kuvhura va ruganesere ezwi lyawo lyokomutjima yipo va tokore nsene kuvhura va zigide kepongo muntu ogu va gusa mombunga ndi va likunde nage nsene ana wiza kepongo. (Tara paragarafu 14)
15. Vantu musinke lya tamba etjangwa lyomwa-2 Johanesa 9-11? (Tara hena kakende “Johanesa naPaurusa kwa zogerere kuhamena nzo zokulifana ndi?”)
15 Vamwe kuvhura va lipure asi: ‘Bibeli nani kapi za tanta asi ogu ana kukunda muntu gwangoso, kuna kukwatesa ko yirugana yendi yoyidona ndi?’ (Resa 2 Johanesa 9-11.) Egaununo omu da tunda novelise odo kulikida asi evyukiso olyo kwa tamba kovarwanesi usili ntani kwava ava korangeda vakwawo va lihameke moyirugana yoyidona. (Ehor. 2:20) Yipo nye, nsene muntu kuna kuhanesa erongo lyovarwanesi usili ndi yirugana yimwe yoyidona, vakuronambunga kapi ngava tura po mawapaiko gokumudingura. Nye nampili ngoso twa kara nehuguvaro asi ezuva limwe muntu ogo nga litezurura. Nye mokumona asi age kapi ana litezurura, ose kapi tatu vhuru kumumorora ndi tu mu zigide komapongo.
HONENA NKENDA ZAJEHOVA
16-17. (a) Yisinke ana hara Jehova va rugane vananzo? (Hesekiyeli 18:32) (b) Ngapi omu vakuronambunga nava ruganena kumwe naJehova yipo va vatere vananzo?
16 Yisinke tuna lirongo mosirongwa esi? Jehova kapi ana hara asi ngapa ka zonauke nampili gumwe! (Resa Hesekiyeli 18:32.) Age kuna hara vananzo va tengure kwendi ndi va likwatakane nage. (2 Kol. 5:20) Eyi yiyo kutunda kwanare, Jehova a korangedere vananzo va litezurure ntani va tengure kwendi. Vakuronambuga kwa kara nositumbukira sosiwa sokuruganena kumwe naJehova yipo va vatere vananzo va litezurure.—Rom. 2:4; 1 Kol. 3:9.
17 Gazara koruhafo oru aru kara meguru apa vananzo ava litezurura! Guhyetu gemeguru Jehova kuhafa nkenye apa nzwi zendi zokuzumbana azi tengura mombunga. Yosili apa atu gazadara ko keharo nonkenda zaJehova zonene, ayo kutuninkisa tu mu hare unene.—Ruk. 1:78.
RUSUMO 111 Nokonda detu dehafo
a Kuliza noBibeli, nzo ezi ava dili kugusira po kapi za tamba konzo zongandi, nye kwa tamba konzo ezi a tura po muntu mowina ntani muntu gwangoso kutokora kurwanesa Karunga dogoro narunye. Nye kapisi nyose ya wapera kutokora nsene muntu ga tura nzo ozo ndi hawe.—Mar. 3:29; Heb. 10:26, 27.
