Mupositoli Paurusa kwa tjangerere Vakriste womoTesaronika asi: “Nsene pweli ogu ana kudira kulimburukwa kononkango domombilive ezi, mu didilikeni.” (2 Tes. 3:14) Nare ose kwa tente asi epukururo eli kwa tamba kovakuronambunga. Nsene gumwe mombungakriste a nyoka kutambura mapukururo gomoNonkango daKarunga, vakuronambunga kuvhura va gave siuyungwa serondoro kombungakriste. Ano konyima zosiuyungwa, vazuvhisi kuvhura va tokore kudira kuzigida munazinyetu ogo vana didilike yipo va ka hafere po yimwe kumwe.

Nye ngesi tuna yi kwata egano asi epukururo lyaPaurusa kwa tamba koVakriste navenye, ava va hepa kutura po etokoro olyo morwa maukaro gamwe. Yipo nye, kapisi hepero hena vakuronambunga va gave siuyungwa serondoro. Morwasinke pana karere malitjindjo? Konekeni eyi ya ninkisire Paurusa a gave epukururo olyo.

Paurusa kwa tente asi vamwe womombungakriste kapi vana “kulimburukwa.” Awo kapi ngava limburukwa mavyukiso gokutunda moNonkango daKarunga. Apa ga va dingwire Paurusa sikando sokuhova, age kwa va tanterere asi: “Nkenye ogu ga dira kuhara kurugana, walye a li.” Nye vamwe simpe kapi va here kurugana nampili ngomu va kere vawawa ntani kwa here kulitura moyininke ya hana asi yawo. Ngapi omu womombungakriste va hepere kutekura vantu owo?—2 Tes. 3:6, 10-12.

Paurusa kwa tente asi “mu didilikeni.” Nkango ozo moRugereka kutanta asi kudimburura muntu gwangoso. Paurusa kapi tupu ga geve epukururo olyo kovakuronambunga, nye kombungakriste mudima. (2 Tes. 1:1; 3:6) Yipo Vakriste navenye va dimburure muntu ogu ana kudira kulimburukwa, makura va “lipore ko kwendi.”

Ngoso muntu ogo kwa mu tekwire ngwendi gogu va gusa mombunga ndi? Hawe, morwa Paurusa kwa tente hena asi: “Twikireni kumupukurura morwa age simpe mupuli mukweni.” Yipo nye, Vakriste simpe ngava kara nomuntu ogu va didilika komapongo ntani moyirugana yokuzuvhisa. Nye nampili ngoso, awo kapi ngava kara kumwe nage poyiruwo yapeke. Morwasinke? Paurusa kwa tente asi: “Yipo a life nomuga.” Mokumona asi age kwa mu didilikire, ayo nampo ya mu ninkisire a life nomuga ntani a rundurure nkareso zendi.—2 Tes. 3:14, 15.

Ngapi omu Vakriste naina nava tura pasirugana epukururo olyo? Pomuhowo, twa hepa kudivilisa nsene asi muntu ogo sili kapi a “limburukwa” ngwendi moomu ga tente Paurusa. Age kapi ga tembe kovantu ava rugana yininke eyi twa dira kuhara, ndi ava ava tura po matokoro aga aga lilimbi nezwi lyetu lyokomutjima. Age hena kapi ga tembe kovantu ava ava tu koresa komutjima. Nye age kwa tembe kovantu ava ava tokora kurwanesa mavyukiso gokutunda moNonkango daKarunga.

Nsene tuna dimburura Mukriste ogu ana kulikida nkareso ozo naina, a kuvhura tu tokore nyamwetu pamundinda nsene kuvhura tu kare kumwe nage ndi tu mu zigide yipo tu ka hafere po nage. Mokumona asi eli etokoro natu tura po natuvenye pamundinda, ayo kapi nayi wapa kuyitantera wopeke ava twa dira kutunga nawo membo limwe ntani ose simpe ngatu twikira kukara namunazinyetu ogo komapongo nomoyirugana yokuzuvhisa. Ano apa nga wapukurura nkareso zendi, ose ngatu kara kumwe namunazinyetu ogo ngwendi moomu ngatu yi rugana komeho tu mu didilike.