1, 2. (a) Yisinke natu lirongera ko kedidimiko lyaNgidiyona novakwayita vendi 300? (Tara efano.) (b) Kuliza naRukasa 21:19, morwasinke kudidimika kwa karera nomulyo?

GAZARA udigu neroroko eli va kere nalyo vakwayita woVaisraeli ava ga pitisilire Ngidiyona apa va tjidire nonkore dawo. Ngidiyona novakwayita vendi kwa tjidire Vamidiyani novakwayita vawo masiku mudima konyara nokilometa 32. Bibeli kututantera eyi ya kweme ko: “Ngidiyona novakwayita 300 kwa wizire komukuro gwaJorodana, tava zauka. Awo kwa rorokere unene.” Nye kapi va fundire yita, morwa va hepere simpe kurwisa vakwayita 15 000. Nonkore odo ngadi hepeke Vaisraeli nomvhura dononzi, yipo nye, Ngidiyona novakwayita vendi va twikilire kuditjida, ano konyima va ya di fundire.—Vapanguli 7:22; 8:4, 10, 28.

² Nose kurwa yita noudigu ntani kuroroka. Nonkore detu kuna kara Satana nouzuni wendi ntani nokudira kusikilira mo kwetu. Vamwe vetu kwa rwa nononkore odo  nomvhura dononzi. Nevatero lyaJehova, ose kwa funda moyita yoyinzi. Nye simpe kapi twa fundilira. Poyiruwo yimwe ose kuroroka mokurwa. Ndi nampo kuvhura tu roroke mokundindira uhura wouzuni ou. Jesus kwa rondwere asi ngatu ligwanekera nomaudigu gomanzi ntani nehepeko lyedona pomazuva aga gopouhura. Nye ga tente hena asi nsene tu lididimika, ngatu funda. (Resa Rukasa 21:19.) Yisinke kudidimika? Yisinke ngayi tu vatera tu lididimikire? Yisinke natu lirongera ko kowo va lididimikilire? Ngapi natu ninka “edidimiko li kare nosirugana sina sikilire mo”?—Jakopo 1:4.

3. Yisinke kudidimika?

³ MoBibeli, kudidimika kutanta yoyinzi kupitakana tupu kudira kulisigilira moudigu. Kwa hamena mo nkedi omu atu gazara nomu atu lizuvhu kuhamena maudigu getu. Edidimiko kutuvatera tu kare nouradi ntani noulimburukwi. Buke zimwe kutanta asi kudidimika aso sikara esi asi tu vatere tu kare nehuguvaro lyokupama ntani tu dire kuligava nsene tuna kara nomaudigu. Ako kutuvatera tu kare tuna nkondopara nampili momaudigu gomanene. Ntani kutuninkisa tu ga diniinine po nokudemenena kositambo setu, nye kapisi kokukora.

4. Yisinke ayi tu tumangeda tu lididimike? Faturura.

⁴ Eharo kututumangeda tu lididimike. (Resa 1 Vakolinte 13:4, 7.) Momaruha musinke? Eharo lyokuhara Jehova kututumangeda tu lididimikire nkenye eyi. (Rukasa 22:41, 42) Eharo lyokuhara vanavazinyetu kutuvatera tu lididimikire mapuko gawo. (1 Peturusa 4:8) Eharo lyokuhara mulikwali gwetu kutuvatera tu lididimikire “maudigu” aga ava ligwanekere nago valikwali ntani nokunkondopeka nonkwara.—1 Vakolinte 7:28.

5. Morwasinke Jehova ga karera asi gelike gokutuvatera tu lididimikire?

⁵ Hundira Jehova nonkondo. Jehova yige “Karunga gedidimiko nogu gehengagwido.” (Varoma 15:5) Yige gelike gokuvhura kukwata egano ukaro nomalizuvho getu. Age ga diva nawa-nawa eyi twa hepa yipo tu lididimikire. Bibeli kutanta asi: “Age kuhepurura maruhepo gava ava mu tjira; age kuzuvha nkugo zawo, ta va parura.” (Episarome 145:19) Nye ngapi Karunga a limburura makanderero getu gokuhundira nonkondo tu lididimikire?

6. Ngapi Jehova a tu wapaikire ‘evega lyokuhenduka’ maudigu?

⁶ Apa atu hundire Jehova a tu vatere tu lididimikire, age kutuwapaikira “evega lyokugahenduka.” (Resa 1 Vakolinte 10:13.) Ngapi a yi rugana? Poyiruwo yimwe, kuvhura a guse po udigu. Nye rorunzi, age kutupa nonkondo yipo tu “vhure kudidimika maudigu nagenye  nehafo.” (Vakorosi 1:11) Morwa Jehova ga diva nawa upirankondo wetu wopamalizuvho nou wopanandunge nou woparutu, age narumwe si kutarerera ukaro wangoso u tu ninkise tu dire kumulimburukwa.

7. Morwasinke twa hepera nondya dopampepo mokulididimikira? Yi fanekesa.

⁷ Nkondopeka epuro lyoge nonondya dopampepo. Morwasinke nondya dopampepo da karera nomulyo? Mokuyifanekesa: Mokuronda ndundu zonde unene, muntu ga hepa kulya nondya dononzi edi ngano na vhura kulya momazuva gatatu ndi gane. Mokulifana, nose twa hepa nondya dononzi dopampepo mokulididimikira nokusikisa mo sitambo setu. Twa hepa kutulisa po siruwo selirongo lyanyamwetu nesi sokomapongo. Ayo ngayi tu vatera tu twikire kunkondopeka epuro lyetu.​—Johanesa 6:27.

8, 9. (a) Kuliza naJoba 2:4, 5, yisinke ya hamena mo apa atu ligwanekere nomaudigu? (b) Nsene kuna kuligwanekera nomaudigu, yisinke no vhura kugazara?

⁸ Diworoka ulimburukwi woge kwaKarunga. Apa atu ligwanekere nomaudigu, yinzi ya hamena mo kupitakana tupu kuhepa. Ulimburukwi wetu kwaKarunga kuuheteka. Monkedi omu atu kara momaudigu kulikida nsene asi ose kutara Jehova ngoMupangeli gouzuni mudima. Morwasinke? Satana, nkore zaKarunga ogu a rwanesa upangeli wendi, kwa swawire Karunga pokutanta asi vantu kumukarera tupu morwa kugwanena mo mauwa. Age kwa tente asi: “Muntu kugava nkenye eyi, morwa kuhara a paruke.” Age kwa uyungire kuhamena Joba asi: “Ano nsene asi o guma rutu rwendi ntaantani, ngano ta teka koge ove kuna kutara!” (Joba 2:4, 5) Satana ga runduruka kutunda apa ga uyungire eyi ndi? Hawe! Apa Satana va mu zugumine mo meguru, age kwa twikira kuheta vakareli vaKarunga wovalimburukwi. (Ehororo 12:10) Naina, Satana simpe kuuyunga asi vantu kukarera Karunga morwa kugwanena mo tupu mauwa. Age kuyindindira nononkondo mokutumona kuna kunyoka upangeli waKarunga nokuhageka kumukarera.

⁹ Nsene kuna kuligwanekera nomaudigu, gazara eyi. Satana novaengeli vendi kuna kara ruha rumwe. Awo kuna kukunomena va mone eyi ono kurugana nokuuyunga asi kapi tayi ku tompoka. Ano koruha rumwe, Jehova naHompa Jesus Kristusa novagwavekwa ntani novaengeli wovanzi. Awo kuna kukumona omu ono kukondja, ntani kuna kukukorangeda. Awo vana hafa mokukumona kuna kulididimikira nokutwikira kulimburukwa Jehova. Makura to zuvhu Jehova kuna kukutantera asi: “Munwange kara munongo, makura ame tani hafa. Ame ngani limburura nkenye ogu nga pa nge usima.”—Yisewe 27:11.

10. Ngapi natu honena Jesus mokunwika komfeto?

¹⁰ Nwika komfeto. Gazara asi ove kuna kara morugendo rorure, ano wa hepa kugenda masiku mudima ntani no ka sika oku ono tamba. Nkenye oku ono kutara  mundema gwelike. Nye ono diva asi ntaantani lise o mone uzera, ntani asi nsene o twikira kugenda ove to ka sika oku ono tamba. Eparu kwa fana ngwendi rugendo. Wa hepa kupita momaudigu, ntani kuvhura o lizuvhe ngwendi gana ku diniinine po. Nampili Jesus yimo ga lizuvhire ngoso. Apa va mu pangwilire konomfa, ayo kwa mu swaukisire nokumukoresa unene. Esi kwa kere siruwo sosidigu po unene meparu lyendi! Yisinke ya mu vaterere a lididimikire? Bibeli kutanta asi age kwa ‘lididimikira nomfa morwa ehafo eli lya mu kere komeho.’ (Vahebeli 12:2, 3) Jesus kwa nwikire komfeto, unene po mokupongora edina lyaKarunga nokukwatesa ko upangeli wendi. Age ga yi divire asi udigu kwa kere wopokaruwogona ntani asi mfeto zendi zemeguru zanarunye. Naina, kuvhura ga ku vhukire maudigu ntani nokukora, nye diworoka asi ago gopokaruwogona.

11. Morwasinke natu konakonena yihorokwa ‘yava va didimika’?

¹¹ Kapi twa hepa kulididimikira nyoselike. Mokukorangeda Vakriste va lididimikire maudigu gokutunda kwaSatana, mupositoli Peturusa kwa tjenge asi: “Kareni muna koro mepuro, mu mu rwise. Yeeyi mwa diva asi, vapuli vakweneni mouzuni naunye, nawo kwa simba maudigu ngagaaga.” (1 Peturusa 5:9) Yihorokwa ‘yava va didimika’ kuturonga omu natu limburukwa nokutupa ehuguvaro asi ngayi tu tompoka ntani nokutudiworokesa asi ngatu gwanena mo mfeto moulimburukwi wetu. (Jakopo 5:11) Tu konakoneni yihonena yongandi. ^[1]

12. Yisinke natu lirongera ko kosihonena sovakerubi ava va tulire moEdeni?

¹² Vakerubi awo vaengeli va kara nositumbukira sokuzeruka. Konyima zapa ga zonene Adamu naEva, Jehova kwa pere vakerubi vamwe sirugana sosipe apa pevhu. Aso kwa lisigire nesi ngava rugana meguru. Sihonena sawo kuturonga omu natu lididimikira nsene tuna gwana sirugana soudigu. Bibeli kutanta asi Jehova “koUpumezuva wosikunino saEdeni, ta tura ko vakerubi negonga lyomundiro lyokuvyuka-vyuka komaruha nagenye. Alyo lyokukonderesa nkenye ogu ana kuhara kuwiza kositji somwenyo.” ^[2] (Genesis 3:24) Bibeli kapi za tumbura asi vakerubi kwa sivanene asi awo mulyo unene kapi va fira sirugana sangoso. Aso kapi sa va setere ndi va si hageke. Nye,  awo kwa twikilire mosirugana sawo dogoro tasi pu, nampo poRuhanzo, konyima zonomvhura dokupitakana 1 600!

13. Yisinke ya vaterere Joba a lididimikire maudigu?

¹³ Joba mugara gomulimburukwi. Poyiruwo yimwe kuvhura o lizuvhe kukora morwa kaume ndi gemepata kuna ku uyungire momudona. Ndi nampo kuna kuvera ndi kuna kuhepa morwa kwa fisa gekoro. Yi kare asi yisinke yina kuhoroka, kuvhura o gwane ehengagwido mosihonena saJoba. (Joba 1:18, 19; 2:7, 9; 19:1-3) Joba kapi ga divire eyi maudigu ga likwama-kwamene, nye kapi ga mu dompesere. Yisinke ya mu vaterere? Age kwa here Jehova nokudira kuhara kumuguvisa. (Joba 1:1) Age kwa here kuhafesa Karunga moyiruwo yoyiwa neyi yoyidona. Ntani, Jehova ga vaterere Joba a mone nonkondo dendi pokumutantera yininke yokutetukisa eyi ga sita. Eyi ya vaterere Joba a dive asi Jehova nga hagekesa po maudigu gendi posiruwo souhunga. (Joba 42:1, 2) Yosili yimo ya horokere. Makura Jehova ‘ta ragopeke hena Joba, ta mu pe pwaruvali kupitakana pweyi yoruhowo.’ Joba kwa parukire siruwo sosire ntani ‘kwa kurupire unene.’​—Joba 42:10, 17.

14. Kuliza 2 Vakolinte 1:6, ngapi edidimiko lyaPaurusa lya vaterere wopeke?

¹⁴ Mupositoli Paurusa. Ove kuna kuhepa komakwamakwamo ndi komarwaneso? Ove mukuronambunga ndi mutareli gonombunga ogu ono kulizuvha asi yitumbukira yina ku vhukire unene ndi? Nsene yimo, sihonena saPaurusa kuvhura si ku vatere. Paurusa kwa mu hepekere unene, nye age kwa kere nosinka kovakwawo womonombungakriste. (2 Vakolinte 11:23-29) Paurusa kapi ya mu dompesere, ntani sihonena sendi kwa  nkondopekere wopeke. (Resa 2 Vakolinte 1:6.) Mokulifana, edidimiko lyoge kuvhura kukorangeda wopeke va lididimikire.

15, 16. (a) Ngapi edidimiko nali kara “nosirugana” sina sikilire? (b) Gava yihonena omu natu ninka “edidimiko li kare nosirugana sina sikilire mo.”

¹⁵ Murongwa Jakopo kwa tjenge asi: “Edidimiko li kare nosirugana sina sikilire mo, omu sikilire mo mwa hana kavadi, one mwa ha puka hena.” (Jakopo 1:4) Ngapi edidimiko nali kara “nosirugana” sina sikilire mo moge? Apa atu piti moudigu, ose kuvhura kuyidimburura asi ose kuhepa elididimikiro ndi rupandu ndi eharo. Ngomu tuna kulididimikira, ose kulironga kulikida yikara oyo momunene, ano monkedi zangoso ose kuwapukurura yikara yetu yoSikriste.

¹⁶ Morwa edidimiko kutuninkisa tu kare Vakriste wovawa, kapi tuna hara kuteza po veta zaJehova yipo udigu u hage po. Pasihonena, nsene kuna kukondja nomagazaro goruhonda, wa ha gwira meheteko. Pura Jehova a ku vatere o nyokere po magazaro gangoso. Kweli gemekoro ogu a ku rwanesa ndi? Ya ha ku dompesa. Tokomena kukarera Jehova. Ngoyitundwamo, ove ngo nkondopeka ehuguvaro lyoge mwaJehova. Diworoka asi mokuninka Karunga a ku hafere, wa hepa kulididimikira.—Varoma 5:3-5; Jakopo 1:12.

17, 18. (a) Fanekesa mulyo gokulididimikira dogoro kouhura. (b) Ngomu tuna kuhedera pepi nouhura, ehuguvaro musinke natu kara nalyo?

¹⁷ Ose twa hepa kulididimika dogoro kouhura, kapisi karuwogona tupu. Gazara sikepa sina kudama. Mokuparuka, varondimo va hepa kuzoga dogoro konontere. Muntu ogu a dompo mutjima apa a tameke kuzoga kudama. Mokulifana, muntu ogu a dompo mutjima komeho tupu a ka sike konontere nage kudama. Nsene tuna hara kukaparuka mouzuni woupe, twa hepa kutwikira kulididimikira. Tu kareni nonkareso ezi ga kere nazo mupositoli Paurusa, ogu ga tente asi: “Yiyo nye natu dilira kudomba nomutjima.”—2 Vakolinte 4:1, 16.

¹⁸ Ngwendi Paurusa, yosili twa kara nehuguvaro asi Jehova nga tu vatera tu lididimike dogoro kouhura. Paurusa kwa tjenge asi: “Ose tu vafundi twa pitakanena, mogu ga tu hara. Nye ame kwa yi diva nawa-nawa asi, nayimwe si yokutugusa mo meharo lyaKristusa: nonomfa si deedi nomwenyo si novaengeli si nomapangero si ndi nonkondo donompepo, noyininke si yantani neyi si yokomeho. Neyi si yekeguru neyi si yokonhi-nhi, nasimwe si poyisitwa nayinye esi sokutugusa mo meharo lyaKarunga eli twa kara nalyo mwaJesus Kristusa, Hompa gwetu.” (Varoma 8:37-39) Yosili, poyiruwo yimwe ngatu roroka. Nye tu honeneni Ngidiyona novakwayita vendi. Awo kwa rorokere, nye kapi va dompere nomutjima. Awo kwa twikilire ‘kutjida nonkore’ dawo.​—Vapanguli 8:4.