1-3. (a) Ngapi Vakriste ava lizuvhu kuhamena kuponga kumwe? (Tara efano.) (b) Yisinke natu ka zogera mosirongwa esi?

APA Corinna ga kere nonomvhura 17, ozina kwa va kwete nokuvatuma kodorongo. Konyima, Corinna nage kwa ya mu twere koSiberiya. Oko nga ka rugana mofarama nokumutekura ngwendi mupika. Poyiruwo yimwe nga va mu sininike a rugane moutenda wounene ga hana kudwara yikoverero yokufu. Nampili ngoso, Corinna namunazinyetu gumwe kwa tokwere asi tava zi kepongo.

² Corinna kwa tente asi: “Ose kwa tundire mofarama masiku nokugenda ure wonokilometa 25 tu ze kositasi somahina gorutenda. Mahina gorutenda kukatuka ngurangura povili zauvali, ntani ose kwa gendere nomahina novili ntazimwe komeho tu ka humburuke ntani nokukagenda ure wonokilometa 10 tu ka sike kepongo.” Corinna kwa hefe unene morwa va ka sikire oku va tembe. Age kwa tente  asi: “Kepongo, ose kwa lirongere Ruhungu nokudimba nonsumo doUhompa. Ayo kwa tu korangedere ntani nokupameka epuro lyetu.” Vanavazinyetu vavali ava kwa tengwire kofarama konyima zomazuva gatatu, nye mwenya farama kapi ga yi dimbwilire.

³ Vantu vaJehova nkenye apa kundindira nononkondo mokuponga kumwe. Pasihonena, Vakriste wokuhova kwa here kuponga kumwe mokukarera Jehova nokulironga kumuhamena. (Yirugana 2:42) Yosili, nove kuyindindira nononkondo mokuza komapongo. Ngwendi vanavazinyetu navenye, ove nampo kukudigopera mokukara momapongo nkenye apa. Nampo kurugana novili dononzi ndi wa kara neyi yoyinzi yokurugana ndi kulizuvha eroroko. Yisinke ngayi tu vatera tu rugane paapa twa hulira yipo tu kare momapongo? ^[1] Ngapi natu korangeda varongwa vetu nava wopeke va kare komapongo nkenye apa? Sirongwa esi tasi ka faturura eyi kukara komapongo (1) aku tu reterere mauwa, (2) aku vaterere wopeke, ntani (3) aku hafesere Jehova. ^[2]

4. Ngapi kuponga kumwe aku tu vatere tu lironge kuhamena Jehova?

⁴ Mapongo kuturonga. Nkenye epongo kutuvatera tu lironge yoyinzi kuhamena Jehova. Pasihonena, nombungakriste detu ntani tupu kadi mene kulironga sifo Bibeli—Mbudi musinke za kara mo? mElirongo lyoBibeli lyoMbunga. Ngapi wa lizuvhire apa mwa zogere mauporofete kuhamena Mesiyasa napa wa zuvhire omu vanavazinyetu ava lizuvhu kumuhamena? Yosili, eyi ya nkondopekere epuro lyoge momauporofete. Komapongo, ose kulironga yoyinzi kuhamena Bibeli pokupurakena koyiuyungwa nokomalikido ntani apa ava resa Bibeli. (Nehemiya 8:8) Ntani gazara yininke eyi atu gwana nkenye sivike apa atu liwapaikire ereso lyoBibeli ntani nokuzuvha eyi vana lirongere ko wopeke.

5. Ngapi mapongo ga ku vatera o ture pasirugana eyi wa lironga moBibeli ntani nokuwapukurura omu o zuvhisa?

⁵ Mapongo, kutuvatera tu ruganese meparu lyetu eyi atu lirongo moBibeli. (1 Vatesaronika 4:9, 10) Pasihonena, wa kere pElirongo lyoRuhungu eli lya ku ninkisire o hare kuruganena unene Jehova ndi kuwapukurura makanderero goge ndi kudongwenena po vanavazinyetu ndi? Epongo eli atu kara nalyo mokatji kosivike kuturonga omu natu zuvhisa mbudi zongwa ntani nomu natu vatera wopeke va kwate egano usili womoBibeli.—Mateusa 28:19, 20.

6. Ngapi mapongo aga tu korangeda nokutunkondopeka?

⁶ Mapongo kutukorangeda. Uzuni waSatana kuhetekera ko kusesupika epuro lyetu ntani nokutuninkisa tu kare nosinka ndi tu dompe mutjima. Nye mapongo kutukorangeda  nokutupa nonkondo tu twikire kukarera Jehova. (Resa Yirugana 15:30-32.) Ose kuzogera omu mauporofete gomoBibeli gana kusika mo. Eyi kutuvatera tu kare nehuguvaro asi matumbwidiro gaJehova gokomeho ngaga ka sika mo. Vanavazinyetu kutukorangeda apa ava gava yiuyungwa nomalimbururo ntani apa ava dimbi mokuhamberera Jehova. (1 Vakolinte 14:26) Apa atu zogere nawo komeho ndi konyima zomapongo, ose kulizuvha epwizumuko morwa twa kara novakaume ava va tu hara.—1 Vakolinte 16:17, 18.

7. Morwasinke ya karera nomulyo kukara komapongo?

⁷ Komapongo, ose kugwana evatero lyompepo zokupongoka zaKarunga. Jesus kuruganesa mpepo ezi zokupongoka a pitisire nombungakriste. Age kwa uyungire asi twa hepa ‘kuzuvha eyi zina kutanta mpepo nombungakriste.’ (Ehororo 2:7) Mpepo zokupongoka kuvhura kutuvatera tu nyokere po maheteko ntani tu zuvhise noupampi. Azo kuvhura kutuvatera tu ture po matokoro gomawa. Eyi yiyo twa hepera kukondja mokukara komapongo ntani nokugwana evatero lyompepo zokupongoka zaKarunga.

8. Ngapi kukara komapongo nokugava malimbururo nokudimba ayi vatere vanavazinyetu? (Tara hena kakende “Age nkenye apa nga lizuvhu ko hansa konyima zepongo.”)

⁸ Komapongo, ose kugwana nompito dokulikida vanavazinyetu asi twa va hara. Mombungakriste zetu vanzi vana kulididimikira maudigu gomanene. Mupositoli Paurusa kwa tjenge asi: “Atu likoraike-koraikeni mokulihara-hara.” (Vahebeli 10:24, 25) Ose kuvhura tu yi likide asi twa hara vanavazinyetu pokuponga kumwe tu likorangede-korangede. Apa atu zi komapongo, ose kulikida vanavazinyetu asi tuna hara kukara nawo nokuzogera kumwe ntani asi tuna hara kudiva omu vana kulizuvha. Ose kuvakorangeda apa ava zuvhu malimbururo getu nomu tuna kudimba kutundilira komutjima.—Vakorosi 3:16.

9, 10. (a) Ngapi nonkango daJesus domwaJohanesa 10:16 adi tu vatere tu kwate egano mulyo gokuponga novanavazinyetu? Faturura. (b) Ngapi kukara komapongo nkenye apa nayi vatera ogu va nyoka vekoro lyendi?

 ⁹ Apa atu wiza komapongo, ose kuvatera mbungakriste zi likwatakane kumwe. (Resa Johanesa 10:16.) Jesus kwa lihetakanesere mwene komusita ano vasikuli vendi kosiunda sononzwi. Gazara tupu: Nsene nonzwi mbali kuna kara kondundu, ano mbali momuramba, ntani zimwe kwapeke, ngoso nonzwi odo kuna kara siunda ndi? Hawe, morwa siunda zononzwi kukara kumwe nokukwama musita. Mokulifana, kapisi tu kare ure novanavazinyetu pokufaura komapongo. Twa hepa kukara kumwe yipo tu kare “siunda simwe tupu” nokukwama ‘musita gumwe tupu.’

¹⁰ Mapongo getu kutuvatera tu kare mouumwe ngepata. (Episarome 133:1) Vamwe mombungakriste kwa va nyoka vekoro lyawo, ngwendi vakurona vawo ndi vamumbya ndi vakuru vawo. Nye Jesus kwa va tumbwidira asi nga va pa epata eli ngali va hara nokuvapakera mbili. (Marukusa 10:29, 30) Nsene o kara komapongo nkenye apa, ove ngo kara ngwendi guhya ndi zinya ndi mukurwa ndi mumbya kwava womombungakriste. Apa atu yi gazara oyo, ose kulitura mo unene mokukara komapongo nagenye.

11. Ngapi kukara komapongo ayi tu vatere tu pe Jehova eyi ya mu fira?

¹¹ Komapongo, ose kupa Jehova eyi ya mu fira. Mokumona asi yige  Musiti gwetu, twa hepa kumupandura nokumufumadeka ntani nokumuhamberera. (Resa Ehororo 7:12.) Ose kuvhura kuyirugana eyi komapongo apa atu kanderere kwaJehova nokumudimbira nokuuyunga kumuhamena. Ee, mpito musi kouwa atu kara nazo nkenye sivike mokukarera Jehova!

12. Ngapi Jehova a lizuvhu apa atu limburukwa mpangera zendi zokukara komapongo?

¹² Jehova yige ga tu sita, ntani twa hepa kumulimburukwa. Age kwa tu pangera tu ponge kumwe, unene po ngomu uhura una kuhedera pepi. Yipo nye, apa atu limburukwa mpangera ozo, Jehova kumuhafesa. (1 Johanesa 3:22) Age kuyidimburura asi yosili tuna hara kukara komapongo ntani age kuhafera navenye ava ava kara ko.—Vahebeli 6:10.

13, 14. Komapongo, ngapi atu hedere pepi Jehova naJesus?

¹³ Apa atu wiza komapongo, ose kulikida Jehova asi tuna hara kumuhedera pepi ntani naMunwendi. Komapongo, ose kulironga Bibeli nokulirongera ko kwaJehova eyi twa hepa kurugana nomu natu paruka. (Jesaya 30:20, 21) Apa vamwe ava ava dili kukarera Jehova ava wiza komapongo, kuyadimburura asi Karunga yige a tu pitisire. (1 Vakolinte 14:23-25) Jehova yige a pitisire mapongo getu kupitira mompepo zokupongoka, ntani eyi atu lirongo ko kutunda kwendi. Yipo nye apa atu zi komapongo, ose kupurakena kweyi a uyunga Jehova nokulizuvha omu ga tu hara ntani nokumuhedera pepi.

¹⁴ Jesus, Mutwe gombungakriste, kwa tente asi: “Nkenye oku aku pongo vantu vavali ndi vatatu medina lyange, name pokatji kawo ani kara.” (Mateusa 18:20) Bibeli kwa tanta hena asi Jesus “kugenda pokatji” konombungakriste. (Ehororo 1:20–2:1) Yosili, Jehova naJesus kumwe nose vana kara ntani awo kutunkondopeka. Ngapi ono kugazara omu Jehova a lizuvhu apa a ku mono kuna kukondja mokumuhedera pepi ntani naMunwendi?

15. Ngapi kukara komapongo ayi likida asi tuna hara kulimburukwa Karunga?

¹⁵ Apa atu wiza komapongo, ose kulikida Jehova asi tuna hara kumulimburukwa. Jehova kapi a tu sininike tu rugane eyi a uyunga. (Jesaya 43:23) Apa atu tokora kulimburukwa mpangera zendi zokukara komapongo, ose kulikida asi twa mu hara ntani twa yi pura asi yige gelike ga kara nononkondo dokututantera eyi natu rugana. (Varoma 6:17) Pasihonena, yisinke natu rugana nsene muhona gwetu a hara tu rugane novili dononzi eyi nayi tu ninkisa tu dire kuwiza komapongo? Ndi nampo epangero tali tanta asi nkenye ogu na ponga mokukarera Jehova, tava mu futisa ndi tava mu tura modorongo ndi tava mu tengeke. Ndi poyiruwo yimwe kuhara kurugana yininke yapeke mevango  lyokuwiza komapongo. Momaukaro nagenye ogo, twa hepa kutokora eyi natu rugana. (Yirugana 5:29) Nye nkenye apa atu limburukwa Jehova, ose kumuhafesa.—Yisewe 27:11.

16, 17. (a) Ngapi tuna yi diva asi mapongo kwa kere nomulyo koVakriste wokuhova? (b) Ngapi munazinyetu George Gangas ga lizuvhire kuhamena mapongo?

¹⁶ Konyima zapa va pongere poPentekoste momvhura 33, Vakriste ngava pongo kumwe mokukarera Jehova. Awo “makura tava ligava mo merongo lyovapositoli nomonkarapamwe.” (Yirugana 2:42) Awo kapi va hagekere kuponga kumwe nampili apa epangero lyoVaroma novampitisili woVajuda va va hepekere. Nampili ngomu ya kere udigu, awo va twikilire kuponga kumwe.

¹⁷ Naina, vakareli vaJehova nawo kulizuvha mfumwa mokuponga kumwe ntani kuvahafesa. George Gangas, ogu ga hamenene moMbungagendesi nomvhura 22, kwa tente asi: “Kwange, kuponga kumwe novanavazinyetu kuna kara mfumwa zonene ntani ntundiliro zekorangedo. Ame kwa hara kukahova kukasika koSinyanga soUhompa, ntani nokuhulilira kutunda ko. Ame kulizuvha ruhafo apa ani zogere novantu vaKarunga. Apa ani kara mokatji kawo ame kulizuvha ngwendi kuna kara nepata lyange, moparadisa zopampepo.” Age kwa gwederere ko asi: “Mazagaro gange ntani neharo lyange kuna tokomene kukara komapongo.”

18. Ngapi o lizuvhu kuhamena mapongo, ntani yisinke ono tokomene kurugana?

¹⁸ Nove yimo o lizuvhu ngoso kuhamena kukarera Jehova ndi? Nsene yimo, twikira kukondja mokukaponga kumwe novanavazinyetu, nampili yi kare asi udigu. Likida Jehova asi nove kulizuvha ngwendi hompa Ndafita ogu ga uyungire asi: “HOMPA, ame kwa hara nzugo ezi wa kara.”​—Episarome 26:8.