SIRUGANA setu sokuzuvhisa mulyo unene. Nye kapisi nkenye ogu atu zuvhisire kusikwata egano. Nampili vantu va kare neharo kweyi azi uyunga ko Bibeli, kapi va diva mulyo gokulironga nose Nonkango daKarunga.

Tu tareni sihonena saGavin. Age nga zi komapongo, nye kapi ga here kulironga Bibeli. Gavin kwa faturura asi age kwa divire tupu yoyisesu kuhamena Bibeli ntani kapi ga here wopeke va yi dive. Age kwa kere nowoma asi nampo nava mu pura a lipakerere moukareli wongandi, ntani kapi ga here va mu mone asi kwato eyi ga diva. Ngapi ono kugazara? Ya kere ureru kuvatera Gavin ndi? Gazara omu marongo goBibeli aga kundama muntu monaruwa. Jehova kwa tanterere Vaisraeli asi: ‘Nonkango dange ngadi gwa ngwendi mata gomvhura, tadi vavere pevhu ngwendi eme.’ (Deuteronomium 31:19, 30; 32:2) Ngesi tatu ka lironga yininke yimwe kuhamena eme ntani nokulihetakanesa nosirugana setu sokuzuvhisa yipo yi tu tompoke mokuvatera “vantu navenye.”—1 Timoteusa 2:3, 4.

Eme kutendeka. Eme kanunu-kanunu kuyalisitunuka mata gomvhura. Ngapi omu nonkango daJehova da ‘vaverere pevhu ngwendi eme’? Age kwa uyungire novantu vendi monkedi zokutendeka zombili ntani zeharo. Ose kumuhonena apa atu fumadeke eyi va pura wopeke. Ose kuvakorangeda va ture po matokoro gavene. Nsene tu litura mo mwawo, ngayi va rerupira kutambura eyi atu uyunga ntani ngayi tu tompoka mosirugana setu sokuzuvhisa.

Eme kupwizumukisa. Sirugana setu sokuzuvhisa ngazi pwizumukisa wopeke nsene tu gazara nonkedi dokulisiga-siga omu natu va vatera va lironge yoyinzi kuhamena usili. Munazinyetu gedina Chris, ogu ga here kuronga Gavin Bibeli, kapi ga sininikire Gavin a tambure elirongo. Nye age kwa hetekerere ko kugwana nonkedi dokulisiga-siga mokuninka Gavin a lizuvhe emanguruko mokuzogera nage Bibeli. Chris kwa tanterere Gavin asi pwa kara mbudi zomulyo va zogera moBibeli nazinye ntani asi kuzilironga ngayi mu vatera a kwate nawa egano mapongo. Makura, Chris yipo ga uyungire asi mauporofete goBibeli yigo ga vaterere nge ni pure asi Bibeli usili. Ngoyitundwamo, awo va zogerere yoyinzi kuhamena omu mauporofete ga sikilira mo. Eyi va zogerere kwa pwizumukisire Gavin, makura ta ya tambura elirongo lyoBibeli.

Eme mulyo keparu. Posiruwo soupyu ndi sorukukutu moIsraeli, pamwe mvhura kapi ngazi roko makwedi gongandi. Pwa hana utenda ou au tundu keme, yimeno kuyakukuta nokufa. Jehova kwa yi pumbire asi momazuva getu ngamu kara rukukutu, kutanta asi vantu ngava va enota “lyononkango daHOMPA.” (Amosa 8:11) Age kwa tumbwidira asi vagwavekwa ngava fana “ngwendi eme lyepe eli a tumu HOMPA” ngomu vana kuzuvhisa mbudi zongwa zoUhompa, ano “nonzwi dapeke” kuvakwatesa ko. (Mika 5:7; Johanesa 10:16) Mbudi ezi atu zuvhisa kuna kara ruha romawapaiko gaJehova aga aga gava eparu kowo vana kufa enota lyononkango daKarunga. Ose kutara mbudi ezi asi mulyo ndi?

Eme kuna kara etungiko lyokutunda kwaJehova. (Deuteronomium 33:13) Sirugana setu sokuzuvhisa kukara etungiko ndi uhwi kowo ava si tambura. Elirongo lyoBibeli kwa kere etungiko kwaGavin morwa kwa mu vaterere a gwane malimbururo komapuro gendi nagenye. Age kwa twikilire kulironga nokuyagwana ekuho, ano ngesi kuzuvhisa mbudi zongwa zoUhompa namukadendi, Joyce.

Kuhetakanesa sirugana sokuzuvhisa keme kutuvatera tu dive asi elituromo lyetu mosirugana oso mulyo unene. Monkedi musinke? Mata gomvhura kuvatera tupu kanunu, nye mata gomanzi kuninkisa evhu linengene. Mokulifana, ezuvhiso lyetu kuvhura li moneke ngwendi mulyo musesu. Nye ngoyitundwamo lyelituromo lyovakareli vaJehova wovanzi, umbangi kuna kuugava ‘konomuhoko nadinye.’ (Mateusa 24:14) Kuzuvhisa kwetu kuvhura ku kare etungiko lyaJehova kwava wopeke ndi? Nhi, mbudi zetu kwa fana ngwendi eme, azo kutendeka nokupwizumukisa ntani mulyo keparu!