1. Ngapi natu limburukwa Karunga nye tu limburukwe hena mapangero?

BIBELI kuturonga tu limburukwe mapangero, nye hena kututantera asi twa hepa kulimburukwa Karunga kupitakana vantu. (Yirugana 5:29; Titusa 3:1) Ngapi nayi vhura kuhoroka oyo? Jesus kwa fatwilire eyi nayi tu vatera tu dive ogu natu limburukwa. Age kwa tente asi twa hepa ‘kufutira hompa gwaRoma eyi ya mu hamena, ano Karunga nage yeeyi ya mu hamena.’ ^[1] (Mateusa 22:21) Ose kufutira hompa eyi ya mu hamena apa atu limburukwa noveta depangero nokufumadeka vapangeli ntani nokufuta mutero. (Varoma 13:7) Nsene epangero li tu tantera tu rugane eyi ya lilimba neyi ga hara Karunga, ose kunyoka kuyirugana, nye monkedi zefumadeko.

2. Ngapi natu dira kulihameka moupolitika?

² Nkedi zimwe omu atu futire ‘Karunga eyi ya mu hamena’ kuna kara pokudira kulihameka moupolitika. (Jesaya 2:4) Mokumona asi Jehova yige ga  pulisira mapangero govantu ga pangere, ose kapi atu ga rwanesa. Ntani kapi twa hara unene sirongo setu kupitakana yapeke. (Varoma 13:1, 2) Ose kapi atu hetekere ko kurundurura mapangero ndi maupolitika, ntani kapi atu horowora ndi tu kare vanapolitika.

3. Morwasinke natu dilira kulihameka moupolitika?

³ Pwa kara nokonda deyi Karunga a tu tanterere tu dire kulihameka moupolitika. Konda zimwe kuna kara asi ose kuhonena Jesus, ogu ga dilire kuhama ‘kouzuni’ ou. Age kapi nga lihameke moupolitika ndi moyita. (Johanesa 6:15; 17:16) Ano zimwe kuna kara asi ose kukwatesa ko Uhompa waKarunga. Morwa kudira kukwatesa ko mapangero govantu, ose twa kara nezwi lyewa lyokomutjima apa atu zuvhisa asi Uhompa waKarunga ngau ya gusa po maudigu govantu. Maukarelikarunga goyimpempa kukwatesa ko maupolitika, ano eyi kugaununa vantu. Ose kwa kara mouumwe novanavazinyetu mouzuni mudima, morwa kapi atu lihameke moupolitika.—1 Peturusa 2:17.

4. (a) Morwasinke yina kudigoperera kukwaterera ngesi koulimburukwi? (b) Morwasinke natu liwapaikilira ngesi kudira kulihameka moupolitika?

⁴ Nampo ose kwa tunga kevango oku ava dili kutusininika tu lihameke moupolitika. Nye ngomu tuna kuhedera pepi nouhura wouzuni waSatana, yimo yina kutudigopera unene mokukwaterera koulimburukwi wetu. Vantu naina awo “vankenye omu” ntani ‘valingi-lingi,’ awo ngava twikira kuligaunuka. (2 Timoteusa 3:3, 4) Vanavazinyetu vamwe ya va kundama morwa marunduruko gomoupolitika mosirongo sawo. Eyi yiyo twa hepera kuliwapaikira ngesi mokudira kulihameka moupolitika nampili moukaro woudigu. Ngesi tatu ka zogera yininke yine eyi natu rugana yipo tu liwapaikire.

5. Ngapi Jehova a tara mapangero govantu?

⁵ Nkedi zokuhova omu natu dira kulihameka moupolitika kuna kara pokutara mapangero ngamoomu a ga tara Jehova. Apa ga sitire Jehova vantu, kapi ga va pere nonkondo dokulipangera vene. (Jeremiya 10:23) Age kutara vantu navenye ngepata. Nye mapangero govantu kugaununa vantu morwa awo kutanta asi muhoko gwawo mulyo. Nampili ngomu mapangero aga moneka asi mawa, kapi aga vhuru kukohonona po maudigu. Ntani, ago kwa ya kara nonkore doUhompa waKarunga, ou wa tamekere kupangera momvhura 1914. Ntaantani Uhompa owo ngau ya guse po mapangero nagenye.—Resa Episarome 2:2, 7-9.

6. Ngapi omu natu tekura ava ava pangere?

⁶ Jehova kwa pulisira mapangero govantu ga kare po morwa kuvhura ga retese po mbili zopokaruwogona. Eyi kutuvatera tu zuvhise mbudi zongwa kuhamena  Uhompa waKarunga. (Varoma 13:3, 4) Karunga kututantera tu kanderere po ava ava pangere yipo tu mu karere nombili. (1 Timoteusa 2:1, 2) Nsene kuna kututekura momudona, kuvhura tu pure ava va kara mepangero va tu vatere. Eyi yiyo ga rugene Paurusa. (Yirugana 25:11) Nampili ngomu Bibeli za uyunga asi Satana yige ana kupangera uzuni, azo kapi za uyunga asi yige a pangere navenye ava va kara mepangero. (Rukasa 4:5, 6) Twa ha gava egano eli asi vamwe vemepangero kuvapitisira Muzonaguli. Bibeli kutanta asi kapisi tu swaure vantu.—Titusa 3:1, 2.

7. Magazaro musinke twa hepa kunyokera po?

⁷ Ose kulimburukwa Karunga pokudira kukwatesa ko mbungapolitika ndi vapangeli, nampili magano gawo ga tu retere mauwa. Poyiruwo yimwe, eyi kapisi ureru. Pasihonena, gazara asi vantu kuna kurwanesa epangero eli lina kuretesa po ruhepo rorunene, nampili koNombangi daJehova. Nampili o dire kulipakerera nawo merwaneso olyo, ngo gazara asi varwanesi owo mouhunga nokuhuguvara asi ngayi va tompoka ndi? (Vaefeso 2:2) Nsene kapi tuna hara kulihameka moupolitika, twa hepa kunyokera po malizuvho gokuhama koruha rumwe kupitakana rukwawo. Eyi kuyilikida mweyi atu uyunga neyi atu rugana.

8. Ngapi omu natu ‘rungama’ ndi natu kotoka nye hena tu ‘kuruke’?

⁸ Nkedi zauvali omu natu dira kulihameka moupolitika kuna kara ‘pokurungama ndi kukotoka ngwendi mazoka, nokukuruka ngwendi nonkutji.’ (Resa Mateusa 10:16, 17.) Ose ‘kurungama’ ndi kukotoka apa atu gazara maudigu komeho zosiruwo. Ose ‘kukuruka’ apa atu dili kulihameka moupolitika momaukaro ogo goudigu. Ngesi tatu ka zogera maukaro gamwe ntani neyi natu rugana mokudira kulihameka mo.

9. Ngapi omu twa hepa kutakamesa mononzogera detu?

⁹ Nonzogera. Twa hepa kutakamesa nsene vantu kuna kuzogera youpolitika. Pasihonena, apa atu zogere nomuntu kuhamena Uhompa waKarunga, kapisi tu uyunge asi tuna kwatesa ko ndi kapi tuna kwatesa ko magano gombunga ndi gomupangeli gumwe goupolitika. Mevango lyokuzogera eyi vantu va hara kurugana mokukohonona po maudigu gawo, va likida moBibeli omu Uhompa waKarunga ngau ka wapeka nayinye. Nsene vantu kuna hara kulipatana sirongwa, ngwendi kulikwara mugara nomugara ndi mukadi nomukadi ndi kuligusa ezimo, wa hepa kuvatantera eyi azi uyunga ko Bibeli nomu ono kuyikwama meparu lyoge. Nsene gumwe a uyunga asi noveta dimwe va hepa kudigusa po ndi kudirundurura, kapisi tu mu kwatese ko ndi tu sininike muntu a rundurure magano gendi.

10. Yisinke twa hepa kurugana mokukwaterera koulimburukwi wetu?

¹⁰ Nombudi. Poyiruwo yimwe mbudi kuvhura va zi uyunge monkedi omu nazi kwatesa ko ruha rongandi. Eyi kuhoroka unene po moyirongo omu epangero ali gendesa nombudi. Nsene mbunga ndi vagavimbudi va hama koruha rongandi, twa hepa kutakamesa mokudira  kugazara monkedi omu ava gazara. Pasihonena, lipura asi: ‘Ame kuhafera kupurakena komugavimbudi gongandi morwa kukwatesa eyi a uyunga kuhamena upolitika ndi?’ Mokukuvatera o kwaterere koulimburukwi woge, nyokera po kutarera ndi kuresa nombudi edi da hamena koupolitika. Nye, hetekera ko kugwana nombudi edi da dira kuhamena ko. Ntani nkenye apa hetakanesa eyi ono zuvhu ‘nononkango donongwa edi wa zuvha’ moBibeli.—2 Timoteusa 1:13.

11. Ngapi kuhara emona ayi tura ulimburukwi wetu mosiponga?

¹¹ Kuhara emona. Apa yimaliwa neyi twa weka ayi kara yomulyo po kwetu, ose kuvhura yi tu digopere kulimburukwa. Konyima zomvhura 1970, Nombangi dononzi moMalawi da hepere kusiga nayinye eyi va wekere morwa kunyoka kulipakerera nombungapolitika. Nye vamwe kapi va here kusiga yiweka yawo. Munazinyetukadi gedina Ruth kudiworoka asi: “Vamwe ava twa zire nawo kounkwate konyima va ya lipakererere nombungapolitika ntani nokutengura komambo gawo morwa kapi va here kuparuka eparu lyedigu mokamba zounkwate.” Nye sinzi sovantu vaKarunga kapisi ngoso va kara. Awo kukwaterera koulimburukwi wawo, nampili yi kare asi tava zumbanesa yimaliwa ndi eyi va weka.—Vahebeli 10:34.

12, 13. (a) Ngapi Jehova a tara vantu? (b) Morwasinke natu dilira kulikangangera sirongo setu?

¹² Kulikanganga. Sinzi sovantu kulizuvha mfumwa nokulikangangera rudi ndi muhoko ndi mpo ndi sitata ndi sirongo sawo. Nye Jehova kapi a gazara asi muntu ndi vantu vamwe va pitanakana vakwawo. Kwendi, natuvenye kwa hetakana. Jehova kwa sitire vantu va lisiga-sige, ano ose kuyihafera ntani twa hara malisigo ogo. Age kapi ana hara tu dire kuhafera rudi rwetu. Nye hena kapi ana hara tu gazare asi ose kwa pitakana wopeke.—Varoma 10:12.

¹³ Kapisi tu likangangere sirongo setu ndi muhoko ogu atu gazara asi gwa pita mukwawo. Nsene yimo atu lizuvhu ngoso, kuvhura yi tu digopere kulimburukwa. Eyi yiyo ya horokere Vakriste wokuhova. Vajuda vamwe kapi ngava tekura nawa vafisavayawo woVagereka. (Yirugana 6:1) Ngapi natu yi dimburura nsene asi nkareso zangoso kuna kukura mwetu? Nsene munazinyetu gomuhoko gwapeke a ku pa egano, ove kugenderera kuuyunga asi: ‘Ose kuyirugana monkedi zapeke,’ makura nokunyoka egano olyo ndi? Nsene yimo, diworoka epukururo lyomulyo eli asi: “Omu linunupike, tomu tara vakweneni asi va mu pita mekuto.”—Vafilipi 2:3.

14. Ngapi kukanderera naku tu vatera, ntani sihonena musinke somoBibeli asi yi likida eyi?

¹⁴ Nkedi zautatu omu natu kwaterera koulimburukwi wetu kuna kara pokuhuguvara mwaJehova. Hundira mpepo zokupongoka,  ezi nazi ku pa elididimiko nelipangero. Yikara eyi ngayi ku vatera nsene epangero kuna kurugana yokudira kuhungama. Hundira Jehova unongo o koneke ukaro ou nampo nau ku ninkisa yi ku digopere kukwaterera koulimburukwi. Mu hundira a ku vatere o rugane youhunga moukaro wangoso. (Jakopo 1:5) Kuvhura ngava ku ture modorongo ndi va ku tengeke morwa kulimburukwa Jehova. Nsene yimo, kanderera o kare nouradi yipo o vhure kufatwilira wopeke konda zeyi o dilire kulihameka moupolitika. Ove kuvhura o huguvare asi Jehova nga ku vatera o lididimikire.—Resa Yirugana 4:27-31.

15. Ngapi Bibeli nazi ku vatera o kwaterere koulimburukwi woge? (Tara hena kakende “ Nonkango daKarunga kwa va vaterere va limburukwe.”)

¹⁵ Jehova kwa tu pa Bibeli yipo a tu nkondopeke. Teda ko novelise edi nadi ku vatera o kwaterere koulimburukwi woge. Hetekera ko kulironga novelise nokudidiworoka, morwa ado ngadi ku vatera apa ngo dira kukara noBibeli ezuva limwe. Bibeli kuvhura kunkondopeka ehuguvaro lyoge kweyi ga uyunga Karunga kuhamena meho. Twa hepa ehuguvaro lyangoso yipo tu lididimikire mahepeko. (Varoma 8:25) Horowora novelise edi adi singonona yininke eyi ono hara kukahafera, ntani ligazara nyamoge mouzuni woupe.

16, 17. Yisinke natu lirongera ko koyihonena yovakareli vaKarunga wovalimburukwi? (Tara efano pepenuno 21.)

¹⁶ Nkedi zaune ezi ngazi tu vatera tu dire kulihameka moupolitika kuna kara pokugazara yihonena yovakareli wovalimburukwi vaJehova. Wovanzi kwa kere nouradi ntani kwa tulire po matokoro gomawa aga ga va vaterere va kwaterere koulimburukwi wawo. Gazara Saduraka naMesaka naAbetenego, ava va nyokere kukarera efano eli lya karerere po epangero lyaBabironi. (Resa Ndaniyera 3:16-18.) Sihorokwa esi somoBibeli kuvatera Nombangi dononzi di kare nouradi ntani di nyokere po kukarera erembe lyomosirongo esi  va tunga. Jesus nage kapi ga lihamekere moupolitika ndi monompata edi adi gaununa vantu. Age ga yi divire asi sihonena sendi sosiwa ngasi vatera varongwa vendi. Age kwa tente asi: “Kwateni nomutjima, ame na funda uzuni.”—Johanesa 16:33.

¹⁷ Nombangi dononzi domosiruwo setu kwa kwaterera koulimburukwi. Dimwe kwa di hepeka nokuditura modorongo nokudidipaga morwa kulimburukwa Jehova. Yihonena yawo kuvhura kutuvatera tu kare nouradi. Munazinyetu gumwe gomoTurkia kwa tanta asi: “Franz Reiter kwa kere mudinkantu ogu va pangwilire konomfa morwa kunyoka kulipakerera novakwayita vaHitler. Mbilive ezi ga tjangerere ozina mesiku olyo va mu dipagere kwa likida epuro lyenene nehuguvaro mwaJehova, ano ame nina hara kukwama sihonena sendi nsene ngani ligwanekera neheteko lyangoso.” ^[2]

18, 19. (a) Ngapi womombungakriste nava ku vatera o kwaterere koulimburukwi woge? (b) Yisinke ono tokomene kurugana?

¹⁸ Vanavazinyetu womombungakriste kuvhura va ku vatere o kwaterere koulimburukwi woge. Divisa vakuronambunga nsene kuna kuligwanekera noukaro woudigu. Awo kuvhura ngava ku pe mavyukiso gomawa gomoBibeli. Ntani, nsene vamwe womombungakriste va diva ukaro ou ono kupita, awo ngava vhura kukukorangeda. Va hundira va ku kanderere po. Nye nose twa hepa kukwatesa ko vanavazinyetu nokuvakanderera po. (Mateusa 7:12) Momakanderero goge, tumbura madina govanavazinyetu ava wa diva ndi wa zuvha, ava vana kara modorongo morwa kukwaterera koulimburukwi wawo. Hundira Jehova a va vatere yipo va kare nouradi ntani va twikire kumulimburukwa.—Vaefeso 6:19, 20.

¹⁹ Ngomu uhura una kuhedera pepi, twa hepa kundindira asi mapangero ngaga tu sininika tu hamene koruha rwago. Eyi yiyo ya karera nomulyo kwetu mokuliwapaikira ngesi kukwaterera koulimburukwi mouzuni ou woudona!