Felisa: Ame kwa kulira mepata lyoruhepo moSipanye. Epata lyetu kwa kere Vakatolika, ntani alyo kwa litulire mo unene moukareli. Vamwe vekoro lyange 13 kwa kere varuti ndi ngava rugana kongereka. Sipwa sonane kwa kere muruti ntani mitili posure zaKatolika. Apa ga fire, mupapa John Paul gwauvali kwa mu fumadekere morwa asi mupongoki. Otate kwa kere muhambuli, ano onane ngava rugana momapya. Ose kwa tu retere vanona ntantatu, ame nyame mbeli.

Apa na kere nonomvhura 12, yipo ya tamekere yita moSipanye. Apa ya hege, otate kwa va tulire modorongo morwa epangero kapi lya here magano gawo goupolitika. Oyo kwa ninkisire onane va dire kugwana nondya dokutureresa. Yipo va tumine vamumbya vange vatatu, Araceli naLauri ntani naRamoni kombongi lyovasosta mositata saBilbao. Oko va vhulire kukagwana nondya dokulya.

Araceli: Posiruwo oso ado nomvhura dange 14, Lauri age 12, ano Ramoni 10. Ose kwa rongwere epata lyetu. Kombongi, sirugana setu kwa kere sokuzeresa. Konyima zonomvhura mbali, vasosta kwa tu tumine kombongi zonene zomoZaragoza oku ngava takamesa vakurupe. Twa hepere kurugana unene mokuzeresa kombisa, eyi ngayi tu ninkisa tu roroke unene.

Felisa: Apa va zire vamumbya vange kombongi zomoZaragoza, hekurwange gomuruti nonane kwa tokwere kutuma nge kombongi ozo. Awo kwa here ni likare ure nomumati ogu ga here nge. Ame kwa yi ndindilire nononkondo mokukakara kombongi morwa kwa here Karunga. Ngani zi kongereka  nkenye ezuva, ntani kwa here hena kukara mutumwa ngwendi sipwa sange ogu va tumine koAfrika.

Nye pombongi, kapi na vhulire kurugana nayinye eyi na here. Vasosta kapi va korangedere nge ni ka karera Karunga kosirongo nasopeke ngwendi omu na yi gazarere. Konyima zomvhura zimwe, tani tengura kembo ni ka pakere mbili hekurwange gomuruti. Ngani zeresa embo lyendi nokukanderera kumwe kosiranda nkenye ngurova. Ame kwa here hena kupakera mbili nombya domongereka nokudwareka mafano gaMariya naga govapongoki.

Araceli: Apa na ka kere moZaragoza, ame kwa gene mugano gokuhova mokukara sosta. Vasosta kwa tokwere mokutugaununa novamumbya vange. Yipo va tumine nge kombongi zomoMadrid, ano Lauri zomoValencia. Ramoni kwa kere moZaragoza. MoMadrid, ame kwa ka gene mugano gwange gwauvali gokukara sosta. Wovanzi ngava wiza va ya kare pombongi, ngwendi vanasure novakurupe. Eyi kwa vhukisire yirugana yetu. Ame ngani rugana mosipangero sopombongi.

Ame kwa yi ndindilire nononkondo mokukara sosta. Ame kwa gazarere asi ngatu ruganesa siruwo sosinzi mokuresa Bibeli nokuzilironga. Nye kapisi yimo ya horokere. Kwato ogu nga ruganesa Bibeli ndi a uyunge kuhamena Karunga ndi Jesus. Na lirongere Ruratina rongandi neparu lyovapongoki Vakatolika, nokukarera Mariya. Nye siruwo nasinye ngatu rugana unene.

Yipo na tamekere kudompa mutjima nokukara nosinka. Ngani lizuvhu asi na hepere kugwana yimaliwa yipo ni vatere epata lyetu mevango lyokungawopeka tupu wopeke. Makura tani uyunga nomukondi govasosta kuhamena yuma oyo nokumutantera asi nina hara kutengura kembo. Nye age ta paterere nge monzugo. Age kwa gazarere asi nampo na yi ninkisa nge ni kare.

Vasosta tava pwagesa nge mo monzugo, nye apa va mwene asi simpe hana karera negano lyokutengura, tava rugwidire nge mo hena. Konyima zokuyirugana nge rutatu, tava tanta asi kuvhura o tengure nsene no tjanga nonkango edi asi: “Ame kuna hara kutengura morwa na hara kukarera Satana mevango lyokukarera Karunga.” Ayo kwa tetukisire nge. Ame kwa here kutunda ko, nye kapi na here kutjanga nonkango odo. Moruhura, tani tanta asi nina hara kuuyunga namuruti, makura tani ka mu tantera eyi ya horokere. Muruti kwa gwene epulisiro kwamubisofi mokutuma nge ni tengure kombongi zomoZaragoza. Konyima zomakwedi gongandi, tava pulisire nge ni ze kembo. Kapi pwa pitire siruwo, Lauri naRamoni nawo tava tengura kembo.

Felisa: Konyima, tani ya kwara nokukatunga momukunda gwaCantabria moSipanye. Simpe ngani  zi kongereka. Sondaha zimwe mongereka, muruti kwa zigilire nehandu asi: “Tareni ezi buke!” Age kwa tu likidire buke The Truth That Leads to Eternal Life. Makura ta tanta asi: “Nsene kwa ku pa buke ezi, zi pa nge ndi ka zi zugume!”

Kapi na kere nobuke ozo, nye na zi here. Konyima zomazuva gongandi, vakadi vavali kwa wizire pembo lyange. Awo kwa kere Nombangi daJehova, makura tava pe nge buke ozo. Ame kwa zi resere masiku googo. Apa va ka tengwilire ko hena, tava pura nge nsene nina hara kulironga Bibeli, makura tani tanta asi nhi.

Ame kwa here kuhafesa Karunga. Makura tani lirongo usili kuhamena Jehova, yipo na tamekere kumuhara unene. Ame kwa here kutantera ko nkenye ogu kumuhamena. Mo-1973, tani gwana ekuho. Ngani hetekere ko kutantera epata lyetu kuhamena usili. Nye epata lyetu, unene po mumbyange Araceli nga uyunga asi eyi na pura epuko.

Araceli: Ame kapi ngani hafere ukarelikarunga, morwa ngava tekura nge momudona pombongi. Nye nkenye Sondaha ngani zi kongereka, ntani ngani kanderere kosiranda. Ame kwa here kukwata egano Bibeli, makura tani hundire Karunga a vatere nge. Makura Felisa ta tantere nge eyi ga lirongere. Age kwa haferere epuliro lyendi dogoro tani gazarere mo asi ana zaruka. Kapi na kwatesere ko eyi ga uyungire.

Tani tengura koMadrid ni ka rugane makura konyima tani ya kwara. Mwaza nomvhura, naya yi dimbwilire asi vantu ava ava zi kongereka kapi ava paruka kuliza nomarongo gaJesus. Yipo na hagekere kuza kongereka. Kapi hena na pulire movapongoki ndi momundiro gwanarunye ntani asi muruti kuvhura kugusira po vantu nonzo. Ame na ya zugumine mafano nagenye goukarelikarunga. Kapi na divire nsene eyi na rugene uhunga. Ame kwa dompere mutjima, nye na twikilire kukanderera kwaKarunga asi: “Na hara ni ku dive. Vatera nge!” Nombangi daJehova ngadi ngongora kevero lyange yikando yoyinzi, nye kapi ngani pwaga ko. Kapi na huguvarere mwankenye ukarelikarunga.

Mumbyange Lauri kwa tungire moFransa, ano Ramoni moSipanye. Koyiha yomvhura 1980, awo kwa tamekere kulironga Bibeli noNombangi  daJehova. Ame kwa gazarere asi awo kuna kulironga yimpempa ngwendi Felisa. Konyima, tani ya gwana Angelines gumwe govamusinda vange nokuyakara vakaume. Nage kwa kere gumwe goNombangi daJehova. Angelines namugara gwendi kwa pulire nge yikando yoyinzi nsene kuvhura ni lironge Bibeli nawo. Awo kwa yi dimbwilire asi nampili ngomu na dilire kukara nosinka kuhamena maukarelikarunga, ame na here kudiva Bibeli. Konyima tani va tantere asi: “Nawa tupu. Nye ngani lironga tupu none nsene ngani ruganesa Bibeli zanyamwange!” Ame kwa kere noBibeli zoRunácar-Colunga.

Felisa: Apa na gwene ekuho mo-1973 moSantander, nkurusitata zaCantabria kwa kere mo tupu Nombangi dokusika 70. Ose ngatu gendi sinano sosire tu ka zuvhisire konomukunda domonkurusitata oso. Ose ngatu ruganesa matuwa mokuza konomukunda.

Mwaza nomvhura, ame kwa tamekere kuronga vantu wovanzi Bibeli, ano 11 kwa gwene ekuho. Wovanzi owo na rongere Bibeli kwa kere Vakatolika. Na hepere kulididimikira. Ngwendi nyame, nawo va hepere siruwo sokudimburura asi eyi va pura epuko. Ame na divire asi Bibeli nompepo zokupongoka zaJehova yiyo yelike yokuvhura kuvatera muntu a rundurure magazaro gendi ntani a kwate egano usili. (Vahebeli 4:12) Mugara gwange, Bienvenido, ogu ga kere muporosi, kwa gwene ekuho mo-1979, ntani onane va ya tamekere kulironga Bibeli komeho va fe.

Araceli: Apa na tamekere kulironga Bibeli noNombangi daJehova, kapi na va huguvarere. Nye mwaza siruwo, kapi na lizuvhire hena ngoso. Nombangi kapi ava rongo tupu Bibeli nye hena kulimburukwa komarongo gazo. Epuro lyange mwaJehova nomoBibeli kwa tamekere kunkondopara, makura tani hafa unene. Vamusinda vamwe va ya dimbwilire marunduruko ogo nokutantera nge asi: “Araceli, twikira kukara ngorooro!”

Ame kudiworoka apa na kandererere asi: “Mpandu Jehova kweyi wa dira kusiga nge ntani kweyi wa pa nge nompito dononzi ni gwane ediwo lyousili lyomoBibeli eli ngani papara.” Na hundilire hena egusiropo kwaFelisa kweyi na mu uyungilire nonkango dokukoresa. Kutunda opo, mevango lyokulitangwisa, ose ngatu hafere kuuyunga kuhamena Bibeli. Ame kwa gwene ekuho nonomvhura 61 momvhura 1989.

Felisa: Ngesi nomvhura dange 91. Mugara gwange ga fa, kapi hena ani vhuru kurugana ngwendi pwanare. Nye simpe kuresa Bibeli nkenye ezuva nokuza komapongo nomokuzuvhisa apa ayi vhulika nge.

Araceli: Ame kwa hara kuzogera novaruti novasosta ava ani gwana kuhamena Jehova, nampo yeeyi na kere sosta. Ame kuhafera nonzogera odo ntani vamwe vawo kugusa nobuke noyimbapiratjangwa. Ame simpe kudiworoka muruti gumwe. Konyima zokuzogera nage yikando yongandi, age ga tambwire eyi ngani uyunga. Makura ta tantere nge asi: “Nye kupi ngani za noukurupe wange? Yisinke ngava gazara womongereka zetu ntani neyi ngava uyunga vekoro lyange?” Tani mu limburura asi: “Age Karunga yisinke nga uyunga?” Age ga yi dimbwilire asi ame mouhunga na kere ntani na mwene asi age ana guwu. Nye kapi ga kere nouradi wokutambura usili.

Kapi ngani divara ezuva eli ga tanterere nge mugara gwange asi ana hara kuza kepongo kumwe name. Apa ga zire sikando sendi sokuhova kepongo age kwa kere nonomvhura dokupitakana 80, kutunda opo ngazi komapongo nagenye. Age kwa ya lirongere Bibeli nokutameka kuzuvhisa. Ame kuhafa pokudiworoka omu ngatu rugana kumwe mokuzuvhisa. Age kwa fire, ago makwedi gavali ko a gwane ekuho.

Felisa: Apa na tamekere kukarera Jehova, vamumbya vange vatatu ngava rwanesa nge. Nye konyima, nawo va ya tambwire usili. Aso kuna kara sininke simwe sosiwa esi sa horokera nge. Konyima zoyo, ose ngatu hafere kukara kumwe nokuzogera kuhamena Karunga gwetu geharo, Jehova, noNonkango dendi! Natuvenye kwa ya karera Jehova. *