1. Ngapi Jehova ngoMuhongi ga pitakana vantu?

MWAMANGUNDU 2010, sipako serova sokoTjina kwa ka si rende moIngiranda koyimaliwa yokupitakana N$ 1 000 000 000. Muhongi kuvhura kuhonga erova li kare sipako sosiwa sondiro. Jehova ngoMuhongi ga pitakana vantu morwa Bibeli kwa tanta asi age kwa ‘gusire evhu’ a li unge muntu gokusikilira mo. (Genesis 2:7) Muntu ogo yige “Adamu zaKarunga,” ndi munwaKarunga. Age kwa mu ungire a vhure kuhonena yikara yaKarunga.—Rukasa 3:38.

2, 3. Ngapi natu honena Vaisraeli ava va litezwilire?

² Apa Adamu ga dilire kulimburukwa koMusiti, kapi hena ga kere munwaKarunga. Nye sinzi sovana vaAdamu kwa ya horowora Jehova a kare Mupangeli gwawo. (Vahebeli 12:1) Pokulimburukwa koMusiti gwawo, awo kulikida asi vana hara Karunga a kare Guhyawo ntani Muhongi gwawo nye kapisi Satana. (Johanesa 8: 44) Ulimburukwi  wawo kutudiworokesa eyi va uyungire Vaisraeli ava va litezwilire asi: “Ove nyove guhyetu, HOMPA. Ose kwa fana ngwendi erova, ove ngwendi muhongi. Ove nyove wa tu unga.”—Jesaya 64:8.

³ Mokulifana, naina vakareli wousili vaJehova nawo kuhetekera ko kulinunupika nokulimburukwa. Awo kulizuvha mfumwa pokutumbura Jehova ngaGuhyawo ntani awo kwa hara a va honge. Ose kwa kara ngwendi erova lyoureru eli na vhura kuhonga Karunga mosipako sosiwa ndi? Ose kumona vanavazinyetu asi nawo Karunga simpe kuna kuvahonga ndi? Mokukara nonkareso zongwa, tatu ka konakona omu Jehova a horowora ava ana hara kuhonga neyi a va hongere ntani nomu a va hongo.

4. Ngapi omu Jehova a horowora ava a kokere kwendi? Gava yihonena.

⁴ Jehova kapi a tara vantu ngwendi moomu atu va tara. Age kumona eyi ya kara momutjima. (Resa 1 Samwere 16:7b.) Jehova kwa yi likidire eyi apa ga tulisire po mbungakriste. Age kwa kokere vantu wokumoneka ngwendi kwato mulyo. (Johanesa 6:44) Pasihonena, Sauru kwa kere Mufalisayi ogu nga ‘uyunga momudona nokuhepeka nokuswaura’ varongwa vaJesus. (1 Timoteusa 1:13) Nye Jehova kwa konakonene mutjima gwaSauru ta ya dimburura asi age kwa fene ngwendi erova lyomulyo. (Yisewe 17:3) Age kwa horowere Sauru a mu honge a kare “siruganeso” sendi yipo a zuvhisire ‘vapagani novahompa nomuhoko gwaIsraeli.’ (Yirugana 9:15) Jehova kwa horowere vamwe ava va kere nonkorwe novanaruhonda novawidi a va honge va kare yipako ‘yefumano.’ (Varoma 9:21; 1 Vakolinte 6:9-11) Apa va lirongere Matjangwa awo kwa nkondopekere epuro lyawo mwaJehova nokumupulisira a va honge.

5, 6. Pokudiva asi Jehova ga diva kuhorowora vantu wonomutjima donongwa, ngapi natu tekura (a) ava atu zuvhisire? (b) ntani vanavazinyetu?

⁵ Ose twa diva asi Jehova ga diva kuhorowora vantu wonomutjima donongwa. Yipo nye kapisi tu pangure vantu ava atu zuvhisire ndi womombungakriste. Tu tareni sihonena saMichael ogu nga tekura momudona Nombangi daJehova edi ngadi mu zuvhisire. Age kwa tanta asi: “Apa ngava wizire nge kapi ngani va pakere mbili. Ngani va kehagura. Konyima tani ya mono epata limwe eli lya hafesere nge morwa nkareso zawo zongwa. Na ya tetukire apa na ya zuvhire asi awo Nombangi daJehova. Nkareso zawo kwa tumangedere nge ni tede ko eyi na nyengerere Nombangi. Tani ya  dimburura asi nani mauyungo govantu yigo ga ninkisire nge ni va tekure momudona.” Michael kwa here kudiva ko yoyinzi makura ta tameke kulironga Bibeli. Konyima ta ya gwana ekuho ntani ta ya kara muzuvhisi gosiruwo nasinye.

⁶ Nsene tu diva asi Jehova kuna kutuhonga, ngatu tekura nawa vanavazinyetu. Ntani ngatu va tara asi nawo Jehova kuna kuvahonga. Age kutara eyi ya kara konomutjima dawo ntani ga diva asi kapi va sikilira mo. Ntani age ga diva asi kuvhura va ture po marunduruko. (Episarome 130:3) Ose kuvhura kuhonena Jehova nsene tu mona yikara yoyiwa movanavazinyetu. Kuvhura tu ruganene kumwe noMuhongi gwetu Jehova mokuvatera vanavazinyetu va ture po marunduruko. (1 Vatesaronika 5:14, 15) Vakuronambunga va hepa kutura po sihonena sosiwa mokuvatera vanavazinyetu.—Vaefeso 4:8, 11-13.

7. Morwasinke Jehova a tu piswire?

⁷ Vantu vamwe kuuyunga asi: ‘Apa na kere munona kapi na kwete egano eyi vakurona vange ngava piswire nge dogoro paapa na ya reta vana vanyaamwange.’ Nsene o mukondi, kuvhura o kwate egano asi episuro kulikida asi kwa ku hara. (Resa Vahebeli 12:5, 6, 11.) Jehova kwa tu hara ngovana vendi, eyi yiyo a tu piswire ndi a tu hongere. Age kuna hara tu hafe nokukara nounongo nokumuhara ngaGuhyetu. (Yisewe 23:15) Age kapi ana tu harere tu hepe ntani tu fe twa hana kulitezurura.—Vaefeso 2:2, 3.

8, 9. Ngapi Jehova ana kutuhonga, ntani ngapi nga ka yi rugana komeho?

⁸ Komeho tu ya lironge kuhamena Jehova, nampo twa kere nonkareso zondona. Nye Jehova ga tu honga nokutuvatera tu ture po marunduruko, ano ngesi tuna kara nonkareso zongwa. (Jesaya 11:6-8; Vakorosi 3:9, 10) Ntani twa gwana mbili ezi Jehova a pe vantu vendi. Morwa mbili ozo, ose kugwana egameno mouzuni ou woudona. Nampo ose kwa kulilire momapata omu va dilire kututekura nawa, nye ngesi kuna kulimonena eharo lyosili nombili movanavazinyetu. (Johanesa 13:35) Ngesi nose twa ya lironga kuhara vakwetetu. Nye unene po, twa ya diva Jehova nokumuhara.—Jakopo 4:8.

⁹ Moparadisa ose ngatu kara mombili. Ntani ngatu ka hafera eparu moUhompa waKarunga. Jehova nga ka tu honga nokukaturonga momunene. (Jesaya 11:9) Ntani Jehova nga ka tu pa marutu gokusikilira mo. Morwa oyo, ose ngatu  ka vhura kukakwata egano nokulimburukwa nomutjima nagunye mapukururo gendi. Yipo nye tu pulisireni Jehova a tu honge nokutambura mapukururo gendi morwa ga tu hara.—Yisewe 3:11, 12.

10. Ngapi Jesus ga honenene Jehova ngomuhongi?

¹⁰ Ngwendi moomu muhongi ga diva nawa erova eli a hongo, Jehova ngoMuhogi nage ga tu diva nawa. Age ga diva maupirankondo getu nomarunduruko aga twa tura po ntani age kutuhonga kuliza noukaro wetu. (Resa Episarome 103:10-14.) Ose kuvhura tu dive omu a tu tara Jehova pokukonakona omu Jesus ga tekwire vapositoli vendi apa ngava tura mapuko. Poyiruwo yimwe awo ngava litatana asi yilye munene po mokatji kawo. Ngano yipo wa kere, ngapi ngano wa tere vapositoli vena? Nampo ngano wa va hetakanesere kerova lyedona. Nye Jesus ga divire asi kuvhura kuvahonga nsene va tambura mapukururo gendi ntani nsene va linunupika ngwendi yige. (Marukusa 9:33-37; 10:37, 41-45; Rukasa 22:24-27) Konyima zevhumbuko lyaJesus, vapositoli kwa va poomwene mpepo zaKarunga makura tava sigi nkareso zokulitatana asi yilye munene po mokatji kawo. Awo kwa litulire mo mosirugana esi ga va sigilire Jesus.—Yirugana 5:42.

11. Ngapi Ndafita ga fene ngwendi erova lyewa, ntani ngapi natu mu honena?

¹¹ Jehova kutuhonga kupitira moBibeli nomompepo zendi zokupongoka ntani mombungakriste. Ngapi nazi tu honga Bibeli? Twa hepa kuresa mo nokugazadara ko kweyi tuna kuresa ntani kuhundira Jehova a tu vatere tu sikise mo eyi tuna lirongo. Hompa Ndafita kwa tjenge asi: “Apa ngani rara pouro wange kukudiworoka; masiku nagenye kukugazara.” (Episarome 63:6) Age kwa tjenge hena asi: “Tani pandura HOMPA ogu a rongo nge nondunge nomomasiku ezwi lyange lyokomutjima kurondora nge.” (Episarome 16:7) Ndafita kwa gazadarere ko komapukururo gaJehova ntani kwa ga tambwire nampili ngomu ya kere udigu. (2 Samwere 12:1-13) Ndafita ga tulire po sihonena sokulinunupika nokukara noulimburukwi. Yipo nye lipura asi: ‘Apa ani resa Bibeli, ame kugazadara ko kweyi ani resa nokutambura mapukururo gaKarunga ndi? Ndi simpe na hepa kutura po marunduruko?’—Episarome 1:2, 3.

12, 13. Ngapi Jehova a tu hongo kupitira mompepo zokupongoka ntani mombungakriste?

¹² Mpepo zokupongoka nazo kuvhura kutuhonga. Pasihonena, azo kuvhura kutuvatera tu honene nkareso zaJesus ntani nokulikida yiyimwa yompepo. (Vagarata 5:22, 23) Simwe soyiyimwa kuna kara eharo. Ose kwa hara Karunga nokuhara kumulimburukwa ntani ose kumupulisira a tu honge morwa twa diva asi yipango yendi kuturetera uwa. Mpepo zokupongoka kutupa hena nonkondo tu dire kupulisira uzuni ou woudona u tu honge. (Vaefeso 2:2) Apa mupositoli Paurusa ga kere mudinkantu nga honene nkareso zokulinenepeka zovampitisili womaukareli goVajuda. Nye mpepo zokupongoka  kwa mu vaterere a sige nkareso ozo. Age kwa tjenge asi: “Ame kuvhura nayinye nononkondo dogu a pameke nge.” (Vafilipi 4:13) Nose twa hepa kuhundira Jehova a tu pe ko mpepo zendi zokupongoka, age nga limburura makanderero getu gokutunda komutjima.—Episarome 10:17.

¹³ Jehova kutuhonga hena kupitira mombungakriste novakuronambunga. Pasihonena, nsene vakuronambunga va dimburura asi tuna kara noudigu wongandi, awo ngava tu vatera. Nye awo kapi ngava tu pa mapukururo gavene. (Vagarata 6:1) Nye awo kuhundira Jehova a va pe ko unongo. Ntani awo kukonakona Bibeli noyimbapiratjangwa yetu va gwane ko mauzera aga naga vhura kutuvatera. Nsene vakuronambunga tava kupukurura nampo kuhamena omu ono dwara, diva asi Karunga kwa ku hara. Nsene o ga tambura, ove ngo fana ngwendi erova lyewa eli Jehova nga vhura kuhonga ntani ngo gwanena mo uwa.

14. Yisinke a dili kurugana Jehova apa a hongo vantu?

¹⁴ Nsene tu diva omu Jehova a tu hongo, ngayi tu vatera tu tekure nawa vanavazinyetu. Ntani kapi ngatu pangura ava atu zuvhisire kukwatera mo varongwa vetu woBibeli. Posiruwo sanare, muhongi komeho a ka honge erova ga hepere kulizeresa nokugusa mo mamanya. Muhongi gwetu gomunene Jehova kuvatera vantu ava vana hara kuvahonga. Age kapi a sininike vantu va ture po marunduruko, nye age kuvaronga nompango dendi. Makura vene yiwo nava tokora nsene vana hara kutura po marunduruko.

15, 16. Yisinke ga hepa kurugana murongwa goBibeli mokulikida asi ana hara Jehova a mu honge? Gava sihonena.

 ¹⁵ Tu konakoneni sihonena saTessie gomoAustralia. Age ga kwete egano eyi nga lirongo moBibeli. Nye kapi ga tulire po marunduruko ntani kapi nga zi komapongo. Munazinyetukadi ogu nga lirongo nage Bibeli ta kanderere kwaJehova nokutokora kuhageka kulironga nage. Nye apa ga zire kwendi, Tessie ta tumbura konda zeyi ga dilire kutura po marunduruko. Age nga lizuvhu unzoni morwa nga rugana yininke eyi ga divire asi Karunga kapi a yi hafere. Makura ta tokora kuhageka kurugana yininke oyo.

¹⁶ Tessie ta ya tameke kuza komapongo nokutunga po yikara yoSikriste nampili ngomu ngava mu sindagura vakwawo vanare. Konyima ta ya gwana ekuho ntani ta ya kara muzuvhisi gokukarerera nampili ngomu ga kere novana. Sihorokwa esi kulikida asi nsene murongwa goBibeli a tameka kutura po marunduruko, Karunga nga hedera pepi nendi ntani nga mu honga a kare sipako sefumano.

17. (a) Morwasinke ono harere Jehova a ku honge? (b) Mapuro musinke ngatu ka zogera mosirongwa sokukwama ko?

¹⁷ Naina vahongi kuruganesa nawa erova va honge yipako yoyiwa. Mokulifana, Jehova nage kuna kuruganesa nawa mapukururo gendi a tu honge nokutunomena nawa a tare nsene kuna kugakwama. (Resa Episarome 32:8.) Wa yi diva asi Jehova ga ku hara ndi? Wa yi diva asi Jehova kuna kukuhonga ndi? Nsene asi yimo, nkareso musinke nazi ku vatera o kare erova lyewa eli na vhura kuhonga Jehova? Nkareso musinke no nyokera po o dire kukara erova lyedona lyoudigu kuhonga? Ntani ngapi vakurona nava ruganena kumwe naJehova va honge vana vawo? Ngatu ka gwana malimbururo mosirongwa sokukwama ko.