Haykanush, muzuvhisi gokudira kugwana ekuho gomosirongo saArmenia, kwa torere pasipoti pepi nembo lyawo. Amo kwa kere mo yikarata yokombanga noyimaliwa yoyinzi. Makura ta tantere ko mugara gwendi ogu ga kere nage muzuvhisi gokudira kugwana ekuho.

Valikwali owo kwa kere nomakongo gomanzi. Nye tava tokora kutengwida yimaliwa kwamwenyayo. Mugara ogu ga yi zumbanesere kwa mu tetukisire kumwe nepata lyendi. Haykanush namugara gwendi tava fatwilire epata olyo asi awo kuna hungike morwa kuna kulironga Bibeli. Makura ta va ruganesa mpito ozo mokuzogera nepata olyo kuhamena Nombangi daJehova nokuvapa ko yimbapiratjangwa.

Epata olyo kwa here kupa Haykanush yimaliwa mokulikida rupandu, nye age ta nyoka. Ezuva lyokukwama ko mukadi gepata olyo yipo ga katukire a ze kembo lyaHaykanush a ka gave simpe rupandu. Age kwa kondjesere Haykanush a tambure linga zodiamande.

Vantu wovanzi kuvhura zi va tetukise nkareso zokuhungika ezi ga likidire Haykanush namugara gwendi. Nye ngapi Jehova ga tere nkareso zawo zokuhungika? Za mu tetukisire ndi? Azo za kere nomulyo kwendi ndi?

Malimbururo komapuro ogo kapisi udigu. Morwasinke? Vakareli vaJehova Karunga va yi diva asi kuhonena yikara yendi mulyo unene kupitakana nodiamande nongorodo ndi yiweka. Eyi a tara Jehova asi mulyo ya lisiga neyi ava tara vantu asi mulyo. (Jesaya 55:8, 9) Vakareli vaJehova va yi diva asi elituromo lyawo lyokuhonena yikara yendi mulyo unene.

Bibeli nazo za uyunga asi mulyo kukara nounongo nonondunge. Yisewe 3:13-15 kwa tanta asi: “Gerago mugara ogu a kara munongo ogu a pongaike nondunge. Amo kwa kara mo mulyo gomunene kupitakana gosisiliveli; kudigwana ove kwa pitakana ngorodo. Unongo mulyo gwawo gwa pitakana unene mamanya gondiro; kutupu eyi wa hara yokuvhura kuheteka po.” Unongo nonondunge kuna kara yikara yomulyo unene kwaJehova kupitakana ungawo.

Ngapi kuhamena kuhungika?

Jehova kuhungika, age kapi a ‘tanta yimpempa.’ (Titusa 1:2) Age kwa gendesere mupositoli Paurusa a tjangere Vakriste woVahebeli asi: “Omu tu kandererere, yeeyi ose tuna yi diva nawa-nawa asi, ose kwa kara nezwi lyaKarunga lyewa lyokomutjima, morwa ose kwa hara kuhungika mwanayinye.”—Vahebeli 13:18.

Jesus Kristusa kwa tulire po sihonena sosiwa sokuhungika. Apa Kayifasa mupristeli gomunene ga mu tanterere asi: “Ame tani ku ganesa kwaKarunga gomunamwenyo, o tu tantere asi, nyove Mesiyasa, MunwaKarunga, ndi?” Jesus kwa uyungire usili asi yige Mesiyasa. Age ga tente usili nampili ngomu ga divire asi kuvhura va mu rundire nokumutomena nomfa.—Mateusa 26:63-67.

Ngapi kuhamena ose? Yisinke natu vhura kurugana nsene tuna kara moukaro ou nau vhura kutuninkisa tu kumbagere yipo tu gwanene mo uwa?

Pomazuva aga gopouhura udigu kuhungika morwa ‘vantu kwa lihara tupu vene, nokudowokera yimaliwa.’ (2 Timoteusa 3:2) Sinzi sovantu nsene kapi vana kara noyimaliwa ndi kapi vana kugwana yirugana awo kuvaka nokukumbagera. Nkareso zangoso kuna lihana naina makura kuna kuninkisa vantu wovanzi va gazare asi mokugwana yininke va hepa kukumbagera. Nampili Vakriste vamwe kwa tura po matokoro gomadona morwa ‘kudowokera emona’ ano oyo kwa va ninkisa va kare nedina lyedona mombungakriste.—1 Timoteusa 3:8; Titusa 1:7.

Nye Vakriste wovanzi kuhonena Jesus. Awo va yi dimburura asi kukara noyikara ngwendi yaKarunga mulyo unene kupitakana ungawo ndi mauwa. Eyi yiyo vadinkantu woVakriste ava dili kukumbagera kosure yipo va pite. (Yisewe 20:23) Kapi yina kutanta asi nkenye apa nsene tu  hungika tatu gwana yuma ngwendi Haykanush. Nampili ngoso, Karunga simpe ana hara tu hungike morwa tatu kara nezwi lyewa lyokomutjima. Oyo yiyo ya kara nomulyo.

Gagik nage yimo ya mu horokerere ngoso. Age kwa tanta asi: “Komeho ni ya kare Mukriste, ame ngani rugana kokampani zonene, ano mwenyazo kapi ga here asi tu fute mutero. Ngomugendesi age kwa here asi ni lizuvhe nogu nga rugana kweyi yomutero pokumufuta yipo a dire kutufutisa mutero gomunzi. Makura tani ya kara nonkareso zokukumbagera. Apa na ya lirongere Bibeli, tani ya hageke yirugana oyo nampili ngomu posa ozo ngava futu nge yoyinzi. Makura tani ya tameke nongesefa zanyamwange. Apa na zi patwilire tani zi tjangesa paveta nokufuta mutero ogu gwa hamenene mo.”—2 Vakolinte 8:21.

Gagik kwa tanta asi: “Mongesefa zange kapi ngani gwana mo yimaliwa yoyinzi yokuvhura kureresa ko nawa epata lyange. Nampili ngoso ame nina hafa ntani na kara nezwi lyewa lyokomutjima kosipara saJehova. Na tura po sihonena sosiwa kovana vange vavali ntani na kara noyitumbukira mombungakriste. Vanangesefa vakwetu ntani womutero ngesi va diva nge asi ame muntu gokuhungika.”

Jehova kwa hara owo ava mu fumadeke pokuhonena yikara yendi kukwatera mo kuhungika. (Titusa 2:10) Nsene tu yi rugana, age nga tu vatera. Age kwa gendesere hompa Ndafita a uyunge asi: “Ntaantani nina kurupa, na kere ni mumati, nye simpe kapi na mona rumwe muhungami asi va mu zumbe, ndi asi vana vendi va hehere nondya.”—Episarome 37:25.

Rutu gomulimburukwi ga limonene usili wononkango odo. Age kapi ga sigilire ongumweyi zendi Naomi nampili ngomu va kurupire. Age kwa zire koIsraeli a ka karere Karunga gosili. (Rutu 1:16, 17) Age nga hungike nokurugana unene mokupupura nombuto kuliza noVeta ezi ga tulire po Jehova kovahepwe. Mokulifana neyi ya horokerere Ndafita, Jehova kapi ga sigilire Rutu naNaomi. (Rutu 2:2-18) Age kapi tupu ga pere Rutu eyi ga hepere. Nye ga mu horowere a kare gumwe gemezimo lyahompa Ndafita omu ga ya tundilire Mesiyasa.—Rutu 4:13-17; Mateusa 1:5, 16.

Vakareli vamwe vaJehova kapi ava gwana yimaliwa yokugwanena po va sikise mo yihepwa yawo. Mevango lyokuvaka ndi va kumbagere awo kurugana unene. Pokurugana ngoso awo kuhonena yikara yaKarunga kukwatera mo kuhungika. Yikara oyo mulyo unene kupitakana ungawo.—Yisewe 12:24; Vaefeso 4:28.

Ngwendi Rutu, sinzi soVakriste kwa tura epuro mwaJehova asi ngava vatera. Awo va tura ehuguvaro lyenene mononkango dendi edi asi: “Ame kapi ngani ku zumba ndi ni ku sige.” (Vahebeli 13:5) Jehova ga yi likida asi age kuvatera owo ava hungike nkenye apa. Ntani age kusikisa mo etumbwidiro lyendi pokupa vakareli vendi yininke eyi va hepa.—Mateusa 6:33.

Vantu kutara nodiamande noungawo asi mulyo. Nye kuhungika ntani noyikara yimwe yoyiwa mulyo unene kwaGuhyetu gemeguru kupitakana mamanya gondiro.