Eli ekwatogano lyepe. Morwasinke lina karere hepero?

Nomvhura 607 komeho Jesus a wize pevhu, Jehova kwa geve emoneko kwaHesekiyeli lyokumulikida eyi ya horokere moJerusarema komeho va ya zi zonagure po. Memoneko olyo, Hesekiyeli kwa mwene yininke yoyinzi yoyidona yina kuhoroka mo. Makura ta mono vagara vatano-nagumwe nkenye ogu kuna simbi “sirwiso.” Ntani hena pwa kere hena mugara ogu ga dwere “yikoverero yolina,” age kwa simbire “yuma yokutjangesa.” (Hesekiyeli 8:6-12; 9:2, 3) Mugara ogo kwa mu tanterere a ze mositata nasinye “a ka ture yidiviso poyipara yanavenye ava vana kara neguwo noudigu wombinga zoyihuna eyi ava rugana mositata.” Makura vagara vatano-nagumwe ava va simbire yirwiso, kwa va tanterere va ka dipage vantu navenye womositata ava va dilire kukara noyidiviso. (Hesekiyeli 9:4-7) Yisinke natu lirongera ko kemoneko eli ntani yilye mugara goyuma yokutjangesa?

Hesekiyeli kwa mwene emoneko olyo nomvhura 612 komeho Jesus a wize pevhu. Uporofete ou kwa sikilire mo konyima zonomvhura ntano apa Jehova ga pulisilire vakwayita woVababironi va zonagure Jerusarema. Jehova kwa ruganesere Vababironi a tengeke vantu wokudira  kulimburukwa. (Jeremiya 25:9, 15-18) Nye ngapi kuhamena Vajuda ava va dilire kukwatesa ko yirugana yoyidona eyi ya horokere moJerusarema? Jehova ga va poperere.

Memoneko, Hesekiyeli kapi ga tulire yidiviso nkenye ogu ndi a lihameke mo mokuzonagura sitata sina. Nye vaengeli yiwo va pitisilire ezonauko lyaJerusarema. Uporofete owo kutulikida eyi ya horokere meguru. Jehova kwa tanterere vaengeli va ya zonagure vantu wovadona nokupopera vantu wovalimburukwi. *

Uporofete owo ngau ka sikilira mo hena komeho. Pwanare ose kwa gazarere asi mugara goyuma yokutjangesa kwa fanekesa vagwavekwa ava simpe vana kuparuka pevhu. Ntani kwa gazarere hena asi vantu kugwana sidiviso separuro apa ava tambura mbudi zongwa ezi atu va zuvhisire. Nye ngesi pana kara marunduruko mekwatogano lyetu kuhamena uporofete ou. Ose twa lironga mwaMateusa 25:31-33 asi Jesus yige nga pangura vantu. Age nga ka yirugana poudigu wounene. Posiruwo oso, ava nga ka hangwira kononzwi ngava ka paruka, ano wokoyikombo ngava ka va zonagura po.

Yisinke natu lirongera ko kemoneko lyaHesekiyeli? Tatu lirongere ko yitwa yitano:

1. Awo kwa kere ngwendi vanomeni . Naina, Jehova kuruganesa kambungagona kovagwavekwa va ronge vantu vendi ntani nokurondora wopeke komeho u wize udigu wounene. Vantu vaKarunga, kukwatera mo vagwavekwa, kuna kulihameka mo mokurondora vantu.—Mateusa 24:45-47.

2. Naina, vantu vaKarunga nawo kapi ava tura vantu yidiviso. Awo kuzuvhisa tupu nokurondora kuhamena eyi ngayi horoka komeho. Sirugana sokuzuvhisa kusisikisa mo nevatero lyovaengeli.—Ehororo 14:6.

3. Mokulifana, ava ngava parura komeho kapi ngava kara noyidiviso yokumoneka poyipara yawo. Yisinke nava rugana vantu mokukaparuka udigu wounene? Apa ava zuvhu erondoro, va hepa kulironga kuhonena Jesus nokuligava kwaKarunga ntani kukwatesa ko vamumbya vaKristusa mokuzuvhisa mbudi zongwa. (Mateusa 25:35-40) Poudigu wounene awo ngava va tura sidiviso, kutanta asi awo ngava va parura.

4. Poudigu wounene, Jesus nga tura emukurumbunga yidiviso apa nga va pangwira kononzwi. Makura awo ngava ka gwana mpito zokukaparuka narunye pevhu.—Mateusa 25:34, 46. *

5. Awo ntaantani ngava ya zonagure po vantu wovadona.—Hesekiyeli 10:2, 6, 7; Ehororo 19:11-21.

Eyi tuna lirongere ko kemoneko olyo kutuvatera tu dive asi apa Jehova nga zonagura po vantu wovadona, wovawa nga va popera. (2 Peturusa 2:9; 3:9) Ntani kutudiworokesa mulyo gokuzuvhisa naina. Nkenye ogu ga hepa kuzuvha erondoro komeho uhura u wize!—Mateusa 24:14.