1, 2. Yisinke za pumbire Bibeli kuhamena eligwederero lyovantu vaJehova?

MOUZUNI mudima kwa kara mo mbunga ezi za hara kukarera Jehova. Vantu owo kuvatumbura asi Nombangi daJehova. Nampili ngomu ava tura mapuko, Jehova kuvapitisira kupitira mompepo zendi zokupongoka. Tu tareni nonkedi dimwe omu ga va tungika.

² Momvhura 1914, wovasesu tupu ngava karere Jehova. Nye Jehova kwa tungika yirugana yokuzuvhisa. Ngoyitundwamo, mamiliyona govantu kwa lironga usili womoBibeli nokuyakara Nombangi dendi. Jehova kwa singonona eligwederero olyo apa ga tente asi: “Nepata lyeeli lyenunu lyesupi ngali nenepa tali nkondopa ngwendi muhoko. Apa ngasi sika mo siruwo, ngani yi ninka yi horoke usimbu eyi. Ame nyame HOMPA!” (Jesaya 60:22) Naina, kuvhura tu dimburure nawa-nawa asi uporofete owo wa sika mo. Vantu vaJehova awo ngwendi muhoko gomunene. Sivaro soNombangi daJehova sa pitakana sivaro sovantu womonomuhoko dimwe.

3. Ngapi vantu vaKarunga va likida eharo?

 ³ Pomazuva aga gopouhura, Jehova kuna kuvatera vantu vendi va lihare-hare. “Karunga yige eharo” ntani awo kumuhonena. (1 Johanesa 4:8) Jesus kwa pangerere vasikuli vendi va “lihara-hare.” Age hena kwa va tanterere asi: “Nsene mu lihara-hara, yipo ngava divira vantu asi one sili varongwa vange.” (Johanesa 13:34, 35) Vakareli vaJehova kwa likida eharo olyo pokudira kulihameka moyita. Pasihonena, poyita yauvali youzuni mudima, vantu wokusika pomamiliyona 55 kwa fire. Nye Nombangi daJehova kapi da lihamekere mo moyita oyo. (Resa Mika 4:1, 3.) Ayo kwa va vatera va dire kutura “nzo” zokudipaga vantu.—Yirugana 20:26.

4. Morwasinke eligwederero lyovantu vaJehova ali tetukisire?

⁴ Sivaro sovantu vaKarunga kwa ligwederera nampili ngomu va kara nonkore zonene Satana. Age “mupangeli gomudona gouzuni ou.” (2 Vakolinte 4:4) Satana kuruganesa nombungapolitika noyikwambudi yokulisiga-siga mokukambadara kuhagekesa po yirugana yokuzuvhisa mbudi zongwa. Nye kapi ta vhuru kuyihagekesa po. Satana kuhetekera ko kutuhagekesa kukarera Jehova morwa ana diva asi siruwo sina mu hupire ko sisupi.—Ehororo 12:12.

5. Morwasinke poyiruwo yimwe vamwe nava tu handukisira? (Tara efano pepenuno 21.)

⁵ Vakareli vaKarunga va diva mulyo gokuhara Karunga novantu. Jesus kwa tente asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye. Esi yiso sipango po sosinene sokuhova. Ano sikwawo sauvali, esi sa hura pwesi, yiso esi asi, ‘Ano a kare mukweni, o mu hare moomu wa lihara nyamoge.’” (Mateusa 22:35-39) Nye Bibeli kulikida asi vantu navenye kapi va sikilira mo morwa kwa pinga nzo kwaAdamu. (Resa Varoma 5:12, 19.) Yipo nye, poyiruwo yimwe vamwe womombunga kuvhura va tu handukise. Nsene yi horoka oyo, yisinke ngatu rugana? Ngatu twikira kuhara Jehova? Ngatu twikira kuhuguvara Jehova ntani novantu vendi? Bibeli kututantera kuhamena vakareli vaKarunga ava va rugene ndi ava va uyungire yokuhandukisa vakwawo. Tu tareni eyi natu lirongera ko kwawo.

6. Monkedi musinke Eli ga piswire vana vendi?

⁶ Pasihonena, Eli kwa kere mupristeli gomunene moIsraeli, nye vana vendi vavali kapi va limburukwire noveta daJehova. Bibeli kutanta asi: “Vana wovagara vaEli kwa kere nompote. Awo kapi ngava pakere mbili HOMPA.” (1 Samwere 2:12) Eli ga yi divire asi vana vendi ngava rugana yininke yoyidona. Nampili ngoso, kapi ga va piswire nawa kwa va twere seke. Mwaza siruwo, Jehova kwa tengekere Eli novana vendi. Konyima zosiruwo, Jehova kapi hena ga pulisilire ruvharo rwaEli ru kare vapristeli wovanene. (1 Samwere 3:10-14) Ngano wa parukire mosiruwo saEli ntani wa divire asi age kwa sigilire vana vendi va rugane yininke yoyidona, ngano ya ku pundukisire ndi? Ukaro wina ngano wa sesupikire  epuro lyoge mwaJehova nokuhageka kumukarera ndi?

7. Nzo musinke zonene ga tulire Ndafita, ntani yisinke ga rugene ko Karunga?

⁷ Jehova kwa here Ndafita unene morwa age kwa kere noyikara yoyiwa. (1 Samwere 13:13, 14; Yirugana 13:22) Nye Ndafita kwa tulire nzo zonene. Apa Uliya ga zire a ka rwe yita, Ndafita kwa honderere naBateseba mukadaUliya, makura ta kara nezimo. Ndafita kapi ga here vantu va dive eyi ga rugene. Makura ta zigida Uliya nokuhetekera ko kumutantera a ze kembo lyendi. Age kwa here Uliya a ka rare naBateseba yipo vantu va gazare asi ezimo lyaUliya. Nye Uliya kapi ga zire kembo lyendi. Yipo nye Ndafita ga tulire po mawapaiko va ka dipage Uliya moyita. Ndafita nepata lyendi kwa ligwanekerere nomaudigu morwa nzo ezi ga tulire. (2 Samwere 12:9-12) Nye Jehova ga mu fililire nkenda nokumugusira po. Age ga yi divire asi Ndafita kwa here kurugana youhunga. (1 Vahompa 9:4) Ngano wa parukire posiruwo sina, ngapi ngano wa lizuvhire kuhamena Ndafita? Ngano wa hagekere kukarera Jehova ndi?

8. (a) Ngapi mupositoli Peturusa ga dilire kusikisa mo nonkango dendi? (b) Morwasinke Jehova ga twikilire kuruganesa Peturusa?

⁸ Sihonena simwe somoBibeli kuna kara somupositoli Peturusa. Jesus kwa horowere Peturusaa kare mupositoli. Nampili ngoso, Peturusa nga uyunga nokurugana yininke yepuko. Pasihonena, Peturusa kwa uyungire asi kapi nga siga Jesus nampili  vamwe ngava yi rugane. (Marukusa 14:27-31, 50) Apa Jesus va mu kwete, vapositoli vendi navenye kukwatera mo Peturusa kwa mu sigire. Peturusa kwa patanene yikando yitatu asi kapi ga divire Jesus. (Marukusa 14:53, 54, 66-72) Nye Peturusa ga lizuvhire kukora komutjima kweyi ga rugene. Ano Jehova kwa mu gusilire po nokutwikira kumuruganesa. Ngano nove kwa kere murongwa gwaJesus ntani wa divire eyi ga rugene Peturusa, ngano wa twikilire kuhuguvara Jehova ndi?

9. Morwasinke wa huguvarera asi Karunga kurugana nkenye apa youhunga?

⁹ Moyihonena oyo, tuna dimburura asi vakareli vaJehova vamwe nawo kwa rugene yininke yoyidona nokukoresa wopeke. Nsene yi horoka oyo naina, yisinke no vhura kurugana? Ngo hageka kuza komapongo nokusiga Jehova ndi? Ndi ngo dimburura asi Jehova munankenda ntani nampo kuna kundindira muntu ogo a litezurure? Nye poyiruwo yimwe vamwe kapi ava lizuvhu unzoni kononzo dononene edi va rugana. Ngo kara nehuguvaro asi Jehova nga rugana ko yuma posiruwo sokuwapera ndi? Age kuvhura nga guse mo mombungakriste muntu ogo nsene hepero. Wa yi huguvara asi Jehova kurugana nkenye apa youhunga ndi?

10. Yisinke ga rugene Jesus apa Peturusa ntani Judasa va mu guvisire?

¹⁰ MoBibeli, ose kuresa mo yihonena yava va twikilire kuhuguvara Jehova novantu vendi nampili ngomu vamwe ngava tura mapuko gomanene. Jesus kwa tulire po sihonena sosiwa. Konyima zokukanderera masiku mudima koGuhwe va mu vatere, age kwa horowere vapositoli 12. Nye gumwe po, Judasa Isikalyoto, kwa ya horwere Jesus. Ntani mupositoli Peturusa nage kwa patanene asi kapi ga divire Jesus. (Rukasa 6:12-16; 22:2-6, 31, 32) Nye Jesus kapi ga pere Jehova usima ndi varongwa vendi apa vamwe va mu guvisire. Age kwa twikilire kuhara oGuhwe nokuvahuguvara. Ngoyitundwamo, Jehova kwa tungikire Jesus pokumuvhumbura ano konyima ta mu tumbu a kare Hompa goUhompa wemeguru.—Mateusa 28:7, 18-20.

11. Yisinke ga uyungire Jehova kuhamena vakareli vendi?

¹¹ Sihonena saJesus kuturonga tu huguvare Jehova novantu vendi. Ntani twa kara nonokonda donongwa deyi natu yi ruganena. Ose twa yi dimburura asi Jehova kuna kupitisira vakareli vendi pomazuva aga gopouhura. Age kuna kuvavatera va zuvhise usili womoBibeli uzuni mudima ntani awo yiwo velike vana kuyirugana. Awo kwa kara mouumwe ntani awo vantu woruhafo morwa Jehova yige ana kuvaronga. Jehova kwa uyungire kuhamena  vakareli vendi asi: “Awo ngava dimba morwaehafo, nye one ngomu kuga nonomutjima dina dombo.”—Jesaya 65:14.

12. Ngapi natu tara mapuko govakwetetu?

¹² Ose kulizuvha ruhafo morwa Jehova kutupitisira nokutuvatera tu rugane yininke yoyiwa. Nye vantu womouzuni waSatana kwato ruhafo ntani kapi va kara nehuguvaro lyokomeho. Ayo ugova ntani kapi ya wapa kusiga Jehova novantu vendi morwa gumwe gomombungakriste ana uyunga ndi ana rugana yininke yoyidona. Twa hepa kutwikira kuhuguvara Jehova nokukwama mavyukiso gendi. Ntani twa hepa hena kulironga omu natu tara mapuko govakwetetu.

13, 14. (a) Morwasinke natu lididimikira mapuko govanavazinyetu? (b) Etumbwidiro musinke twa hepa kudiworoka?

¹³ Yisinke wa hepa kurugana nsene munazinyetu a ku uyungira ndi a ku rugana yininke yokukukoresa? Bibeli kutukorangeda asi: “Walye o genderere kuhandukisa mutjima goge, yeeyi ehandu kwa kara monturo zegova.” (Muudisi 7:9) Natuvenye kapi twa sikilira mo ntani kutura mapuko. Yipo nye, twa ha ndindira asi vanavazinyetu nkenye apa ngava uyunga nokurugana youhunga. Ntani kapi nayi wapa nsene tu gazadara mapuko gawo. Nsene tu yi rugana, kapi ngatu yi hafera kukarera Jehova. Epuro lyetu kuvhura ngali sesupe ntani kuvhura ngatu sige mbunga zaJehova. Makura kapi ngatu karera Jehova ndi tu kare nehuguvaro lyomeho zongwa.

¹⁴ Yisinke ngayi tu vatera kukarera Jehova noruhafo nampili ngomu vamwe va rugane yininke yokutuhandukisa? Twa hepa kudiworoka etumbwidiro eli asi: “Ame tani ungu evhu lyepe neguru lyepe. Yihoroka yanare ngava yi divara nuunu.” (Jesaya 65:17; 2 Peturusa 3:13) Jehova nga ku pa matungiko ogo nsene ngo twikira kumuhuguvara.

15. Yisinke ga tente Jesus eyi natu rugana nsene vakwetetu va tura mapuko?

¹⁵ Ose simpe kapi tuna kara moParadisa. Yipo nye asi nsene gumwe tatu koresa komutjima twa hepa kuteda ko kweyi ana tu harere Jehova. Pasihonena Jesus kwa tente asi: “Nsenesi mu dongwenena po vantu maunzoni gawo, Guhyeni gemeguru ngano nage nga mu dongwenena po aga geni. Ano nsenesi mu dira kudongwenena po vantu mauzoni gawo, Guhyeni gemeguru nage ngano kapi nga mu dongwenena po maunzoni geni.” Apa Peturusa ga pulire Jesus nsene asi kuvhura kugusira po muntu yikando ‘rutano naruvali’ Jesus ta mu limburura asi: “Ame tani ku tantere asi, kapisi dogoro pwarutano-naruvali  tupu, dogoro rokonomurongo ntano-nambali rutano-naruvali.” Jesus kwa tu ronga asi twa hepa kugusira po vakwetetu kutundilira komutjima.—Mateusa 6:14, 15; 18:21, 22.

16. Sihonena musinke sosiwa ga tulire po Josefa?

¹⁶ Sihonena saJosefa kuturonga eyi natu rugana nsene va tu guvisa wopeke. Josefa namumbyendi gomumati yiwo velike ga reterere Jakopo pwaRakera. Jakopo kwa kere hena novana wovagara murongo, nye age kwa here po Josefa kupitakana navenye. Eyi kwa va ninkisire va fire Josefa mfudu. Awo kwa mu nyengere unene yiyo va mu randesere koupika, makura ta ka kara moEgipite. Konyima zonomvhura dononzi, hompa gwaEgipite kwa tulire Josefa a kare mupangeli gwauvali mosirongo oso morwa nga rugana yoyiwa. Konyima vakuru vaJosefa kwa zire koEgipite morwa mosirongo sawo kwa kere mo erumbu. Awo kapi va dimbwilire Josefa, nye age ga va dimbwilire. Nampili ngomu va mu tekwire momudona, age kapi ga va tengwidire kuwoko. Nye age kwa va hetekere a dive nsene va rundwilire nkareso zawo. Apa Josefa ga mwene asi va rundwilire nkareso zawo, ta va tantere asi age mumbyawo. Makura tava hengagwida asi: “Nye ntaantani gwa ha mu pwaga! Ame tani mu rere novana veni.”—Genesis 50:21.

17. Yisinke ono hara kurugana nsene vamwe va tura mapuko?

¹⁷ Mokumona asi nkenye ogu kutura mapuko, nove kuvhura kuhandukisa wopeke. Nsene o dimburura asi ono handukisa muntu, kwama mavyukiso gomoBibeli. Mu hundira a ku gusire po ntani hetekera ko kulipa mbili nendi. (Resa Mateusa 5:23, 24.) Ose kuyihafera apa vakwetetu a va tu gusire po. Yipo nye, nose twa hepa kuvagusira po. Vakorosi 3:13 kutanta asi: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” Nsene twa hara vanavazinyetu, kapi ngatu kara nonkoko. (1 Vakolinte 13:5) Ntani nsene tu gusira po wopeke, Jehova nage nga tu gusira po. Yipo nye nsene vamwe vana tura mapuko, ngano tu va fire nkenda ngwendi moomu Guhyetu Jehova a tu fire nkenda.—Resa Episarome 103:12-14.