WA DIVA KO vanavazinyetu ava va za kosirongo ndi komukunda oku va hepa vazuvhisi ndi? Wa lipura asi: ‘Yisinke ya va tumangeda va diruke? Mawapaiko musinke va tulire po? Name kuvhura ni yi rugane ndi?’ Mokugwana malimbururo, twa hepa kuvapura vanavazinyetu owo.

Yisinke ya mu ninkisire mu gazadare kukazuvhisira kosirongo oku va hepa vazuvhisi? Amy, gonomvhura dokoyiha 35, kwa tunda koAmerika. Age kwa tanta asi: “Nare ngani gazara kukazuvhisira kosirongo sapeke, nye kapi ya monekere ngwendi ngani yi sikisa mo.” Yisinke ya mu ninkisire a sikise mo sitambo sendi? Age kwa tanta asi: “Momvhura 2004, valikwali ava va dirukilire kosirongo saBelize kwa zigidire nge ni ka va dingure nokukazuvhisa kumwe nawo kwedi kumwe. Na zire ntani na ka yi haferere. Konyima zomvhura, tani dirukire ko Ghana ngomuzuvhisi gokukarerera.”

Stephanie, gomosirongo saAmerika gonomvhura dokoyiha 30 nage kwa gazadarere ko koukaro wendi asi: ‘Ame ukanguki wange uwaawa ntani kapi na kwara ndi ni kare novana. Ame kuvhura ni ruganene Jehova unene kupitakana eyi nina kurugana ngesi.’ Kulikonakona nyamwendi kwa mu tumangedere a dirukire koGhana a ka vatere. Filip naIda, awo valikwali wovazuvhisi wokukarerera wokosirongo saDenmark wonomvhura dokupitakana 50. Awo kwa kere neharo lyokudirukira komukunda oku kwa hepere vazuvhisi. Awo kwa paparere nompito yipo va sikise mo sitambo sawo. Filip kwa tanta asi: “Apa za monekere mpito kwa lizuvhire ngwendi Jehova ana kututantera asi: ‘Zendeni.’” Momvhura 2008 yipo va zire koGhana tava ka kara ko nomvhura dokupitakana pwantatu.

 Hans naBrook vazuvhisi wokukarerera wonomvhura dokoyiha 30, kwa kara moAmerika. Momvhura 2005, awo kwa ka vaterere vanavazinyetu ava sa kundamene simpagwa sekundungu lyenene momukunda gomosirongo sawo. Konyima tava tura mo ehundiro lyokuvatera kutunga matungo goUhompa nye kapi va va tambwire. Hans kwa tanta asi: “Posigongi somazuva gatatu kwa geve po siuyungwa omu va tumbwire hompa Ndafita ogu va nyokesere kudika ntembeli nye ga yi tambwire nokurugana yapeke. Sitwa oso kwa tu vaterere tu dimburure asi kapi ya kara epuko kurundurukira kositambo sapeke.” (1 Hist. 17:1-4, 11, 12; 22:5-11) Brook kwa tanta asi: “Jehova kwa here tu rugane yapeke.”

Hans naBrook kwa va tumangedere va dirukire kosirongo sapeke ngovazuvhisi wokukarerera apa va zuvhire yihorokwa yokuhafesa kovakwawo ava va dirukilire koyirongo nayopeke va ka vatere. Momvhura 2012 tava zi koGhana nokukavatera mbunga zorupurupuru makwedi gane. Apa va ka tundire koGhana va tengure koAmerika, eharo lyawo lyokutura yirugana yoUhompa muhowo kwa ya nkondopere. Kutunda opo, awo kwa vaterere kutunga Beteli posirudi saMicronesia.

Mawapaiko musinke mwa tulire po? Stephanie kwa tanta asi: “Ame kwa resere yirongwa yomoRuhungu eyi ya simwitira kuhamena kukazuvhisira oku kuna hepa vazuvhisi. * Makura tani tantere ko vakuronambunga nomutareli gonombunga namukadendi kuhamena sitambo sange. Unene po ngani tantere Jehova mekanderero kuhamena sitambo sange.” Stephanie kapi nga randangana yininke nye nga pungura yimaliwa yendi yipo a vhure kukalireresa ko oku ga here kudirukira.

Hans kwa tanta asi: “Ose ngatu kanderere kwaJehova a tu vatere morwa  kwa here kuza oku ga tu harerere. Momakanderero getu ngatu tumbura ezuva eli twa here kudiruka.” Hans naBrook kwa tjangerere koNobeteli ne. Apa za va limbwilire Beteli zaGhana, tava tokora kukakara mosirongo oso makwedi gavali. Hans kwa tanta asi: “Ose kwa ka haferere kukazuvhisa kumwe novanavazinyetu, makura tatu ka kara ko kupitakana makwedi gavali.”

George naAdria, valikwali wonomvhura dokoyiha 40 womosirongo saKanada, va dimbwilire asi Jehova kutungika matokoro gomawa. Makura tava rugana ko yuma va sikise mo sitambo sawo. Tava simwitire nokupura munazinyetukadi ogu ga dirukilire koGhana a ka vatere. Ntani tava tjangere koBeteli zaKanada nezi zaGhana. Adria kwa tanta asi: “Ose kwa konakonene omu natu vhura kuruganesa nawa yimaliwa yetu.” Matokoro ogo ga va vaterere va vhure kudirukira koGhana momvhura 2004.

Maudigu musinke mwa ligwanekerere nago oku mwa dirukilire, ntani ngapi mwa ga lididimikilire? Amy kwa rongwere kembo lyawo. Age kwa tanta asi: “Kapi na yikire yininke yomosirongo oso.” Yisinke ya mu vaterere? Age kwa tanta asi: “Apa ekoro lyange ngali bela nokupandura nge kosirugana sange kwa vaterere nge ni demenene kositambo sange esi na dirukilire. Konyima ngatu libela nawo kupitira movidiyo. Morwa ngatu limono nawo movidiyo, kapi hena nava rongwere unene.”  Apa Amy ga tulisire po ukaume namunazinyetukadi gokomukunda ogo kwa mu vaterere a dive nompo damo. Age kwa tanta asi: “Ame na ya mu huguvarere nokumuhundira evatero nkenye apa ngani dili kukwata egano nkareso zovantu. Nevatero lyendi na divire omu nani paruka kumwe nawo ano oyo ya vaterere nge ni hafere kuzuvhisa.”

George naAdria apa va dirukilire koGhana, awo kwa zuvhire ngwendi eparu lyawo lina digopa. Adria kwa tanta asi: “Mevango lyokukuhwa yidwara yetu mehina, ngatu kuhu komawoko. Ntani ngayi gusa siruwo pokutereka nondya. Nye konyima twa ya yi yikire.” Brook kwa tanta asi: “Nampili ngomu atu ligwanekere nomaudigu, ose vazuvhisi wokukarerera kuhafera eparu. Apa atu diworoka yihorokwa nayinye yoyiwa eyi atu limonene, ayo kufana ngwendi ugawo.”

Morwasinke muna harere kukorangeda vamwe va rugane yokulifana? Stephanie kwa tanta asi: “Kuzuvhisira momukunda omu mwa kara vantu ava va hara kulironga Bibeli kuhafesa nge.” Age kwa tanta hena asi: “Kudirukira oku kuna hepa vazuvhisi kuna kara etokoro lyewa na tura po.” Momvhura 2014, Stephanie yipo va likwere naAaron ntani awo ngesi kuna kurugana koBeteli zomoGhana.

Christine muzuvhisi gokukarerera gonomvhura dokoyiha 30 ogu ga tunda koNdovesiranda kwa tanta asi: “Ame kuhafera sirugana sange.” Christine nga zuvhisire mosirongo saBolivia komeho a dirukire koGhana. Age kwa tanta hena asi: “Morwa kulikara ure nekoro lyange, ame kuhundira Jehova a vatere nge. Age kuna kara kaume kange gomunene. Ntani ame kuna kulimonena uumwe movantu vaJehova. Oyo kuretera nge ruhafo rorunene.” Christine va likwara naGideon, ntani awo kuna kuzuvhisira moGhana.

Filip naIda kwa tumbura eyi va rugene mokuvatera varongwa vawo va ture po ezokomeho. Awo kwa tanta asi: “Ose kwa kere novarongwa woBibeli wokupitakana 15, nye tatu horoka va kare 10, yipo tu vhure kuvavatera nawa.” Varongwa vawo va gwanene mo uwa ndi? Filip kwa tanta asi: “Ame ngani lirongo nomudinkantu gedina Michael. Ngani mu rongo nkenye ezuva ntani morwa nga liwapaikire nawa twa mene buke Marongo goBibeli mokwedi kumwe. Konyima zoyo, Michael ta ya kara muzuvhisi gokudira kugwana ekuho. Apa twa pwege nage sikando sokuhova mokuzuvhisa, ta pura nge asi: ‘Kuvhura o vatere nge novarongwa vange woBibeli ndi?’ Tani mu tara oku nina tetuka. Ta tantere nge asi ga tameka kulironga novantu vatatu ano ana hepa evatero omu na va ronga.” Sihorokwa esi kulikida hepero zovazuvhisi.

Amy kwa simwitira omu ga dimbwilire asi pana kara hepero momukunda gongandi. Age kwa tanta asi: “Apa na ka sikire moGhana, ose kwa ka zuvhisilire komukunda gumwe tu ka papare yipurupuru. Momukunda gumwe ose kwa ka gwene mo yipurupuru yokusika pontantatu! Konyima zosiruwo, Amy tava ya likwara naEric ano ngesi awo kuna kara vazuvhisi wosiruwo nasinye. Awo kwa kara mombungakriste zoyipurupuru mokuvatera vazuvhisi womoGhana woyipurupuru wokupitakana po-300 ntani navamwe ava ava likida elituromo. George naAdria morwa va zire va ka vatere koGhana va gwene mpito mokuyakara vatumwa. Awo kwa hefe apa va va zigidire va ka kare moSikora zaGiliyata. Ngesi awo kuna kara vatumwa mosirongo saMozambique.

Ruhafo pokuzuvha omu vanavazinyetu ava va dirukira koyirongo yapeke vana kuzuvhisa kumwe novanavazinyetu womoyirongo oyo. (Joh. 4:35) Nkenye sivike, vantu wokusika 120 kugwana ekuho moGhana. Vazuvhisi wokusika po-17 kwa dirukira koGhana va ka vatere. Mokulifana morwa kwa hara Jehova, naina uzuni mudima pana kara vazuvhisi mayovi ava ‘va ligava vene’ mokukazuvhisira oku kuna hepa evatero. Vazuvhisi owo kuhafesa Jehova.—Epis. 110:3; Yis. 27:11.