1, 2. (a) Faturura sifanekeso saJesus somunasikunino sovhinyu. (b) Ngapi sifanekeso oso sa likida ugavi nonkenda?

MUNASIKUNINO sovhinyu kwa menekere a ka papare varugani. Ava ga ka gwene ta lizuvhu nawo mfuto makura tava zi va ka rugane. Munasikunino ga hepere simpe varugani, makura ta zi pomarandero ta ka gwana ko vamwe. Kositenguko, ta gwana ko hena vamwe. Ta lizuvhu nawo mokuvafuta mouhunga. Ano eyi lina siki pongurova, ta zigida varugani a ya va pe mfuto zawo, nkenye ogu kwa mu pere mfuto zokulifana yi kare asi kwa rugene novili dononzi ndi zimwe. Vena ga hovere kukuta, tava tanguna. Age ta va limburura asi: ‘Nani kapisi yiyo tuna lizuvhu oyo? Nani ame nokuvhura si kupa varugani vange eyi nina panga? Ndi nampo mfudu zina mu kara morwaugavi wange?’—Mat. 20:1-15.

² Sifanekeso saJesus kutudiworokesa sikara saJehova ‘sonkenda’ va tumbura moBibeli. (Resa 2 Vakolinte 6:1.) Varugani ava va rugene vili  zimwe kapi ngano va va futire yimaliwa yoyinzi, nye mwenyasikunino kwa va fililire nkenda. Kuhamena nkango “nkenda,” mulirongi gumwe kwa tjanga asi: “Nkango ozo kutanta kouhwi ndi kosininke no pa muntu esi ana dili kuruganena.”

3, 4. Morwasinke Jehova ga tu likidira nkenda, ntani ngapi?

³ MoBibeli kwa tumbura mo ‘uhwi wonkenda zaKarunga.’ (Efe. 3:7) Morwasinke Jehova ga gavera ‘uhwi’ owo, ntani ngapi? Morwa kapi atu sikisa mo nawa-nawa yipango yaJehova, yiyo a tu fililire nkenda. Hompa Saromo yiyo ga tjenge asi: “Kutupu nampili gumwe pevhu, ogu a rugana narunye youhunga ga hana kupuka.” (Muud. 7:20) Mupositoli Paurusa nage kwa tjenge asi: “Navenye kwa zona, makura uyerere waKarunga yiyo va u pira” ntani “mfeto zononzo nomfa.” (Rom. 3:23; 6:23a) Ose twa fira kufa.

⁴ Nye Jehova kwa tu likida eharo ose vantu wononzo kupitira monkenda zendi zonene. Uhwi wounene ou ga tu pa kuna kara “Munwendi gelike a huru,” ogu ga tumine pevhu a ya tu fire. (Joh. 3:16) Paurusa kwa tjenge kuhamena Jesus asi “ntaantani kuna mu pe uyerere nefumano, morwarunyando rwendi dogoro konomfa. Karunga monkenda zendi ga yi rugana eyi asi Jesus a fire vantu navenye.” (Heb. 2:9) Yimo, “uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.”—Rom. 6:23b.

5, 6. Yisinke nayi horoka nsene zi tu pangera (a) nzo? (b) nkenda zaKarunga?

⁵ Ngapi vantu va pinga nzo nonomfa? Bibeli kwa uyunga asi: “Morwanzo zomuntu gumwe [Adamu] yiyo adi pangerere nomfa mouzuni.” (Rom. 5:12, 14, 17) Nye kuvhura tu tokore di dire kutupangera nonzo. Nsene tu kara nepuro monzambo zosizoweseso saKristusa, ose tazi tu pangere nkenda zonene zaJehova. Monkedi musinke? Bibeli kutanta asi: “Apa pa vhuka nonzo, nonkenda zaKarunga nazo yipo azi vhuka unene nye. Ano moomu da pangera nonzo uzuni, di twaredese vantu konomfa, noufenkenda waKarunga yimo au pangere pwantaantani, u va twaredese kouhungami nokomwenyo gwanarunye mwaJesus Kristusa.”—Rom. 5:20, 21.

⁶ Nampili ose simpe tu vananzo, kapisi hepero tu lisigilire zi tu pangere nzo. Nsene tuna zono, twa hepa kuhundira Jehova a tu gusire po. Paurusa kwa rondwere Vakriste asi: “Nonzo nokumupangera si hena, yeeyi one kapisi womoVeta, one womonkenda zaKarunga.” (Rom. 6:14) Yipo nye, ose kutupangera nkenda zaKarunga. Ano yitundwamo? Paurusa kwa tente asi: ‘Ufenkenda waKarunga, kuturonga asi tu zumbe udinikarunga nomadowo gopauzuni ou, ose hena tu pangere marutu getu, tu hungame, ose tu kerere Karunga mouzuni ou.’—Tit. 2:11, 12.

7, 8. Yisinke ayi tanta asi Jehova kwa kara nonkenda “zonzi-zonzi”? (Tara mafano pepenuno 21.)

⁷ Mupositoli Peturusa kwa tjenge asi: “One kwa gwana nkenye ogu uhwi wendi wompepo. Omu yi ruganese mokulikwafa-kwafa ngovagendesi wovawa wonkenda zaKarunga zonzi-zonzi.”  (1 Pet. 4:10) Yisinke yina kutanta oyo? Yi kare asi maudigu musinke natu ligwanekera nago, Jehova kuvhura kutuvatera tu ga lididimikire. (1 Pet. 1:6) Karunga nga tu fira nkenda mwankenye udigu.

⁸ Jehova kutulikida nkenda zonzi-zonzi mononkedi dokulisiga-siga. Mupositoli Johanesa kwa tjenge asi: “Natuvenye twa tambura konkenda zendi zonzi za hana kupwa, ezi a tu paape.” (Joh. 1:16) Morwa nkenda zaJehova zonzi-zonzi ose kugwana mauwa gomanzi. Mauwa musinke?

9. Uwa musinke atu gwanene mo monkenda zaJehova, ntani ngapi natu likida rupandu rwetu?

⁹ Kutudongwenena po nonzo detu. Morwa nkenda zaJehova, ose kutudongwenena po nonzo detu nsene tu litezurura nokutwikira kurwanesa po madowo getu. (Resa 1 Johanesa 1:8, 9.) Ngano tu likide rupandu konkenda ezi ga tu likida Karunga pokumuhamberera. Paurusa kwa tjangerere vagwavekwa vakwawo asi Karunga “kwa tu parura mo mononkondo domundema, makura yiyo ga tu rundwilira moUntungi waMunwendi ogu ga hara. Yige ga tu zowora, kuninka asi nonzo detu ga di dongonona po.” (Koros. 1:13, 14) Morwa nonzo detu kudidongonona po, ose kugwana mauwa gomanzi.

10. Uwa musinke atu hafere morwa nkenda zaKarunga?

¹⁰ Kukara nombili naKarunga. Morwa kwa pinga nzo, apa ava tu hampuruka ose kukara nonkore daKarunga. Paurusa kwa yi kwatesere ko pokutanta asi: “Ose kwa kere nonkore daKarunga. Nye nampili ngomu ya kere ngesi, Karunga kwa tu gwanekedesesa kumwe nendi konomfa daMuzowoli.” (Rom. 5:10) Egwanekedeso olyo kwa tu reta mombili naJehova. Paurusa kwa kwatakanesere mbili ozo nonkenda zaJehova pokutanta asi: “Ano moomu ga tu hungamekesa Karunga kepuro, yiyo nye tuna karere nombili naKarunga mwaHompa gwetu Jesus Kristusa. MwaJesus yimo tuna gwanene mpito zokuza monkenda, omu twa kara.” (Rom. 5:1, 2) Owo kuna kara uwa wounene.

11. Ngapi vagwavekwa va vatera ‘nonzwi dapeke’ va hungame?

¹¹ Kutuhungameka. Natuvenye kapi twa hungama. Nye muporofete Ndaniyera kwa pumbire asi pehagero lyouzuni “vagendesi wonondunge” ndi vagwavekwa, ‘ngava ronga vantu wovanzi va rugane youhunga.’ (Resa Ndaniyera 12:3.) Awo kwa vatera mamiliyona ‘gononzwi dapeke’ va hungame kosipara saJehova kupitira moyirugana yokuzuvhisa nokuronga. (Joh. 10:16) Nye oyo kwa tompoka morwa nkenda zaJehova. Paurusa kwa fatwilire asi: “Karunga kuvahungameka mawoko-woko morwankenda zendi mwaJesus Kristusa ogu ga va zowora.”—Rom. 3:23, 24.

12. Ngapi kukanderera ya likwatakana nonkenda zaKarunga?

¹² Kuvhura kuhedera Karunga mekanderero. Morwa nkenda, Jehova kwa tu pulisira tu hedere sipundi sendi souhompa pokukanderera. Paurusa kwa tumbwire ‘sipundi souhompa saKarunga gonkenda,’ ntani asi tu si hedere “nonomutjima nadinye.” (Heb. 4:16a) Jehova kwa tu pa mfumwa zokumukanderera kupitira mwaMunwendi, ‘momalikwatakano nendi nomokumupura,  ose kuwapa kuza nemanguruko kosipara saKarunga twa hana woma.’ (Efe. 3:12) Jehova kwa tu likida nkenda zonene pokutupulisira tu mu hedere mekanderero.

13. Ngapi nkenda zaKarunga azi tu ‘kwafa paapa tuna zi hepere’?

¹³ Kugwana ekwafo paapa tuna li hepere. Paurusa kwa tu korangedere tu kanderere kwaJehova nonomutjima nadinye yipo “va ka tu fire nkenda, zi tu kwafe paapa tuna zi hepere.” (Heb. 4:16b) Nkenye apa natu ligwanekera noudigu, kuvhura tu hundire Jehova a tu kwafe. Nampili ngomu twa zona, age kulimburura makanderero getu, rorunzi kupitira movapuli vakwetetu, ‘yipo tu uyunge nehuguvaro asi: “Hompa yige Mukwafi gwange, yinke nani tjilira. Muntu a tompore nge yinke?”’—Heb. 13:6.

14. Ngapi nkenda zaJehova azi retere uwa nomutjima detu?

¹⁴ Kuhengagwida nomutjima detu. Uwa wounene atu gwana morwa nkenda zaJehova kuna kara asi nampili tu dompe nomutjima ose kugwana ehengagwido. (Epis. 34:18) Paurusa kwa tjangerere Vakriste womoTesaronika ava va pitire momaudigu asi: “Hompa gwetu Jesus Kristusa mwene naKarunga Guhyetu, ogu ga tu hara yiyo ga tu pa ehengagwido lyanarunye nehuguvaro lyewa morwankenda ngano ta hengagwida nomutjima deni, a mu koreke.” (2 Tes. 2:16, 17) Ose kutuhengagwida pokudiva asi Jehova kutupakera mbili morwa nkenda zendi.

15. Ehuguvaro musinke twa kara nalyo morwa nkenda zaKarunga?

¹⁵ Kukara nehuguvaro lyomwenyo gwanarunye. Ngovantu wononzo, pwanyoselike ose ngano kwato ehuguvaro. (Resa Episarome 49:7, 8.) Nye Jehova kwa tu pa ehuguvaro. Jesus kwa tumbwidilire vasikuli vendi asi: “Eharo lyaTate yilyo eli asi, nkenye ogu gokumona Muna, nye a mu pure, yige nga kara  nomwenyo gwanarunye.” (Joh. 6:40) Ehuguvaro lyomwenyo gwanarunye kuna kara uhwi wonkenda zaKarunga. Paurusa kwa likidire rupandu kouhwi owo apa ga tente asi: “Ufenkenda waKarunga kwa u horwera u rete eparu kovantu navenye.”—Tit. 2:11.

16. Yisinke va rugene vamwe womombunga zoVakriste vanare?

¹⁶ Pokumona asi Jehova kutupa mauwa gomanzi morwa nkenda zendi, kapisi tu gazare asi age kutambura yirugana yoyidona. Mombunga zoVakriste vanare mwa kere vamwe ava va here ‘kupirura nkenda zaKarunga morwa madowo.’ (Juda 4) Vakriste owo kwa gazarere asi kuvhura tupu va zone ano Jehova ta va gusire po. Awo hena kwa zedagwilire vamwe va kwame eyi vana kurugana. Naina, ava ava rugana yininke yangoso ‘kuswaura mpepo zonkenda.’—Heb. 10:29.

17. Epukururo musinke ga geve Peturusa?

¹⁷ Satana kwa pukisa Vakriste vamwe va gazare asi kuvhura tupu va zonene mowina ano Karunga ta va fire nkenda. Nampili ngomu Jehova a dongwenene po ava ava litezurura, simpe ana hara tu rwanese po madowo getu. Peturusa kwa tjenge asi: “Nye one vakwetu mwa yi diva nare eyi. Ano takameseni nye, neisi va mu pigaukisa vadiniveta vemepuko, mu gwe ko ketateko lyeni eli lya kora. Kureni ngorooro monkenda nomokudiva Hompa Muzowoli gwetu Jesus Kristusa.”—2 Pet. 3:17, 18.

18. Morwa Jehova kutufira nkenda, yitumbukira musinke twa kara nayo?

¹⁸ Morwa Jehova ga tu fira nkenda, twa hepa kuruganesa mauhwi getu mokumupandura ntani nokuruganena uwa vakwetu. Mononkedi musinke? Paurusa kwa tente asi: “Ose kwa kara nomauhwi gonkenda ga lisiga-siga poufenkenda ou ga tu pa Karunga, . . . Ogu ga kara mosirugana sokukwafa, a kwafe momuwa. Ano ogu a rongo, a ronge nomupampi. Ogu ga kara nouhwi wokukorangeda vakwawo, a kare nokukorangeda kwendi. . . . ano ogu a zuvhire vantu nkenda, a va zakure nehafo.” (Rom. 12:6-8) Morwa Jehova kutufira nkenda, twa kara nositumbukira sokulitura mo unene moyirugana yokuzuvhisa nokuronga vantu Bibeli nokukorangeda vapuli vakwetetu ntani nokugusira po nkenye ogu ana tu zonene.

19. Situmbukira musinke ngatu ka konakona mosirongwa sokukwama ko?

¹⁹ Mokulikida rupandu keharo eli ga tu likida Jehova, ngano tu liture mo unene ‘mokusanseka mbudi zongwa zonkenda zaKarunga.’ (Yirug. 20:24) Ngatu ka konakona situmbukira oso mosirongwa sokukwama ko.