Yininke yinzi va lipakerere sinka eyi va here kugwanena usima Jesus novarongwa vendi. MoVeta zaMosesa kwa hamenene mo nompango dononzi kuhamena ukuhuki ngwendi wovagara novakadi, woyingondwe ntani kuhamena yimpu yovantu neyi yoyikorama. Azo kwa geve hena mapukururo omu ekuhuro nava li rugana. Ekuhuro ngava li rugana kupitira mokuzamba nzambo nokulikuhwa ndi kulitjisangera mema.—Lev., egau. 11-15; Num., egau. 19.

Valirongi woVajuda ngava gwederere ko kwankenye veta mapukururo gomanzi. Buke zimwe kwa tanta asi nkenye ogu nga nyata pampo “ngava mu konakona va tare eyi yina mu nyateke nomu ana nyata nava ana nyateke ntani ngava tara yipako noyininke eyi ya fira kunyata ntani eyi va hepere kurugana mokulikuhura.”

Nonkore daJesus kwa mu pulire asi: “Varongwa woge morwasinke ava dilire kuliza nonompo dava vanare, ava lye nondya, awo va hana kukuhwa mawoko gawo?” (Mar. 7:5) Awo kapi va tembe asi muntu kapi ta kanguka nsene a lya age kapi ana likuhu komawoko. Kuliza nompo zawo, muntu va hepere kumutjira mema komawoko komeho a lye. Buke zina tuna tumbura kwa tanta asi: “Awo kwa tulire po hena veta kuhamena yipako nomema aga va hepere kuruganesa nomuntu ogu ngano ga vhulire kutjira mema ogo ntani kupi muntu na tetera kulikuhwa komawoko.”

Kombinga zonoveta odo, Jesus kwa limbwilire valirongi woVajuda asi: “Jesaya nani ga hungika yombinga zeni, vambudi one, apa ga pumbire momu va tjanga asi: ‘Mbunga ezi kufumadeka nge konomurungu nye nomutjima dawo ure name da kara. Mawoko-woko ava fumadeke nge, erongo lyawo, nompangera dosintu.’ One kusiga Veta zaKarunga, tomu kakatere konompo dovantu.”—Mar. 7:6-8.