1, 2. (a) Ngapi uporofete waJesaya 60:22 una kusika mo pomazuva aga gopouhura? (b) Hepero musinke zina kara mo mombunga zaJehova?

“NEPATA lyeeli lyenunu lyesupi ngali nenepa tali nkondopa ngwendi muhoko.” (Jes. 60:22) Nonkango odo douporofete kuna kusika mo pomazuva aga gopouhura. Momvhura 2015, vazuvhisi woUhompa wokusika po-8 220 105 uzuni mudima kwa litulire mo mokuzuvhisa. Ruha rokuhulilira rouporofete owo ngano ru tumangede Vakriste navenye, morwa Guhyetu gemeguru kwa tente asi: “Ngani yi ninka yi horoke usimbu.” Ngwendi moomu vantu ava lizuvhu asi siputa setuwa kuna kuligwederera, nose kuna kumona omu sirugana sokutura po varongwa sina kuligwederera. Pokumona asi sirugana oso kuna kuligwederera, ose kuna kuzuvhisa noupampi ndi? Sinzi sovanavazinyetu kuna kurugana uzuvhisi wokukarerera ndi wokuvatera. Ose kuhafa pokumona wovanzi omu vana kuligava va ka zuvhisire oku vana hepa vazuvhisi ndi kuna kulihameka momaruha gapeke goyirugana yoUhompa.

² Pana kara hena hepero zovarugani wovanzi mombunga zaJehova. Nkenye mvhura nombungakriste dokusika konyara 2 000 kuditulisa po. Nsene asi vakuronambunga 5 va pitisire mwankenye mbungakriste, ntudi pwa hepa kukara vakwafimbunga 10 000 nkenye mvhura ava nava vhura kukara vakuronambunga.  Eyi kutanta asi pana kara hepero kovanavazinyetugara mayovi va wapere kukara vakwafimbunga. Ntani hena, vagara novakadi navenye va hepa kukara “nkenye apa nomupampi moyirugana yaHompa.”—1 Kol. 15:58.

3, 4. Yitambo musinke yopampepo no vhura kulitulira po?

³ Resa 1 Timoteusa 3:1. Ntanto “nsene ono hara kukara,” moRugereka kutanta asi “kuraverera” sininke sina kara koure. Apa Paurusa ga uyungire nonkango odo, age kwa nkondopekere asi mokutura po ezokomeho pwa hepa elituromo lyenene. Tu ninke nye asi munazinyetugara kuna kugazadara omu na vatera mombungakriste. Age simpe kapisi mukwafimbunga nye ana dimburura hepero zokutunga po yikara yopampepo. Pomuhowo, ta kondjere kukara mukwafimbunga. Mwaza siruwo, ta gazadara ko kukara mukuronambunga. Moyitumbukira nayinye oyo, age ga hepa kurugana unene mokuyisikisa mo.

⁴ Mokulifana, vanavazinyetu navenye ava vana hara kukara vazuvhisi wokukarerera ndi kurugana koBeteli ndi kutunga Yinyanga yoUhompa va hepa kukondja unene mokusikisa mo yitambo yawo. Tu tareni omu Nonkango daKarunga adi korangeda navenye va ture po ezokomeho moukareli wousili.

5. Ngapi omu vadinkantu nava vhura kuruganesa nonkondo dawo moyirugana yoUhompa?

⁵ Vadinkantu kwa kara nononkondo dokusikisa mo yoyinzi moyirugana yaJehova. (Resa Yisewe 20:29.) Vadinkantu vamwe wokoBeteli kunduruka nokurongera Nobibeli noyimbapiratjangwa. Sinzi sovadinkantu kutunga nokuwapukurura Yinyanga yoUhompa. Apa ayi horoka yimpagwa, vadinkantu kurugana kumwe novanavazinyetu ava va kara noudivi mokuvatera ava sina kundama simpagwa. Ntani vadinkantu wovanzi wovazuvhisi wokukarerera kuzuvhisa mbudi zongwa momaraka gokulisiga-siga.

6-8. (a) Marunduruko musinke ga tulire po mudinkantu gumwe, ntani yitundwamo musinke ya kere? (b) Ngapi omu natu ‘heteka tu tare omu Jehova ga wapa’?

⁶ Pamwe ove wa dimburura mulyo gokuruganena Karunga nomutjima nagunye. Nye ngapi nsene ove kulizuvha ngwendi moomu ga lizuvhire munazinyetu Aaron? Nampili ngomu vakurona vendi va mu rongere Bibeli kutunda unona, age kwa tanta asi: “ Kapi ngani hafere mapongo noyirugana yokuzuvhisa.” Age kwa here kukarera Karunga noruhafo nye kapi ga divire eyi nga dili kuyihafera. Yisinke ga rugene?

⁷ Aaron kwa litulire po siruwo sokuresa Bibeli nokuliwapaikira komapongo ntani nokukagava malimbururo. Unene po age kwa tamekere kukanderera nkenye ezuva. Apa eharo lyendi lyokuhara Jehova lya ya nkondopere, ta tameke kutura po ezokomeho. Kutunda opo, Aaron kwa haferere uzuvhisi wokukarerera nokurugana navamwe mokuvatera ava sina kundama simpagwa ntani nokukazuvhisira kosirongo sapeke. Ngesi age kuna kara koBeteli ntani age mukuronambunga. Ngapi ana kulizuvha kuhamena ezokomeho eli ga tura po? “Ame na ‘heteka yiyo na mona omu Jehova ga wapa.’ Morwa mauwa aga na gwana ame kulizuvha asi na hepa kumuruganena unene ntani ayo kureta hena mauwa gomanzi.”

 ⁸ Episarome kwa tanta asi: “Ava ava mu tjira, kugwana nayinye eyi va hepa.” (Resa Episarome 34:8-10.) Jehova kapi a sigilire ava ava mu karere noupampi. Nose ‘kuheteka tu tare omu Jehova ga wapa’ apa atu litura mo unene mosirugana sendi. Ntani apa atu mu ruganene Karunga nomutjima nagunye, ose kulizuvha ruhafo rorunene.

9, 10. Morwasinke ya karera mulyo o kare nonkareso ‘zokundindira’?

⁹ Kara nonkareso ‘zokundindira’ ngomu ono kukondjera kusikisa mo yitambo yoge. (Mika 7:7) Jehova nkenye apa kuvatera vakareli vendi wovalimburukwi, nampili ngomu pamwe va hepa kundindira komeho va gwane yitumbukira. Age kwa tumbwidilire mokupa Abirahamu munwa. Nye Abirahamu ga hepere kundindira nokukara nepuro. (Heb. 6:12-15) Nampili ngomu ga ndindilire nomvhura dononzi, age kapi ga zumbanesere ehuguvaro ndi asi a fe unye ntani Jehova ga sikisire mo etumbwidiro lyendi.—Gen. 15:3, 4; 21:5.

¹⁰ Kapi ya kara ureru kundindira. (Yis. 13:12) Nsene tu gazadara nkenye apa koyininke eyi ya dira kusika mo, ta yi tu rorora komutjima. Nye ya wapa kuruganesa siruwo setu tu ture po ezokomeho. Tu konakoneni nonkedi ntatu omu natu yi rugana.

11. Yikara musinke yoyiwa twa hepa kutunga po, ntani morwasinke ya karera nomulyo?

¹¹ Tunga po yikara yoyiwa. Pokuresa Nonkango daKarunga nokuteda ko, kuvhura tu tunge po yikara ngwendi unongo nonondunge nediwo nomayere. Yikara oyo mulyo kowo ava pitisire moukareli wousili. (Yis. 1:1-4; Tit. 1:7-9) Pokuresa  yimbapiratjangwa yetu, kuvhura tu dive omu a gazara Karunga kuhamena yininke. Nkenye ezuva, ose kutura po matokoro kuhamena yilihafeso nondwareso nomaliwapaiko nomu natu ruganesa yimaliwa ntani omu natu tekura wopeke. Pokutura pasirugana eyi tuna kulironga moBibeli, kuvhura tu ture po matokoro gokuhafesa Jehova.

12. Ngapi womombungakriste nava kara wokuvhura kuhuguvara?

¹² Kara gosili ndi gokuhuguvara. Natuvenye twa hepa kurugana paapa twa hulira mokusikisa mo nkenye sirugana soUhompa esi twa gwana. Ngomupangeli, Nehemiya kwa pere yitumbukira kovantu vaKarunga. Wolye ga yi pere? Age kwa ruganesere vantu wokuhuguvara ava va tjilire Karunga. (Neh. 7:2; 13:12, 13) Mokulifana nanaina,“eyi va va hepera vakereli yeyi asi, ava limburukwe kohekurwawo” ndi va kare wokuhuguvara. (1 Kol. 4:2) Yirugana yoyiwa, kulihorora.—Resa 1 Timoteusa 5:25.

13. Ngapi no honena Josefa nsene kuna kukutekura momudona?

¹³ Pulisira Jehova a ku wapeke. Yisinke no rugana nsene kuna kukutekura momudona? Nampo kuvhura o kohonone po udigu owo usimbu. Nye yiruwo yimwe nsene o genderera kulipopera, kuvhura udigu u ligwederere. Josefa, vakuru vendi kwa mu tekwire momudona, nye age kapi ga kere nonkoko. Konyima, Josefa kwa mu rundilire tava mu tura modorongo. Nye age kwa pulisilire Jehova a mu vyukise momaudigu nagenye ogo. Yitundwamo? “Nonkango daHOMPA da mu wapekere.” (Epis. 105:19) Apa ga pwire maudigu ogo, Josefa ga waperere situmbukira esi va mu pere. (Gen. 41:37-44; 45:4-8) Ngomu ono kupita momaudigu gomanene, hundira unongo nononkondo kwaKarunga ntani rugana nokuuyunga nombili novakweni. Jehova nga ku vatera.—Resa 1 Peturusa 5:10.

14, 15. (a) Morwasinke natu ‘takamesera’ omu atu zuvhisa? (b) Ngapi omu no vhura kuzuvhisa kuliza nomaukaro? (Tara efano pepenuno 20 ntani kakende “ Kuvhura o heteke nkedi zapeke mokuzuvhisa ndi?”)

¹⁴ Paurusa kwa korangedere Timoteusa asi: “Kovekeda ngorooro kuresa matjangwa nkenye apa, oku to korangeda nokuronga. . . . O litakamese nyamoge nerongo lyoge.” (1 Tim. 4:13, 16) Timoteusa ga kere nare noudivi wokuzuvhisa. Nye mokumutompoka, ga hepere ‘kutakamesa’ erongo lyendi. Age ga hepere kudiva asi vantu kapi tupu tava mu purakene pokuruganesa ndongeseso zokulifana. Mokuguma nomutjima dawo ga hepere kuruganesa nondongeseso dokulisiga-siga mokuronga vantu kuliza noukaro wawo. Ngovazuvhisi twa hepa kurugana yokulifana.

¹⁵ Apa atu zuvhisa, pamwe kapi atu gwana vantu momambo. Monomukunda dimwe, mambo gamwe kwa ga kundurukida nomakuma gomare. Nsene yimo ya kara ngoso, papara nonkedi dimwe omu no vhura kuzuvhisa mbudi zongwa.

16. Ngapi omu nayi vhura kututompoka kuzuvhisira mononzira?

¹⁶ Kuzuvhisira mononzira kuna kara nkedi zongwa zokuhanesa mbudi zongwa. Sinzi soNombangi kuna kuvatompoka kuzuvhisira mononzira ntani awo kuna kugwanena mo uwa. Awo kuzuvhisira vantu komavango gokurondera nokoyitanda ntani nokomavango gamwe. Pokuruganesa nondunge, muzuvhisi kuvhura a tameke nzogera nomuntu pokutumbura eyi yina kuhoroka momukunda ndi pokupandadeka vana vendi ndi pokumupura kuhamena yirugana yendi. Ngomu  zina kutwikira nzogera, muzuvhisi ta tumbura sitwa somoBibeli esi na si tumangeda muntu a limburure. Elimbururo eli na gava ta li va twaredesa va zogere momunene kuhamena Bibeli.

17, 18. (a) Yisinke nayi vhura kukuvatera o dire kukara nowoma kuzuvhisira mononzira? (b) Morwasinke nkareso zaNdafita zokuhamberera Jehova nazi karera nomulyo kwetu apa atu zuvhisa?

¹⁷ Nsene kukudigopera kuzuvhisira mononzira, wa ha fa unye. Eddie, muzuvhisi gokukarerera gomoAmerika kwa kere nowoma wokuzuvhisira vantu mononzira. Mwaza siruwo woma tau ya mu pu. Yisinke ya mu vaterere? Age kwa tanta asi: “Poukareli wepata, name namukadange ngatu rugana mapaparo mokugwana malimbururo komapuro aga va hara kupura vantu. Ntani ngatu pura magano kovazuvhisi vakwetu.” Eddie ngesi kuna kuhafera kuzuvhisira mononzira.

¹⁸ Apa ngo kara noudivi nouradi wokuzuvhisa mbudi zongwa, kukura koge ngava ku mona navenye. (Resa 1 Timoteusa 4:15.) Ntani ngo ya vhura kuhamberera Guhyetu gemeguru ngwendi moomu ga yi rugene Ndafita apa ga dimbire asi: “Ame kuna hara ngani pandure nkenye apa HOMPA; kapi ngani tuda kumupandura. Ame ngani mu pandwira eyi ga rugana; ava va linunupika ngava yi zuvha, tava hafa.” (Epis. 34:1, 2) Morwa yirugana yoge yokuzuvhisa, valinunupiki ngava lipakerera nove moukareli wousili.

19. Morwasinke mukareli gwaJehova gokulimburukwa na kara ana hafa nampili momaukaro goudigu?

¹⁹ Ndafita kwa dimbire hena asi: “Yisitwa yoge nayinye, HOMPA, ngayi ku hamberera, ano vantu woge ngava ku pandura! Awo ngava uyunga youyerere wountungi woge, va sanseke nonkondo doge, nkumwe ngava divire po vantu navenye yirugana yoge yononkondo, nefumano lyouyerere wountungi woge.” (Epis. 145:10-12) Vakareli vaJehova wokulimburukwa yimo ava lizuvhu ngoso. Ngapi nsene pamwe kapi o pwaga mokuzuvhisa morwa uvera ndi ukurupe? Diworoka asi apa o zuvhisire nesa ndi ndokotora, ove kuna kuyererepeka Karunga. Nsene asi ove kuna kara modorongo morwa epuliro lyoge, ove nampo kuzuvhisa apa o gwana mpito ano ayo kuhafesa Jehova. (Yis. 27:11) Mokulifana, nsene asi ove kwa kwara muntu ogu ga kara noukareli wapeke, twikira kunkondopeka elikwatakano lyoge naJehova. (1 Pet. 3:1-4) Nampili momaukaro goudigu kuvhura o yererepeke Jehova nokutura po ezokomeho.

20, 21. Nsene o tura po ezokomeho, ngapi omu nayi kundama wopeke?

²⁰ Jehova nga ku tungika nsene o twikira kutura po ezokomeho. Pokutura po marunduruko meparu lyoge kuvhura o lihameke mo unene mokutantera ko vantu ava vana hara kudiva usili kuhamena Karunga. Ntani vapuli vakweni ngava gwanena mo mauwa nsene o tura po ezokomeho nokulizambera. Morwa elituromo lyoge lyokuvatera mbungakriste, ava va hara Jehova ngava kuhara nokukuhafera nokukukwatesa ko.

²¹ Nampili kwa karera Jehova nomvhura dononzi ndi makwedi gongandi, natuvenye kuvhura kutura po ezokomeho moukareli wendi. Nye ngapi Vakriste va kura pampepo nava vatera wovape va ture po ezokomeho? Ngatu ka yi zogera mosirongwa sokukwama ko.