1, 2. Morwasinke natu dewira wopeke moyirugana yomombungakriste?

KUZUVHISA mbudi zongwa zoUhompa kwa kere sirugana somulyo po kwaJesus. Nampili ngoso, ga li tulilire po siruwo sokudeura wopeke va kare vapitisili novarongi. (Mat. 10:5-7) Filipusa nage nga zuvhisa unene, nye ga vaterere vana vendi wovakadona va dive omu nava ronga wopeke. (Yirug. 21:8, 9) Ngapi edeuro olyo lina kara nomulyo naina?

² Mouzuni mudima, sivaro sovantu ava vana kutambura mbudi zongwa kuna kuligwederera. Vazuvhisi wovape ava va dira kugwana ekuho, simpe vana hepa kukwata egano mulyo gwelirongo lyavene lyoBibeli. Va hepa hena kuvaronga omu nava zuvhisa mbudi zongwa nokuronga wopeke. Monombungakriste, vanavazinyetugara va hepa kuvakorangeda va rugane unene yipo va wapere kukara vakwafimbunga novakuronambunga. ‘Pokuronga nawa,’ Vakriste ava va kura pampepo kuvhura kuvatera wovape va ture po ezokomeho.—Yis. 4:2.

3, 4. (a) Yisinke ga uyungire Paurusa eyi twa hepa kurugana yipo yi tu tompoke mokuzuvhisa? (b) Komeho tu korangede varongwa vetu va kare nelirongo lyavene lyoBibeli, yisinke twa hepa kurugana nyamwetu?

³ Morwasinke elirongo lyanyamwetu lyoBibeli lya karera nomulyo? Elimbururo kuligwana mononkango daPaurusa edi ga tanterere Vakriste womoKorosi. Age kwa tjenge asi: “Kapi twa tuda hena kumukandererera. Ose kuhundira asi Karunga a mu zwide ediwo lyompango zendi monondunge nomounongo naunye wopampepo. One ntani nye ngomu wapa kukara moomu ga hara Hompa, tomu rugana nkenye apa yokumuhafesa. One ngomu yima yiyimwa yoyirugana nayinye yoyiwa moukaro weni oku tomu kuru mediwo lyokudiva Karunga.” (Koros. 1:9, 10) Pokukara nediwo, Vakriste womoKorosi ngano va vhulire ‘kukara moomu ga hara Hompa, nokurugana nkenye apa yokumuhafesa.’ Ntani ngano va vhulire ‘kuyima yiyimwa yoyirugana nayinye yoyiwa,’ unene po mokuzuvhisa mbudi zongwa. Mokuninka asi muntu yi mu tompoke kukarera Jehova, ga hepa kukara nelikwamo lyokulironga Bibeli. Yipo nye, twa hepa kuvatera varongwa vetu woBibeli va dive mulyo gokukara nelikwamo olyo.

⁴ Nye komeho tu vatere wopeke va gwanene mo uwa melirongo lyoBibeli lyavene, pomuhowo nyamwetu twa hepa kumona mulyo gokulironga. Twa hepa kukara nelikwamo lyelirongo lyoBibeli. Kuvhura o lipure asi: ‘Nsene vamwe tava uyunga yininke yokulilimba noBibeli ndi va pure mapuro goudigu, kuvhura ni gave malimbururo gokutundilira moBibeli ndi? Apa ani resa kuhamena Jesus naPaurusa ntani wopeke ava va kovekedere mokuzuvhisa, name kugazadara ko omu etokomeno lyawo nali kundama ukareli wange kwaJehova ndi?’ Natuvenye twa hepa ediwo nomapukururo gokutunda moNonkango daKarunga. Nsene tu tantera ko wopeke mauwa aga twa gwanena mo melirongo lyanyamwetu lyoBibeli, kuvhura kuvakorangeda nawo va gwanene mo uwa pokulitura mo melirongo lyavene.

5. Gava magano omu no vatera murongwa goBibeli a kare nelirongo lyamwene lyoBibeli.

⁵ Kuvhura o lipure asi: ‘Ngapi nani deura murongwa gwange ali ronge Bibeli nkenye ezuva?’ Pomuhowo mu likida omu na liwapaikira simbapiratjangwa esi omu lirongo nendi. Kuvhura o mu korangede a rese magwederero ko mobuke Yinke azi rongo Bibeli sili? nokuresa matjangwa aga va tura mo. Mu vatera a liwapaikire yokomapongo yipo a ka gave malimbururo. Mu korangeda a rese yifo yoRuhungu ntani Awake! Nsene Watchtower Library ndi BIBILIYOTEKA ZOKOINTERNETA mozili meraka lyawo kuvhura omu likide omu nazi ruganesa a limburure mapuro gokuhamena koBibeli. Morwa evatero lyangoso, murongwa nga hafera  elirongo lyamwene lyoBibeli.

6. (a) Ngapi no vhura kuvatera murongwa goge a kare neharo lyokulironga Bibeli? (b) Yisinke nga vhura kurugana murongwa nsene a tunga po eharo lyokuhara Bibeli?

⁶ Kapisi tu sininike vantu va rese ndi va lironge Bibeli. Nye twa hepa kuruganesa yiruganeso eyi azi gava mbunga zaJehova tu vatere varongwa vetu va nkondopeke eharo lyawo lyokuhara Bibeli. Mwaza siruwo, murongwa nga kara neharo lyokulironga, nga lizuvha ngwendi mutjangi gEpisarome ogu ga dimbire asi: “Yoyiwa po kwange ame, yokukara pepi naKarunga! HOMPA Karunga yige a popere nge.” (Epis. 73:28) Nsene murongwa a litura mo nokukara neharo lyokulironga Bibeli, mpepo zaJehova ngazi mu vatera.

7. Ngapi Jesus ga dewire vapositoli va zuvhise mbudi zongwa? (Tara efano pepenuno 25.)

⁷ MwaMateusa egaununo 10, kwa kara mo mapukururo aga ga geve Jesus kovapositoli vendi 12. Mevango lyokuuyunga yoyinzi, age nga vyukilire positwa. ^[1] Vapositoli kwa purakenene ngomu Jesus gava rongere omu nayi va tompoka mokuzuvhisa. Konyima tava zi va ka zuvhise. Awo va ya kere varongi wovawa morwa va lirongerere ko kwaJesus. (Mat. 11:1) Nose kuvhura kudeura varongwa vetu woBibeli va kare vazuvhisi wovawa wombudi zongwa. Tu konakoneni nonkedi mbali omu natu va vatera.

8, 9. (a) Ngapi omu Jesus nga uyunga novantu mokuzuvhisa? (b) Ngapi natu vatera vazuvhisi wovape va uyunge novantu ngwendi Jesus?

⁸ Uyunga novantu. Jesus nga uyunga novantu nkenye apa kuhamena Uhompa. Pasihonena, age kwa uyungire nomukadi pondjombo zaJakopo ezi za kere pepi nositata Sikara. (Joh. 4:5-30) Jesus kwa uyungire hena naMateusa Revhi, mufutisi gomutero. MoBibeli kapi va uyunga mo yoyinzi kuhamena nzogera zawo, nye Mateusa ga ya kere musikuli gwaJesus. Mateusa ntani navamwe kwa purakenene apa Jesus ga uyungire posipito sosinene membo lyaMateusa.—Mat. 9:9; Ruk. 5:27-39.

⁹ Posikando simwe, Jesus kwa uyungire mombili naNatanayera nampili ngomu ga sensere vantu womoNasareta. Konyima Natanayera ga ya rundwilire magazaro gendi. Ta tokora kupurakena eyi ga rongere Jesus ogu ga tundilire moNasareta. (Joh. 1:46-51) Yipo nye, tuna kara nokonda zongwa zokudeura vazuvhisi wovape va uyunge novantu nombili. ^[2] Ava atu deura ngava hafa pokumona vantu wonomutjima donongwa kuna kutambura mbudi zongwa morwa elituromo lyawo nononkango dawo dombili.

10-12. (a) Ngapi Jesus ga likidire elituromo kowo va tambwire mbudi zongwa? (b) Ngapi natu vatera vazuvhisi wovape va gwederere ko kediwo lyawo lyokuronga?

¹⁰ Likida elituromo. Jesus kwa kere nosiruwo sosisupi mokuzuvhisa. Nye simpe ga litulilire po siruwo a vatere ava va likidire eharo kombudi zongwa. Pasihonena, Jesus kwa rongere mbunga age ana hingire mowato. Posiruwo sina, age ga rugene sitetu pokuninka Peturusa a kwate nomfi dononzi nokumutantera asi: “Kutunda apa, ove ngo kwata nye vantu.” Yisinke ya tundire mo merongo nomoyirugana yaJesus? Peturusa novakwawo ‘tava hegeke mawato gawo makura nayinye tava zumbu, va kwame Jesus.’—Ruk. 5:1-11.

¹¹ Nikodemusa, esimbi limwe lyoVajuda, kwa here eyi nga rongo Jesus. Age kwa here kudiva ko yoyinzi, nye kwa kere  nowoma kweyi nava uyunga wopeke nsene va mu mona kuna kuuyunga naJesus moyitarameho. Jesus ga ruganesere siruwo sendi ta zi kwaNikodemusa masiku. (Joh. 3:1, 2) Yisinke natu lirongera ko kosihorokwa oso? MunwaKarunga ga litulilire po siruwo sokuvatera wopeke va nkondopeke epuro lyawo. Nose twa hepa kulitura mo unene mokurugana matengwiro po ntani nokuronga ava vana kulikida elituromo.

¹² Vazuvhisi wovape kuvhura kugwederera kediwo lyawo ngovarongi woBibeli nsene tu rugana nawo mokuzuvhisa. Kuvhura hena tu va vatere va tengwire ko kovantu ava vana kulikida elituromo. Kuvhura tu pure vazuvhisi wovape tu ze nawo komatengwiro po ntani kovarongwa vetu woBibeli. Nsene tu va deura nokuvakorangeda, awo ngava vhura kurugana matengwiro po nomalirongo goBibeli pwavelike. Ntani awo kapi ngava li teka usimbu nye ngava likida yiyimwa yompepo nokukovekeda mokuzuvhisa.—Gar. 5:22; tara kakende, “ Kukovekeda mulyo unene.”

13, 14. (a) Ngapi ono kulizuvha kuhamena yihonena yomoBibeli ya va va lizamberere mokuvatera vapuli vakwawo? (b) Mononkedi musinke no vhura kudeura vazuvhisi wovape novadinkantu va likide eharo kovapuli vakwawo?

¹³ Yihorokwa yomoBibeli kwa nkondopeka mo situmbukira esi twa kara naso ‘sokuhara vakwetu’ ntani nokuvavatera. (Resa 1 Peturusa 1:22; Rukasa 22:24-27.) MunwaKarunga kwa geve eparu lyendi mokuvatera wopeke. (Mat. 20:28) Dorokasa “nga rugana yirugana yoyinzi yoyiwa.” (Yirug. 9:36, 39) Mariya ogu ga kere moRoma, nga ‘rugana unene’ mombungakriste. (Rom. 16:6) Ngapi omu natu vatera vazuvhisi wovape va dimburure mulyo gokuvatera vapuli vakwawo?

¹⁴ Ava va kura pampepo kuvhura va pure vazuvhisi wovape va ze nawo pokukadingura vaveli novakurupe. Pasihonena, vakurona kuvhura va simbe vana vawo apa nava ka dingura vaveli ndi vakurupe. Vakuronambunga kuvhura va ruganene kumwe nava womombungakriste mokuvatera vakurupe nokudivilisa asi vana kara nonondya ntani mambo gawo gana zere. Monkedi ozo vadinkantu novazuvhisi wovape kuvhura ngava lironge mokuvatera wopeke. Mukuronambunga gumwe apa nga zi mokuzuvhisa nga dingura pausupi vanavazina ava va tungire momukunda ogu nga zuvhisire. Munazinyetugara gomudinkantu ogu nga zi nendi pamwe, kwa lirongerere ko asi navenye womombungakriste va hepa kulizuvha asi kwa va hara.—Rom. 12:10.

15. Morwasinke yina karere nomulyo kovakuronambunga va liture mo mezokomeho lyovanavazinyetugara?

¹⁵ Morwa Jehova kuruganesa vagara mokuronga mombungakriste, ayo ya kara nomulyo kovanavazinyetugara va liyomberese kuuyunga nawa. Ngomukuronambunga, kuvhura o purakene omu mukwafimbunga ana kuliyomberesa siuyungwa sendi. -Nevatero lyoge, age nga gwederera ko kediwo lyendi lyokuronga Nonkango daKarunga.—Neh. 8:8. ^[3]

16, 17. (a) Ngapi Paurusa ga likidire elituromo mezokomeho lyaTimoteusa? (b) Ngapi omu vakuronambunga nava deura ava ngava kara vapitisili mombungakriste?

¹⁶ Monombungakriste kuna hepa mo unene vapitisili, ntani ava ngava kara vapitisili ngava hepa edeuro. Paurusa ga geve egano omu nava rugana edeuro olyo apa ga tanterere Timoteusa asi: “Ove munwange, nkondopa konkenda ezi atu gwana momalikwatakano naJesus Kristusa. Nonkango edi wa zuvha kwange ado nondipo dononzi kuna  kutara, di gava kovagara wokuvhura kuhuguvara, nawo ngava vhure hena kudironga vakwaawo.” (2 Tim. 2:1, 2) Apa ngava rugana kumwe, Timoteusa ga lirongerere ko kwaPaurusa ogu ga kere mupositoli nomukuronambunga. Makura Timoteusa nga ruganesa mokuzuvhisa nomombungakriste eyi ga lirongere kwaPaurusa.—2 Tim. 3:10-12.

¹⁷ Paurusa kapi ga sigililire Timoteusa a lironge mwene. Nye nga zi nage morugendo rwendi. (Yirug. 16:1-5) Vakuronambunga kuvhura va honene Paurusa pokuza novakwafimbunga wokuwapera pokukagava ekorangedo kwagumwe gomombungakriste. Monkedi zangoso, vakwafimbunga ngava vhura kutunga po yikara eyi ga hepa kukara nayo mupitisili ngwendi kudiva kuronga nokukara nepuro nelididimikiro ntani eharo. Ezi kuna kara nkedi zokudeura ava ngava kara vapitisili “wosiunda saKarunga.”—1 Pet. 5:2.

18. Morwasinke nayi karera nomulyo kwetu kudeura wopeke mosirugana saJehova?

¹⁸ Kudeura wopeke mulyo morwa pana kara hepero zonene mombunga zaJehova. Sihonena esi ga tulire po Jesus naPaurusa sokudeura kuna kara nomulyo naina. Jehova ana hara vakareli vendi va va deure nawa moyirugana yomombungakriste. Karunga kwa tu pa situmbukira sokuvatera wovape va kare noudivi wokusikisa mo yirugana yomombungakriste. Ngomu uzuni una kudonapa, nompito dokuzuvhisa mbudi zongwa kuna kuligwederera, ntani edeuro nalyo kuna kara nohepero ntani mulyo.

19. Morwasinke no yi pulira asi nga yi kutompoka nsene o litura mo mokudeura wopeke?

¹⁹ Kudeura wovape kugusa siruwo ntani kuhepa elituromo. Nye Jehova naMunwendi ngava tu vatera nokutupa unongo yipo tu gave edeuro olyo. Ayo nga yi tu hafesa pokumona ava twa vatera kuna ‘kukondja nokurugana unene.’ (1 Tim. 4:10) Ngano nose nyamwetu tu twikire kutura po ezokomeho pampepo mokukarera Jehova.