SIFO soRuhungu 1 Sitarara 1915, kwa singwenene kuhamena yita yokuhova youzuni eyi ya kundamene yirongo yokusika po-30 asi: “Yita yanare kwa kere hansa ko . . . pokuyihetakanesa nomaudigu aga vana kuligwanekera nago moEuropa.” Morwa yita oyo, Ruhungu kwa tente asi: “Yirugana yokuzuvhisa kapi yina kugenda po nawa unene po moNdovesiranda ntani moFransa.”

Morwa yita kwa kundamene uzuni mudima, Valirongo woBibeli kapi va kwete nawa egano asi Mukriste nokulihameka si moyita. Nye, awo va tokomenene kuzuvhisa mbudi zongwa. Wilhelm Hildebrandt kwa here kuzuvhisa, makura ta tura mo ehundiro va mu tumine yitratate The Bible Students Monthly moRufransa. Age kapi ga kere muzuvhisi gokukarerera moFransa nye mukwayita goMundovesi. Age nga gavere yimbapira oyo age ana dwara mudwaro govakwayita woVandovesi mokutetukisa vantu womoFransa.

Nombilive edi ngava tjanga moRuhungu kwa likidire asi Valirongi woBibeli vamwe woVandovesi nawo kwa kere neharo lyokuzuvhisa mbudi zongwa zoUhompa nye awo vakwayita. Munazinyetu Lemke, ogu ga kere mukwayita kwa divisire asi age kwa vaterere vakwayita vatano. Age kwa tjenge asi: “Nampili omu mosikepa sovakwayita, ame kuna kuzangura mbuto mokuyererepeka Jehova.”

Georg Kayser kwa zire koyita nye apa ga ka tengwire age mukareli gwaKarunga gosili. Ngapi omu ya horokere? Age kwa gwene mbapira koMulirongi goBibeli, ta tambura marongo gousili makura ta hageke kurwa yita. Ta rugana yirugana ya dilire kulikwatakana noyita. Konyima zoyita, age kwa kere muzuvhisi gokukarerera gomupampi nomvhura dononzi.

Nampili ngomu Valirongi woBibeli va dilire kukwata nawa egano kuhamena kudira kulihameka moyita, nkareso zawo za lisigire novantu ava ngava kwatesa ko yita. Apa vanapolitika novampitisili womaukareli ngava litura mo  mokukwatesa ko yita, Valirongi woBibeli awo ngava kwatesa ko “Hompa gombili.” (Jes. 9:6) Nampili ngomu va dilire kukwata nawa egano eyi ya hamena mo mokudira kulihameka moyita awo va kere nepuro lyokupama eli ga pwagesere Mulirongi goBibeli Konrad Mörtter asi: “Ame na lironga moNonkango daKarunga asi Mukriste nokudipaga si.”—Ex. 20:13. *

MoNdovesiranda, Valirongi woBibeli wokupitakana po-20 kwa nyokere kukara vakwayita morwa ezwi lyawo lyokomutjima. Morwa oyo, vamwe ngwendi Gustav Kujath kwa va twere kosipangero soyizaruke nokukavapa nomutji doyizaruke. Hans Hölterhoff, ogu nage ga nyokere kukara mukwayita, kwa mu tulire modorongo omu ga ka nyokere kurugana nkenye sirugana sa likwatakanene noukwayita. Makura vanoneni tava mu pandeke nomaliva dogoro yisupa yendi ta yi kanka. Apa ga dilire kuteza po ulimburukwi wendi, tava mu kumbagere asi tava mu roya. Nye, Hans ga kere ngorooro mulimburukwi.

Vanavazinyetu vamwe ava va nyokere kukara vakwayita, kwa hundilire va va pe yirugana eyi ya dilire kulikwatana noukwayita. * Johannes Rauthe kwa nyokere kukara mukwayita tava mu tumu a ka rugane korutenda romahina. Konrad Mörtter nga vatere vanesa ano Reinhold Weber kwa kere nesa. August Krafzig kwa hefe morwa yirugana yendi kapi ya hamenene mo kukara mukwayita. Valirongi woBibeli owo ntani navamwe kwa tokomenene kukarera Jehova kuliza nekwatogano lyawo kuhamena eharo ntani ulimburukwi.

Morwa kudira kulihameka moyita, epangero ngali kwama-kwama Valirongi woBibeli. MoNdovesiranda, Valirongi woBibeli kwa va twere kompanguro yikando eyovi morwa kuzuvhisa. Beteli zomoNdovesiranda yipo za tulire po mberewa zeyi yoveta moMagdeburg mokuvatera vanavazinyetu.

Mwaza nomvhura Nombangi daJehova kwa tamekere kukwata nawa egano eyi ya hamena mo mokudira kulihameka moyita. Apa yita yauvali youzuni ya tamekere, awo kwa nyokere kulihameka moyita. Morwa oyo, awo kwa va tere asi nonkore depangero lyoVandovesi makura ngava va hepeke momudona. Nye oyo ngatu ka yi zogera komeho mosirongwa “Upungwiro woyininke yanare.”—Upungwiro woyininke yanare moEuropa.