APA na kere nonomvhura 12 yipo na dimbwilire asi nina kara neyi yomulyo nani vhura kugava. Posigongi simwe, munazinyetugara kwa pulire nge nsene nina hara kuzuvhisa. Tani ninki asi “nhi,” nye siruwo oso kapi na zuvhisa rumwe. Apa na pwege nendi ta pe nge nobuke kuhamena Uhompa waKarunga. Makura ta tantere nge asi: “Ove to zuvhisire ruha oru ame ruha rokukwamako.” Nampili ngomu na kere nowoma, tani zi momambo, ano nobuke nadinye da ka pwire kugava. Ayo kwa likidire asi vantu va di haferere.

Ame kwa hampurukilire nge moIngiranda momukunda gwaKent momvhura 1923. Posiruwo sina vantu kapi va hefe, morwa epangero kapi lya sikisire mo etumbwidiro lyokureta mbili konyima zoyita eyi ya horokere. Vakondi vange nawo kapi va hefe morwa vampitisili woukareli woVabatista kwa kondjerere tupu uwa wavene. Apa na kere nonomvhura 9, onane yipo va tamekere kuza komapongo goNombangi daJehova. Munazinyetukadi gumwe nga tu rongo ose vanona yirongwa yomoBibeli ntani buke The Harp of God. Ame na haferere eyi ngani lirongo.

Ngomudinkantu ngani hafere kuronga vantu Nonkango daKarunga. Nampili ngomu poyiruwo yimwe ngani zuvhisa nyamelike, nye na lirongerere ko pokuzuvhisa navamwe. Pasihonena, ezuva limwe apa twa zire mokuzuvhisa nonombasikora namunazinyetugara gomukondi, tatu lipiti nomumpitisili gongereka makura tani uyunga asi: “Tara sina sikombo.” Munazinyetugara ta sikameke mbasikora zendi ta ninki nge tu hingire. Ta pura nge asi: “Yilye ga ku pa nonkondo dokupangura muntu asi sikombo? Ose yetu ko yokutwarera vantu mbudi zongwa ano Jehova yige a pangura.” Ame na ya lirongere ruhafo aru tundu mokugava.—Mat. 25:31-33; Yirug. 20:35.

Munazinyetugara gumwe ga rongere nge hena asi pokugwana ruhafo pamwe wa hepa kulididimikira maudigu. Mukadendi kapi ga here Nombangi daJehova. Ezuva limwe apa twa mene kuzuvhisa namunazinyetu ogo tatu kembo lyendi. Mukadendi kwa handukire unene tatu zugumanga yindjato yotiye morwa mugara gwendi kwa zire mokuzuvhisa. Mevango lyokutugumukira  mukadendi, age ta toragura yindjato oyo a yi tengwidire mosipako. Morwa kulididimika, konyima zonomvhura dongandi mukadendi ta ya gwana ekuho ngagumwe goNombangi daJehova.

Eharo lyange lyokutantera ko vantu kuhamena meho zetu tali nkondopara, makura name nonane tatu gwana ekuho mwaNsinano momvhura 1940. Momvhura 1939 mwaSitarara, sirongo saBritania kwa rwire yita nosirongo saNdovesiranda ame opo nomvhura dange 16. Momvhura 1940 mwaPembagona, ame kwa mwene vakwayita wokuguva vana kupita momaroli. Awo kwa ka tundire koyita. Awo kapi va kere nehuguvaro makura ame kwa here kuvatantera ko kuhamena Uhompa waKarunga. Momvhura zoozo, noboma ngadi hanuka mosirongo. Nkenye masiku, ngani tarere omu vakwayita woVandovesi ngava wiza momukunda gwetu. Ehanuko lyonoboma ngali tu retere utjirwe. Ngurangura apa ngatu zi mokuzuvhisa, ngatu mono omu mambo gana zonauka. Yipo na dimbwilire asi Uhompa waKarunga yiwo welike wokugusa po maudigu.

Momvhura 1941 yipo na tamekere nosirugana esi sa retera nge ruhafo. Pomuhowo ngani rugana kevango oku ngava pangere yikepa, azo kwa kere posa zongwa. NgoNombangi daJehova twa kwete egano asi Vakriste nokulihamekasi moyita. Momvhura 1941 yipo twa ya divire asi kapi tatu rugana mofabilika ezi azi rugana yirwiso. (Joh. 18:36) Oku ngani rugana tava ya tameke kupangera yikepa yomomema yokuza koyita. Yipo na hagekere yirugana yange makura tani tameka sirugana sokuzuvhisa siruwo nasinye. Ame kwa tumine nge ni ka zuvhisire komukunda gwaCirencester.

Apa na kere nonomvhura 18, tava tura nge modorongo makwedi 9 morwa kwa nyokere kukara mukwayita. Ame kwa kere nowoma apa va zedilire nge nyamelike modorongo. Nye apa vanomeni novanadorongo va pulire nge eyi va tulilire nge modorongo, ame kwa hefe kuvafatwilira epuliro lyange.

Apa na pwege modorongo, kwa pulire nge ni ka zuvhise kumwe naLeonard Smith * momukunda gwetu Kent. Kutundilira momvhura 1944, mayovi gonoboma ngadi hanuka momukunda gwetu. Ose kwa tungire kevango oku ngadi hanuka.  Noboma odo ngava di tumbura asi ntumbavere. Apa ngatu zuvhu muhagaro gomahina, ose twa divire asi boma tazi hanuka. Ngatu rongo Bibeli mugara namukadendi novana vawo vatatu. Poyiruwo yimwe ngatu hingire monda zositafura sosivera mokutupopera nsene nzugo zi mbanduka. Epata olyo lyaya gwene ekuho.

Apa ya hege yita, tani ka zuvhisira nomvhura mbali moIliranda. Kapi twa yi ndindilire asi vantu womoIliranda va lisiga nava womoIngiranda. Apa ngatu zi momambo tu papare mararo, ngatu va tantere asi ose vatumwa ntani mositarata ngatu pe vantu yifo yetu. Aso kwa kere sirongo soVakatolika. Apa mugara gumwe ga tu homokerere, tani ka mu rapota komuporosi ogu ga tente asi: “Yisinke nani rugana ko ame?” Kapi twa yi divire asi varuti yiwo va kere nononkondo mosirongo oso. Awo ngava tjidisa vantu moyirugana apa ngava tambura yifo yetu ntani ngava tu tjida mo momambo omu ngatu rara.

Apa ngatu zi komukunda sikando sokuhova, ose ngatu tameke kukazuvhisira kevango lyapeke oku kwa kere muruti gwapeke. Moruhura ntani ngatu zuvhisire popepi. Momukunda gwaKilkenny, ngatu lirongo nomugara rutatu mosivike nampili ngomu ngatu ligwanekere nomahomokero. Ame kwa haferere kuronga vantu Bibeli yipo na tokwere kutura mo ehundiro lyokuza kosikora zaGiliyata.

Konyima zokudimba Sikora zaGiliyata makwedi gatano, name novakwetu vatatu tava tu tumu koyirudi yefuta lyaCaribbean. Momvhura 1948 mwaMangundu, yipo nye twa rondere sikepa sedina Sibia. Ame kwa hefe unene morwa aso kwa kere sikando sange sokuhova kugendera mosikepa. Gust Maki yige ga tu singire. Age kwa kere noudivi wounene, makura tatu rongo yimwe eyi ya hamena mo mokusinga sikepa. Nampili ngomu kwa kere mpepo zonene, Maki kwa singire sikepa mazuva 30 dogoro tatu ka sika koBahamasi.

Konyima zokuzuvhisira makwedi gongandi poyirudi yaBahamasi, tatu twikire norugendo rwetu koyirudi yaLeeward ntani yaWindward, eyi ya kara pokatji kaPuerto Rico ntani Trinidad. Ure wonomvhura ntano, ose kwa zuvhisilire unene po poyirudi oku va dilire kukara Nombangi daJehova. Pamwe ngapa piti yivike twa hana kutuma ndi kugwana nombilive. Nye ose kwa hefe kuzuvhisira vantu wopoyirudi nonkango daJehova.—Jer. 31:10.

Apa ngatu hege pezenga, vantu ngava tetuka ntani ngava wiza va ya tare. Vamwe kapi va mona rumwe sikepa ndi sirumbu. Vantu wopoyirudi kwa kere wombili ava va divire Bibeli. Pamwe nga va tu pe nomfi, avokado nonondongo. Nampili ngomu sikepa setu sa kere sinunu, mwa kere evango lyokurara, lyokuterekera ntani lyokukuhwira.

Ose ngatu zuvhisa ezuva nalinye. Ntani ngatu tantere vantu asi kongurova tatu  kara nosiuyungwa somoBibeli. Apa nga ru siki mo ruveze ngatu toona ngenzo. Ayo ngayi tu hafesa pokumona omu vantu vana kuwiza. Noramba dawo domaholi ngadi moneka ngwendi nombungururu dina kutema. Poyiruwo yimwe vantu efere ngava wiza ntani ngava kara siruwo sosire va tu pure mapuro. Awo kwa here kudimba makura ngatu va pe yimbapira yomarusumo getu goUhompa. Name novakwetu ngatu tongwenene ano awo ngava lipakerere kudimba nose. Ame ngani hafere yiruwo oyo.

Apa ngatu mana kulironga Bibeli navamwe, awo ngava tu sindikire ko komambo gapeke yipo nawo va ka hingire pelirongo olyo. Apa ngatu twikire norugendo rwetu, ose ngatu rekere ava va likidire elituromo va twikire kulironga novakwawo dogoro ngatu ka tengure. Ayo ya tu hafesere pokumona omu vamwe ngava sikisa mo eyi ngatu va rekere.

Naina sinzi soyirudi oyo kuna kara mavango gomawa aga vana kudingura vantu nye pwanare kapi ngava ga pakere mbili. Ose unene po ngatu dugu masiku. Ngatu mono nomfi donene omu dina kuzoga konontere dosikepa setu ntani nokuzuvha muhagaro gosikepa omu sina kugenda pomema. Apa kwedi ngaku tema, ngatu mono omu uzera una livarara mefuta.

Konyima zonomvhura ntano zokuzuvhisira poyirudi, tatu zi koPuerto Rico tu ka gwane ko sikepa sa kara noindjina. Apa twa ka sikire tani ka lidiva namunazinyetukadi gedina Maxine Boyd, age kwa kere mutumwa. Age kwa kere muzuvhisi gomupampi kutundilira unona wendi. Age kwa mu tumine kosirongo saDominican Republic dogoro momvhura 1950 apa epangero lyaVakatolika lya mu tjidire mo. Ame kwa gwene peremeta zokwedi moPuerto Rico. Kutunda opo, ose ngano twa hepere kuza koyirudi yapeke nomvhura dongandi. Ame tani lipura asi: ‘Ronald, nsene asi ono hara ogu mukadi, rugana ko yuma ngesi.’ Konyima zoyivike yitatu tani mu dwareke linga ano konyima zoyivike ntazimwe tatu likwara. Name naMaxine tava tu ninki tu kare vatumwa moPuerto Rico makura kapi na zire hena novakwetu mosikepa sosipe.

Momvhura 1956 yipo twa tamekere sirugana sokudingura nombungakriste. Sinzi sovanavazinyetu ava ngatu dingura kwa kere nohepwe, nye twa here kuvadingura. Pasihonena, momukunda gwaPotala Pastillo, mwa kere mapata gavali goNombangi daJehova omu mwa kere novanona wovanzi ano ame ngani va sikire nsiva. Ezuva limwe tani pura mukadona gedina Hilda nsene ana hara kuza nose mokuzuvhisa. Age ta tanta asi: “Nina hara, nye ame kwato nonkaku.” Yipo twa mu randerere nonkaku makura ta zi nose mokuzuvhisa. Momvhura 1972, apa twa zire tu ka dingure koBeteli zokoAmerika, munazinyetukadi gumwe tatu hedere. Age kwa mene sikora zaGiliyata ano kwa mu tumine koEcuador. Makura tatu pura asi: “Muna dimburura nge ndi? Nyame gwina mukadona gomoPastillo mwa randerere nonkaku.” Ose kwa lilire noruhafo apa twa dimbwilire asi yige Hilda.

Momvhura 1960 tava tu zigida tu ka rugane koBeteli zaPuerto Rico ezi za kere momukunda gwaSan Juan. Pomuhowo, name naLennart Johnson nyose ngatu rugana yirugana nayinye. Nage namukadendi yiwo vatumwa wokuhova moDominican Republic ano koPuerto Rico kwa zire ko momvhura 1957. Konyima, Maxine nga rongere yifo eyi ngava hundire vantu, pamwe mosivike nga gwana mahundiro gokupitakana eyovi. Age kwa haferere sirugana oso morwa nga gazara vantu ava ngava gwana yifo oyo.

Ame kuhafera sirugana somoBeteli morwa kwa hamena mo kugava. Nye namo kuligwanekera mo nomaudigu. Pasihonena, apa twa kere nosigongi sosinene sokuhova moPuerto Rico momvhura 1967, ame kwa lizuvhire asi yirugana yina vhukire nge. Nathan Knorr ogu nga pitisire mbunga zoNombangi daJehova posiruwo sina, kwa wizire koPuerto Rico. Age kwa gazarere asi kapi na wapaikilire ugendero vatumwa ava va wizire, nye ame na yi rugene. Konyima ta ya tantere nge asi kapi ya mu hafesere omu na gendesere yininke. Kapi na mu limbwilire momudona, nye kapi ya hafesere nge eyi ga uyungilire nge. Nampili ngoso, name namukadange apa twa ya ligwene nendi sikando simwe, tatu zigida monzugo zendi ta ka tu terekera nondya.

Apa twa kere moPuerto Rico ngani zi ni ka dingure vakondi vange koIngiranda. Apa name noyina twa lirongere Bibeli, otate kapi va lirongere.  Nye apa vanavazinyetu wokoBeteli ngava zi va ka gave yiuyungwa, oyina ngava va pe mararo. Otate va mwene nkareso zokulinunupika zovanavazinyetu owo ezi za lisigire nezi zovampitisili wonongereka. Momvhura 1962, otate yipo va gwene ekuho ngagumwe goNombangi daJehova.

Mukadange Maxine kwa dogoroka momvhura 2011. Ame kuna kundindira nononkondo mokukamumona hena pevhumbuko. Alyo ehuguvaro lyewa sili. Nomvhura 58 edi twa rugene kumwe namukadange, twa mwene omu vantu vaJehova va ligwederere moPuerto Rico kutunda kosivaro 650 dogoro 26 000. Momvhura 2013, Beteli zaPuerto Rico kwa zi pakerere kumwe nezi zaAmerika makura ame kwa zigidire nge ni ka rugane koWallkill, moAmerika. Ame na kere nowoma kuza kosirongo sosinene morwa na yikire kukara posirudi ure wonomvhura 60. Nye na hepere kuza.

Ame simpe kuna kuhafera kukarera Karunga koBeteli. Nomvhura dange ngesi dina pitakana po-90 ano situmbukira sange kuna kara sokugava ekorangedo kwa va va kara moBeteli. Kutunda apa na tamekere kurugana koWallkill ame kwa korangeda vantu wokupitakana po-600. Vamwe kuwiza va ya tantere nge maudigu gawo ndi gemepata. Vamwe kupura nge magano omu nava hafera sirugana sawo somoBeteli. Ano valikwali vamwe wovape kupura nge magano gomononkwara. Vamwe womoBeteli ava ava tumu va ka kare vazuvhisi wokukarera nawo kuwizira nge. Ame kupurakena navenye ava ava wizire nge ntani ame pamwe kuvatantera asi: “‘Karunga kwa hara ava ava gava neharo lyewa.’ Hafera sirugana soge. Jehova ono kusiruganena.”—2 Kol. 9:7.

Mokuninka asi o hafere sirugana soge koBeteli: Wa hepa kudiva konda zeyi ono kurugana ntani mulyo gosirugana oso.  Yirugana nayinye yokoBeteli kwa pongoka. Nayinye kukwatesa ko “mukareli gokulimburukwa gonondunge” a gave nondya dopampepo kovanavazinyetu uzuni mudima. (Mat. 24:45) Nkenye sirugana atu mu ruganene Jehova, kutupa mpito zokumuyererepeka. Tu hafereni nkenye sirugana ana kutupa, morwa “Karunga kwa hara ava ava gava neharo lyewa.”