1, 2. (a) Ngapi eharo nepuro ya likwatakana? (b) Mapuro musinke natu ka tarurura?

OSE TWA hara Jehova yeeyi “yige ga hova kutuhara.” (1 Joh. 4:19) Nkedi zimwe omu Jehova atu likida eharo, pokufuta vakareli vendi ava ava tura epuro mwendi. Moomu ngatu mu hara Karunga kapi tupu ngatu pura asi yipo ga kara nye ngatu kara nepuro lyokupama asi age kufuta ava va mu hara.—Resa Vahebeli 11:6.

² Sininke somulyo esi a rugana Jehova kuna kara kufuta vakareli vendi. Epuro lyetu kapi tali tanta yuma ntudi tu pure nawa-nawa asi Karunga yige a futu ava ava mu papara morwa “epuro yilyo ehuguvaro lya pama lyoyininke eyi twa ndindira.” (Heb. 11:1) Epuro kwa hamena mo kukara nehuguvaro lyapama momatumbwidiro gaKarunga. Uwa musinke atu gwanene mo mokuhuguvara momatumbwidiro gaKarunga? Ngapi omu Jehova ga tungika vakareli vendi vanare nava vantaantani? Tu tareni omu ga yi rugana.

3. Etumbwidiro musinke lya kara mwaMarakiya 3:10?

³ Jehova Karunga kwa tumbwira kufuta vakareli vendi ava ava  tura epuro mwendi. Yiyo nye ana kutukorangedera tu mu ruganene nokuhuguvara asi nga tu tungika. Bibeli kuuyunga asi: “Hetekeni nge, ngomu mone tani zegurura makende geguru ni mu tjukumwine yoyinzi yoyiwa yomarudi nagenye.” (Mara. 3:10) Ose kulikida rupandu rorunene kwaJehova apa atu tambura ezigido lyendi lyokumuheteka.

4. Morwasinke natu huguvarera etumbuwidiro lyaJesus mwaMateusa 6:33?

⁴ Jesus kwa tumbwidilire varongwa vendi asi nsene va tura Uhompa muhowo meparu lyawo, Karunga nga va vatera. (Resa Mateusa 6:33.) Jesus ga vhulire kuuyunga nonkango odo morwa ga divire asi Jehova Karunga nkenye apa kusikisa mo matumbwidiro gendi. (Jes. 55:11) Nose kuvhura tu kare nehuguvaro asi nsene tu likida epuro mwaJehova age nga sikisa mo etumbwidiro lyendi eli asi: “Ame kapi ngani ku zumba ndi ni ku sige.” (Heb. 13:5) Etumbwidiro olyo lyaJehova kutuvatera tu kare nehuguvaro mononkango edi ga uyungire Jesus kuhamena kupapara muhowo Uhompa neyi ga hepa ko Karunga kwetu.

5. Morwasinke elimbururo lyaJesus eli ga geve kwaPeturusa ali nkondopekere epuro lyetu?

⁵ Mupositoli Peturusa kwa pulire Jesus asi: “Ose amesi nayinye twa siga, yiyo atu ku kwama. Yinke eyi ngatu ka gwanena po?” (Mat. 19:27) Jesus kapi ga handukilire Peturusa, nye age kwa tanterere varongwa vendi asi awo ngava va futa morwa elizambero lyawo. Vapositoli wovalimburukwi novantu vamwe ngava ka pangera naJesus meguru. Nye nampili ngesi varongwa vaJesus kuna kugwana matungiko. Jesus kwa uyungire asi: “Nkenye ogu a sigi embo lyawo ndi vakuru vendi ndi mumbyendi ndi mpanzedi ndi oguhwe nozina  ndi vana vendi nepya lyendi morwedina lyange, age nga gwanena po yokuvhura porwefere, hena nga ka gwanena po mwenyo gwanarunye.” (Mat. 19:29) Matungiko aga ngava gwana varongwa vendi manzi unene kupitakana malizambero aga va tura po. Vaguhya novazinya novakuru novamumbya novana wopampepo ava twa gwana mulyo unene kupitakana yininke eyi twa siga morwa Uhompa.

6. Morwasinke Jehova a tumbwidire vakareli vendi asi ngava futa?

⁶ Pokutumbwidira vakareli vendi asi ngava futa, Jehova kuvavatera va lididimikire apa epuro lyawo ava li heteke. Nampili ngomu vana kuhafera matungiko naina, vakareli vaJehova Karunga ava ava tura epuro mwendi kuna kundindira nononkondo matungiko gomanzi gokomeho. (1 Tim. 4:8) Nsene tu kara nehuguvaro lyokupama asi Jehova ‘kufuta ava ava mu papara’ ngayi tu vatera tu kare tuna koro mepuro.—Heb. 11:6.

7. Ngapi omu ehuguvaro lya kara ngwendi sisikameso sowato?

⁷ Peudiso lyopondundu Jesus kwa uyungire asi: “Omu hafe oku tomu hamberere, yeeyi asi mfeto zeni nene unene meguru. Yimo ngorooro va hepekere sa novaporofete, ava va mu hoverere.” (Mat. 5:12) Kugusa ko owo ngava gwana mfeto zokuza meguru, ehuguvaro lyomwenyo gwanarunye pevhu moparadisa kuninkisa vantu ‘va hafe nokuhamberera.’ (Epis. 37:11; Ruk. 18:30) Yi kare asi ngatu ka parukira meguru ndi pevhu, ehuguvaro lyetu kuvhura kukara ngwendi “sisikameso sowato womwenyo, sa hana malilimbo sa kora.” (Heb. 6:17-20) Ngwendi moomu sisikameso asi vatere wato ndi sikepa si kore posiruwo sekundungu, ehuguvaro lyetu lyokukagwana mfeto kuvhura kutuvatera tu kare tuna pama pamalizuvho panandunge nopampepo. Ehuguvaro kuvhura kutuvatera tu kare nononkondo dokulididimikira maudigu.

8. Ngapi omu ehuguvaro lya kara nononkondo dokusesupika yinka yetu?

⁸ Ehuguvaro eli twa gwana moNonkango daKarunga kwa kara nononkondo dokusesupika yinka yetu. Ngwendi moomu magadi aga ninkisa sipapa sinengene, matumbwidiro gaKarunga nago kutuhengagwida nsene tuna kara noyinka. Ayo kutuhengagwida pokudiva asi Jehova nga tu “kwafa” nsene tu mu ‘twika maudigu getu.’ (Epis. 55:22) Tu kareni nehuguvaro lyokupama asi Karunga “kuvhura kurugana yoyinzi-yoyinzi, kupita nayinye eyi atu hundire neyi atu gazara.” (Efe. 3:20) Diworokeni asi age kapi tupu nga tu pa yoyinzi nye ‘yoyinzi-yoyinzi kupitakanena.’

9. Ngapi tuna yi diva asi Jehova nga tu tungika?

⁹ Mokugwana mfeto, twa hepa kulikida epuro lyenene mwaJehova nokulimburukwa mavyukiso gendi. Mosesa kwa tanterere Vaisraeli asi: “HOMPA Karunga gweni nga mu tungika mosirongo esi nga mu pa. . . nsene ngomu limburukwa kwendi mu kare nosinka sokusikisa mo nayinye eyi nina kumutantera naina. HOMPA ngamu tungika moomu ga yi mu tumbwidira.” (Deut. 15:4-6) Ove wa kara nehuguvaro lyokupama asi Jehova nga ku tungika nsene o twikira kumukarera noulimburukwi ndi? Pwa kara konda zongwa zeyi no karera nehuguvaro olyo.

10, 11. Ngapi omu Jehova ga futire Josefa?

¹⁰ Bibeli kwa zi tjangera tu gwanene mo uwa. Amo kwa kara mo yihorokwa omu Karunga ga futire vakareli vendi wovalimburukwi. (Rom. 15:4) Josefa kuna kara gumwe gwawo. Age kwa mu tulire modorongo moEgipite morwa vakuru vendi kwa mu fililire mfudu ntani mukadaPotifara kwa mu rundilire. Karunga ga mu sigililire ndi? Hawe. ‘HOMPA  pwaJosefa ga kere, ta mu ragopeke . . . HOMPA pwendi ga kere. Age hena nkenye eyi nga rugana, HOMPA ta yi wapeke.’ (Gen. 39:21-23) Momaudigu nagenye ogo, Josefa kwa huguvarere mwaKarunga.

¹¹ Konyima zonomvhura dongandi, Farawo ta pwagesa Josefa modorongo nokumutura a kare mupangeli gwauvali moEgipite. (Gen. 41:1, 37-43) Apa mukadendi ga mu hampurukilire vana vavali, Josefa ta “ruku mbeli zawo Manase (kutanta asi kudivara), yeeyi age kwa tente asi: ‘Karunga ana divaresa nge ruhepo rwange narunye nembo lyotate nalinye.’ Ano gwauvali kwa mu rukire Efurayimi (kutanta asi kukara mvhadi), yeeyi age kwa tente asi: ‘Karunga ana pe nge ruvharo mosirongo soudigu wange.’” (Gen. 41:51, 52) Morwa Josefa ga limburukwire, Karunga ga mu tungikire, makura age ga ya vhulire kuyaparura Vaisraeli noVaegipte kerumbu. Ano Josefa ga yi divire asi Jehova yige ga mu futire nokumutungika.—Gen. 45:5-9.

12. Yisinke ya vaterere Jesus a lididimikire?

¹² Jesus Kristusa nage ga limburukwire kwaKarunga apa epuro lyendi va li hetekere ntani nage va mu futire. Yisinke ya mu vaterere ali didimikire? Nonkango daKarunga kuuyunga asi: ‘Age kwa lididimikire nomfa morwaehafo eli lya mu kere komeho, ga hana kufira mbili nomuga edi da mu reterere.’ (Heb. 12:2) Jesus kwa hefe morwa ga pongwere edina lyaKarunga. Ntani hena, oGuhwe kwa mu futire pokumutambura nokumupa yitumbukira yoyinene. Bibeli kwa uyunga asi age kwa “ka hingira korulyo rwaKarunga.” (Heb. 10:12) Ntani kwa uyunga hena asi: “Karunga yiyo ga mu zerura unene, age yiyo ga mu ruka edina lya pitakana madina nagenye.”—Fil. 2:9.

13, 14. Ngapi omu Jehova a lizuvhu kweyi a tu mu ruganene?

¹³ Tu kareni nehuguvaro asi nkenye eyi atu rugana yipo tu karere Jehova, mulyo kwendi. Age kukwata egano woma ndi masinganyeko aga atu kara nago. Age hena kutufira nkenda nsene yinka yeparu kuna kuturorora ndi uvera kapi una kutupulisira tu lihameke mo unene mokumukarera. Ntani tu kareni nehuguvaro lyenene asi Jehova kapi nga divara eyi ava rugana vakareli vendi yipo va mu limburukwe.—Resa Vahebeli 6:10, 11.

¹⁴ Tu diworokeni asi ose kuvhura kuhedera ‘Muzuvhi gomakanderero’ nehuguvaro asi age nga zuvha yinka yetu. (Epis. 65:2) “Guhya ga zura nkenda, age Karunga ogu a kwafa nkenye apa” nga tu hengangwida nokutupa ekorangedo eli twa hepa nampo pokuruganesa vapuli vakwetu. (2 Kol. 1:3) Jehova kumuhafesa apa atu fire nkenda vakwetu. Bibeli kuuyunga asi: “Nsene o gava konohepere kuna fana ngwendi kwaHOMPA ono kuheheda, nye HOMPA nga ku tengwida kuwoko.” (Yis. 19:17; Mat. 6:3, 4) Yipo nye apa atu vatere ava vana kara moudigu, Jehova kulizuvha ngwendi yige tuna kuyiruganena. Ntani age ga tumbwidira asi ngatu futa koyirugana yetu yoyiwa.

15. Mfeto musinke ono kundindira? (Tara efano pepenuno 24.)

¹⁵ Eyi ayi korangeda Vakriste wovagwaveka kuna kara ehuguvaro lyokukagwana ‘nkata zefundo zouhungami, ezi nga ka va pa  Hompa, Mupanguli gomuhungami mezuva olyo.’ (2 Tim. 4:7, 8) Nampili ngoso, wa ha lizuvha asi ove kwato mulyo morwa asi to ka parukira pevhu. Mamiliyona ‘gononzwi dapeke’ daJesus nawo kuna kundindira nononkondo mokukagwana mfeto zomwenyo gwanarunye pevhu moparadisa. Awo ngava ka “hafera mpora zonene.”—Joh. 10:16; Epis. 37:11.

16. Ehengangwido musinke atu gwana mwa-1 Johanesa 3:19, 20?

¹⁶ Poyiruwo yimwe kuvhura tu lizuvhe asi kapi tuna kuruganena Jehova yoyinzi, ndi asi age kapi a tambura eyi tuna kumuruganena. Ntani kuvhura tu kare nomasinganyeko asi kapi ngatu gwana mfeto. Nye tu diworokeni asi ‘Karunga ga pitakana nomutjima detu, age ga diva nayinye.’ (Resa 1 Johanesa 3:19, 20.) Nampili tu lizuvhe asi yisesu tuna kumuruganena, nye nsene ose kuna kuyirugana nomutjima nagunye morwa twa pura mwendi ntani twa mu hara, age nga ka tu futa.—Mar. 12:41-44.

17. Mauwa musinke tuna kuhafera ngesi?

¹⁷ Jehova kuna kufuta vantu vendi nampili momazuva aga gopouhura gomadona gouzuni waSatana. Age kudivilisa asi vakareli wousili kuna kugwana nkenye apa erongo lyomoBibeli. (Jes. 54:13) Ngamoomu Jesus ga yi tumbwidilire, Jehova kuna kutufuta ngesi pokutuninka tu hame kepata lyenene lyovanavazinyetu wopampepo. (Mar. 10:29, 30) Ntani hena owo ava papara Karunga awo kugwana mbili zomomutjima noruhafo.—Fil. 4:4-7.

18, 19. Ngapi vakareli vaJehova ava lizuvhu kuhamena mauwa aga ava gwana kwendi?

¹⁸ Vakareli vaJehova uzuni mudima kugavera umbangi komauwa aga va gwana kwendi. Pasihonena, Bianca gomoNdovesiranda kwa uyunga asi: “Ame kuna kupandura sili Jehova kweyi ga vatera nge ni lididimikire yinka yange nokuhengagwida nge nkenye ezuva. Mouzuni kuna kara mo epiyagano nomaudigu. Nye apa ani kara pepi naJehova, ame kulizuvha egameno. Nkenye eyi ani mu ruganene Jehova age kutungika nge momunene.”

¹⁹ Tu tareni sihonena saPaula gonomvhura 70 gosirema ogu ga tunga moKanada. Age kwa uyunga asi: “Kukara sirema kapi yina kutanta asi kapi to vhuru kuzuvhisa. Ame kuruganesa nonkedi dononzi yipo ni zuvhise ngwendi koterefona ntani komavango gokulisiga-siga. Ame kugwana ekorangedo pokuresa mobuke omu ani didilike matjangwa nomagano gomoyimbapiratjangwa yetu. Buke ozo kukorangeda nge sili unene. Nsene tu demenena komatumbwidiro gaJehova, ose ngatu tara madompeso asi yininke yopokaruwogona tupu. Yikare asi maudigu musinke twa kara nago, Jehova ga liwapaikira kutuvatera.” Udigu woge kuvhura u lisige nou waBianca ndi waPaula. Nye gazadara ko omu Jehova ga kufuta ntani nomu ga futa wopeke. Ayo kuhengagwida nsene o gazadara ko omu Jehova ana kukufuta ngesi ntani nomu nga ka kufuta komeho.

20. Yisinke ngatu ka gwana nsene tu twikira kukarera Jehova nomutjima nagunye?

²⁰ Diworoka asi pokukanderera kwaKarunga kutundilira komutjima ove ngo ka gwanena mo ‘mfeto zonene.’ Kara nehuguvaro asi nsene ‘o rugana eyi ya za Karunga komutjima, ngava ku pa eyi va ku tumbwidira.’ (Heb. 10:35, 36) Yipo nye tu twikireni kunkondopeka epuro lyetu nokuruganena Jehova nomutjima nagunye, morwa twa yi diva asi mfeto zetu ngatu ka zi gwana kwendi.—Resa Vakorosi 3:23, 24.