Kukuruka ndi kulitura kulikida unongo
Ezuva limwe Antonia kwa zire koyirugana yendi yokutakamesa mukurupe, ta ka ngongora kevero makura ta pwaga ko mukadi. Ano mukadi ogo ta swaura nokuharukira Antonia asi morwa kwa hulilire kuwiza a ya takamese ozina. Nye age kapi ga hulililire. Nampili ngoso Antonia kwa hundilire egusiropo.
SIKANDO sokukwama ko, mukadi ogo ta harukire hena Antonia. Age ngapi ga lizuvhire? Antonia kwa uyunga asi: “Awo kwa kere ukaro woudigu sili. Nonkango edi ga uyungire nondona.” Nampili ngoso, Antonia kwa hundilire egusiropo nokutantera mukadi ogu asi kuna kukwata egano udigu ou ana kupita.
Ngano nyove Antonia, yisinke ngano wa rugene? Ngano wa hetekerere ko kulitura? Ndi ngano wa handukire? Kapi ya kara ureru kulipangera momaukaro gangoso. Nsene maudigu gana tu vhukire ndi gumwe ana tu handukisa, kapi ya kara ureru kukara ono litura.
Bibeli kukorangeda Vakriste va kare vantu wokulitura ndi wokukuruka. Azo kwa kwatakanesa nkareso ozo kumwe nounongo. Jakopo kwa pulire asi: “Opo muna kara, yilye po munongo ndi mukonentu? A horore mekuruko lyounongo yirugana yoyiwa eyi ayi tundu moukaro wendi wouwa.” (Jak. 3:13) Monkedi musinke kukara ono litura ayi likida unongo ou wa tunda meguru? Yisinke nayi vhura kutuvatera tu tunge po sikara oso?
UNONGO WOKUKARA MUNTU GOKULITURA
Kukara muntu gokulitura kumweneka ehandu. “Elimbururo lyombili, kumweneka ehandu, nye lyononkango dehandu, kuhwameka unene ehandu.”—Yis. 15:1.
Nsene o handuka kuvhura kugwederera koudigu. (Yis. 26:21) Nye nsene o litura kureta yitundwamo yoyiwa. Kuvhura kuninkisa muntu ogu ana handuka a liture.
Antonia nage yimo ya mu horokerere. Apa mukadi ga mwene nkareso zaAntonia zokulitura makura ta lili. Age kwa uyungire asi maudigu kwa mu vhukilire. Antonia ta zuvhisire ogo mukadi makura tava tameke kulironga Bibeli morwa nkareso zendi zombili zokulitura.
Kukara muntu gokulitura kureta ruhafo. ‘Vanerago vava va kuruka ndi va litura, yeeyi sirongo yiwo ngava si weka.’—Mat. 5:5.
Morwasinke vantu wokulitura ava karere noruhafo? Sinzi sovantu ava va kere nyanya ngesi vana hafa morwa kwa tunga po nkareso zokulitura. Awo va tura po marunduruko meparu lyawo ntani awo va diva asi meho zongwa zina kuvandindira. (Koros. 3:12) Adolfo, mutareli gonombunga moSipanye, kwa simwitira nkareso ezi ga kere nazo komeho a ya lironge Bibeli.
Adolfo kwa tanta asi: “Kapi na kere nositambo meparu. Ngani handuka usimbu, makura vakwetu vamwe kwa tjilire nge morwa nyanya ezi na kere nazo. Koyili eyi ya horokere eyi na ninikisire nge ni ture po marunduruko. Ezuva limwe kwa rwene makura tava tu nge nombere yikando ntazimwe dogoro kuhara kufa.”
Ngesi Adolfo kuronga wopoke va kare nonkareso zokulitura kupitira mononkango nomosihonena sendi. Wovanzi kumuhafera morwa nkareso zendi zongwa zougomoki. Age ana hafa komarunduruko aga ga tura po. Ntani kuna kupandura Jehova kweyi ga mu vatera a tunge po nkareso zokulitura.
Kukara muntu gokulitura kuhafesa Jehova. “Munwange kara munongo, makura ame tani hafa. Ame ngani limburura nkenye ogu nga pa nge usima.”—Yis. 27:11.
Satana nkore zonene, age kupa Jehova nkenye apa usima. Karunga ga kara nokonda zokuhanduka kweyi a mu swaura Satana, nye Bibeli kuuyunga asi Jehova ‘kapi a handuka usimbu.’ (Epis. 86:15) Apa atu hetekere ko kuhonena nkareso zaKarunga zokulididimika ntani zokulitura, ose ngoso kuna kurugana eyi ayi mu hafesa unene.—Efe. 5:1, 2.
Mouzuni kuna zura mo nyengo. Ose kumona vantu ‘wokulifumadeka vene, wokulinenepeka, woyitjani, wokurundira vakwawo, kapi va paka nkenda ntani woyikotjongana.’ (2 Tim. 3:2, 3) Nampili ngoso, nonkareso odo kapisi di ninkise Mukriste a dire kukara muntu gokulitura. Nonkango daKarunga kututantera asi “unongo ou wa tunda meguru, . . . kwa hara mpora, kwa kara nombili.” (Jak. 3:17) Pokukara nombili, ose kulikida asi twa gwana unongo wokutunda meguru. Unongo owo ngau tu tumangeda tu kare tuna litura nsene gumwe tatu handukisa ntani ngau tu ninkisa tu hedere pepi naJehova ntundiliro zounongo.