KOMEHO otate va ya zumbe oyina ame opo na kere neharo lyokulironga Bibeli. Oyina nga va gwana yimbapiratjangwa yoBibeli ano ame ngani tarururu mo unene po mafano. Otate kapi va here oyina va tantere nge ko eyi ngava lirongo. Nye ame kwa here kudiva ko yuma ntani ngani pura mapuro, makura oyina ngava rongo nge apa otate ngava pili mo membo. Morwa oyo, name yipo na tokwere kuligava kwaJehova. Ame kwa gwene ekuho moIngiranda momukunda gwaBlackpool momvhura 1943, ame opo nomvhura dange murongo.

Kutunda pekuho lyange, name noyina nga tu zuvhisa unene kumwe. Ose ngatu ruganesa nongaramafona. Ado kwa kere mukumo unene nga di viha nokilogarama dokupitakana pwane. Gazareni tupu epupi lyange lina ni damune nongaramafona dokusika opo.

Apa na kere nonomvhura 14 ame kwa here kurugana uzuvhisi wokukarerera. Oyina kwa tanterere nge asi pomuhowo ni pure mutareli gonombunga. Age ta pe nge ko egano asi ni lironge ko udivi umwe yipo  ngani vhure ka lireresa ko mosirugana oso souzuvhisi. Makura tani yi rugana. Konyima zokurugana nomvhura mbali, yipo na tanterere ko mutareli gonombunga gwapeke asi na hara kurugana uzuvhisi wokukarerera. Age ta tantere nge asi: “Nawa tupu.”

Momvhura 1949 mwaKudumogona, name noyina yipo twa randesere yiweka yetu tatu dirukire kodoropa zaMiddleton pepi nositata saManchester makura tatu ka tameka uzuvhisi wokukarerera. Konyima zomakwedi gane, yipo na gwene ko munazinyetugara ogu ngani zuvhisa nendi. Beteli yipo za tu pulire tu dirukire kombungakriste zompe momukunda, Irlam. Oyina nawo va gwene ko munazinyetukadi ogu ngava zuvhisa nendi.

Nampili ngomu na kere nonomvhura 17, name namukwetu kwa tu pere yitumbukira yokupitisira mapongo morwa mombungakriste kapi mwa kere vanavazinyetugara wovanzi wokupitisira. Konyima yipo va tumine nge kombungakriste zaBuxton, omu mwa kere vazuvhisi wovasesu ntani va hepere evatero. Yirugana nayinye oyo kwa dewire nge koyitumbukirwa na ya gwene komeho.

Momvhura 1951 yipo na tulire mo ehundiro lyokukakara moSikora zaGiliyata. Nye momvhura 1952 mwaSindimba, epangero tali zigida nge koukwayita. Tani va tantere asi ame muzuvhisi gosiruwo nasinye, nye mpanguro kapi za yi tambwire oyo makura tava  tomene nge modorongo makwedi ntazimwe. Apa na ka kere modorongo, yipo na gwene ezigido lyokukara moSikora zaGiliyata. Momvhura 1953 mwaPembankuru, yipo na rondere sikepa esi sa zire koAmerika sedina Georgic.

Apa na ka sikire tani ka kara posigongi. Konyima zosigongi tani ka ronda mahina gorutenda ni ze kevango oko sa karere Sikora zaGiliyata. Apa na pwege modorongo kwa kere noyimaliwa yoyisesu. Apa na ka humburukire momahina gorutenda tani rondo mbesa nye kapi na kere noyimaliwa makura tani hundire gumwe a futire nge po.

MoSikora zaGiliyata kwa ka tu rongere ‘tu lize novantu moyikara yawo nayinye’ mosirugana setu soutumwa. (1 Kol. 9:22) Name naPaul Bruun naRaymond Leach kwa tu tumine koFilipine. Konyima zomakwedi gongandi yipo twa gwene mbapira zokutupulisira tu ze kosirongo oso, makura tatu rondo sikepa tu pite moRotterdam, mEfuta lyoPokatji momukanko gwaSuez, mEfuta lyaIndia moMalaysia, ntani moHong Kong. Rugendo oro kwa tu gusire kwedi noharufa. Momazuva 19 Mangundu 1954 yipo twa ka sikire moManila nkurusitata saFilipine.

Tatu ka tameka kukalironga mpo zovantu vamo neraka lyawo. Nye pomuhowo kwa ka tu tulire mombungakriste zomositata saKasoni omu sinzi sovatungi mo ngava uyunga Ruingilisa. Konyima zomakwedi ntazimwe twa divire ko tunkango tumwe meraka lyoRutagalogi. Konyima tatu ya gwana situmbukira sapeke.

Ezuva limwe mwaKudumonkuru 1955 apa twa ka tundire mokuzuvhisa name naMunazinyetu Raymond tatu ya gwana nombilive monzugo zetu. Amo kwa tu divisire mo asi vana tu tura vatareli wonombunga. Ame opo nomvhura dange 22 nye situmbukira oso kwa pere nge mpito ni ‘lize novantu moyikara yawo nayinye.’

Pasihonena, ame kwa geve siuyungwa sange sokuhova ngomutareli gonombunga ponze zositora. Yipo na ya dimbwilire asi azo kwa kere mpo moFilipine mokugavera siuyungwa ponze. Apa ngani dingura nombungakriste ngani gavere yiuyungwa momautara nopomarandesero, ponze zomatungo nokomavango gokupwizumukira ntani moyitarata. Ezuva limwe, mvhura kwa rokere unene mositata saSan Pablo, kapi na vhulire kugava siuyungwa pomarandesero makura tani pura vanavazinyetugara ava ngava pitisire ni ka si gavere moSinyanga soUhompa. Konyima zosiuyungwa awo tava pura nge nsene asi kuvhura va si didilike siuyungwa oso morwa kapi na si gaverere ponze.

Ame ngani gwana mararo kovanavazinyetu. Nampili ngomu vanavazinyetu va kere ruhepo nye mambo gawo kwa kere gokuzera. Ame ngani rara perwarwa. Awo ngava zoganene ponze, name na lirongere kuzoganena ponze. Ngani ruganesa mbesa, ano pokuza poyirudi ngani gendere mowato. Monomvhura nadinye dosirugana sange, kapi na wekere etuwa.

Morwa ngani lihameke mokuzuvhisa nokudigura nombungakriste, ya vaterere nge ni lironge Rutagalogi. Ame kwa lirongere eraka olyo pokupurakena vanavazinyetu moyirugana yokuzuvhisa ntani komapongo. Vanavazinyetu kwa vaterere nge ni lironge eraka, ntani na haferere elididimikiro lyawo mokuvatera nge.

Mwa za siruwo, tani gwana ko yitumbukira yimwe eyi ya ninkisire nge ni ture po hena marunduruko. Momvhura 1956, apa munazinyetu Nathan Knorr ga ya tu dingwire, ame kwa pere nge  situmbukira sokugendesa sigongi. Kapi na kere noudivi, nye vanavazinyetu va vaterere nge. Tapa ya kara hena sigongi simwe, ano munazinyetu Frederick Franz gokomberewa zetu zomutayi yige ga ya tu dingwire. Ame na lirongerere ko kwamunazinyetu Frederick monkedi omu ga kere nonkareso zokuhara mpo zovantu. Vanavazinyetu kwa hefe apa va mu mwene ana dwara mudwaro gopampo goVafilipino apa ga geve siuyungwa sanavenye.

Na hepere kutura po marunduruko apa va pere nge situmbukira somutareli gonomukunda. Posiruwo sina, ngatu likidire ponze vidiyo The Happiness of the New World Society. Poyiruwo yimwe, yimbumburu ngayi tu donganesa. Ayo kwa here ramba zehina eli ngatu ruganesa makura ngayi kakatere mehina olyo. Nga yi tu pe sili sirugana sosinene mokuzeresa ehina. Kapi ya kere ureru kutura po mawapaiko mokulikida vidiyo, nye ayo ngayi tu hafesa pokumona vantu ava ngava wiza va ya lironge kuhamena mbunga zaJehova.

Varuti woVakatolika ngava tjokatjoka vemepangero va dire kutupulisira kurugana yigongi. Ndi pamwe ngava toona nongenzo dongereka mokudonganesa yigongi yetu apa ngatu yi ruganene pepi nonongereka dawo.  Nye simpe sirugana sa twikilire, wovanzi womonomukunda odo kuna kukarera Jehova.

Momvhura 1959, yipo na gwene mbilive mokudivisa nge asi vana zigida nge ni ka rugane koBeteli. Ayo ya pere nge mpito ni lironge yoyinzi. Pamwe ngava pura nge ni ka dingure yirongo yimwe. Momadinguro ogo, yipo na ka lidivire namunazinyetukadi Janet Dumon, ogu ga kere mutumwa moThailand. Ose ngatu litjangere nombilive ano konyima tatu ya likwara. Ngovalikwali ose kwa rugana kumwe sirugana soUhompa nomvhura 51.

Mosirugana sange, ame kwa dingura yirongo 33. Edeuro eli na gwene poudinkantu lya vatera nge ni vhure kuruganena kumwe novantu wokulisiga-siga. Mokudingura yirongo yokulisiga-siga ya vatera nge unene ni dimburure omu Jehova a tambura vantu navenye.—Yirug. 10:34, 35.

Ayo kwa hafesa nge kuruganena kumwe novanavazinyetu womoFilipine. Ngesi sivaro sovazuvhisi sina ligwederere unene. Name naJanet simpe kuna kurugana moBeteli zomoFilipine mositata saKasoni. Nampili ngomu na kara mosirugana soUhompa sosiruwo nasinye nomvhura dokupitakana po-60, na hepa simpe kutura po marunduruko mokurugana eyi ana harere nge Jehova. Marunduruko aga gana kuhoroka mombunga zaJehova simpe kuna kuhepa kwetu tu tambure eyi ana kutura pura Karunga nokuruganena kumwe novanavazinyetu.

Name namukadange kwa tura po marunduruko tu tambure eyi ana kutupura Jehova ano ose twa gwanena mo ruhafo rorunene. Ntani twa hetekera ko kutura po marunduruko yipo tu ruganene kumwe novanavazinyetu. Ose tuna tokomene kurugana ‘kuliza novantu moyikara yawo nayinye’ yipo tu sikise mo mpango zaJehova.