1, 2. (a) Morwasinke atu karere nosinka? (Tara efano pepenuno 19.) (b) Yisinke natu ka konakona mosirongwa esi?

OSE KUNA kuparuka moyiruwo youdigu. Satana ana handuka unene ntani age “kugendagura ngwendi nyime gokununga, a papare ogu na lipapagwira.” (1 Pet. 5:8; Ehor. 12:17) Yipo nye, novakareli vaKarunga nawo poyiruwo yimwe kukara nosinka. Nampili vakareli vaJehova ngwendi hompa Ndafita poyiruwo yimwe kwa lididimikire “kukora” ndi yinka. (Epis. 13:2) Mupositoli Paurusa nage kwa mu hepekere ‘yinka yonombungakriste.’ (2 Kol. 11:28) Yisinke natu rugana nsene tuna kara nosinka sosinene?

² Guhyetu gemeguru kwa vaterere vakareli vendi vanare ntani age naina simpe kutuvatera tu gwane rufuwo koyinka yetu. Bibeli kutukorangeda asi: “Mu peni yinka yeni nayinye, yeeyi age kumupakera mbili.” (1 Pet. 5:7) Ngapi natu mu pa yinka yetu? Tatu ka konakona nonkedi ne omu natu yirugana oyo: Kupitira mokukanderera, pokuresa Bibeli nokuteda ko, pokuhundira Jehova mpepo zendi zokupongoka ntani pokutantera ko yinka  yetu ogu twa huguvara. Ngomu natu ka konakona nonkedi odo, tara apa no vhura kuwapukurura.

3. Monkedi musinke no “twika HOMPA udigu woge”?

³ Nkedi zokuhova omu natu yi rugana oyo kuna kara pokukanderera kwaJehova nelituromo. Nsene kuna kuligwanekera noukaro ou una kukuretera woma nosinka neguwo, tantera Guhyetu gemeguru omu ono kulizuvha. Ndafita kwa likwamberere kwaJehova pokutanta asi: “Zuvha ekanderero lyange, Karunga.” Megaununo lyoolyo ta tanta hena asi: “Twika HOMPA udigu woge, age nga ku kwafa.” (Epis. 55:1, 22) Nsene ono rugana ko yuma mokukohonona po udigu woge, mevango lyokukara nosinka, kanderera Jehova. Ngapi kukanderera nga kukuvatera yipo yinka yi dire kurorora mutjima goge?—Epis. 94:18, 19.

4. Nsene tuna kara noyinka, morwasinke ya karera nomulyo tu kanderere?

⁴ Resa Vafilipi 4:6, 7. Nsene tu twikira kukanderera nelituromo ntani kutundilira komutjima, Jehova nga limburura makanderero getu. Monkedi musinke? Age ngatu pa mbili zomomutjima yipo tu dire kukara nosinka nowoma nomalizuvho gomadona. Vanavazinyetu wovanzi kwa limonena mbili ozo. Mevango lyokukara nosinka, Karunga kwa va vaterere va gwane mbili zomomutjima ezi za pitakana nondunge dovantu nadinye. Nove kuvhura kugwana mbili ozo. Yipo nye, “mbili zaKarunga,” nga zi kuvatera o lididimikire nkenye udigu. Kuvhura o huguvare metumbwidiro lyaJehova eli asi: “Ame nyame Karunga goge – patupu yokukutjilisa! Ngani ku nkondopeka tani ku kwafa.”—Jes. 41:10.

5. Ngapi omu Nonkango daKarunga nadi ku vatera o gwane mbili zomomutjima?

⁵ Nkedi zauvali omu no gwana mbili zomomutjima kuna kara pokuresa Bibeli nokuteda ko. Morwasinke ya karera nomulyo? Morwa moBibeli kwa kara mo mapukururo aga naga ku vatera omu no nyokera po yinka nomu no yi lididimikira ndi omu no yi sesupika. Nonkango daKarunga kuvhura di ku vatera nokukuhengagwida morwa amo kwa kara mo mapukururo gokutunda koMusiti gwetu. Pokuresa nokuteda ko nkenye ezuva omu no tura pasirugana mapukururo gomoBibeli, nga yi kunkondopeka unene. Jehova kwa yi likidire asi nsene tu resa Nonkango dendi ngatu kara tuna ‘koro unene nokukwata mutjima’ ntani kapi ngagu tu ‘pwaga ndi asi o tukuke.’—Jos. 1:7-9.

6. Uwa musinke no gwanena mo mononkango daJesus?

⁶ MoBibeli, kwa kara mo nonkango daJesus dehengagwido. Nonkango edi nga uyunga nga di retere vantu ehengagwido norufuwo. Vantu wovanzi ngava mu wizire morwa age nga purakene maudigu gawo nokuvakorangeda nokuhengagwida wokudomba nomutjima. (Resa Mateusa 11:28-30.) Age nga pakere sinka vantu pampepo, pamalizuvho nopanyama. (Mar. 6:30-32) Ngwendi moomu Jesus ga tumbwidilire mokuvatera vapositoli ava ngava gendi nendi, nove nga ku vatera. Kapisi hepero o mone Jesus yipo a ku vatere. NgaHompa meguru, Jesus simpe kuna kutwikira kutupakera mbili. Yipo nye, nsene o kara nosinka, age nga ku ‘kwafa’ nokukufira nkenda ‘zi ku kwafe paapa ono zi hepere.’ Jesus kuvhura kukuvatera o lididimikire  yinka yoge ntani nokukupa ehuguvaro nouradi.—Heb. 2:17, 18; 4:16.

7. Uwa musinke no gwanena mo nsene o hundire Karunga a ku pe mpepo zokupongoka?

⁷ Jesus kwa tumbwidilire asi Guhyetu gemeguru nga tu pa mpepo zokupongoka nsene tu mu hundira. (Ruk. 11:10-13) Mpepo zokupongoka kuna kara nkedi zautatu ezi nazi tu vatera tu sesupike yinka yetu. Nonkondo daKarunga ndi mpepo zokupongoka kutuvatera tu tunge po yikara yoyiwa eyi ga kara nayo Karunga gwetu munankondo nadinye ngwendi “eharo nehafo nombili nedidimiko nonkenda nouwa nepuro, nougomoki ntani elipangero.” (Gar. 5:22, 23, NW; Koros. 3:10) Nsene tu yima yiyimwa ndi yikara yompepo ose ngatu kara nelikwatakano lyewa nava wopeke. Ntani nga yi tu vatera tu nyokere po maukaro aga naga vhura kuturetera sinka. Tu tareni omu yiyimwa yompepo nayi vhura kutuvatera.

8-12. Ngapi omu yiyimwa ndi yikara yompepo nayi kuvatera o lididimikire ndi o nyokere po yinka?

⁸ “Eharo nehafo nombili.” Nsene o tekura wopeke nefumadeko, kapi ngo kara nosinka sosinene. Monkedi musinke? Pokuhara wopeke nokuvalikida nkenda nefumadeko ngo nyokera po maukaro aga naga kuninkisa o handuke nokunyegenya nokukara nosinka.—Rom. 12:10.

⁹ ‘Edidimiko nonkenda nouwa.’ Ove ngo kara nelikwatakano lyewa nava wopeke nsene o kwama epukururo eli asi: “Omu likara-kare nombili, tomu lifira-fire nkenda, oku tomu lidongwenene-dongwenene po.” (Efe. 4:32) Mokurugana oyo, ove ngo nyokera po maukaro aga naga kuretera sinka. Ntani ove hena ngo vhura kulididimikira maukaro aga aga horoka morwa kudira kusikilira mo.

¹⁰ ‘Epuro.’ Naina, ose kulipakere sinka unene kuhamena yimaliwa nemona. (Yis. 18:11) Nsene o kara nepuro lyokupama asi Jehova nga ku pakera mbili, ayo nga yi kuvatera o lididimike ndi o nyokere po kulipakera sinka soyininke oyo. Monkedi musinke? Pokukwama epukururo eli ga geve mupositoli Paurusa asi: ‘Yi mu gwanene eyi mwa kara nayo.’ Ntani ga tente asi: “Yeeyi Karunga kwa tanta asi: ‘Ame kapi ngani ku zumba ndi ni ku sige.’ Yipo nye natu uyungira nehuguvaro asi: ‘Hompa yige Mukwafi gwange, yinke nani tjilira. Muntu a tompore nge yinke?’”—Heb. 13:5, 6.

¹¹ ‘Ugomoki nelipangero.’ Gazara omu ngayi kuvatera pokulikida yikara oyo. Yikara oyo ngayi kuvatera o nyokera po kuuyunga ndi kurugana yininke eyi ngayi kuretera sinka ntani ngo gwanena mo uwa pokunyokera po dira kukara “noukenya nehandu lyenene nonomutangu nomatuka noudona.”—Efe. 4:31.

¹² Wa hepa kulinunupika yipo o huguvare ‘kuwoko kononkondo kwaKarunga’ ntani ‘nokumupa yinka yoge nayinye.’ (1 Pet. 5:6, 7) Nsene o linunupika, Karunga nga ku hafera nokukuvatera. (Mika 6:8) Pokunongonona eyi no dira kuvhura kusikisa mo kuliza nononkondo ntani nonondunge doge, ove ngo huguvara mwaKarunga ntani kapi ngo lipakera sinka sosinene.

13. Yisinke ga tembe Jesus pokutanta asi: “Yipo nye nomu dilira kulipakera sinka”?

¹³ MwaMateusa 6:34 (resa), Jesus kwa tente asi: “Yipo nye nomu dilira kulipakera sinka.” Kuvhura yi moneke ngwendi udigu kusikisa mo epukururo olyo. Yisinke ga tembe Jesus pokutanta asi: “Yipo nye nomu dilira kulipakera sinka”? Age kapi ga tembe asi  muntu ogu a karere Karunga kapi a kara nosinka, morwa nampili Ndafita naPaurusa nawo va kere nosinka. Jesus kwa here kuvatera varongwa vendi va kwate egano asi kukara nosinka sa hana hepero ndi kulipakera unene sinka kapi ayi gusa po maudigu. Nkenye ezuva kwa kara nomaudigu galyo, yipo nye Vakriste kapisi va gwederere kosinka sawo pokugazadara kweyi ya horoka nare ndi yokomeho. Ngapi kukwama evyukiso lyaJesus nayi kuvatera o dire kukara nosinka sosinene?

14. Ngwendi Ndafita, yisinke no vhura kurugana nsene ono kara nosinka sononzo doge danare?

¹⁴ Pamwe muntu kukara nosinka morwa mapuko aga ga tulire po nare. Age kuvhura a lizuvhe unzoni wounene kweyi ga rugene, nampili yininke oyo kwa horoka nomvhura dononzi da ka pita. Hompa Ndafita nage kwa lizuvhire asi ana “pwire mo mononzo.” Age kwa tente asi: “Mutjima gwange moudigu guna kara, yiyo nina kuhanda kokukora.” (Epis. 38:3, 4, 8, 18) Moukaro owo, yisinke ga rugene Ndafita? Age kwa tulire ehuguvaro mwaJehova asi ta mu fire nkenda nokumudongwenena po. Nepuro lyokupama age kwa tente asi: “Gerago googu va dongwenena po nonzo dendi.”—Resa Episarome 32:1-3, 5.

15. (a) Morwasinke no dilira kulipakera sinka kweyi yina kukuhorokera ngesi? (b) Yisinke no rugana ko mokusesupika yinka yoge? (Tara kakende “ Omu no sesupika yinka yoge.”)

¹⁵ Pamwe kuvhura o lipakere sinka kweyi yina kukuhorokera ngesi. Pasihonena, Ndafita apa ga tjenge Episarome 55, age kwa kere nowoma wokumudipaga. (Epis. 55:2-5) Nampili ngoso, kapi ga pulisilire sinka si mu ninkise a dire kuhuguvara mwaJehova. Ndafita kwa likwambererere kwaKarunga a mu vatere nye hena mwene ga rugene ko yuma kuhamena ukaro owo. (2 Sam. 15:30-34) Kuvhura tu lirongere ko kosihonena saNdafita. Mevango lyokupulisira sinka si kurorore, rugana ko yuma ntani gava yinka yoge kwaJehova.

16. Ngapi nayi nkondopeka epuro lyoge eyi ali tanta edina lyaKarunga?

¹⁶ Mukriste pamwe kuvhura a lipakere unene sinka kuhamena maudigu gokomeho. Nye kapisi hepero o lipakere sinka kuhamena yininke eyi ono dili kudiva. Morwasinke? Morwa rorunzi yininke kapi ayi horoka moomu atu yi gazarere. Ntani diworoka asi, Karunga kwato udigu ou au mu vhura kukohonona po. Edina lyendi kutanta asi: “Age kuninka yi kare po.” (Ex. 3:14, NW) Yipo nye, kapisi hepero o kare nosinka seyi yokomeho, morwa Karunga kusikisa mo matumbwidiro gendi kovakareli vendi. Kara nehuguvaro asi Karunga kufuta vakareli ava va kara nepuro ntani age kuvhura kuvavatera va lididimikire yinka yawo yanare neyi yantaantani neyi yokomeho.

17, 18. Ngapi kutantera ko ogu wa huguvara ngayi kuvatera o lididimikire yinka yoge?

¹⁷ Nkedi zaune ezi nazi kuvatera o lididimikire yinka, pokutantera ko maudigu goge muntu ogu wa huguvara. Mulikwali goge ndi kaume goge gomunene ndi mukuronambunga kuvhura a ku vatere o kwate egano udigu woge. Bibeli kwa tanta asi: ‘Esivano ndi sinka ngayi ku hakana erago, nye nonkango donongwa tadi ku hafesa.’ (Yis. 12:25) Pokumangurukira mukweni o mu tantere maudigu goge, age nga vhura kukupa ko mapukururo aga ngaga kuvatera. Bibeli kwa tanta asi: “Tambura mapukururo nagenye, moomu o vhulire, makura to ragopa. Nye nsene kapisi yimo, to hudipara.”—Yis. 15:22.

¹⁸ Jehova kuvatera hena vakareli vendi va lididimike yinka yawo kupitira momapongo. Komapongo ove ngo ka kara novapuli vakweni ava ava kupakere sinka ntani kwa hara kukukorangeda. (Heb. 10:24, 25) “Ekwafo” ndi ekorangedo lyangoso ngali kunkondopeka nokukuvatera o lididimikire yinka yoge.—Rom. 1:12.

19. Morwasinke no karera nehuguvaro asi elikwatakano lyoge naKarunga ngali kunkondopeka?

¹⁹ Tu tareni omu mukuronambunga gomoKanada, ga mwene mulyo gokugava yinka yendi kwaJehova. Age mitili, ano sirugana oso nga si mu retere sinka sosinene ntani ga kara nouvera ou au mu retere sinka. Yisinke ya mu vatera ali didimikire? Age kwa tanta asi: “Ame kwa dimburura asi kurugana unene ni nkondopeke elikwatakano lyange naJehova yiyo ayi nkondopeke nge po unene ni lididimikire yinka yange. Vanavazinyetu novakaume vange wovanene kwa vatera nge moyiruwo youdigu. Ame kupwagesera malizuvho gange mukadange. Vakuronambunga vakwetu nomutareli gonombunga kwa vatera nge ni kwate egano ukaro wange. Na gwene hena evatero kosipangero makura na vhulire kutura po marunduruko monkedi omu ani ruganesa siruwo sange yipo ni gwane siruwo sokupwizumuka nokuhufena. Konyima na ya divire eyi nani vhura kurugana moukaro wange. Ano yininke eyi ani dili kuvhura kusikisa mo, ame kuhuguvara Jehova a vatere nge.”

20. (a) Ngapi natu mu pa Karunga yinka yetu? (b) Yisinke ngatu kakonakona mosirongwa sokukwama ko?

²⁰ Mosirongwa esi tuna lirongo mulyo gokupa Karunga yinka yetu kupitira mokukanderera kutundilira komutjima ntani kuresa Bibeli nokuteda ko. Tuna lirongo hena mulyo gokuyima yiyimwa ndi yikara yompepo nokutantera ko ogu twa huguvara maudigu getu ntani nokugwana ekorangedo kovapuli vakwetetu komapongo. Mosirongwa sokukwama ko ngatu ka konakona omu Jehova atu nkondopeke pokututumbwidira asi nga tu futa.—Heb. 11:6.