Wa resa nawa yifo yoyipe yoRuhungu ndi? Tara nsene kuvhura o limburure mapuro gana kukwama ko:

Kuzona musinke ga tembe Jesus apa ga geve epukururo eli lya kara mwaMateusa 18:15-17?

Age kwa tembe komadiro kulizuvha aga nava vhura kukohonona po vantu vavali ava vana hamene mo. Pasihonena, nsene muntu kwa kumbangera ndi kwa rundira mukwawo nye ana nyoka kulitezurura, tava mu gusa mo mombunga.—w16.05, epe. 7.

Yisinke no rugana yipo o gwanene mo uwa mereso lyoBibeli?

Kuvhura o rugane eyi yina kukwama ko: Litura mo nyamoge, papara magano aga no tura pasirugana ntani lipura asi: ‘Ngapi nani ga ruganesa ni vatere wopeke?’; ntani rugana epaparo kweyi ono kuresa.—w16.05, epe. 28-30.

Epuko koVakriste kukugava nampili ngomu va pura mevhumbuko ndi?

Kukara nepuro mevhumbuko kapi ayi gusa po kukora kokufisa muntu. Abirahamu kwa lilire nomfa damukadendi Sara. (Gen. 23:2) Mwaza siruwo eguwo kuyasesupa.—wp16.3, epe. 4.

Memoneko lyaHesekiyeli, yisinke ya fanekesa mugara goyuma yokutjangesa ntani vagara vatano-nagumwe ava va kere noyirwiso?

Awo kwa fanekesa vaengeli ava va lihamekere mezonaguro lyaJerusarema ntani yiwo ngava ka lihameka mezonaguro lyouzuni waSatana poHarumagedoni. Naina, mugara goyuma yokutjangesa kwa fanekesa Jesus Kristusa ogu a tura sidiviso vantu ava ngava ka paruka.—w16.06, epe. 31-32.

Kosinke va zi poperere Bibeli?

Azo kwa zi poperere (1) koyimbumburu morwa kwa zi tjangerere poyipepa noyipapa; (2) komarwaneso govanapolitika novampitisili womaukarelikarunga ava va tokwere kuzizonagura po; ntani (3) kwava va here kutjindja mbudi zamo.—wp16.4, epe. 4-7.

Mononkedi musinke Mukriste na vhura kutura po marunduruko meparu lyendi?

Diva yihepwa yoge ntani nyokera yifutwa ya hana hepero. Didilika omu no ruganesa yimaliwa yoge. Zuguma ndi gava yininke eyi o dili kuruganesa ntani futa makongo goge. Sesupika novili doyirugana yoge ntani gazara ko omu no vhura kulitura mo mokuzuvhisa.—w16.07, epe. 10.

Yisinke za tumbura Bibeli eyi ya kara mulyo kupitakana ngorodo ndi sisiliveli?

MwaJoba 28:12, 15 kwa likida asi unongo wokutunda kwaKarunga kwa pitakana ngorodo ndi sisiliveli. Apa no papara unongo owo, kondja mokulinunupika nokupameka epuro lyoge.—w16.08, epe. 18-19.

Kuvhura munazinyetugara a kare nononzwedu ndi?

Monompo dimwe, vagara va va pulisira kukara nononzwedu edi vana kurura nawa ntani kapi ayi kondere vantu va dire kupurakena mbudi zoUhompa. Nye nampili ngoso, vanavazinyetugara vamwe kudikurura ko. (1 Kol. 8:9) Monompo ndi komavango gamwe vagara woVakriste kapi va va pulisira kukara nononzwedu.—w16.09, epe. 21.

Morwasinke natu yi pulira asi sihorokwa saNdafita naGolyata sa horokere sili?

Musika gwaGolyata kwa ka sikire koyiha yonometa 3 kupitakana musika gomugara gomure gomosiruwo setu. Ndafita yipo sili ga kere, eyi kuyikwatesa ko etjango eli va gwene vasimaguli eli lya tumbura mbara zaNdafita ntani neyi ga uyungire Jesus kumuhamena. Mavango aga va tumbura moBibeli ga liza nomaumbangi ganaina.—wp16.5, epe. 13.

Ngapi unongo wa lisiga nediwo nekwato egano?

Muntu ogu ga kara nediwo kwa diva tupu mauzera ndi nombudi. Ano muntu ogu a kwata egano yininke, kumona omu mauzera ndi nombudi da likwatakana. Nye muntu ogu ga kara nounongo age kuruganesa ediwo nekwato egano lyendi ayi ture pasirugana.—w16.10, epe. 18.